Luki 4

Yezu Makerɛ

(Matu 4.1-11; Maki 1.12, 13)

1Ti Yezu pirɛ la Fa'a Sia la, ze'ele Yɔɔdan lebe na, ti Sia la tari en kɛ̃ kpaahenɛ puan ha, 2ti a ta bɔna bini dabeha pihinaahi, ti Sagena la makɛ en bihɛ. Dabeha pihinaahi wa puan a ka di sɛla, ti dabeha la en ta ba'ahɛ la, ti kom tara en. 3Ti Sagena la yele en yeti, “Fum han sirum dɛna la Yinɛ bia, bo' nuurɛ, ti kuga wa lebege boroboro.” 4#Tii 8.3 Ti Yezu lerege en yeti, “La gulehɛ yeti, ‘Nɛra ka vɔi mɛ la dia ma'a.’ ”

5Ti Sagena la tari en zom zi'an, ta ze'ele bilam pa'alɛ en sɔ'ɔlum la woo en boi timpaberɛ wa zuo la za'a bilam bilam. 6Ti Sagena la yele en yeti, “Fum ti en wan dikɛ bana woo, la ba pahi la suŋa la za'a bo'. Se'ere en sɔi la, ba dikɛ ba bo' la mam, ti mam me dikera bɔ'ɔra se'em ti n bɔta. 7Fum han wan na'ahɛ mam, ba za'a dela fum dinɛ.” 8#Tii 6.13 Ti Yezu lerege en yeti, “La gulehɛ yeti,

‘Na'aha Daana la en de fum Yinɛ la,

gee tuna bɔ'ɔra eŋa ma'a.’ ”

9Ti Sagena la tari Yezu kiŋɛ Yerusalɛm, tari en ta zom pu'uhegɔ yire la zuin zuin ha, yele en yeti, “Fum han sirum dɛna la Yinɛ bia, ze'ele ka'lam lobe fum mɛŋa bahɛ tiŋa ha, 10#Yoo 91.11 se'ere en sɔi la, la gulehɛ yeti,

‘Yinɛ wan bo' a suŋereba nuurɛ, fum zuo,

ti ba te'ele fum,’

11ti

‘Ba wan te'ele fum la ba nu'uhi,

ti fum na'arɛ kan ŋmɛ kugere.’ ”

12 # Tii 6.16 Ti Yezu lerege en yeti, “La tɔgɛ biŋe yeti, ‘Da makɛ Daana la en de fum Yinɛ la bihɛ.’ ” 13Sagena la n ba'ahɛ mageha la woo la, a bahɛ en mɛ, gee gura sansɛka ti a wan le nyɛ fole.

Yezu pɔhɛ tuuma Galilii

(Matu 4.12-17; Maki 1.14, 15)

14Ti Yezu pirɛ la Fa'a Sia paŋa, lebe Galilii, ti a yele to'e tinse'ehi en kaaɛ la za'a. 15Ti Yezu pɔhɛ pa'alegɔ ba zamehegɔ yiya la puan, ti nɛra woo pɛgera en.

Ba zagehɛ Yezu Nazareti

(Matu 13.53-58; Maki 6.1-6)

16Yezu en lebe Nazareti, zi'an ti a zo'e na la, ta kiŋɛ zamehegɔ yire la puan vo'ohego daarɛ, wuu en ni pun ita se'em la. Nyaa ihege ze'ele ti a kãalɛ, 17ti ba yehe Azaaya gɔŋɔ bo' en. Ti a yirege gɔŋɔ la nyɛ ze'sɛka n gulehɛ yeti,

18“Daana Sia la en boi la mam,

Se'ere en sɔi la, a sɔ mam mɛ

ti n tari faarɛ yelehum wa na bo' naheduma.

A tum mam na ti n wa'am na muulɛ fai yɛla bo' sɛba en boi bobere puan,

gee bihɛ ti fɔɔhi nini pigehɛ

gee bahɛ ti sɛba n boi mugehego puan kiŋɛ fai.

19Ti n muulɛ Daana la nimbɔ'zɔrɛ yuunɛ la.”

20Gee nyaa kilum gɔŋɔ la, dikɛ bo' bituneŋa la, gee lebe zi'ire. Ti nɛra woo n boi zamehegɔ yire la puan la nini kɔ'ɔm kpa' bihera en ziki. 21Ti a pɔhɛ yele ba yeti, “Zina, gɔŋɔ wa zɛ'kana wa'am yelemɛŋerɛ na ya tuban.” 22Ti nɛra woo pɛgera en, gee ti la iŋɛ ba pakerɛ la zu'uhegɔ yele sɛ'a n ze'eti a nuuren na la. Ti ba yɛta yeti, “Dagi Yosefe dayua la n bala?” 23Ti Yezu yele ba yeti, “Mam ka bu'uri, ti ya wan dikɛ yetɔgum biŋere se'ere n yeti, ‘Tibera, tibɛ fum mɛŋa yia’ la, yele mam. Ya me wan yele mam yeti, ‘Tum ka'lam me, fum mɛŋa tiŋa wa puan, daalehum ti tu wum ti fum tum si Kapɛnum la.’ ” 24#Yɔn 4.44 Ti Yezu yele ba yeti, “Yelemɛŋerɛ ti n yɛta wa, ti nɔtɔgeha ka boi' ti a mɛŋa tiŋa nɛreba to'e en. 25#1 Nad 17.1 De yelemɛŋerɛ la dela, pokɔpa kekeko yuum boi Izirale tiŋa puan mɛ Elia saŋa la, ti saazuo yuum yu', yuuma atã la ŋmarehi siyoobe la. Ti kompɛɛlega yuum to'e tiŋa la za'a la. 26Gee Yinɛ yuum ka bahɛ ti Elia kiŋɛ ba se'em zi'an, han dagena pokuurɛ se'ere n boi Zarefati tiŋa n boi Sidɔn tiŋa la. 27#2 Nad 5.1-14 Insageŋɔ duma me yuum zo'e mɛ Izirale tiŋa wa puan nɔtɔgeha Elisa saŋa la, gee ba ayima me yuum ka nyɛ tibegɔ han dagena Siriya tiŋa buraa Neeman ma'a.” 28Ban wum ŋwana la, ba woo n boi zamehegɔ yire la puan la suya nyiie mɛ. 29Ti ba vaaɛ ihege sa'ɛ en, tari en yehe tiŋa la yiŋa ha, tari en ta paaɛ zoore la ti ba tiŋa mɛ yaga de zuo la zuleŋa ha, ti ba za'ɛ en bahɛ tiŋa ha. 30Gee a lilum la ba puan yehe kiŋɛ.

Buraa en tari sɛfi'iha

(Maki 1.21-28)

31Ti Yezu sige Kapɛnum n boi Galilii sɔ'ɔlum puan la, ta pa'ala nɛreba vo'ohego daarɛ la. 32#Mat 7.28-29 Ti la iŋɛ nɛreba la pakerɛ, la a pa'alegɔ la, se'ere en sɔi la, a pa'ali mɛ ti paŋa bɔna bini. 33Zamehegɔ yire la puan, buraa n tari sɛfi'iha boi bini, kaahɛ tagi tagi bahɛ na yeti, 34“Bahɛ tu bããlam, beni tu fum tara la tɔ, Nazareti buraa Yezu wa? Fum wa'am na ti fum sagum tu mɛ? Mam mi' fum n de se'em, fum dela Yinɛ Fa'a nɛra.” 35Ti Yezu tahɛ en yeti, “Go'e suram gee yehe a puan na.” Ti sɛfi'iha la fɔbɛ buraa wa tiŋa nɛreba la nɛŋan, gee nyaa yehe na, gee ka pɔgelum buraa la. 36Ti la iŋɛ nɛra woo pakerɛ, ti ba yɛta taaba yeti, “Beni yele ŋwana? Kpe'eŋo la paŋa ti a tara tahɛ sɛfi'iha ti si yɛha!” 37Ti ba pɔhɛ tɔgera a yele tiŋa la zi'an woo puan.

Simɔn dɛɛmpɔka tibegɔ

(Matu 8.14-17; Maki 1.29-39)

38Yezu n bahɛ zamehegɔ yire la, a kɛ̃ la Simɔn yire. Bala ma'a ti Simɔn dɛɛmpɔka n boi yire la puan ti ka iŋa tulegɛ, ti ba tɔgɛ ka yele bo' Yezu. 39Ti Yezu paaɛ ze'ele ka zuin, tahɛ intulegerɛ la, ti bã'a la bahɛ pɔka la. Ti ka ihege bilam bilam bo' ba ko'om.

40Zaanuurɛ n ta ma'ara la, ti sɛba woo n tari ba nɛreba ti ba bɛ̃'ɛra bã'ahi yima yima la, tari ba kina la Yezu zi'an na, ti a tara a nu'uhi pagela ba ayima ayima zuo, tibera ba. 41Ti kulekpa'bɛ'ɛhi me zɛ'ɛta ba zo'e zo'e puan yɛhera na gee tahera yeti, “Fum n de Yinɛ Dayua la.” Gee ti a ni tahɛ ba, ka bahera ti ba tɔgera, se'ere n sɔi la kulekpa'bɛ'ɛhi la mi' ti Yezu n de Kiresta la.

Yezu tɔgɛ zamehegɔ yiya puan

(Maki 1.35-39)

42Ti beere ta yilegɛ, ti a bahɛ bilam gee kiŋɛ zi'an ti nɛreba ka bɔna bini. Ti nɛrekuuŋɔ ɛɛra en, ban paaɛ en la, ba boti ba gu' en mɛ ti a da bahɛ ba. 43Gee Yezu yele ba yeti, “La dela n muulɛ faarɛ yelehum la n de Yinɛ sɔ'ɔlum yɛla la bo' tihi sise'ehi me. Se'ere n sɔi la ba tum mam la bala zuo na.” 44Bala ti a dɔla muula yelehum la Yudiya zamehegɔ yiya la puan.

Currently Selected:

Luki 4: GBTP

Highlight

Copy