Luki 24

Yezu vo'ore

(Matu 28.1-10; Maki 16.1-8; Yɔn 20.1-10)

1Gee dabeha ayopɔi pɔhega daarɛ, bulika yu'uŋɔ yu'uŋɔ, ti pɔgehi wa ihege kiŋɛ yɔɔ la zi'an, tara ba nyuuŋo suŋɔ kaam la ti ba maalɛ la. 2Ba paaɛ nyɛ ti yɔkugere la bilege mɛ gã'a kinkɛleŋa ha. 3Gee ban kɛ̃ la, ba ka nyɛ Daana Yezu iŋa la. 4Ti ba yari zɛ'a yɛli la yele dina wa, ba yeti ba bihɛ ti buraahi siyi en bala zɛ'a ba zi'an, ti si futo nyagera. 5Ti dabeem kɛ̃ pɔgehi la ti si suure si zuto tiŋa, gee buraahi wa yele ba yeti, “Ŋwani ti ya ɛɛra vɔpa ki'induma puan?. 6A ka boi ka'lam a ihege mɛ.Tɛri ya en daa yele ya se'em en daa nan boi Galilii la, 7#Mat 17.21; 17.22-23; 20.18-19; Mak 8.31; 10.33-34; Luk 9.22; 18.31-33 ti ba wan dikɛ Asaala Dayua la iŋɛ be'emduma nu'uhen, ti ba ku en, gee dabeha atã daarɛ, a wan vo'e.” 8Ti ba nyaa tiɛ Yezu tɔgebuna wa, 9ti ban ze'ele yɔɔ la puan lebe na la, ba yele a zahereba pia la ayima la mɛ la bana la za'a sɛla woo en iŋɛ. 10La dela Mɛɛri Magedalin, Yowana, Mɛɛri en de Yemesi ma la, la pɔgese'ehi woo en doohe ba na la en yele Yezu tuntuneba wa. 11Gee yeledina wa ani mɛ wuu solene la bo' tuntuneba la, ti ba ka sakɛ bo' ba. 12Gee Pita ihege mɛ guu zua yɛ'a yɔɔ la puan, ta paaɛ teke veehe bihɛ ku puan ha, nyɛ ti tanpeelesunɛ la gã' de ma'a, ti a lebe kula, ti la iŋɛ en pakerɛ la sɛla en iŋɛ la.

Emayose sore zuo

(Maki 16.12-13)

13Daan dinɛ daarɛ mɛa, ti Yezu zahereba bayi' yɛ'a timbila ti ba yi'ira Emayose, en de wuu miila ayopɔi fum ze'ele Yerusalɛm yɛ'a bini. 14Ti ba kina gee suhera la taaba yele se'ere en iŋɛ la. 15Ban tɔgera gee sɔheri la, ti Yezu en bala wa'am na paaɛ ba, naaɛ la ba kina, 16gee la pi' la ba nini ti ba da baŋɛ en. 17Ti Yezu tɔgɛ bo' ba yeti, Yamam kini gee suhera la beni la taaba wa? Ti ba ze'ele bããlam la nimbu'ɔ. 18Ti ba ayima yu'urɛ en yi'iri Kelopase la lebehe en yeti, “Fum ma'a en de saana Yerusalɛm wa ka mina yelesɛ'a en iŋɛ ka'lam dabeha ana wa puan?” 19Ti a soke ba yeti, “Beni yɛla?” Ti ba lerege en yeti, “Yezu en yehe Nazareti na la, dɛna nɔtɔgeha, pirɛ la paŋa, la yelehum la Yinɛ la nɛreba woo nɛŋan la, 20ti malema kiinduma, la yizuto kiinduma nyɔkɛ en tihɛ ti ba gakɛ en ti la dela a ki, ti ba kpa' en la. 21Gee tumam me daa biheri la eŋa ti eŋa en de se'em en wan yɔ to'e Izirale bahɛ. Yele ana woo pooren, zina dela dabeha atã, ti yele ana wa iŋɛ. 22Sɛla en le pa'ahɛ dela, pɔgehi sise'ehi en pa'ahɛ tumam puan en maam tumam nɔya. Si kiŋɛ ni la yɔɔ la puan zina bulika ma'aherɛ ma'aherɛ, 23ka nyɛ a iŋa la, gee lebe na yele tumam ti bamam nyɛ la suŋereba, ti ba yele bamam yeti, a vo'e mɛ. 24Ti tu puan basɛba kiŋɛ yɔɔ la puan lebe na yele tu yeti la kɔ'ɔm dɛna la pɔgehi la en yele se'em la, gee bamam ka nyɛ en.” 25Ti a yele ba yeti, “Ya gerege mɛ, ti ya bɔkerɛ me tɔna ti ya nam sɛla woo ti nɔtɔgeheba la muulɛ ti la wan iŋɛ la. 26La dagi la de sore ti Kiresta la namehɛ yele ana woo puan gee nyaa kɛ̃ a suŋa la puan?” 27Gee nyaa pɔhɛ Moose, doohe nɔtɔgeheba la woo puan pa'alɛ ba eŋa yele en de se'em bɔna gulehegɔ la puan.

28Ban wa'am na pɔra timbila la puan ti ba yɛ'a la, ti a kina tɔla ba nɛŋa wuu a ye' tɔla mɛ la. 29Ti ba belum en ninmu'urɛ yeti, “Yee la tu ka'lam, gee la ye' la zaanuurɛ n bala, ti yinɛ me yɛ'a lua.” Bala ti a yee bilam la ba. 30En ta zi'a la ba ti ba di la, ti a dikɛ boroboro purɛ sum bahɛ de zuo, gee fike dikɛ bo' ba. 31Bilam ti ba nini pikɛ, ti ba nyaa baŋɛ en, ti a me mɛlum ba nɛŋan. 32Ti ba yɛta taaba yeti, “Bihɛ, tu paleŋa ka ɛgeri ni mɛ, en tɔgeri ni la tɔ sore la zuo la, se'em ma'a ti a lakeri ni gɔŋɔ la yelehum la pa'ali ni tu la?” 33Gogo kaareŋa kaŋa mɛa puan ti ba ihege lebe Yerusalɛm, ta paaɛ nyɛ zahereba pia la ayima la, ti ba lagehɛ taaba. 34Ba tɔgeri me yeti, “Daana la sirum vo'e mɛ, a niiɛ a mɛŋa bo' Simɔn mɛ.”

35Ti ba nyaa yele ba sɛla en iŋɛ sore la zuo la, la en niiɛ a mɛŋa bo' bamam se'em boroboro figehego saŋa la.

Yezu niiɛ a mɛŋa pa'alɛ a zahereba

(Matu 28.19-20; Maki 16.14-18; Yɔn 20.19-23; Tuuma 1.6-8)

36Ban boi bini tɔgera ŋwana la, ti Yezu en bala zɛ'a la ba, gee yele ba yeti, “Suma'ahum bɔna la ya.” 37Ti ba gɛ̃rɛ zɛ'a, ti dabeem sãɛ ba, ti ba ti'iha ti ba nyɛti la kukɔ. 38Ti a yele ba yeti, “Ŋwani ti dabeem sãɛ ya bala, ŋwani ti bumbu'um bɔna ya suya puan bala? 39Bihɛ ya n nu'uhi la n nama, la ya baŋɛ ti la dela mam en bala. Kalum ya mam bihɛ, se'ere en sɔi la, kukɔ ka tari inganɛ la kɔba wuu yan nyɛ mam ti en tari se'em wa.” 40En yele ŋwana ba'ahɛ la, a pa'alɛ ba la a nu'uhi la a nama la. 41La ba nyaa pun nyɛɛna la, ba kelum ka sakera, gee me bɔ'ɔra. Ti a yele ba yeti, “Ya tari sɛla ka'lam ti n di?” 42Ti ba bo' en ziho fiiwa ti ba sɛ', 43ti a to'e bu, ze'ele ba nɛŋan obe.

44Ti a yele ba yeti, Mam yelehum n ŋwana ti n daa tɔgɛ bo' ya, mam daa nan boi la ya la, yeti, “Sɛla woo ti ba gulehɛ doohe mam yu'urɛ puan, Moose nɔze'elego la, la nɔtɔgeheba la, la yuuma puan la za'a dela la wa'am na tum.” 45Ti a nyaa yu'ɛ ba puti'irɛ ti ba bɔkɛ gɔnɔ la yɛla. 46Ti a le yele ba yeti, “La pun gulehɛ mɛ ti, Kiresta la wan namehɛ gee vo'e a kum la puan dabeha atã, 47ti a yu'urɛ puan ti ba wan muula teere en bo'ori , la be'em sugeri dia, pɔhera Yerusalɛm, la tihi za'a puan. 48Yamam en de aze'nyɛduma yele ana wa woo puan. 49#Tuum 1.4 Nyaa bihɛ ya, n yeti n tum la mam Sɔ la n biŋe nuurɛ ti a iŋɛ se'em la. Bala, boni ya tinkana wa puan gura ti ba ta pirɛ ya la saazuo paŋa.”

Yezu zom saazuo

(Maki 16.19-20; Tuuma 1.9-11)

50 # Tuum 1.9-11 Ti Yezu nyaa tari ba yehe ti ba kiŋɛ zaaɛ ta paaɛ Bɛtani tiŋa, ti a zɛkɛ a nu'uhi saazuo, purɛ sum bahɛ ba zuo. 51En boi bini puta sum baha ba zuo la, ba nyɛ ti a zɛkera la saazuo, nyaa zɔna zuin ha ta kɛ̃ ha. 52Ti ba na'ahɛ en, gee tulege lebe Yerusalɛm na la nyɛɛmkãtɛ. 53Ti ba naaɛ taaba bɔna pu'uhegɔ yire la puan pɛgera Yinɛ saŋa woo.

Currently Selected:

Luki 24: GBTP

Highlight

Copy