Yɔn PƆHEGA
PƆHEGA
Yɔn en gulehɛ Yezu yelehum la se'em la, kɔ'ɔm pa'ala la Yezu en de Yinɛ Yelehum la en ka tari ba'ahegɔ la, “Lebege asaala, wa'am na bɔna la tɔ.” Wuu gɔŋɔ wa mɛŋa en yele se'em yeti, Yelehum buna wa gulehɛ biŋe mɛ, ti sɛba en wan kãalɛ ku la, wan nam ti, Yezu en de faara sɛka ti Yinɛ yuum biŋe nuurɛ ti a wan wa'am na la, eŋa en de Yinɛ Dayua la. Ti sɛba en nam en wan tara vom (Yɔn 20.31).
Gulehegɔ la en diŋɛ nɛŋa dikɛ Yezu pa'alɛ ti iŋɛ en de Yinɛ Yelehum la en ka tari ba'ahegɔ la, gɔŋɔ wa yia gulehegɔ la pa'ali la daalehum sɛ'a en pa'alɛ ti Yezu en de Faara la ti Yinɛ biŋe nuurɛ ti a wan wa'am na la, dɛna Yinɛ dayua la. Yɛla dole yele ana wa poore mɛ pa'ala daalehum la vuurɛ en de sɛla. Gɔŋɔ ze'kana wa tari nɛreba basɛba en wa'am na nam Yezu, lebege a zahereba, gee ti sɛba me ka to'e en gee zagehɛ ti ba kan nam en. Lagehegɔ pia la butã paara pia la buyopɔi la (13-17) tari la Yezu en boi la a zahereba la yuue se'em, la ban daa boi la taaba se'em, ta paaɛ yu'uŋɔ la ti ba nyɔkɛ en la. La a kpemehego, la en daa maahum ba se'em zaanuurɛ se'ere ti ba wan kpa' en la puan la. Gɔŋɔ wa ze' kana wa ba'ahegɔ la puan la, ba'ahɛ mɛ la Yezu nyɔkerɛ, la ban tari en kiŋɛ naba yire la, la a kpa'a, la a ihegere, la en niiɛ a mɛŋa pa'alɛ a zahereba la, en daa ta vo'e a kum la puan la.
Pɔka la en tum kabohi ti ba nyɔkɛ la yele en boi (Yɔn 8.1-11), yia yia gulehegɔ zo'e zo'e buuɛ gilege yele dinɛ la mɛ, ti yia yia gulehegɔ la tuseto me ka gulehɛ yele dinɛ pa'ahɛ, ti tuseto me gulehɛ de pa'ahɛ luga a sɛ'a puan.
Yɔn Ze'kana wa pa'ali yeti, vom en ka tari ba'ahegɔ bo'olum la en ze'eti Kiresta zi'an na la, dela bo'olum sebo en pɔheri nananawa, gee me dikɛ bɔ'ɔra la sɛba en nam bo' Yezu, ti eŋa en de sore, yelemɛŋerɛ, la nyɔvore la. Ze'sɛka me en le tara yele sabelɛ dela, Yɔn Ze'kana wa tari lɔge seto ti tu nyɛta daare woo tara mageha tu daare woo vom puan yɛla, ti la pa'alɛ tu sia puan yɛla. Lɔgerɔ la tuseto dela, ko'om, boroboro, niihum, dunkiina la a duhi, la tiihi va'am la si wala.
Yele sɛ'a en boi gɔŋɔ wa puan
Pɔhega 1.1-18
Yɔn ko'sɔɔra la Yezu yia zahereba la 1.19-51
Yezu en pɔhɛ a tuuma nɛreba puan 2.1—12.50
Yezu ba'ahegɔ dabeha en daa ani se'em, Yerusalɛm puan, la yiŋa 13.1—19.42
Daana la ihegere, la en niiɛ a mɛŋa 20.1-31
Ka'ahegɔ: Yezu en le niiɛ a mɛŋa Galilii 21.1-25
Currently Selected:
Yɔn PƆHEGA: GBTP
Highlight
Share
Copy
Want to have your highlights saved across all your devices? Sign up or sign in
Gurenɛ New Testament © The Bible Society of Ghana, 2020.