Yɔn 18

Ba nyɔkɛ Yezu

(Matu 26.47-56; Maki 14.43-50; Luki 22.47-53)

1Yezu n tɔgɛ yele ana wa ba'ahɛ la, a yehe mɛ la a zahereba la yakɛ Kidiron bɔka la n zoti dɔla bɔ'seko puan ti va'am pika bɔna bini la, ti eŋa la a zahereba la ta kɛ̃ de puan. 2Yudasi se'em n pun koohe Yezu la mi' zi'an wa puan mɛ, se'ere n sɔi la, Yezu tabeli kina bini mɛ la a zahereba la za'a. 3Bala ti Yudasi wa doohe la pɛntiireba tansugere, la gureba ti malema kiinduma la, la Farasii duma la tum la, ti ba wa'am va'am la puan na, la butolelehe, bugum, la zaba lɔgerɔ. 4Ti Yezu n pun mina sɛla woo n yeti la iŋɛ la, tole nɛŋan na ze'ele, soke ba yeti, “Ya eere la ani?” 5Ti ba lerege yeti, “ Yezu, Nazareti buraa la.” Ti Yezu yele ba yeti, “Mam ŋwana.” Ti Yudasi se'em n koohe en la, ze' mɛ la ba. 6Yezu n yele ba yeti, “Mam n ŋwana la,” ba za'a gɛ̃rɛ mɛ apovura ta lu ha turururu. 7Ti Yezu le soke ba yeti, “Ani ti ya ɛɛra?” Ti ba yeti, “Yezu, Nazareti buraa la.” 8Ti Yezu lerege ba yeti, “Mam yele ya yeti, mam n ŋwana. Bala, ya han ɛɛra la mam, bahɛ ya ti nɛreba wa kiŋɛ.” 9Dina wa dela la bahɛ ti a yetɔge sebo n yeti, “N ka bɔregɛ sɛba ti fum dikɛ bo' mam la la ayima me, wa'an asira na.” 10Ti Simɔn Pita, se'em n tari su'a a zi'an la, fooe ka na, kɛ̃' malema kiima ayima yameŋa zuɔ tuberɛ fike. Yameŋa wa yu'urɛ yi'ire la Malekus. 11#Mat 26.39; Mak 14.36; Luk 22.42 Ti Yezu yele Pita yeti, “Dikɛ fum su'a la lebehe su' ka su'a zi'an. N dagi la n nyu mɛlehegɔ wanɛ se'ere puan ti mam Sɔ dikɛ bo' mam la?”

Yezu ze' malema kiima nɛŋan.

12Ŋwana ti pɛntiireba la, la ba kpɛ'ɛnduma, la Yuuduma gureba la nyaa yɔkɛ Yezu lu' en. 13Yia, ba tari en kiŋɛ la Anase n de Kaifase dɛɛma la nɛŋan. Kaifase wa dɛna la malema kiima yuum dinɛ puan. 14#Yɔn 11.49-50 Kaifase kana n bala tabelɛ ka'am Yuuduma la yeti, La ani suŋa ti nɛre yinɛ ki bo' nɛrekuuŋɔ la.

Pita ki'ihegɔ

(Matu 26.69-70; Maki 14.66-68; Luki 22.55-57)

15Ti Simɔn Pita, la Yezu zahereba la ayima, dɔla Yezu poore. Yezu zahera ayima ti malema kiima la mina en, eŋa en doohe la Yezu ta kɛ̃ malema Kiima wa zinzaka la puan, 16gee ti Pita zɛ'a yiŋa, nayaŋa la nuuren. Ti Yezu zahera se'em ti malema kiima la mina la, yehe na tɔgɛ bo' pɔka n guri nayaŋa la, gee tari Pita kɛ̃ zinzaka la puan na. 17Ti pɔka la soke Pita yeti, “Fum dagi Yezu zahereba la ayima, bii fum de mɛ?” Ti Pita yeti, “Mam dagi ba puan.” 18Yamehi la la gureba la dikɛ la bugum saana na tuurɛ bugum, se'ere n sɔi la la ma'arɛ mɛ, ti nɛra woo nyaa kaaɛ bugum la ɔɔha. Ti Pita me zɛ'a la ba ɔɔha.

Malema kiima sokere Yezu

(Matu 26.59-66; Maki 14.55-64; Luki 22.66-71)

19Ti malema kiima la nyaa soke Yezu a zahereba la, la a pa'alegɔ la yele. 20Ti Yezu lerege en yeti, “Mam tɔgera la peelumen bɔ'ɔra timpaberɛ wa zuo nɛreba woo. Saŋa woo, mam ni bɔna zamehegɔ yiya, la pu'uhegɔ yiya puan mɛ, zi'an ti Yuuduma za'a ni lagehɛ taaba la. Mam ka sugɛ yele se'ere. 21Wani ti fum sɔkera mam? Soke sɛba n wum sɛla ti n yele ba la. Ba mi' mam n yele ba sɛla.” 22Yezu n yele ŋwana wa la, ti pu'uhegɔ yire gureba la ayima n ze' lɛm en, lobe Yezu pɛka gee yeti, “Fum lebehe la malema kiima la bala?” 23Ti Yezu lerege en yeti, “Mam han tɔgɛ tuue mɛ, pa'alɛ mam n tuure la, gee n han tɔgɛ la tuuntɔɔ, beni zuo ti fum ŋmɛ' mam?” 24Ti Anase bahɛ ti ba bobe Yezu bala, tari en ta bo' Kaifase, malema kiima la.

Pita le ki'ihɛ Yezu

(Matu 26.71-75; Maki 14.69-72; Luki 22.58-62)

25Ti Pita zɛ'a bugum la zi'an ɔɔha, ti ba soke en yeti, “Fum me dagi Yezu zahereba la ayima bii fum de' mɛ?” Ti Pita ki'ihɛ gee yeti, “Aayi, mam dagi.” 26Ti malema kiima la yameŋa kayima, se'em suuɔ ti Pita kɛ̃' a tuberɛ fike la, soke Pita yeti, “Mam ka nyɛ ni hɔ va'am la puan la en?” 27Ti Pita le ki'ihɛ. Ti saŋa kaŋa mɛa puan la, ti nɔdɔɔ kaahɛ.

Yezu paaɛ Palete zi'an

(Matu 27.1-2, 11-14; Maki 15.1-5; Luki 23.1-5)

28Ti ba tari Yezu ze'ele Kaifase zi'an, kiŋɛ Palete yikãtɛ la puan. Bala ma'a ti la dela bulika yu'uŋɔ yu'uŋɔ. Ban paaɛ la, Yuuduma mɛhi ka kɛ̃ naba yire la puan, ti ba da galum ba mɛhi, gee la ba ta'am di azɔɛtole de'eŋo la. 29Bala ti Palete yehe paaɛ ba, soke ba yeti, “Beni tuure ti ya tara la buraa wa?” 30Ti ba lerege en yeti, “Buraa wa han dagi ni tuunfi'iha daana, tu kan tari ni ka na bo' hɔ.” 31Ti Palete yele ba yeti, “Ya mɛhi tari en kiŋɛ, ta gakɛ en ya mɛhi, doohe ya ze'elego la puan.” Ti Yuuduma wa lebehe yeti, “Tumam ka tari sore ti tu ku nɛra.” 32#Yɔn 3.14; 12.32 (Dina wa iŋɛ ti la bahɛ ti Yezu n pa'alɛ eŋa wan ta ki kum sebo la, wa'am asira na.’)

33Ti Palete le kɛ̃ a yire la puan ha, gee yi' Yezu paaɛ a nɛŋan na soke en yeti, “Fum dela Yuuduma wa naba?” 34Ti Yezu lerege en yeti, “Fum soke dina wa la fum mɛa bii, nɛreba en yele fum mam yele?” 35Ti Palete lebehe en yeti, “Mam dagi Yuuduma nɛra, bii n de mɛ? Fum mɛŋa tiŋa wa nɛreba, la malema kiinduma n tari fum na bo' mam. Fum iŋɛ la bem?” 36Ti Yezu lerege en yeti, “Mam sɔ'ɔlum la ka boi timpaberɛ wa zuo. Mam sɔ'ɔlum han boi ni timpaberɛ wa zuo, mam dɔleba wan zaberɛ ni ti Yuuduma wa kan nyɔkɛ ni mam na bo' fum. Gee yelemɛŋerɛ la dela mam sɔ'ɔlum la ka boi timpaberɛ wa zuo.” 37Ti Palete soke en yeti, “Bala, Fum dela naba?” Ti Yezu lerege en yeti, “Fum yele ya ti mam dela naba. Yele dina wa zuo ti ba dɔgɛ mam, yele dina wa zuo ti mam sige timpaberɛ wa zuo na, ti n tɔgɛ yelemɛŋerɛ la yele. Se'em woo n de yelemɛŋerɛ la nɛra, kelehe mam yetɔgum mɛ.” 38Ti Palete soke en yeti, “Beni n de yelemɛŋerɛ?”

Ba bo' sore ti ba ku Yezu

(Matu 27.15-31; Maki 15.6-20; Luki 23.13-25)

Palete n tɔgɛ ŋwana ba'ahɛ la, a le yehe la Yuuduma la zi'an na, yele ba yeti, “Mam ka nyɛ nɛra la tuure. 39Gee ya tari la ya malema kayima, ti n ni yehe nɛra ayima paka deen bo' ya azɔɛtole saŋa woo. Bala, ya boti n yehe Yuuduma naba wa bahɛ bo' ya?” 40Ti Yuuduma la za'a kaahɛ bahɛ na yeti, “Aayi, dagi burakana wa, yehe Barabase bahɛ!” Barabase fãari mɛ.

Currently Selected:

Yɔn 18: GBTP

Highlight

Copy