Yɔn 15

Yezu n de Tile

1“Mam de yelemɛŋerɛ sinsabega, ti mam Sɔ bihera sinsabega la. 2A ŋmati yile-se'ere woo n naaɛ la mam gee ka wuna baha mɛ. Gee yɔreha yile-se'ere woo n naaɛ la mam gee wuna wala ti de wam zo'e zo'e. 3Yamam pun diŋɛ ana la filam, doohe la yelehum la ti n tɔgɛ bo' ya la. 4Boi ya la mam, ti mam me bɔna la ya. Wuu yile n kan ta'am wam wala de ma'a se'em, han dagena de naaɛ mɛ la ta'aŋa la, bala mɛa ti yamam me kan ta'am wam, han dagena ya naaɛ mɛ la mam. 5Mam n de ta'aŋa la, ti yamam dɛna yila. Sɛba n naaɛ la mam, ti mam me naaɛ la ba la wani zɔ'ɔra mɛ, se'ere zuo, la han dagena la mam puan, ya kan ta'am iŋɛ sɛla. 6Se'em woo n ka naaɛ la mam, ba lobere en baha mɛ wuu yile ti ba ŋmaaɛ bahɛ ti a ku'e se'em la. Yile aŋa, ba ni lagehɛ ba mɛ bahɛ bugum puan ti ba di. 7Ya han bɔna la mam, ti n yelehum la bɔna la ya, soke ya yan boti sɛla, gee la wan tum bo' ya. 8Mam Sɔ pɛka boi la, ya wam zo'e zo'e. Ŋwana ti ya wan dɛna mam zahereba. 9Wuu Sɔ la n nɔŋɛ mam se'em la, bala mɛa ti mam nɔŋɛ ya. Boni ya n nɔŋerɛ la puan. 10Ya han gurɛ mam pa'alegɔ duma la kankaŋi, ya wan bɔna n nɔŋerɛ la puan, wuu mam n gurɛ n Sɔ pa'alegɔ duma la se'em kankaŋi la, bɔna a nɔŋerɛ la puan se'em la. 11N yeti ya yele ana wa woo, ti mam nyɛɛŋɔ wan bɔna la yamam puan, ti ya nyɛɛma pirɛ.

12 # Yɔn 13.34; 15.17; 1 Yɔn 3.23; 2 Yɔn 5 “Mam Pa'alegɔ n ŋwana. Ti ya nɔŋɛ taaba, wuu mam n nɔŋɛ ya se'em la. 13Se'em ka tari nɔŋerɛ n karegɛ gana dina wa, ti nɛra dikɛ a vom bo' a zɔduma. 14Yamam dela mam zɔduma, ya han ita mam bo' ya nuurɛ ti ya ita sɛla la. 15Mam ka yi'iri ya n yamehi yɛ'ɛha, se'ere n sɔi la, yameŋa ka mi' ka daana n iti sɛla. Gee mam yi'iri ya la n zɔduma se'ere n sɔi la, mam bahɛ ti ya mina sɛla woo ti mam wum n Sɔ la zi'an mɛ. 16Yamam ka looe mam, gee mam n looe ya, gee tum ya ti ya kiŋɛ ta wam wala. Ya wam wala sɛ'a n kan pu'ɛ. Bala ti Sɔ la wan bo' ya sɛla woo ti ya soke en mam yu'urɛ puan. 17N bo'ori ya pa'alegɔ kuna, ti ya nɔŋɛ la taaba.

Nɛreba wan yaaɛ ya.

18“Timpaberɛ wa zuo han yaaɛ ya, mini ya ti ka yaaɛ la mam yia, gee nyaa yaaɛ yamam. 19Ya han deni timpaberɛ wa zuo dinɛ, timpaberɛ wa zuo wan nɔŋɛ ya wuu a dinɛ la. Gee yan dagi timpaberɛ wa zuo dinɛ la, gee mam n looe ya yehe timpaberɛ wa puan la, bala zuo ti timpaberɛ wa zuo yaaɛ ya la. 20#Mat 10.24; Luk 6.40; Yɔn 13.16 Tɛri ya yelehum la ti mam tɔgɛ bo' ya yeti, ‘Yameŋa ka gana ka daana la.’ Ba han mɛlehɛ mam, ba wan mɛlehɛ yamam me. Ba han gurɛ mam yelehum la kankaŋi, ba wan gurɛ yamam yelehum la me kankaŋi. 21Gee ba wan iŋɛ ya yele ana woo mam yu'urɛ wa zuo. Se'ere n sɔi la, ba ka mi' se'em n tum mam na la. 22Mam han ka sige ni na tɔgɛ ni bo' ba, ba ka tari ni tuure. Gee nananawa, ba ka tari tu ka baŋɛ mɛ, ba be'em la puan. 23Se'em woo n yaaɛ mam, yaaɛ mam Sɔ la me mɛ. 24Mam han ka ze'ele ni ba nɛŋan tum daalehum sebo taaba ti nɛra kan ta'am tum wa, ba ka tari ni tuure. Gee nananawa, ba pun nyɛ mɛ, gee ti ba sina gee yaaɛ mam la n Sɔ la. 25#Yoo 35.19; 69.4 Gee ŋwana woo iŋɛ ti la doohe la gulehegɔ la n boi ba pa'alegɔ gɔŋɔ la puan yeti, ‘Ba yaaɛ mam la yoo la.’

26“Gee Tɛ'ɛla la han wa'am na, se'em ti mam wan tum en ti a ze'ele Sɔ la zi'an na la, se'em n de Fa'a Sia la en de yelemɛŋerɛ, ze'ele mam Sɔ la zi'an na la, a wan tɔgera la mam yele bɔ'ɔra ya. 27Yamam me mɛhi dela ya tɔgera mam yele, se'ere n sɔi la, ya boi la mam mɛ n pa'alegɔ wa pi'ileŋo puan na.

Currently Selected:

Yɔn 15: GBTP

Highlight

Copy