Yɔn 14

Yezu n de sore yɛ'ɛha Sɔ la zi'an

1“Da bahɛ ya ti ya suya daana, nam ya Yinɛ, gee nam mam me. 2Mam Sɔ yire la ha, deto zo'e mɛ. La han dagi ni bala, mam wan yele ni ya ti n ye' ti n ta maalɛ la bɔŋa zi'an biŋe ya’? 3N han kiŋɛ ta maalɛ zi'an la biŋe ya ba'ahɛ, n wan le lebe n mɛŋa na, tari ya kiŋɛ, ti zi'an ti mam bɔna la, bilam ti yamam me wan bɔna. 4Ya me pun mina sore se'ere n dole yɛ'ɛha zi'an ti mam yɛ'ɛha la mɛ.” 5Ti Tɔmasi yele en yeti, “Daana, tu ka mi' fum ye' zi'an, tu yeti tu iŋɛ la wani baŋɛ sore la?” 6Ti Yezu yele en yeti, “Mam n de sore la, la yelemɛŋerɛ la, la nyɔvore la. Se'em kan ta'am paaɛ Sɔ la zi'an, han dagena a doohe la mam puan. 7Ya han mina mam, ya wan mina mam Sɔ la me. Gee nananawa yɛ'ɛha ha, ya mi' en, gee me nyɛ en.”

8Ti Filipi yele en yeti, “Daana, pa'alɛ tɔ se'em n de Sɔ la, gee bala wan tigɛ tɔ.” 9Ti Yezu yele en yeti, “Mam n boi la ya saŋa kana wa woo wa Filipi, ti fum kelum ka mina mam? Se'em woo n nyɛ mam, nyɛ Sɔ la mɛ. Wani ti fum le yɛta mam yeti, ‘Pa'alɛ tɔ Sɔ la’? 10Fum ka nam ti mam boi mɛ la Sɔ la, ti Sɔ la me bɔna la mam? Yelehum wa ti mam tɔgera wa dagi mam mɛŋa yelehum, gee bu dela Sɔ se'em n boi la mam la n tuni a tuuma mam puan. 11Nam bo' mam ti mam boi mɛ la n Sɔ la, ti n Sɔ la bɔna la mam. Gee fum han pun ka nam, tuuma la mɛŋa zuo, fum dela fum nam bo' mam. 12Yelemɛŋerɛ yelemɛŋerɛ ti n yɛta ya wa, ti se'em woo n nam mam, me wan tuna tuuma sɛ'a ti mam tuna wa, a wan tum a pun gaŋɛ bala, beni zuo, mam ye' la Sɔ la zi'an. 13N wan iŋɛ sɛla woo ti ya soke bɔta mam yu'urɛ puan, ti Sɔ la nyɛ pɛka dayua la puan. 14Ya han soke mam yu'urɛ la puan bɔta sɛla woo, n wan iŋɛ dɛ.

Fa'a Sia la nɔ'pu'ulegɔ.

15“Ya han nɔŋɛ mam, ya wan gurɛ mam pa'alegɔ kankaŋi. 16Bala ti n wan soke n Sɔ la, ti a wan bo' ya Nu'pu'ŋmɛ'ɛra ayima en kpe'em paaɛ paaɛ ti a bɔna la ya wuuha. 17Eŋa en de Fa'a Sia la n de yelemɛŋerɛ la, se'em ti Timpaberɛ wa zuo kan to'e en, Se'ere n sɔi la, timpaberɛ wa zuo nɛreba ka nyɛti en, bii ba mina en. Gee yamam mi' en se'ere n sɔi la, a boi mɛ la ya, gee wan kelum bɔna la ya.

18“N kan bahɛ ya ti ya ana wuu kiibehi la. N lebere ya zi'an me na. 19La han iŋɛ fiiwa, timpaberɛ wa zuo nɛreba kan le nyɛ mam, gee yamam wan nyɛ mam. Mam vɔi la, yamam me wan vɔna. 20De daarɛ la, ya wan baŋɛ ti mam boi mɛ la n Sɔ la, ti yamam bɔna la mam, ti mam me bɔna la ya. 21Se'em n mi' mam Pa'alegɔ duma la, gee dɔla a n de se'em n nɔŋɛ mam. Se'em en nɔŋɛ mam la, mam Sɔ la me wan nɔŋɛ en, ti mam mɛŋa me nɔŋɛ en, gee niira n mɛŋa pa'ala en.” 22Ti Yudasi ayima, (dagi se'em n de Isikariyɔte la) yele Yezu yeti, “Daana, wani ti fum wan ta niiɛ fum mɛŋa pa'ala tumam, gee dagi timpaberɛ wa?” 23Ti Yezu lerege en yeti, “Sɛba en nɔŋɛ mam la, wan tara mam yelehum la, ti mam Sɔ wan nɔŋɛ ba, ti mam la n Sɔ la wan wa'am na iŋɛ tu bɔŋa zi'an ba puan. 24Se'em n ka nɔŋɛ mam, ka guti mam yelehum. Yelehum wa ti ya wuna wa me dagi mam yelehum, bu dela Sɔ la n tum mam na la dinɛ.

25“N yeti ya yele ana wa woo ti n nan boi la ya wa. 26Gee Tɛ'ɛla la kini na, Fa'a Sia la. Se'em ti Sɔ la wan tum en na mam yu'urɛ puan la. Eŋa wan pa'alɛ ya sɛla woo, gee tiiha ya sɛla woo ti mam yele ya la. 27Suma'ahum ti mam dikɛ baha ya. Mam mɛŋa suma'ahum ti mam dikɛ bɔ'ɔra ya. Mam ka bo'ori n suma'ahum wa wuu timpaberɛ zuo nɛreba n bo'ori ba suma'ahum se'em la. Da bahɛ ya ti ya suya daana, gee me da bahɛ ya ti dabeem tara ya. 28Ya wum mam pun yele ya yeti, ‘N yeti n kiŋɛ mɛ, gee le lebe ya zi'an na.’ Ya han nɔŋɛ mam, ya wan nyɛɛna, la mam n ye' Sɔ la zi'an la. Se'ere en sɔi la, Sɔ la gani mam mɛ. 29Nananawa, n pun yele ya mɛ, gee ti yɛla la baŋɛ wa'am na, bala ti yele ana wa han ta wa'am na tum, ya wan nam mam. 30N kan le ta'am tɔgɛ la ya yuue, se'ere en sɔi la, Be'em daana se'em n pɛregeri timpaberɛ wa zuo kini me na. A me ka tari n paŋa, 31gee mam iti la sɛla ti Sɔ la bo' mam nuurɛ ti n iŋɛ la, ti timpaberɛ nɛreba baŋɛ ti mam nɔŋɛ Sɔ la mɛ. Ihige ya ti tu kiŋɛ.

Currently Selected:

Yɔn 14: GBTP

Highlight

Copy