Tuuma 7

Siteven tɔgɛ bo' Kiinduma la

1Ŋwana ti malema nɛŋadaana la soke Siteven yeti, “Alaa, yele ana wa za'a dela asira ti fum yele la bala?” 2#Pi'il 12.1 Ti Siteven lerege yeti, “N suurɔ la n sɔduma, kelehe ya mam. Yinɛ en de suŋa Yinɛ la yuum niiɛ la de mɛŋa bo' tu sɔyaaba Aberaham, se'em ma'a ti a bɔna Mɛsopotemiya, se'em ma'a ti a nan ka nɔgɛ kiŋɛ Haran la, yeti, 3‘Bahɛ fum tiŋa wa la fum nɛreba, gee kiŋɛ tiŋa kayima ti n yeti n pa'alɛ hɔ.’ 4#Pi'il 11.31; 12.4 Bala ti Aberaham bahɛ Kalediya duma tiŋa wa, gee kiŋɛ ta zi'ire Haran la. Ti a sɔ en ta ki la, ti Yinɛ ihege en bilam wa'am tinsɛka ti ya bɔna ka puan zina wa puan na. 5#Pi'il 12.7; 13.15; 15.18; 17.8 Yinɛ yuum ka dikɛ tinkana wa zi'an bɔba bo' Aberaham ti ka dɛna a dinɛ, pun dagena wuu na'arɛ tagelegɔ beene. Gee Yinɛ yuum biŋe la nuurɛ ti a wan dikɛ ka bo' eŋa la a yaahi se'ehi n wan ta wa'am na, la Aberaham n yuum pun ka tara bia la. 6#Pi'il 15.13-14 Yinɛ yuum tɔgɛ bo' en yeti, “A yaahi wan ta dɛna saama bɔna nɛreba basɛba tiŋa, ti ba dikɛ ba lebege ba da'aba, mugehe ba yuuma kɔbehi sinaahi.” 7#Yɛh 3.12 ‘Gee n wan gakɛ tinse'ehi ti ba dɛna ba da'aba la.’ Yinɛ n yele se'em n bala. ‘N han ta gakɛ tihi la ba'ahɛ fum yaahi la nyaa wan ze'ele si puan yehe na, la ba na'aha mam tinkana wa puan.’ 8#Pi'il 17.10-14; 21.2-4; 25.26; 29.31—35.18 Ti Yinɛ ku ŋmaa nuurɛ la n. Bala zuo ti Aberaham n ta dɔgɛ Aziki la, a ŋmaaɛ bia la dɔgum dabeha anii daarɛ mɛ, ti Aziki me n ta dɔgɛ Yakɔbe, ti Yakɔbe me ta dɔgɛ ba yaabeduma pia la bayi' la.

9 # Pi'il 37.11, 28; 39.2, 21 “Ti yaabeduma wa looe Yosefe ba puan nyuuna la en, ta koohe en bu Igipiti. Gee Yinɛ boi la en mɛ, 10#Pi'il 41.39-41 gee faaɛ en pɔgeleŋɔ woo puan bahɛ, gee bahɛ en ti a nyɛ zu'uhegɔ, gee bo' en yɛm Igipiti naba Faro nɛŋan, se'em n wa looe Yosefe ti a sɔna Igipiti za'a la eŋa naba la yire za'a biha. 11#Pi'il 42.1-2 Ti la bɔna bɔna ti kom pɛɛlega ta sige Igipiti la Keenan tihi puan, la namehegɔ kãtɛ, ti tu yaabeduma ka nyɛ dia zi'an zi'an. 12Gee Yakɔbe n ta wum ti ki boi Igipiti la, a tum la tu yaabeduma wa ti ba kiŋɛ ba yia kinɛ. 13#Pi'il 45.1, 16 Ba yi'i puan la ti Yosefe niiɛ a mɛŋa pa'alɛ a kiinduma wa, ti naba Faro me baŋɛ Yosefe yire buuri wa. 14#Pi'il 45.9-10, 17-18; 46.27 Ŋwana ti Yosefe nyaa tum yi' a sɔ Yakɔbe, la Yosefe suurɔ woo wa'am a zi'an Igipiti na, ti ba za'a dɛna nɛreba pihiyopɔi la banuu. 15#Pi'il 46.1-7; 49.33 Lan iŋɛ se'em ti Yakɔbe la tu yaabeduma basɛba la kiŋɛ Igipiti n bala. Yakɔbe ta ki la bilam, la tu yaabeduma basɛba la me, 16#Pi'il 23.3-16; 33.19; 50.7-13; Yos 24.32 Ti ba zi ba lebe Sɛkɛm na, pi' ba yɔɔ seko puan ti Aberaham yuum da' la salema pɛɛlega Hamɔn dayɔɔhi la zi'an Sɛkɛm puan la.

17 # Yɛh 1.7-8 “Gee saŋa la n ta pɔra ti Yinɛ tum a nɔbiŋere la ti a biŋe la Aberaham la, ti nɛreba wa en boi Igipiti bala ma'a la ba' wi'ɛ mɛ, 18tara tara ti naba ka yima n ka mi' Yosefe yele, wa'am na zi'ire Igipiti na'am kuka la zuo, 19#Yɛh 1.10-11; 22 tara yɛm kirega dugera tu buuri wa, pɛregɛ tu yaabeduma ti ba han ni dɔgɛ bia, ba bahɛ ka ti ka ta ki. 20#Yɛh 2.2 Sankana puan ti ba dɔgɛ Moose, ti a dɛna bia n sum Yinɛ Nɛŋan. Ŋmarehi sitã ti bia wa bɔna ka sɔ yire, 21#Yɛh 2.3-10 ti ban daa ta tari en ta bahɛ la, Faro mɛŋa poyua n nyɛ en, dikɛ en bihera, ti a ta zo'e na dɛna a mɛŋa dayua. 22Bala zuo la, ba yuum pa'alɛ Moose mɛ la Igipiti yɛm la za'a, ti a zo'e na, tara paŋa a yetɔgum puan la a tuuma puan.

23 # Yɛh 2.11-15 “Moose n ta dɛna yuuma pihinaahi la, ti la wa'am a suuren na, ti a kiŋɛ ta kaaɛ a nɛreba la n de Izirale buuri la. 24En wa'am na nyɛ ti ba tari ba ayima ŋmɛ'ɛra la, a lerege en mɛ, ŋmɛ' Igipiti nɛra la ku. 25Moose ti'ihɛ ti a buuri la wan baŋɛ ti Yinɛ wan doohe eŋa puan faaɛ ba bahɛ, gee a buuri la ka bɔkɛ de bala. 26Yiimbeere ti a le kiŋɛ na paaɛ ti a buuri la bayi' zaberɛ, ti a zigɛ ti a sugelum ba, nyaa yɛta ba yeti, ‘N suurɔ wa, mini ya ti ya dela suuɔ. Ŋwani ti ya pɔgelena taaba?’ 27Ti se'em n ŋmɛ'ɛri ni a tadaana la za'ɛ Moose bahɛ ha, gee yele en yeti, ‘Ani n iŋɛ hɔ ti fum biha tumam, gee gakera tɔ? 28Fum boti fum ku mam me mɛ wuu fum zaam ku Igipiti nɛra la se'em la?’ 29#Yɛh 18.3-4 Moose n wum ŋwana la, a zɔ mɛ loŋe Midiya, ta dɛna saana bilam. Bilam ti a dɔgɛ dayɔɔhi siyi. 30#Yɛh 3.1-10 Ti yuuma pihinaahi ta tole, ti Yinɛ Suŋera ta niiɛ a mɛŋa pa'alɛ en Muɔ puan ha, Sinai Zoore la ha, ti tuntuo dita gee ka taara. 31Moose n nyɛ ŋwana la, la iŋɛ en la pakerɛ la sɛla ti a nyɛta la, ti en kiŋɛ paara ti a bihɛ la, ti Daana la kua yi' en yeti, 32‘Mam n de fum yaabeduma Yinɛ la. Aberaham Yinɛ, Aziki la Yakɔbe Yinɛ la.’ Ti Moose iŋa pɔhɛ gbɛ'ɛra, gee ti a ka le sakɛ ti a le bihɛ. 33Ti Daana la yele en yeti, ‘Pirege fum tagera la ti fum pire la, se'ere n sɔi la, ze'sɛka ti fum zɛ'a wa dela Tuulum zi'an. 34Mam nini sirum nyɛ mɛlehegɔ seko ti mam nɛreba wa bɔna Igipiti mɛleha la, gee me wum ba uhega, bala ti n sige na ti n faaɛ ba. Wa'am na nananawa na, n wan tum hɔ Igipiti.’

35 # Yɛh 2.14 “Moose kana n bala ti ba daa ka nam gee soke en yeti, ‘Ani n iŋɛ hɔ ti fum biha tumam gee gakera tu la?’ Moose kaŋa n bala ti Yinɛ tum en ti a sɔna biha gee dɛna faara, doohe Suŋera la n niiɛ a mɛŋa pa'alɛ en muuen ha la. 36#Yɛh 7.3; 14.21; Kãl 14.33 Ti a tari ba yehe na, se'em ma'a ti a damɛ Igipiti, la mɔgemɔlegɔ la puan, la kpaahenɛ la puan la daalehum nyalema yuuma pihinaahi. 37#Tii 18.15, 18 Moose kana n bala yuum yele Izirale buuri wa yeti, ‘Yinɛ wan looe a nɔtɔgeha ya mɛŋa buuri wa puan bo' ya wuu en looe mam se'em la.’ 38#Yɛh 19.1—20.17; Tii 5.1-33 Eŋa n bala wa bɔna Izirale lageŋɔ la puan muuen ha la, la suŋera se'em n yuum tɔgɛ bo' Moose Sinai Zoore la zuo la, gee daa bɔna la tu yaabeduma, ti a to'e vom pa'alegɔ na bo' tu. 39Tu yaabeduma la yuum ka maahum ti ba nana en, gee tugum za'ɛ en bahɛ kinkɛleŋa, gee ti ba suya puan, ba yuum lebe la Igipiti puan, 40#Yɛh 32.1 doohe la ban yuum yele Aron yeti, ‘Maalɛ baga bo' tu ti a pa'alɛ tu sore, gee han dɛna Moose wa n tari tu ze'ele Igipiti yehe na wa, tu ka mi' sɛla n iŋɛ en.’ 41#Yɛh 32.2-6 Sankaŋa ti ba kure nagebila, kɔrum duhi kaabɛ ka, gee na'ahɛ sɛla ti ba dikɛ ba nu'uhi kure la. 42#Amo 5.25-27 Ŋwana ti Yinɛ ŋmɛregɛ gee bahɛ ba, gee dikɛ ba bo' saazuo ŋmarebibehi wa kaabegɔ, wuu lan gulehɛ nɔtɔgeheba gɔŋɔ la puan yele se'em la. La yeti,

‘Yamam yuum kɔreni ya duhi la gee kaabera la mam

yuuma pihinaahi muɔ la puan ha la, Izirale yire duma wa?

43Aayi, yan daa yeheri la, ya daa tari Mɔlɛki bagerɛ la mɛ la ya,

gee tara ŋmarebila bagerɛ la n yi'iri Arafan la,

bage se'ere ti ya kure na'aha la.

Bala la, n wan bahɛ ti ya kiŋɛ zaaɛ gana Babilɔn.’

44 # Yɛh 25.9, 40 “Tu sɔyaabeduma la yuum ziiri tuulum sugerɛ la mɛ la ba muuen la ha, wuu Yinɛ n yuum pa'alɛ Moose se'em la, gee yuum bo' en nuurɛ ti a maalɛ tuulum sugerɛ la wuu eŋa n pa'alɛ en se'em la. 45#Yos 3.14-17 Tu yaabeduma la me yuum tari tuulum sugerɛ wa doohe la Yosua kɛ̃ na, se'em ma'a ti ba yuum ta nyaŋɛ tihi se'ehi woo ti Yinɛ yuum dige si nɛreba tu yaabeduma wa ninin la. Ti tuulum sugerɛ wa yuum bɔna la bilam tara tara ta paaɛ Naba Deviti saŋa, 46#2 Sam 7.1-16; 1 Yel 17.1-14 se'em ti Yinɛ yuum zu'uhɛ en ti a yuum soke Yinɛ ti a bahɛ ti a mɛ Yinɛ bɔŋa zi'an, Yakɔbe Yinɛ wa yu'urɛ purega zi'an. 47#1 Nad 6.1-38; 2 Yel 3.1-17 Gee Solomɔn en yuum ta wa'am na mɛ yire bo' en. 48Gee Gaŋɛ Za'a Daana wa ka ki'ire yiya ti saaleba nu'uhi mɛ puan, wuu nɔtɔgeha la n yele se'em la.

49 # Aza 66.1-2 ‘Saazuo n de mam na'am kuka zi'an,

ti timpaberɛ wa zuo dɛna mam nama dafeere

Yire deni taaba ti fum wan ta'am mɛ bo' mam, Daana n yele.

Bii ze'kani n wan dɛna mam vo'ohego zi'an?

50Dagi mam nu'o n maalɛ sɛla woo en boi wa?’

51 # Aza 63.10 “Tube-kpirega duma wa, ya suya digelum mɛ ti ya tuba li', saŋawoo yamam kan malum nam bo' Fa'a Sia la, ya kɔ'ɔm ita mɛ wuu ya yaabeduma en yuum iti se'em la. 52Nɔtɔgeha kani ti ya yaabeduma ka mɛlehɛ? Ba yuum ku sɛba woo en yuum puti Fa'a Daana wa kinɛ yele la mɛ, ti nananawa, yamam nyaa lebege ŋma'areba la kuureba. 53Ya dela sɛba n to'e ze'elego la, ti ku ze'ele la Yinɛ Suŋereba ze'a na, gee ya ka dole ku.”

Ba lobe Siteven

54Nɛreba la n wum yele ana wa la, ba suure n nyiie, ti ba ɔbera nyɛna Siteven nɛŋan. 55Gee ti Fa'a Sia la pirɛ en, ti Siteven gorege bihɛ saazuo ha, nyɛ Yinɛ suŋa, ti Yezu zi'a Yinɛ zuɔ nu'o. 56Ti a yele nɛreba la yeti, “Bihɛ ya, mam nyɛti la saazuo n yu'ɛ, ti Asaala Dayua la zɛ'a Yinɛ zuɔ nu'o.” 57Ti nɛreba la li' ba tuba, gee kaaha tagurega, lagum zɔ uue en ha. 58Nyaa vuue en yehe tiŋa la kinkɛleŋa ha, pɔhɛ lɔbera en la kuga. Ti aze' nyɛ duma la yɛɛhɛ ba futo biŋe budibele paalega ti ba yi'ira ka Sɔɔl nɛŋan. 59Ban lobere Siteven la, ti a pu'uhɛ yeti, “Daana Yezu, to'e n sia wa.” 60Gee kpa' duma kaahɛ supi yeti, “Daana, da dikɛ be'em buna wa bahɛ ba zuo.” En yele ŋwana ba'ahɛ la, a ki mɛ.

Currently Selected:

Tuuma 7: GBTP

Highlight

Copy