Tuuma 5

Ananiya la Safira

1Gee buraa kayina yu'urɛ n yi'iri Ananiya naaɛ la ka pɔga Safira, koohe ba samanɛ, 2ti a pɔga la mina, ti a welege ligeri la i se'ehi biŋe gee tari se'ehi n gee la na biŋe tuntuneba la nɛŋan. 3Ti Pita soke “Ananiya” yeti, “Ŋwani ti Sagena la pirɛ fum suure paaɛ bala ti fum parum bo' Fa'a Sia, doohe fum aaɛ samanɛ la ti fum koohe la ligeri i se'ehi biŋe la? 4Samanɛ la n nan ka koohe ni la, de dagi ni la fum mɛŋa dinɛ, fum le ta koohe de la, ligeri la ka boi la fum nu'uhen? La iŋɛ la ŋwani ti fum ta'am ti'ihɛ yele dina wa fum suuren? Fum ka parum bo' la asaala, gee Yinɛ.” 5Ananiya n wum yetɔgebuna wa la, a kɔ'ɔm lu mɛ ki. Ti dabeem kãtɛ sãɛ sɛba woo me n wum la. 6Ti budibe paalehi la paaɛ pɔbɛ en, zi en yehe ta pi'.

7Ti la iŋɛ wuu gogo kaareŋa atã la, ti a pɔga la me kiŋɛ kɛ̃ na, ka baŋɛ sɛla en iŋɛ. 8Ti Pita soke en yeti, “Yele mam, fum la fum sira la koohe ya samanɛ la ligeri la ŋwani la ŋwani.” Ti a yeti, “Ɛ̃ɛ, tumam n koohe de se'em n bala.” 9Ti Pita yele en yeti, “La iŋɛ la ŋwani ti yamam ku nuurɛ la taaba ti ya magehɛ Daana la Sia wa bihɛ? Bihɛ, sɛba n pi' fum sira nama n bala bɔna kuleŋa nuuren wa, bamam mɛa n wan zi fum yehe.” 10Bilam bilam ti a lu Pita nɛŋan ki, budibe paalehi la n kɛ̃ nyɛ en ti a ki mɛ la, ti ba zi eŋa me yehe ta pi' en lɛm asira la. 11Ti dabeem kãtɛ sãɛ lageŋɔ la, la sɛba woo n wum yele ana wa.

Tuntuneba tibɛ nɛrekuuŋɔ

12Daalehum la nyalema la kekeko en tuni nɛreba la puan, doohe tuntuneba la puan. Ti ba za'a lagehɛ bɔna pu'uhegɔ yire la ze'sɛka ti ba yi'ira ka Solomɔn zinzaka la puan. 13Gee nɛreba la, la ayima me ka makɛ dikɛ a mɛŋa pa'ahɛ tuntuneba la puan, gee nɛreba la za'a na'aheri ba mɛ paaɛ paaɛ. 14Gee nɛreba n tugum malum nam bo' Daana la, ti buraahi la pɔgehi kãlɛ zo'e, 15ti nɛreba ni zi bã'duma ta biŋe sore nuuren la ba kugehi bii ba sunɔ zuto, ti Pita en tole la a nyilenyileho wan doohe ba zuto tole ti ba nyɛ ba tibegɔ. 16Ti nɛreba zo'e zo'e me ni ze'ele tinse'ehi n boi Yerusalɛm bɔba, tari bã'duma la sɛba ti kulekpa'bɛ'ɛhi mɛleha ba, ti ba za'a nyɛ ba tibega.

Tuntuneba la mɛlehegɔ

17Ti malema kiima la vaaɛ ihege, eŋa la sɛba woo n boi la en la (Sadusiiduma wele la) n pirɛ la nyuure la, 18nyɔgɛ tuntuneba la pagɛ ba paka deto puan. 19Gee yu'uŋɔ, ti Yinɛ suŋera wa'am na yu'ɛ paka deo kulehi la tari ba yehe na, gee yele ba yeti, 20“Kiŋɛ ya ta ze'ele pu'uhegɔ yire la puan la ya yele nɛreba la vom bɔna wa yelehum la za'a.” 21Ban wum ŋwana la, ba kiŋɛ pu'uhegɔ yire la la bulika, ta kɛ̃ pɔhɛ ba yelehum pa'alegɔ.

Malema nɛŋa daana la, la sɛba woo n boi la en la n paaɛ na la, ba yi' la kiinduma la za'a, la sɛba woo n de kima Izirale buuri puan la lagehɛ na, gee nyaa tum ti ba kiŋɛ paka deo la puan ta tari tuntuneba la na. 22Gee sɛba n guri pu'uhegɔ yire la n kiŋɛ paka deo la puan la, ba ka nyɛ ba bini, ti ba lebena yele yeti, 23“Tumam paaɛ ti paka deo kulehi la yu' mɛ kankaŋi, ti gureba la me zɛ'a kulehi la nuuren, gee tumam n yu'ɛ kulehi la, tumam ka nyɛ se'em bini.” 24Sɛba n biheri pu'uhegɔ yire la kpɛ'ɛma la, la malema kiinduma la n wum ŋwana wa la, ba maam mɛ la ba, ti'ihera nyaa beni n tugum ita wa. 25Ti nɛra ayima n bala paaɛ na muula yeti, “Bihɛ ya, buraahi la ti ya pagɛ ba la n bala zɛ'a pu'uhegɔ yire la puan ha pa'ala nɛreba la.” 26Ti sɛba n guri pu'uhegɔ yire la kpɛ'ɛma la pu'uhegɔ yire gureba la kiŋɛ ta tari ba bããlam wa'am na, se'ere n sɔi la, ba zoti mɛ ti nɛreba la wan lobe bamam.

27Ban tari ba paaɛ na la, ba bahɛ ti ba ze'ele la malema duma kima la nɛŋan. Ti malema nɛŋa duma la soke ba 28#Mat 27.25 yeti, “Tu daa bo' ya nuurɛ la ninmu'urɛ yeti, ya da le tara yu'urɛ wa pa'ala, gee bihɛ yamam n bala pirɛ Yerusalɛm wa la ya pa'alegɔ wa, kɔ'ɔm lu' ti ya dikɛ buraa wa ziim ka'arɛ pagelɛ tumam zuo.” 29Gee Pita la tuntuneba la lebehe ba yeti, “Tumam wan nam la Yinɛ nyana saala kpe'eŋo. 30Tu yaabeduma Yinɛ la n vo'e Yezu a kum la puan, se'em ti ya daa yule en tia la zuo ku la. 31Yinɛ zɛkɛ en mɛ ta zi'ire a zuɔ nu'o ti a dɛna Nɛŋa Daana, la Faara, ti a bo' Izirale suteere la yelebe'ero sugeri. 32Ti tumam n dɛna aze' nyɛ duma bo' yele ana wa, la Fa'a Sia ti Yinɛ dikɛ bo' sɛba n nane en la.”

33Ban wum ŋwana la, ba suya n nyiie gaŋɛ, ti ba ku nuurɛ la taaba ti ba ku ba. 34Gee Farasii ayima n lagum bɔna kiinduma la puan ti a yu'urɛ yi'ira Gamaliyɛl, pa'ala Moose pa'alegɔ la, ti nɛreba za'a na'ahera en. Eŋa n ihege ze'ele bo' nuurɛ ti ba bahɛ ti tuntuneba la yehe yiŋa fii wa. 35Ti a nyaa yele ba yeti, “N suurɔ Izirale taaba wa, ti'ihɛ ya suŋa yan yeti ya iŋɛ nɛreba wa se'em. 36Saŋa n tole ha, Tiyodase yuum ihege mɛ, yeti eŋa dela sɛla, ti buraahi yuum paaɛ wuu kɔbehi sinaahi dɔla en. Gee ba yuum ku en mɛ, ti a dɔleba la za'a yiregɛ, mɛlum. 37Eŋa pooren, ti Yudasi n de Galiliiŋa me yuum ihege na, nɛreba kãalegɔ saŋa la, ti nɛreba me yuum dɔla en, ti eŋa me ta ki, ti a dɔleba la za'a yiregɛ. 38Bala, nananawa, yeledina wa puan, mam yeti ya me wa, ti ya fooe ya nu'o buraahi wa puan gee bahɛ ba ba ma'a. Se'ere n sɔi la, yele dina wa bii tuun-dina wa han dɛna la asaala puti'irɛ, de wan bahɛ yoo. 39Gee de han dɛna la Yinɛ puti'irɛ yamam kan ta'am gu' ba. Ya han yeti ya iŋɛ bala, ya wan ta nyɛ ti ya zaberɛ mɛ la Yinɛ mɛŋa!”

Ti ba bɔkɛ a yetɔgum la. 40Ti ban yi' tuntuneba la kɛ̃ na la, ba bahɛ ti ba ŋmɛ' ba mɛ, gee ti ba nyaa bo' ba nuurɛ yeti ba da le tɔgɛ se'ere Yezu yu'urɛ la puan, gee nyaa bahɛ ba ti ba kiŋɛ. 41Ban baheri kiinduma la zi'an la, ba puurɛ pee mɛ ti bamam me ti ba diihe ba vi Yezu yu'urɛ la zuo. 42Ti daarɛ woo, pu'uhegɔ yire la puan bii ba mɛhi yiya puan, ba ka go'ore pa'alegɔ, bii ba muula ti Yezu n de Kiresta la.

Currently Selected:

Tuuma 5: GBTP

Highlight

Copy