Tuuma 18

Pɔɔl boi Korinti

1Ŋwana wa n tole la, ti Pɔɔl bahɛ Atense gee kiŋɛ Korinti. 2Bilam ti ba ta nyɛ Yuda buuri la nɛra ayima ti ba ba yi'ira en Akuila, yehe Pɔntusi tiŋa na, nan kɔ'ɔm ze'ele Itali lebena la a pɔga Pirisila, se'ere n sɔi la, Kaiza Kulodeyose bo' la nuurɛ ti Yuuduma woo bahɛ Arome. Ti Pɔɔl kiŋɛ ti a ta bihɛ ba, 3gee ba za'a n tuni tuunɛ deyina la zuo ti Pɔɔl kɛ̃ la ba, ti ba lagum tuna. Ba za'a lagum maala la gana pagehi. 4Vo'ohego dabeherɛ woo, Pɔɔl ni wan kɛ̃ zamehegɔ yire la puan, zigera ti a nyaŋɛ Yuda la Girikiduma la.

5Silase la Timoti n ta ze'ele Masedoniya paaɛ en na la, ti Pɔɔl boi la yelehum la muulegɔ puan mimi, yɛta Yuuduma la ti Kiresta la dela Yezu. 6Ban ka sakɛ bo' en, gee tuura en la, ti a kpa'ahɛ a futo puuhego bahɛ, gee yele ba yeti, “Ya taala dɔla ya mɛhi, mam ka tari taalɛ. Yehe zina yɛ'a ha, n nyaa wan kiŋɛ la sɛba n dagi Yuda buuri la zi'an.” 7Ti Pɔɔl bahɛ zamehegɔ yire la puan, gee yehe kiŋɛ buraa ka yima zi'an ti ka yu'urɛ yi'iri Taitusi Yusetuse, dɛna se'em n na'aheri Yinɛ, ti a yire kɔ'ɔm du' la zamehegɔ yire la. 8Kirisipuse n de kpɛ'ɛma zamehegɔ yire la puan la, to'e yelehum la lebege Daana la sakera, eŋa la a yire nɛreba za'a, ti Korintiduma sɛba n wum Pɔɔl yelehum muulegɔ la zo'e zo'e to'e lebege sakereba, to'e ko'om sua. 9Yu'uŋɔ kuyima ti Daana la yele Pɔɔl lilegere puan yeti, “Da tara dabeem, tɔgera, da sina. 10Se'ere n sɔi la, mam boi mɛ la hɔ, ti nɛra ka bɔna wan dikɛ a nu'o kalum hɔ bii a pɔgelum hɔ. Se'ere n sɔi la, nɛreba zo'e mɛ tinkana wa puan mɛ dɛna mam nɛreba.” 11Ti Pɔɔl yee tiŋa la puan yuunɛ la ŋmarehi siyoobe, pa'ala nɛreba la Yinɛ yelehum la.

12Gee Galiyo n wa biha Akaiya tiŋa la, ti Yuuduma wa lagehɛ taaba gbirege la Pɔɔl, tari en wa'am tugum yire puan na. 13Nyaa yeti, “Burakana wa dole pa'ala nɛreba paaɛ paaɛ ti ba pu'uha Yinɛ sadɔɔ seko n ka dole la ze'elego la.” 14Pɔɔl n boi bini ti a ya'ɛ nuurɛ la, ti naba Galiyo pun yele Yuuduma la yeti, “La han deni la a tuue la se'ere bii a galum la se'ere n wan tari ni sore ti n to'e yamam Yuuduma wa suhega la. 15Gee kan de tugum la yu'ura la yamam mɛŋa ze'elego wa la, ya mɛhi bihɛ tɔgɛ dɛ, gee mam ka boti n dɛna gakera yele ana wa puan.” 16Gee sa'ɛ ba tugum deo la puan ti ba yehe. 17Ti Yuuduma la ŋmɛregɛ gurɛ Sositenese n de zamehegɔ yire la kpɛ'ɛma ayima la, ŋmɛ' en gakereba la nɛŋan, gee la bala za'a Galiyo ka be'e bihɛ ba yɛla wa puan.

Pɔɔl lebe Antiyoke

18 # Kãl 6.18 Pɔɔl en kɛ̃ bilam yuue fii la, a keehe sakereba la za'a mɛ, gee zom uureŋɔ kiŋɛ Siriya tiŋa, ti Pirisila la Akuila doohe en. Ti a wa'am na paaɛ Sinkireya, bahɛ ti ba kɛ̃ a zuo bilam se'ere n sɔi la a biŋe la nuurɛ. 19Ban wa'am na na paaɛ Ɛfisu la, a bahɛ ba la bilam, gee yia la, a kɛ̃ la zamehegɔ yire puan, ta tɔgɛ yɛla la Yuuduma la. 20Gee ban yele en ti a yee la ba dabeha ayi la, a ka sakɛ, 21gee en bahɛ ba gee yɛ'a la, a yele ba yeti, “Yinɛ han bɔta de bala, n wan ta lebe ye zi'an na.” Gee zom uureŋɔ Ɛfisu la yɛ'a.

22En ta paaɛ sige Kasariya puan la, a kiŋɛ zom la Yerusalɛm ta pu'uhɛ lageŋɔ la, ze'ele bilam kiŋe sige Antiyoke. 23En kɛ̃ bilam yuue fii wa la, a bahɛ bilam mɛ gee dɔla kaara tihi la n boi Galatia la Firigiya sɔ'ɔlum puan la, kpɛmeha zahereba la za'a en boi bini la.

Apolos tuuma

24Nananawa, Yuda buuri la nɛra ayima yu'urɛ n yi'iri Apolos, wa'am Ɛfisu na. Ba dɔgɛ en la Alɛgezandiriya, ti a dɛna buraa n mi' tugum, gee me mina gulehegɔ la suŋa. 25A zamehɛ bi'ɛ mɛ Daana sore la puan, gee tɔgera la ninmu'urɛ, gee me pa'ala Yezu yɛla la ma'a ma'a. Gee a mi' la Yɔn ko'om sua la ma'a yele la. 26Ti buraa wa pɔhɛ tɔgera la buraanɛ zamehegɔ yire la puan, gee Pirisila la Akuila n kelehe en ba'ahɛ la, ba tari en yehe kiŋɛ la kinkɛleŋa ha, ta pa'alɛ en Yinɛ sore la ma'a ma'a. 27Buraa wa ta maahum ti a kiŋɛ Akaiya la, suurɔ la za'a daa pa' la a poore kpɛmeha en ti a kiŋɛ, gee nyaa gulehɛ gɔŋɔ bo' zahereba la n boi bilam la yeti ba to'e en suŋa . En ta paaɛ la, a nyaŋɛ kpemehe sɛba woo ti zu'uhegɔ zuo ba lebege sakereba la mɛ. 28Se'ere n sɔi la a kɔ'ɔm tɔgɛ mɛ la buraanɛ nyaŋɛ Yuuduma la, dɔla gulehegɔ la puan pa'alɛ ba ti Kiresta la dela Yezu.

Currently Selected:

Tuuma 18: GBTP

Highlight

Copy