ମାତିସ୍ 20
20
ଅଙ୍ଗୁର୍ ବାଟ୍କିନ୍ ତା ମଜ୍ରୀୟାର୍ଘି ନମୁନା
1“ସରଗ୍ ରାଜୀଦ୍ ଅଣ୍ଟା ଗାଉଁଟିୟାସ୍କି ଲେଖା, ଏକାସ୍ କା ଭୋର୍ ପାଇରି ମାନିଦ୍ କା ନିଜର୍ ଅଙ୍ଗୁର୍ ବାଟ୍କିନୁ ମଜ୍ରୀ ଲାଗାବାଗେ ମଜ୍ରୀୟାରିନ୍ ଅନ୍ଦ୍ରାଗେ ଉର୍ଖିୟାସ୍। 2ଆରୁ ଆସ୍ ମଜୁରୀୟାର୍ଗେ ଅନ୍ଦୁଲ୍ନୁ ଅନ୍ଦୁଲ୍ ତା ମଜ୍ରୀ ଚିୟାଗେ ଠିକ୍ କାମ୍ଚାସ୍ ଆରୁ ଆବ୍ଡ଼ାରିନ୍ ତାଙ୍ଘାଏ ଅଙ୍ଗୁର୍ ବାଟ୍କିଗେ ତାଇୟାସ୍। 3ଆନ୍ତିନ୍ ପାଇରି ବିଡ଼ି ନଅ ବାଜେ ଆସ୍ ଉର୍ଖିକିରି ଆରୁ ଦୁସ୍ରା ଆଲାରିନ୍ ହାଟ୍ଟେନୁ ବେକାର୍ ଇଜ୍ଜକା ଏରିକିରି ଆବ୍ଡ଼ାରିନ୍ହି ତେଙ୍ଗିୟାସ୍, 4‘ନିମ୍ହି ଅଙ୍ଗୁର୍ ବାଟ୍କିଗେ କାଲା, ଆରୁ ଏକାଦ୍ ଠିକ୍ କାମ୍ଚ୍କାରାଇ ଆବନ୍ ନିମାଗେ ଚିଅନ୍।’ ଆରୁ ଆବ୍ଡ଼ାର୍ କେରାର୍। 5ଆରୁ ଆସ୍ ବାର ବାଜେ ଆରୁ ତିନ୍ବାଜେଗେ ଉର୍ଖିକିରି ହନ୍ନେନିନ୍ କାମ୍ଚାସ୍। 6ଆରୁ ଲାଗ୍ଭାଗ୍ ପାଞ୍ଚବାଜେ ଆସ୍ ଉର୍ଖିକିରି ଆରୁ ୟୋଁଲୋକ୍ ଆଲାରିନ୍ ଇଜ୍ଜକା ଏରିୟାସ୍, ଆରୁ ଆବ୍ଡ଼ାରିନ୍ ମେନ୍ଚାସ୍, ‘ନିମ୍ ଏନ୍ଦେର୍ଗେ ଇସାନ୍ ବେକାର୍ନୁ ଉଲ୍ଲାଅଣ୍ଟା ଇଜ୍ଜକାଦାର୍?’ 7ଆବ୍ଡ଼ାର୍ ଆସିନ୍ ତେଙ୍ଗିୟାର୍, ‘ଏନ୍ଦେର୍ଗେକା ନେଦ୍ହି ଏମାନ୍ ମଜ୍ରୀ ମାଲ୍ଲା ଲାଗାବୁର୍।’ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, ‘ନିମ୍ହି ଅଙ୍ଗୁର୍ ବାଟ୍କିନୁ ନାଲ୍ଖୁ କାମାଗେକାଲା।’”
8“ବିଡ଼ି ଅକ୍କାନ୍ତି ଅଙ୍ଗୁର୍ ବାଟ୍କିନ୍ନ୍ତା ମାଲିକ୍ସ୍ ତାଙ୍ଘାଏ ମୁନ୍ସୀସିନ୍ ତେଙ୍ଗିୟାସ୍, ‘ମଜ୍ରୀୟାଜାମାରିନ୍ ମେହାଁ ଆରୁ ପାଛ୍ଲି ବାର୍ଚ୍କା ଆଲାର୍ସ୍ତି, ସୁରୁ କାମିକିରି ପହ୍ଲେ ବାର୍ଚ୍କା ଆଲାର୍ଗେ ମଜ୍ରୀ ଚିଆଲାଗା।’ 9ଆଙ୍ଗେନ୍ ଏକାର୍ ପାଞ୍ଚ୍ ବାଜ୍ନା ବାକେନ୍ ମଜ୍ରୀ ଲାଗାବା କେର୍କାଚାର୍, ଆବ୍ଡ଼ାର୍ ଅନ୍ଦୁଲ୍ ତା ମଜ୍ରୀ ହାଖ୍ଖୀୟାର୍। 10ଆରୁ ଏକାର୍ ଆଘ୍ଲି ବାର୍ଚ୍କାଚାର୍ ଆବ୍ଡ଼ାର୍ ସୋଚାଲିୟାର୍ କା ଏମାଗେ ବାଗ୍ଗେ ହାଖ୍ରୋ, ଲେକିନ୍ ଆବ୍ଡ଼ାର୍ଗେହି ଅନ୍ଦୁଲ୍ ତା ମଜ୍ରୀ ହାଖ୍ଖରା। 11ଲେକିନ୍ ଆବ୍ଡ଼ାର୍ ଆବନ୍ ହାଖ୍ଖୀକିରି ହାଲ୍ଲୁଘି ମାଲିକ୍ସ୍କି ମିଆଁ କୁର୍ବୁର୍ରିକିରି ତେଙ୍ଗା ଲାଗ୍ଗିୟାର୍, 12‘ଇ ପାଛ୍ଲିନ୍ନ୍ତା ଆଲାର୍ ଅନ୍ଘାଣ୍ଟା ଖାଲି ନାଲ୍ଖୁ କାମ୍ଚାର୍, ଆରୁ ଏମ୍ ଉଲ୍ଲାଅଣ୍ଟା ବିଡ଼୍ନା ସାହିକିରି ନାଲ୍ଖୁ କାମ୍ଚ୍କାମ୍ ହାଲେହି ନିମ୍ ଆବ୍ଡ଼ାରିନ୍ ଏହ୍ମା ଗାନେ ସାମାନ୍ କାମ୍ଚ୍କାର୍?’ 13ଲେକିନ୍ ଆସ୍ ଆବ୍ଡ଼ାର୍ଘି ଭିତର୍ନୁ ଅର୍ତୁସିନ୍ ଯାବାବ୍ ଚିଚ୍ଚାସ୍, ‘ହେ ଭାଇ, ଏନ୍ ନିଙ୍ଘାଗାନେ ଅନ୍ୟାୟ ମାଲ୍ଲା କାମୁନ୍। ଏନ୍ଦେର୍ ନିନିନ୍ ଏଙ୍ଘାଗାନେ ଅଣ୍ଟାଦିନାର୍ ଠିକ୍ ମାଲ୍ଲା କାମୁୟ? 14ଏକାଦ୍ ନିଙ୍ଘାଏ, ଆଦିନ୍ ଧାରା ଆରୁ କାଲା; ଲେକିନ୍ ଇ ପାଛ୍ଲି ବାରୁ ଆଲାସ୍କେହି ନିଙ୍ଘା ହତ୍କ ଚିୟାଗେ ଏଙ୍ଘା ଇଚ୍ଛା। 15ନିଜର୍ ସମ୍ପତ୍ତିବନ୍ ନିଜର୍ ଇଚ୍ଛା ଲେଖା ବେଭାର୍ କାମାଗେ ଏଙ୍ଘାଏ ହକ୍ ମାଲ୍ଲାଦିନ୍ କାଁଏ? କା ଏନ୍ ଦାନ୍ ଚିଆଲ୍ଦାନ୍ ଆଦ୍ଘି ଲାଗାନ୍ ଏନ୍ଦେର୍ଗେ ହିସ୍ଙ୍ଗା କାମାଲ୍ଦାଏ?’ 16ଏନ୍ନେନିନ୍ ଏକା ଆଲାର୍ ପାଛ୍ଲି ରାନାଏ ଆବ୍ଡ଼ାର୍ ଆଘ୍ଲି ମାନର୍କର୍; ଆରୁ ଏକାର୍ ଆଘ୍ଲି ରାନାଏ, ଆବ୍ଡ଼ାର୍ ପାଛ୍ଲି ମାନର୍କର୍।”
ଯୀଶୁସ୍କି ଦୁଃଖ୍ଭୋଗ୍ ଆରୁ ଉଜ୍ଜନାଘି ତିସ୍ରା ଭବିଷତ୍ କାତ୍ଥା
(ମାର୍କୁସ୍ ୧୦:୩୨-୩୪; ଲୁକାସ୍ ୧୮:୩୧-୩୪)
17ଯୀଶୁସ୍ ଯେରୁଶାଲେମ୍ କାନାବାକେନ୍ ବାର ଚେଲାରିନ୍ ଭିନେ ତାରା ଅଚ୍ଚାସ୍ ଆରୁ ପାବୁନୁ ଆବ୍ଡ଼ାରିନ୍ ତେଙ୍ଗିୟାସ୍, 18“ଏରା, ନାମ୍ ଯେରୁଶାଲେମ୍ଗେ କାଲ୍ଦାତ୍; ଆରୁ ମୁନୁଷ୍ ହାଦ୍ଦୁସ୍ ମୁଖ୍ୟା ପୁରୋହିତ୍ ଆରୁ ପଣ୍ତିତ୍ଜାମାର୍ଘି ହେଖ୍ଖାନୁ ସୋଁପାଚାକସ୍। 19ଆରୁ ଆବ୍ଡ଼ାର୍ ଆସିନ୍ ମରନ୍ଘି ଦଣ୍ଡ୍ ଚିଇକିରି ମାଜାକ୍ ଉଡ଼ାବର୍, କୋଡ୍ରାତି ଡେମର୍ ଆରୁ କ୍ରୁଶ୍ନୁ ଖିଆଗେ, ବିନାୟାହୁଦୀର୍ଘି ହେଖ୍ଖାନୁ ସୋଁପର୍ଚର୍ ଆରୁ ତିସ୍ରା ଉଲ୍ଲାନୁ ଆସ୍ ଉଜ୍ଜସ୍କସ୍।”
ଅଣ୍ଟା ଆୟାଙ୍ଗ୍ଘି ଆର୍ଜୀବିନ୍ତି
(ମାର୍କୁସ୍ ୧୦:୩୫-୪୫)
20ଯେତ୍କବାକେନ୍ ଜେବେଦୀସ୍କି ଆଲି, ତାଙ୍ଘା ହାଦ୍ଦୁର୍ ଗାନେ ଯୀଶୁସ୍କି ଚାହାଗେ ବାରିକିରି ଯୋହାର୍ କାମ୍ଚା, ଆରୁ ଆସିନ୍ ଏନ୍ଦ୍ରିନ୍ ନିଆଁଗେ ଲାଗ୍ଗିୟା। 21ଯୀଶୁସ୍ ଆବନ୍ ମେନ୍ଚାସ୍, “ନିନ୍ ଏନ୍ଦେର୍ ବେଦ୍ଦାଲ୍ଦିନ୍?” ଆଦ୍ ଆସିନ୍ ତେଙ୍ଗିୟା, “ଏନ୍ନେ ବଚନ୍ ଚିଆ କା ଏଙ୍ଘାଏ ଇ ଯୋଡ଼େ ହାଦ୍ଦୁର୍ ନିହ୍ମା ରାଜୀନୁ ଅଣ୍ଟାସ୍ ତିନାତାରା ଆରୁ, ଆରୁ ଅଣ୍ଟାସ୍ ଡେବ୍ବାତାରା ଅକ୍କର୍।” 22ଯୀଶୁସ୍ ଯାବାବ୍ ଚିଚ୍ଚାସ୍, “ନିନ୍ ବାଲ୍ଦିନ୍ନିନ୍ କା ନିନ୍ ଏନ୍ଦେର୍ ନିଆଁଲ୍ଦିନ୍। ଏନ୍ ଏକା ଦୁଃଖୁ ସାହା କାଲ୍ଦାନ୍, ନିମ୍ ସାହା ଅଙ୍ଗର୍ କାଁଏ?” ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ସାହା ଅଙ୍ଗମ୍।” 23ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଏଙ୍ଘାଏ ଦୁଃଖୁ ସାହା ଅଙ୍ଗର୍, ଲେକିନ୍ ଏଙ୍ଘାଏ ତିନା ଆରୁ ଡେବ୍ବାତାରା ଅକ୍ତାଗେ ଏଙ୍ଘାଏ ହକ୍ ମାଲ୍ଲାଦିନ୍, ବରନ୍ ନେକାଗେ ଏଙ୍ଘା ବାଙ୍ଗ୍ସ୍କି ଦ୍ୱାର୍ନୁ ଆଡ୍ଡା କାମା କେର୍କିଚି, ଆବ୍ଡ଼ାର୍ ଅକ୍କର୍।”
24ଇବନ୍ ମେନିକିରି ଦଶ୍ଲୋକ୍ ଚେଲାର୍ ଆ ଦୁଇ ଭାଇର୍ଘି ମିଆଁ ଖୀସାରାଚାର୍ କେରାର୍। 25ଯୀଶୁସ୍ ତାଙ୍ଘା ଚେଲାଜାମାରିନ୍ ଚାହାନୁ ମେହିଁକିରି ତେଙ୍ଗିୟାସ୍, “ନିମ୍ ଆହ୍ଦାର୍ କା ବିନାୟାହୁଦୀର୍ଘି ଶାସନ୍ କାମୁର୍ ବିନାୟାହୁଦୀର୍ଘି ମିଆଁ ମନ୍ମର୍ଜୀ ଶାସନ୍ କାମ୍ନାଏ; ଆରୁ ନେଦ୍ ସାର୍କାରୀ ଅଫିସର୍ଜାମାର୍, ଆବ୍ଡ଼ାର୍ ହୁବ୍ଡ଼ାର୍ଘି ମିଆଁ ହକ୍ ଜାମାବାନାଏ। 26ଲେକିନ୍ ନିହ୍ମା ମାଝାନୁ ଏନ୍ନେ ମା ମାନି; ଲେକିନ୍ ନିହ୍ମା ଭିତର୍ନୁ ନେଦ୍ ବାଡ଼୍କା ମାନାଗେ ବେଦ୍ଦନାଏ, ଆବ୍ଡ଼ାର୍ ଦୁସ୍ରାର୍ଘି ସେବକ୍ ମାନର୍; 27ଆରୁ ନେଦିନ୍ ମୁଖିଆ ମାନାଗେ ବେଦ୍ଦନାଏ, ଆବ୍ଡ଼ାର୍ ଦୁସ୍ରାର୍ଘି ଗୁତ୍ତିୟା ମାନର୍; 28ଏସ୍କେ ମୁନୁଷ୍ ହାଦ୍ଦୁସ୍ହି ସେବା କାମ୍ତାଗେ ମାଲ୍ଲା ବାରୁସ୍ ଲେକିନ୍ ଆସ୍ ସେବା କାମାଗେ, ଆରୁ ତାଙ୍ଘା ଜୀଆ ଚିଇକିରି ଢେର୍ ଆଲାରିନ୍ ତାହ୍ମା ପାପ୍ଘି ଦଣ୍ଡ୍ତି ବାଛାବାଗେ ବାର୍ଚ୍କାଦାସ୍।”
ଯୀଶୁସ୍ ଦୁଇ ଲୋକ୍ କାଁଣାରିନ୍ ଏରାଗେ ଶକ୍ତି ଚିଆଲ୍ଦାସ୍
(ମାର୍କୁସ୍ ୧୦:୪୬-୫୨; ଲୁକାସ୍ ୧୮:୩୫-୪୩)
29ଯେତ୍କବାକେନ୍ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ଯେରିଖୋ ସହର୍ତି ଉର୍ଖାଲିୟାର୍ ହତ୍କବାକେନ୍, ଢେର୍ ଆଲାର୍ ତାଙ୍ଘା ପାଛ୍ଲି-ପାଛ୍ଲି କେରାର୍। 30ଆରୁ ଦୁଇ ଲୋକ୍ କାଁଣାର୍, ପାବୁ ଖାଁଣିନୁ ଅକ୍କାଚାର୍, ହତ୍କବାକେନ୍ ଯୀଶୁସ୍ ହୁ ପାବୁ ଚିଇକିରି କାଲ୍ଦାସ୍ବୁଲି ମେନ୍ଚାର୍ ଆରୁ ଜୋର୍ସେ ଚିର୍ରା ରାଇକିରି ତେଙ୍ଗିୟାର୍, “ହେ ପ୍ରାଭୁ, ଦାଉଦ୍ସ୍କି ହାଦ୍ଦୁ, ଏହ୍ମା ମିଆଁ ଦାୟା କାମା।” 31ଲେକିନ୍ ଆଲାର୍ ଆବ୍ଡ଼ାରିନ୍ କାଡ଼େ-କାଡ଼େ ରାଗେ ଧାମ୍କାଚାର୍; ଲେକିନ୍ ଆବ୍ଡ଼ାର୍ ଆରୁହି ଜୋର୍ସେ ଚିର୍ରା ରାଇକିରି ତେଙ୍ଗିୟାର୍, “ହେ ପ୍ରାଭୁ, ଦାଉଦ୍ସ୍କି ହାଦ୍ଦୁ, ଏହ୍ମା ମିଆଁ ଦାୟା କାମା।” 32ଆଙ୍ଗେନ୍ ଯୀଶୁସ୍ ଇଜ୍ଜାସ୍ ଆରୁ ଆବ୍ଡ଼ାରିନ୍ ମେହିଁକିରି ମେନ୍ଚାସ୍, “ଏନ୍ ନିମାଗେ ଏନ୍ଦେର୍ କାମନ୍ବୁଲି ନିମ୍ ସୋଚାଲ୍ଦାର୍?” 33ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ହେ ପ୍ରାଭୁ, ଏସ୍କେ କା ଏମ୍ ଏରା ଅଙ୍ଗମ୍।” 34ଆରୁ, ଯୀଶୁସ୍ ଦାୟାତି ପିଘ୍ଲାରାଇକିରି ଆବ୍ଡ଼ାର୍ଘି ହାନ୍ନୁବନ୍ ଏସ୍ରାସ୍, ଆରୁ ଆବ୍ଡ଼ାର୍ ହୁଙ୍ଗେନିନ୍ ଏରାଗେ ଅଙ୍ଗିୟାର୍; ଆରୁ ତାଙ୍ଘା ପାଛ୍ଲି-ପାଛ୍ଲି କେରାର୍।
Currently Selected:
ମାତିସ୍ 20: xis
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
