Markus 2

Agatn monyamani urakng lumpuh, Yesus mombutian diri-Nyo bokuaso moamputi dosa

(2:1-12)

(Mat. 9:1-8; Luk. 5:17-26)

1Boboropo ari lopas nantai, Yesus bobali' ko kota Kapernaum. Banya' urakng mondinga' obai Sio ado di rumah nantai 2Jadi, kotakan banya' urakng datakng bokumpul di santai. Rumah nantai bisi agatn urakng kotakan pohadapan lawakng pan conyiant ado tompat. Tongahan Yesus momboritoan Pomandiran Allah ko sia', 3ado ompat urakng datakng mombaba' siku' urakng lumpuh. Sia' honda' mombaba' urakng nantai ko Yesus pakai' dinyamani. 4Apo sia' culih mansu' ko dalapm rumah obai banya' bondar urakng. Ongko sia' mongaro hatap pas di pucu' tompat Yesus mongajar. Sia' mouluran urakng lumpuh nantai inyo diulit'an di tikarnyo. 5Pas Yesus moniant iman sia', Yesus bopandir ko urakng lumpuh nantai, “Oi ana'-Ku, dosa kolai udah diamputi.”

6Apo, boboropo guru agama Yahudi inyo tongahan dudu' di santai bopikir dalapm hati sia', 7“Hibo urakng ni'in bopandir ubo nian? Sio mohayam Allah! Ongkah Allah inyo ulih moamputi dosa!”

8Kato-Nyo ko sia', “Mapo kaitn bopikir sama'an nian di dalapm hati kaitn? 9Mono inyo lobih mudah, bopandir ko urakng lumpuh ni'in ‘Dosa kolai udah diamputi’ kata'an bopandir ‘Bodiritncam, angkat tikar kolai nantai ongko bojalatncam’? 10Apo watu ni'in, Aku paca'an monunju'an ko kaitn obai Ana' Monsio bokuaso moamputi dosa di dunia ni'in.”

Jadi Yesus bopandir ko urakng lumpuh nantai, 11“Bodiritn cam huatan angkatcam tikar kolai, ongko pulakngcam!” 12Lansukng urakng nantai bodiritn di pohadapan sia' somuo, moangkat tikarnyo lalu botula' ko luar. Somuo urakng di santai hiratn, lalu momuji Allah. Kato sia', “Kito bolupm kalo moniant kojadian ubo ni'in!”

Yesus bokawal agatn boko urakng inyo dianggap bodosa

(2:13-17)

(Mat. 9:9-13; Luk. 5:27-32)

13Lopas nantai, Yesus botula' agi' ko pinggir danau Galilea. Banya' urakng datakng ko Sio, lalu Sio mongajar sia'. 14Tongahan Yesus bojalatn di santai, Sio moniant ado urakng Yahudi inyo monagih pajak pakai' pomorintahan Romawi. Damonyo Lewi, ana' Alfeus. Lewi tongahan dudu' di rumah tompat pongumpulan pajak. Yesus bopandir ko io, “Tuyut Aku!” Lewi lansukng bodiritn, tuyut Yesus.

15Timpu Yesus tongahan makatn di rumah Lewi, ado banya' ponagih pajak ongko boko urakng bukai inyo dianggap ulih masrakat bodosa, datakng tuyut makatn bosamo-samo agatn Yesus ongko boko murid-Nyo. Obai, banya' di antaro sia' tuyut Yesus. 16Apo watu boko pomimpitn agama Yahudi doi' kolompok Farisi ongko boko guru agama Yahudi moniant Yesus makatn agatn ponagih pajak ongko boko urakng bodosa. Sia' bopandir ko boko murid Yesus, “Mapo Sio makatn bosamo agatn ponagih pajak ongko boko urakng bodosa?”#2:16: Boko pomimpitn agama Yahudi momakai istilah ni'in pakai' morendahan boko urakng inyo dianggap kinyo cucu'. Ponagih pajak kotakng dibonci' urakng Yahudi inyo bukainyo obai sia' bokorojo pakai' Pomorintahan Romawi. Sia' pan mongumpulan pajak lobih banya' daripado inyo ditontuan pomorintah.

17Apo Yesus mondinga' pomandiran sia' nantai. Jadi Sio bopandir, “Urakng inyo sehat kinyo momontikan dokter. Apo urakng boponyakit pasti pontikng dokter. Aku datakng bukainyo pakai' moningkau urakng bondar. Apo Aku datakng pakai' moningkau boko urakng inyo bodosa oca' sia' moninggalan boko dosa sia'.”

Yesus monjolasan alasan hibo boko murid-Nyo kinyo bopuaso

(2:18-22)

(Mat. 9:14-17; Luk. 5:33-39)

18Boko murid Yohanes Pombaptis ongko boko urakng Farisi bopuaso. Jadi, watu nantai, ado boko urakng inyo datakng ko Yesus lalu botakutn, “Boko murid Yohanes ongko boko pongikut urakng Farisi bopuaso. Hibo boko murid kolai cado?”

19Timbas Yesus ko sia', “Watu pongantitn lolaki ija' bosamo agatn pokawalannyo di pogai pokawitan, pasti pokawalannyo kinyo bopuaso. 20Apo watunyo tajahan datakng, pongantitn lolaki dikuti' doi' sia'. Watu nantai, sia' tajahan bopuaso.

21Aman baju inyo manah birat, conyiant urakng inyo monumpal baju nantai agatn momakai solamba'i koitn inyo ija' boharu. Obai, koitn inyo ija' boharu tajahan ngorisut lalu birat di baju nantai monjadi lobih bosar. 22Sama'an nian jam conyiant urakng inyo monyimpatn anggur boharu dalapm kantong kulit inyo manah. Urakng co molabuhan nantai obai watu anggur boharu mongombakng, kantongnyo pocah. Jadi kantongnyo rusa' lalu anggurnyo tumpah. Koduonyo tobuakng. Anggur inyo boharu gola' disimpatn dalapm kantong inyo boharu jam.”

Pongajaran Yesus mongona'i ari Sabat#2:23-28: Ari Sabtu, husus botongga' ongko sombayakng pakai' urakng agama Yahudi.

(2:23-28)

(Mat. 12:1-8; Luk. 6:1-5)

23Timpu ari Sabat, Yesus ongko boko murid-Nyo bojalatn molalu'i lakau gandupm. Boko murid-Nyo momokis boko tangka'i gandupm. 24Jadi, boko urakng Farisi bopandir ko Sio, “Tiat! Porbuatan boko murid Kolai nantai salah! Obai, ado porintah Allah dalapm Hukupm Torat inyo morarakng urakng bokorojo watu ari Sabat.”

25-26Timbas Yesus ko sia', “Pasti kaitn kalo mombaco Buku Suci mongona'i porbuatan Rajo Daud watu Abyatar monjadi Imam Agukng. Daud ongko boko urakng inyo tuyutnyo kolaparan. Jadi, Daud mansu' ko dalapm Rumah Allah, monguti' roti inyo udah diposombahan ko Allah. Monurut Hukupm Torat bayo boko imam ulih bopua' roti nantai. Apo watu nantai, Daud momua'inyo. Io moonju' ko boko urakng inyo tuyutnyo pakai' bopua' jam.”#2:25-26: Kisah mongona'i Rajo Daud ni'in ado di buku 1 Samuel 21:16. Poraturan mongona'i roti nantai ado di buku Imamat 24:5-9.

27Lalu kato Yesus ko sia', “Allah bulah ari Sabat pakai' kopontikan monsio. Sio co bulah monsio pakai' kopontikan ari Sabat. 28Jadi, Ana' Monsio ia'an Tuhatn inyo bokuaso doi' ari Sabat.”

Currently Selected:

Markus 2: TBDS

Highlight

Copy