Matius 8

Yesus monyamani siku' urakng inyo kona' ponyakit kulit inyo bogola'i

(8:1-4)

(Mrk. 1:40-45; Luk. 5:12-16)

1Lopas Yesus turutn doi' bukit, banya' urakng tuyut Sio. 2Ado siku' urakng inyo boponyakit kulit inyo bogola'i datakng ko Yesus. Io tundu' monyungkapan ongko momuhun ko Yesus, “Habakng,#8:2: Baso Yunani momakai kato ‘kurios’ pakai' ‘Tuhatn’ (inyo bokuaso) huatan ‘Habakng’ (urakng inyo tohormat). Banya' ahli Buku Suci bopikir urakng ni'in bolupm mongotohu'i obai Yesus nantai Allah, jadi kato ‘Habakng’ dipakai dalapm torjomahan. Apo, Yesus opat monyamani bodasaran ‘iman’ urakng nantai. Boroti, mungkitn urakng nantai pocayo obai Yesus nantai Tuhatn inyo bokuaso, bukainyo bayo pocayo obai Yesus ulih monyamani. tulukng nyamani aku. Aman Duatn honda', pasti Duatn ulih.”

3Yesus mouluran jari-Nyo, moncama' urakng nantai. Kato-Nyo, “Aku honda'. Nyamancam!” Lansukng io nyamanam doi' ponyakit kulit nantai. 4Ongko Yesus bopandir ko io, “Jangan mongisahan hal ni'in ko sopo pan. Apo, botula'cam ko imam holu'ai pakai' momastian kolai udah nyamanam. Lopas nian onju'cam posombahan sosuai agatn porintah Musa. Nianam monjadi buti ko urakng bukai, kolai bondar-bondar udah nyamanam.”

Yesus monyamani siku' hulutn urakng powira Romawi

(8:5-13)

(Luk. 7:1-10; Yoh. 4:46-53)

5Yesus botula' ko kota Kapernaum. Watu Sio mansu' ko kota nantai, ado siku' urakng powira Romawi inyo datakng minto tulukng ko Sio. 6Kato powira nantai, “Habakng, aku ado siku' urakng hulutn inyo kotakng kompodihan. Io monggarikng di rumah huatan culih angkat.”

7Kato Yesus, “Aku paca'an botula' monyamani io.”

8Apo powira nantai monimbas, “Aku co cucu' monorima' Duatn dalapm rumahku. Apo porintahan doi' si'itn ja'am, pasti hulutnku paca'an nyamanam. 9Aku tohu mo mongona'i kuaso obai aku siku' pan ado pomimpitn inyo gola' ku taat'i. Aku pan ado ana' buah ia'an boko projurit. Aman aku monyiuh salah siku' pakai' botula', ongko pasti io botula'. Aman aku monyiuh inyo bukainyo pakai' datakng, ongko pasti io datakng. Aman aku monyiuh hulutnku pakai' mongorojoan sosuatu, pasti io mongorojoannyo.”

10Yesus hiratn mondinga' pomandiran powira nantai. Yesus bopandir ko sia' inyo tuyut Sio. Kato-Nyo, “Dinga'anbo, Aku bolupm kalo monomuan iman sobosar ni'in. Doi' banso-Ku urakng Israel, bolupm kalo ku tomu'i urakng inyo pocayo ko Allah samo sama'an powira Romawi ni'in. 11Dinga'anbo ni'in: Banya' urakng inyo bukainyo urakng Israel paca'an datakng doi' somuo ponjuru dunia. Sia' paca'an dudu' makatn bosamo agatn Abrahapm, Ishak ongko Yakub di dalapm Koraja'an Sorugo. 12Apo soharusnyo urakng inyo mansu' ko dalapm Koraja'an nantai paca'an dibuakan ko noraka. Di santai sia' paca'an monangis huatan gorit'an gigi obai kotakng ajab sonsaro.”

13Ongko Yesus bopandir ko powira nantai, “Pulakngcam. Kolai udah pocayo Aku ulih monyamani hulutn kolai. Hal nantai paca'an tojadi.” Watu nantai jam hulutnnyo nantai nyamanam.

Yesus monyamani montuho botina' Simon huatan boko urakng bukai

(8:14-17)

(Mrk. 1:29-34; Luk. 4:38-41)

14Yesus botula' ko rumah Petrus. Di santai, montuho botina' Petrus hontapm gorikng. Jadi, io mangkakan di kotidu'annyo. Yesus moniant nantai, 15ongko moncama' longannyo. Watu nantai jam, montuho botina' Petrus nyamanam. Io bodiritn ongko mula'i molayati Yesus.

16Watu babahari, banya' urakng sakit dibaba' ko Yesus, tomansu' inyo korasu'an boko roh jahat. Agatn pomandiran-Nyo mo, Yesus monundukng boko roh jahat nantai. Sio pan monyamani somuo urakng inyo sakit di santai. 17Poristiwa nantai tojadi oca' pomandiran Allah monjadi nyata. Timpu joman komai Nabi Yesaya monulis pomandiran Allah nantai dinga' ni'innan bunyinyo: “Sio nanam monanggukng ajab sonsaro kito huatan monyamani ponyakit kito.”#8:17: Doi' buku Yesaya 53:4

Boko syarat pakai' monjadi murid Yesus

(8:18-22)

(Luk. 9:57-62)

18Timpu Yesus moniant urakng banya' inyo mongoliliki-Nyo nantai, ongko Sio monyiuh boko murid-Nyo oca' noi' porohu monyomboraki danau. 19Sobolupm botula', ado guru agama Yahudi datakng. Katonyo ko Yesus, “Guru, aku paca'an hala tuyut Duatn, ko mono pan Duatn botula'.”

20Apo Yesus bopandir ko io, “Payau ado lubakngnyo. Burukng ado sayakngnyo. Apo biar pan Aku Inyo Diutus Allah Pakai' Monjadi Monsio, Aku co nyiant kodiapan.”#8:20: Yesus honda' urakng nantai mongotohu'i aman io monjadi murid-Nyo, io paca'an mohadapi banya' kosusahan.

21Siku' urakng inyo bukai, ia'an salah sikuꞌ urakng murid-Nyo, bopandir ko Sio, “Tuhatn, aku honda' tuyut Duatn. Apo aku ija' minto ijitn pakai' momasar bopaiku holu'ai.”

22Apo Yesus bopandir ko io, “Hincapm tuyut Aku ninam. Biaram boko urakng mati momasar urakng mati sia'.”#8:22: Urakng inyo mati socaro rohani ia'an urakng inyo kinyo pocayo ko Yesus. Yesus co bomasud kito co ulih momasar urakng mati apo tugas inyo kotakng pontikng pakai' urakng inyo pocayo (urakng inyo hidup socaro rohani) ia'an tuyut Yesus.

Yesus monongga'an bonakau

(8:23-27)

(Mrk. 4:35-41; Luk. 8:22-25)

23Lopas nantai, Yesus noi' ko dalapm porohu. Boko murid-Nyo tuyut Sio. 24Watu sia' tongahan bolayar, kali labuh ado bonakau mohontapm danau nantai, apo watu nantai Yesus tongahan tidu'. Golumbakng bosar mohontapm porohu sia' sampai honda' tonggolapm. 25Jadi, boko murid-Nyo mondataki-Nyo ongko monggagaian Sio. Kato sia', “Tuhatn! Tulukng! Kito paca'an bomatian!”

26Kato Yesus ko sia', “Kaitn inyo kurakng pocayo, kaitn jangan gola'.” Lalu Yesus bodiritn ongko monyiuh bonakau huatan danau nantai botongga'. Ongko, lansukng danau nantai monjadi diapm.

27Sia' hiratn. Kato sia', “Urakng ni'in kotakan luar biaso. Bonakau huatan danau pan taat agatn Sio.”

Yesus monyamani duo urakng inyo korasu'an boko roh jahat

(8:28-34)

(Mrk. 5:1-20; Luk. 8:26-39)

28Lopas nian, Yesus bosamo boko murid-Nyo sampai di soborakng danau di doerah Gadara.#8:28: Doerah ni'in di sopia' timur danau Galilea. Nantai bukainyo doerah urakng Yahudi. Di sopia' barat danau Galilea nantai doerah urakng Yahudi. Di santai, ado duo urakng inyo dirasu'i boko roh jahat inyo tinggal di boko gua tompat pasaran. Duo urakng nantai kotakng bobohayo sampai co nyiant urakng inyo borani molalu'i jalatn nantai. Duo urakng nantai datakng ko Yesus, 29ongko mondorah, “Oi Ana' Allah! La'apo urusan Duatn agatn koi? Apobai Duatn datakng honda' mohukupm koi sobolupm watunyo inyo ditontuan Allah?” 30Kinyo jouh doi' sia' ado banya' bondar babi tongahan bogoyap pomakatn di ririkng bukit. 31Jadi, boko roh jahat nantai mominto ko Yesus, “Aman Duatn monundukng koi koluar doi' duo urakng ni'in, siuhcam koi momansu'i boko babi nian.”

32Yesus bopandir ko boko roh jahat nantai, “Botula'cam!” Lansukng koluaram sia' ongko momansu'i boko babi nantai. Boko babi nantai rari molansakng doi' ririkng bukit inyo tinggi nantai ko dalapm danau, ongko mati lomas. 33Boko ponjago babi nantai moniant poristiwa nantai. Jadi, sia' rari ko kota. Di santai, sia' mongisahan somuo hal inyo tojadi, tomansu' la'apo inyo tojadi agatn koduo urakng nantai inyo komainyo korasu'an boko roh jahat. 34Ongko, soluruh pondudu' kota koluar pakai' monomu'i Yesus. Sia' momuhun oca' Sio moninggalan doerah sia'.

Currently Selected:

Matius 8: TBDS

Highlight

Copy