Matius 22
22
Yesus monyandikan boko pomimpitn urakng Yahudi agatn urakng inyo monula' hundakan
(22:1-14)
(Luk. 14:15-24)
1Lalu Yesus monyampaian poumpamoan agi' ko sia'. 2Kato-Nyo, “Koraja'an Sorugo samo sama'an kisah ni'in. Ado siku' urakng rajo inyo moadoan pogai ngawitan ana'nyo. 3Rajo nantai monyiuh boko hulutnnyo oca' moningkau boko urakng inyo dihundakng boko hulutnnyo, inyo bukai. Katonyo boko urakng inyo dihundakng ko pogai nantai kinyo honda' datakng. 4Jadi, io monyiuh sia', ‘Padahan ko boko urakng inyo dihundakng nantai obai pomakatn pogai udah siap. Boko sapi huatan boko ana' sapiku inyo gomu' udah disombolih. Somuonyo udah siap. Maracam datakng ko pogai kawitan ana'ku ni'in!’
5Apo boko urakng inyo dihundakng nantai totap co moolikannyo. Ado inyo botula' ko lakaunyo. Ado inyo botula' mourus usahanyo. 6Malahan ado inyo bukai sampai monangkap boko hulutn rajo nantai. Sia' mondorako'i huatan mombunuh boko hulutn nantai. 7Rajo nantai kotakan godi. Sio monyiuh tontaranyo pakai' mombunuh boko urakng inyo mombunuh boko hulutnnyo nantai. Sio pan monyiuh tontaranyo pakai' moncucul kota sia'.
8Lopas nantai, io bopandir ko boko hulutnnyo, ‘Pogai kawitn udah siap. Apo boko urakng inyo dihundakng tontai kinyo cucu'. 9Jadi botula'cam ko boko posimpakan jalatn. Hundakngcam somuo urakng inyo kaitn tomu'i di santai oca' sia' datakng ko pogai kawitn ni'in.’ 10Lalu boko hulutn nantai botula' ko boko jalatn mohundakng somuo urakng inyo di tomu'inyo, ia'an boko urakng jahat huatan boko urakng boi'. Lalu, banya' bondar boko urakng inyo dihundakng nantai datakng.
11Lopas nian, rajo nantai mansu' ko ruakan pakai' monomu'i boko tamu'nyo nantai. Timpu nantai, io moniant ado siku' inyo co momakai pakai'an husus pakai' pogai kawitn. 12Jadi, rajo botakutn ko io, ‘Uai somadikan, ubo apo kulo ulih mansu' ko si'itn co momakai pakai'an pogai kawitn?’ Urakng nantai co bopandir la'apo pan. 13Lalu, rajo nantai bopandir ko boko hulutnnyo, ‘Kobat kaki huatan longan urakng ni'in. Buakancam io ko tompat inyo kotakan potakng. Somuo urakng di santai paca'an monangis ongko bokorit gigi obai kotakan mondorita'.’ ”
14 Lalu Yesus monuntukan kisah-Nyo nantai agatn bopandir, “Banya' urakng inyo ditingkau pakai' monjadi warga Koraja'an-Nyo, apo bayo sodikit mo inyo topilih.”#22:11-14: Dalapm poumpamoan ni'in rajo nantai molambakan Allah, pogai molambakan Koraja'an Allah, boko tamu' inyo dihundakng potamo (ayat 3-7) molambakan boko urakng Yahudi inyo monula' hundakan Allah, boko tamu' inyo bukai molambakan boko urakng Yahudi damo bukainyo urakng Yahudi inyo monorima' hundakan Allah. Urakng inyo mansu' ko ruakan pogai kawitn nantai molambakan urakng inyo moncubo mansu' ko dalapm Koraja'an Allah agatn caro bukai daripado pocayo Yesus.
Boko pomimpitn urakng Yahudi balakng mouru'an Yesus
(22:15-46)
Potakutan mongona'i pombayaran pajak ko pomorintahan Romawi
(22:15-22)
(Mrk. 12:13-17; Luk. 20:20-26)
15Lopas nian, boko pomimpitn agama Yahudi doi' kolompok Farisi nantai botula'am doi' santai. Sia' bohajat pakai' monakutan sosuatu ko Yesus agatn tujuan oca' sia' ulih monyalahan Yesus. 16Jadi, sia' monyiuh boko murid sia' huatan boko urakng inyo mondukukng Rajo Herodes botula' ko Yesus. Boko urakng nantai bopandir ko Yesus, “Guru, koi tohu Duatn urakng inyo jujur. Duatn mongajar agatn jujur mongona'i caro hidup sosuai agatn porintah Allah. Duatn co bopihak ko boko urakng totontu. Obai nantai, Duatn co gola' agatn sopo pan. 17Monurut Duatn, apobai poraturan Allah inyo ditulis Musa dalapm Hukupm Torat moijitan kito mombayar pajak ko Rajo Roma kata'an cadoai?”
18Apo Yesus tohu mo tujuan sia' inyo jahat nantai. Ia'an Sio bopandir, “Kaitn pompadah boi' mo. Mapo kaitn monjebak-Ku? 19Cubo tiat'an ko Aku sopingka'i duit pira' inyo kaitn gunoan pakai' mombayar pajak!” Jadi, sia' moonju' sopingka'i duit pira' ko Yesus.
20Yesus botakutn ko sia', “Gambar huatan damo sopo ado di siatn?”
21Timbas sia', “Gambar huatan damo Rajo Romawi inyo disobut Kaisar.”
“Aman ubo nian,” kato Yesus, “Onju' ko Kaisar la'apo inyo umputnnyo. Onju'jam ko Allah la'apo inyo monjadi umputn Allah!”
22Sia' kotakng hiratn mondinga' timbas Yesus nantai. Lalu, sia' moninggalan Yesus.
Potakutan mongona'i bobali' hidup agi' doi' komatian
(22:23-33)
(Mrk. 12:18-27; Luk. 20:27-40)
23Timpu ari nantai jam, boboropo pomimpitn agama Yahudi inyo bukai datakng ko Yesus. Sia' doi' kolompok Saduki inyo co pocayo obai urakng paca'an bobali' hidup agi' lopas jadi mati. Jadi, sia' honda' monjebak Yesus agatn potakutan mongona'i nantai. Kato sia', 24“Guru, Musa moajaran poraturan ubo ni'in: Aman siku' urakng lolaki mati, bolupm boana', jadi somadikannyo gola' kawitn agatn iparnyo nantai oca' dionji'i koturutan pakai' somadikannyo inyo udah mati nantai.#22:24: Tiat Ulangan 25:5-6 ongko Kojadian 38. 25Nah, koi ado tujuh somadikan kandukng, inyo kojula'an bobini, apo io nantai mati sobolupm boana'. Jadi, io moninggalan bininyo nantai pakai' somadikannyo. 26Somadikan inyo koduo kawitn agatn iparnyo nantai. Apo, io pan mati sobolupm boana' jam. Ubo nian jam tojadi ko somadikannyo kotigo. Huatan ubo nian jam tojadi sampai somadikannyo kotujuh. 27Ponsuahannyo, lopas jadi sia' bomatian nam, botina' nantai pan mati jam. 28Jadi, kotujuh urakng somadikan nantai kawitn agatn botina' inyo samo. Aman bondar urakng ulih bobali' hidup agi', botina' nantai paca'an monjadi bini inyo mono?”#22:28: Urakng Yahudi ulih mo siku' lolaki bobini lobih doi' siku' (Biar pan bukainyo kohonda' Allah; Kojadian 2:24), apo co ulih siku' botina' bolaki lobih doi' siku'. Urakng Saduki monyangko kisah sia' ulih mombutian co nyiant urakng bobali' hidup agi', obai aman ado urakng inyo bobali' hidup agi', sia' monyangko botina' nantai paca'an bisi tujuh laki, inyo monurut sia' co diijitan Allah. Sia' jam bopikir kisah ni'in paca'an bulah Yesus kotiat'annyo budu di pohadapan urakng banya'.
29Timbas Yesus ko sia', “Kaitn kotakan salah obai kaitn co mongoroti Buku Suci huatan kuaso Allah! 30Watu boko urakng bobali' hidup agi', sia' co bobini co bolaki agi'. Sia' paca'an hidup samo sama'an molekat di sorugo. 31Hal mongona'i boko urakng bobali' hidup agi' doi' komatian ado di dalapm Buku Suci. Apo, pasti kaitn bolupm mongoroti nantai. Kato Allah, 32‘Aku ni'innam Allah inyo disombah Abrahapm, Ishak, ongko Yakub.’#22:32: Doi' buku Koluaran 3:6 Allah nantai bukainyo Allah disombah urakng mati apo Allah inyo disombah urakng hidup!”
33Timpu urakng banya' mondinga' ponjolasan Yesus nantai, sia' topocongo bondar agatn ajaran-Nyo.
Potakutan mongona'i porintah Allah inyo kotakan pontikng
(22:34-40)
(Mrk. 12:28-34; Luk. 10:25-28)
34Boko urakng Farisi mondinga' obai Yesus bulah boko urakng Saduki nantai langunt. Jadi, watu nantai sia' bokumpul. 35Siku' guru agama Yahudi doi' kolompok sia' nantai moncubo Yesus agatn potakutan bukainyo agi'. Katonyo, 36“Guru, doi' somuo porintah Allah dalapm Hukupm Torat, inyo mono inyo kotakan pontikng?”
37Kato Yesus ko sia', “Kasihicam Tuhatn Allah kaitn agatn sogonap hati kaitn, sogonap jiwa kaitn, ongko sogonap akal budi kaitn.#22:37: Doi' buku Ulangan 6:5. 38Porintah nantaiam inyo kotakng utamo ongko inyo kotakan pontikng. 39Samo sama'an porintah nantai, ado porintah koduo inyo samo pontikngnyo, ia'an, ‘Kasihicam sosamo kaitn sama'an kaitn mongasihi diri kaitn siku'.’#22:39: Baco doi' buku Imamat 19:18. 40Koduo porintah nantaiam dasar doi' somuo porintah di dalapm Hukupm Torat ongko buku boko nabi.”
Yesus, Rajo Inyo Dijanjian Allah, lobih bokuaso daripado bayo koturutan Rajo Daud
(22:41-46)
(Mrk. 12:35-37; Luk. 20:41-44)
41Somontaro boko urakng Farisi nantai ija' bokumpul di santai, Yesus botakutn ko sia', 42“Pikirancam mongona'i Rajo Inyo Dijanjian Allah inyo disobut ‘Kristus’. Doi' Koturutan sopo kironyo Sio?”
Timbas sia', “Kristus ia'an koturutan doi' Rajo Daud.”
43“Aman ubo nian,” kato Yesus, “Hibo Roh Allah bulah Daud moningkau ‘Kristus’ sobagai ‘Tuhatn’? Ni'innam pomandiran Daud:
44‘Tuhatn bopandir ko Tuhatnku:
Dudu'cam di sopia' kanan-Ku,
sampai Aku mongalahan boko musuh Duatn,
bulah sia' ubo kotonja'an kaki Duatn huatan bulah sia' tundu' agatn kuaso Duatn.’#22:44: Doi' buku Mazmur 110:1
45Jadi, Daud monyobut Kristus sobagai ‘Tuhatn’. Obai nantaiam, pasti Kristus lobih bokuaso doi' koturutan Daud inyo biaso.”#22:45: Yesus, Rajo Inyo Dijanjian Allah, ni'innan monsio (koturutan Daud) apo Allah (Tuhatn Daud). Tiat Roma 1:3-4.
46Co nyiant siku' pan urakng inyo ulih monikaki Yesus. Doi' ari nantai, co nyiant inyo borani monjebak Sio agatn potakutan agi'.
Currently Selected:
Matius 22: TBDS
Highlight
Share
Copy
Want to have your highlights saved across all your devices? Sign up or sign in
