Matius 18

Monurut Allah, sopo palikng tohormat

(18:1-5)

(Mrk. 9:33-37; Luk. 9:46-48)

1Watu nantai, boko murid Yesus datakng ko Sio. Kato sia', “Sopo inyo palikng tohormat dalapm Koraja'an Sorugo?”

2Yesus moningkau siku' urakng bobia' kocit huatan mombaba'nyo ko tongah-tongah sia'. 3Kato Sio, “Dinga'anbo! Kaitn gola' morubah caro hidup ongko rondah hati sama'an bobia' kocit ni'in. Aman cado, kaitn kinyo paca'an mansu' ko dalapm Koraja'an Sorugo. 4Apo urakng inyo monjadi sama'an bobia' kocit ni'in morendahan dirinyo, ongko io nantai urakng inyo palikng tohormat dalapm Koraja'an Sorugo. 5Aman ado urakng inyo monorima' bobia' kocit sama'an ni'in obai Aku, io samo sama'an monorima' Aku jam.”

Boko murid Yesus gola' hala molawatn dosa

(18:6-11)

(Mrk. 9:42-48; Luk. 17:1-2)

6 Yesus pan bopandir, “Sotiap urakng inyo bulah salah siku' bobia' kocit#18:6: Ado boboropo pondapat mongona'i roti doi' sotilah ‘boko urakng kocit’. 1) Boko urakng inyo kinyo pontikng kinyo dirogo'i masrakat, sama'an urakng jaro huatan urakng boponyakit; 2) Boko murid Yesus; 3) Boko murid Yesus inyo bolupm ado iman inyo kuat; damo 4) Boko bobia' kocit. inyo pocayo ko Aku oca' bulah dosa, Allah paca'an mohukupm urakng nantai. Jadi, lobih boi' aman batu bosar dikokalai dikobat'an ko lihi'nyo, lalu io dibuakan ko dalapm lout.#18:6: Ma'apo hal nantai lobih boi' pakai' io? Ado boboropo pondapat 1) Aman io bulah somuo siku' urakng kocit bodosa, io paca'an dihukupm lobih borat doi' caro komatiannyo nantai. KATA'AN 2) Aman urakng nantai mati sobolupm bulah urakng kocit bodosa, boroti io kinyo paca'an dihukupm Allah pakai' porbuatan nantai. 7Allah paca'an mohukupm dunia ni'in obai boko hal inyo bulah boko urakng bodosa! Memang boko hal nantai gola' ado, apo Allah paca'an mohukupm sotiap urakng inyo bulah urakng bukai bodosa!

8Aman longan kaitn huatan kaki kaitn bulah kaitn bodosa tota' ja' lalu buakancam. Obai, lobih boi' aman kaitn mondapat'an hidup somanah-manahnyo di sorugo biar pan co nyiant longan huatan kaki nantai, daripado kaitn totap ado longan huatan kaki nantai apo dibuakan ko dalapm api noraka nononyo. 9Aman mato kaitn bulah kaitn bodosa, cungkilcam lalu buakan mato nantai! Obai, lobih boi' aman kaitn mondapat'an hidup somanah-manahnyo di sorugo biar pan co nyiant bigi' mato, daripado kaitn totap ado bigi' mato nantai apo dibuakan ko dalapm api noraka nononyo.

10Ingantcam, jangan mohayam salah siku' doi' boko urakng kocit ni'in. Obai, dinga'anbo ni'in: Ado boko molekat di sorugo inyo monjago'i sia'. Boko molekat nantai hala ado di hadapan Bopai-Ku di sorugo. [ 11Obai Ana' Monsio datakng pakai' monyolamant'an urakng inyo sosat.]”

Poumpamoan Yesus mongona'i domba inyo sosat

(18:12-14)

(Luk. 15:4-7)

12Pikirancam mongona'i contoh ni'in: Soumpamonyo ado siku' urakng inyo bisi soratus iku' domba. Aman io kohilakan siku' domba obai domba nantai sosat, pasti io paca'an moninggalan inyo sombilatn puluh sombilatn iku' domba bukainyo di bukit oca'nyo ulih botula' monggoyapi domba inyo sosat nantai. 13Dinga'anbo! Aman io bohasil monomuan domba nantai, pasti io paca'an kotakng rindakng. Io paca'an lobih rindakng obai mondapat'an siku' domba nantai daripado sombilatn puluh sombilatn iku' domba inyo kinyo sosat. 14Ubo nian jam Bopai kaitn di sorugo kinyo honda' salah siku' bobia' kocit sosat.

Caro monosihat'i somadikan inyo bodosa

(18:15-20)

15“Aman somadikan kaitn bulah dosa, botula'cam socaro sonsiku'an ko io pakai' monosihat'i io.#18:15: Poniant'an urakng inyo bulah dosa ni'in urakng inyo pocayo. Kito ulih monosihat'i urakng bukai inyo pocayo. Apo, Allah paca'an mohakipi boko urakng inyo bolupm pocayo ko Yesus. Tiat 1 Korintus 5:12-13. Aman io mondinga'an kaitn, ongko kaitn udah moarahan io agi' pakai' hidup agatn caro inyo bondar. 16Aman io kinyo honda' mondinga'an nosihat kaitn, botula'cam agi' ko io agatn mombaba' siku' damo duo urakng. Obai sotiap pokaro pontikng duo tigo sasi pakai' momastian pokaro nantai bondar-bondar tojadi.#18:16: Poraturan ni'in doi' buku Ulangan 19:15. 17Aman io kinyo honda' mondinga'an nosihat kaitn, sampaiancam pokaro nantai ko jomaat. Aman io kinyo honda' jam mondinga'an nosihat sia', ongko anggapcam io nantai urakng inyo kinyo mongonal Allah huatan ponagih pajak.#18:17: Ponagih pajak dibonci' obai sia' bokorojo mongumpulan pajak pakai' pomorintahan Romawi. Opat jam, ponagih pajak mongolakari.

18Dinga'anbo ni'in! Aman kaitn mongobat sosuatu di dunia ni'in, hal nantai pan paca'an dikobat di sorugo. Apo aman kaitn molopasan sosuatu di dunia ni'in, hal nantai pan paca'an dilopasan di sorugo.

19Dinga'anbo ni'in jam: Aman ado duo damo lobih di antaro kaitn di dunia ni'in bohoupm-bokubo mongona'i la'apo pan lalu mondoa'an hal nantai, ongko Allah Bopai-Ku di sorugo paca'an mongabulan doa nantai. 20Obai, aman ado duo ongko tigo urakng bokumpul obai pocayo ko Aku, ongko Aku pan ado di tongah-tongah sia'.”#18:20: Yesus moonji'i hak ko urakng pocayo pakai' bulah koputusan dalapm boko hal sama'an di ayat 15-17. Kosatuan urakng pocayo bulah porbuatan huatan doa kito (di dunia ni'in) lobih sosuai agatn kohonda' Allah (di sorugo).

Poumpamoan mongona'i pongamputan

(18:21-35)

21Lopas nantai Petrus datakng ko Yesus. Kato io, “Tuhatn, aman somadikanku bulah dosa ko aku, sampai boropo kali kiro aku gola' moamputinyo? Sampai tujuh kali?”

22Yesus bopandir ko io, “Bukainyo tujuh kali. Dinga'anbo ni'in: Kolai gola' moamputi io tujuh puluh kali tujuh kali.

23Koraja'an Sorugo samo sama'an kisah ni'in. Ado siku' urakng rajo honda' bulah pohitukan duit inyo udah io pinjapan ko boko hulutnnyo. 24Jadi, io mula'i boriso'i hutakng boko hulutnnyo. Timpu nantai, ado siku' urakng hulutn bisi hutakng sobanya' gajihnyo somanah lima' bolas tohutn#18:24: Teks asli, baso Yunani momakai ‘sopuluh ribu talenta’.. Hulutn nantai dibaba' mohadap rajonyo. 25Apo hulutn nantai culihnyo mombayar hutakngnyo. Obai nantai, rajo monyiuh oca' hulutn nantai dijual pakai' pacal. Boko ana' bininyo, huatan somuo kodampuannyo pan dijual pakai' mombayar hutakngnyo inyo kotakng banya' nantai. 26Apo, hulutn nantai tundu' monyungkapan di hadapan rajo. Katonyo, ‘Tulukng cakah holu'ai duatn agatn aku. Nononyo, paca'an kubayar mo somuo hutakngku.’ 27Rajo nantai mooso salu' ko hulutn nantai ongko io dibebasan huatan hutakngnyo dihilakan.

28Apo, hulutn nantai koluar lalu botomu agatn kawalnyo korojo inyo bohutakng ko io sobanya' upahnyo soratus ari korojo.#18:28: Teks asli, baso Yunani momakai ‘soratus dinar’. Hutakng nantai cukup banya' apo sodikit dibandikan agatn hutakng inyo udah dihilakan rajo. Io monangkap huatan mongoci' kawalnyo nantai. Katonyo, ‘Bayar hutakng kolai!’ 29Kawalnyo nantai tundu' monyungkapan di hadapannyo lalu momuhun, ‘Tulukng cakah holu'ai duatn agatn aku. Nononyo, paca'an kubayar mo somuo hutakngku.’ 30Apo bolai'nyo. Io monyorahan kawalnyo nantai oca' dimansu'an ko dalapm ponjara sampai io ulih mombayar somuo hutakngnyo.

31Boko pokawalannyo inyo bukainyo moniant hal nantai. Sia' kotakng salu' lalu monyampaian porbuatan hulutn nantai ko rajo. 32Jadi, rajo nantai moningkau hulutn nantai. Kato rajo nantai ko io, ‘Kolai ni'in hulutn inyo jahat. Aku udah mohilakan somuo hutakng kolai obai kolai momuhun ko aku. 33Jadi kohonda'nyo kolaipan monunju'an oso salu' ko kawal kolai, samo sama'an aku udah monunju'annyo ko kolai!’ 34Rajo nantai kotakan godi. Io monyorahan hulutn nantai ko boko ponjago ponjara pakai' didorako'i sampai io ulih mombayar hutakngnyo.

35Samo sama'an rajo nantai mohukupm hulutnnyo, Allah Bopai-Ku di sorugo paca'an mohukupm kaitn aman kaitn co somombondarannyo moamputi boko somadikan kaitn.”

Currently Selected:

Matius 18: TBDS

Highlight

Copy