Matius 10

Yesus moonji'i kuaso ko koduo bolas rasul-Nyo

(10:1-4)

(Mrk. 3:13-19; Luk. 6:12-16)

1Yesus moningkau koduo bolas murid-Nyo pakai' bokumpul. Ongko, Sio moonji'i ko sia' kuaso pakai' monundukng boko roh jahat huatan monyamani bomacapm ponyakit. 2Ni'in daptar damo koduo bolas rasul nantai: Potamo, Simon (inyo Yesus damo'i Petrus jam), Andreas (somadikan Simon nantai), Yakobus (ana' Zebedeus) ongko somadikannyo Yohanes, 3Filipus, Bartolomeus, Tomas, Matius (ponagih pajak nantai), Yakobus (ana' Alfeus), Tadeus, 4Simon (urakng Zelot),#10:2-4: Zelot = Kolompok urakng Yahudi inyo bojuakng oca' bebas doi' kokuasa'an Romawi. Yudas Iskariot (inyo lopas nian monyorahan Yesus ko musuh-Nyo).

Yesus moutus koduo bolas rasul

(10:5-15)

(Mrk. 6:6b-13; Luk. 9:1-6)

5Ongko, Yesus moutus koduo bolas rasul agatn boko potunju' ni'in. Kato-Nyo, “Jangan botula' ko doerah boko urakng inyo bukainyo urakng Yahudi. Jangan jam ko boko kota urakng Samaria. 6Apo botula'cam ko boko urakng Israel inyo momontikan potulukan. Sia' samo sama'an boko domba inyo hilakng. 7Boritoancam ko sia' nantai: Koraja'an Sorugo udah dampikam. 8Nyamanicam urakng sakit. Pulahcam urakng mati bobali' hidup. Nyamanicam urakng inyo boponyakit kulit inyo bogola'i. Tundukngcam boko roh jahat. Kaitn udah monorima' borokat apo co bobayar. Ongko kaitn pan gola' moonji'i ko urakng bukai agatn co dibayar. 9Jangan mombaba' omas, pira' ongko tombago dalapm ikat pinggakng kaitn. 10Jangan mombaba' tas pobokalan, pakai'an posalitn, sandal ponggonti, damo tungkah. Jangan dibaba' somuo nantai obai sotiap urakng bokorojo totap mondapat pomakatn.

11Timpu kaitn mansu' ko sotiap kota ongko laman, goyapcam siku' urakng inyo honda' monorima' kaitn. Bodiapmcam agatn io sampai kaitn botula' agi'. 12Aman kaitn momansu'i ko rumah uyakng, ucapan salapm ko ‘Boko urakng inyo bodiapm di rumah nantai.’ 13Aman sia' honda' monorima' salapm sonang-asau nantai, Allah bondar-bondar paca'an bulah koluarga nantai sonang-asau. Apo, aman sia' kinyo honda' monorima'nyo, sonang-asau nantai paca'an bobali' ko kaitn.#10:13: Biar pan boko murid mohadapi urakng inyo monula' sia', sia' totap ado sonang-asau Allah. Mungkitn boko murid ni'in mooso gola' momborokati boko urakng inyo co sia' konal. Aman urakng nantai jahat, mungkitn sia' jam dianggap jahat. Damo mungkitn sia' gola' dihukupm Allah. Apo, sia' sobondarnyo jangan gola', obai hal kojahatan damo koboi'an nantai urusan urakng nantai agatn Allah. 14Aman ado urakng inyo kinyo monorima' kaitn damo kinyo honda' mondinga' pomandiran kaitn mongona'i Kabar Boi', koluarcam doi' rumah damo kota nantai. Tinggalancam sia'. Tata'cam dobu doi' kaki kaitn sobagai poringant'an hukupan pakai' sia'. 15Dinga'ancam ni'in! Hukupan inyo sia' torima' watu Ari Ponghakipan paca'an lobih borat doi' hukupan ko kota Sodom agatn Gomora di joman komai.”#10:15: Kisah mongona'i Sodom ongko Gomora ado di buku Kojadian 19:24-28.

Boko murid Yesus paca'an didorako'i

(10:16-33)

(Mrk. 13:9-13; Luk. 12:2-9, 21:12-19)

16“Dinga'anbo ni'in! Aku moutus kaitn samo sama'an boko ana' domba ko boko bonatakng ganas. Obai nantai, kaitn gola' corodi' sama'an ular. Apo kaitn pan gola' tulus hati sama'an burukng daro. 17Boboi'cam! Obai ado boko urakng inyo paca'an monangkap kaitn ongko mombaba' kaitn ko hadapan boko majelis agama pakai' diadili. Sia' paca'an moncambuk kaitn di boko rumah sombayakng. 18Obai kaitn pongikut Aku, kaitn paca'an dibaba' ko boko ponguaso ongko boko rajo pakai' diadili. Nantaiam watunyo kaitn paca'an bosasi mongona'i Aku ko sia' urakng Yahudi huatan ko boko urakng inyo bukainyo urakng Yahudi. 19Timpu kaitn ditangkap, jangan gola' mongona'i pomandiran inyo paca'an kaitn pandiran pakai' mombela diri. Jangan gola' jam mongona'i caronyo kaitn gola' monyampaian pomandiran nantai. Obai watu nantai, Allah siku' paca'an moonji'i ko kaitn pomandiran. 20Jadi, sobondarnyo nantai bukainyo kaitn inyo bopandir. Apo Roh Allah Bopai di dalapm kaitn paca'an bulah kaitn momadahan pomandiran nantai.

21Paca'an tojadi obai boko urakng paca'an monyorahan boko somadikan sia' pakai' dibunuh. Paca'an ado boko Bopai inyo monyorahan boko poana'an sia' jam. Paca'an ado boko poana'an inyo molawatn monyorahan indai-bopai sia' pakai' dibunuh. 22Somuo urakng paca'an mombonci' kaitn obai kaitn tuyut Aku. Apo sotiap urakng inyo totap pocayo ko Aku sampai koponsuahannyo, sia' paca'an disolamant'an. 23Aman kaitn didorako'i di sobuah kota, raricam ko kota inyo bukai. Dinga'anbo! Kaitn co paca'an jadi mondataki somuo kota di tanah Israel nantai sobolupm Ana' Monsio datakng.

24 Ingantcam! Siku' urakng murid kinyo lobih pontikng doi' gurunyo. Siku' urakng hulutn kinyo lobih pontikng doi' habakngnyo. 25Udah cukup aman siku' urakng murid monjadi samo sama'an gurunyo huatan siku' urakng hulutn monjadi samo sama'an habakngnyo. Aku ni'in pomimpitn kaitn huatan sia' udah moningkau Aku sobagai Rajo Sitatn.#10:25: Dalapm baso asli, Baso Yunani, sotilah inyo digunoan pakai' Rajo Sitatn nantai Beelzebul. Nantai damo duato. Tiat 2 Raj 1:2. Jadi, pasti paca'an mompolakuan kaitn agatn lobih jahat agi'!.”

26Jadi, “Jangannam kaitn gola' tohadap sia'. Somuo inyo tobumbutn ni'inan, nononyo paca'an kotiat'an. Somuo inyo diombakan paca'an dikotohu'i. 27Boko hal inyo dikatoan socaro bototapu' pandiran cam socaro tobuka' watu siakng ari. Boko hal inyo dikucap'an di kolindakan kolai, boritoan doi' pucu' hatap rumah.#10:27: Hatap rumah di doerah Timur Tongah bobontu' rato. Boko rumah bodampikan, lalu urakng ulih monyampaian pongumuman doi' pucu' hatap rumah. 28Jangan gola' agatn sia' inyo bayo ulih mombunuh kaitn. Sia' kinyo bokuaso mombunuh jiwa kaitn. Apo kaitn harus gola' agatn Allah. Obai, Sio bokuaso mombonasoan jiwa ongko bukakng-tubuh kaitn di dalapm noraka!

29Duo iku' burukng pipit dijual kotakng mudah. Apo co nyiant siku' pan mati kocuali nantai sosuai agatn kohonda' Allah Bopai kaitn. 30-31Allah lobih morogo'i kaitn daripado banya' burukng pipit nantai. Boropo banya' lambai' rambut di kopala' kaitn pan Sio udah tohu. Jadi jangan kaitn gola'.

32Sotiap urakng inyo moaku'i Aku di hadapan urakng bukai Aku pan paca'an moaku'inyo di hadapan Bopai-Ku inyo di sorugo. 33Apo sotiap urakng inyo kinyo moaku'i Aku di hadapan boko urakng bukai, Aku pan cuku moaku'inyo di hadapan Bopai-Ku inyo di sorugo.”

Urakng inyo pocayo ko Yesus gola' moutamoan Sio

(10:34–11:1)

(Luk. 12:51-53, 14:26-27; Mrk. 8:34-37, 9:41)

34“Jangan bopikir Aku datakng mondamaian boko urakng di dunia ni'in. Malah sobali'nyo! Aku datakng monyongkayoan sia'. 35Aku datakng monyongkayoan urakng doi' bopainyo, ana' botina' doi' indainyo, bonantu botina' doi' montuho botina'nyo. 36Jadi, paca'an ado urakng inyo bomusuhan agatn urakng dalapm koluarganyo.

37Sotiap urakng inyo mongasihi Bopai damo indainyo lobih daripado Aku, io kinyo cucu' monjadi pongikut-Ku. Ubo nian jam, sotiap urakng inyo mongasihi ana'nyo lolaki damo botina' lobih daripado Aku, io kinyo cucu' monjadi pongikut-Ku. 38Sotiap urakng inyo kinyo bosodia momikul salibnyo siku' ongko tuyut Aku, io kinyo cucu' monjadi pongikut-Ku. 39Sotiap urakng inyo moutamoan kohidupannyo siku', sobondarnyo kinyo paca'an mondapat'an kohidupan inyo sobondarnyo. Apo sotiap urakng inyo monyorahan kohidupannyo siku' pakai' tuyut Aku, pasti paca'an mondapat'annyo.”#10:38-39: Tiat catatan ponjolasan di Lukas 9:23-24.

40-41“Aman kaitn monorima' siku' nabi obai nabi nantai monyampaian posatn Allah, kaitn paca'an monorima' upah inyo samo sama'an inyo dionju' ko siku' urakng nabi. Aman kaitn monorima' urakng bondar obai io molabuhan inyo bondar dihadapan Allah, kaitn paca'an monorima' upah inyo samo sama'an inyo dionju' ko urakng bondar. Jadi, sotiap urakng inyo monorima' kaitn, rotinyo io monorima' Aku jam. Huatan sotiap urakng inyo monorima' Aku, rotinyo io pan monorima' Allah inyo moutus Aku. 42Jadi, urakng inyo moonji'i socangkir ara'i ko kaitn obai kaitn murid-Ku, urakng nantai kinyo paca'an kohilakan upahnyo.”

Currently Selected:

Matius 10: TBDS

Highlight

Copy