Lukas 7
7
Yesus monyamani siku' hulutn powira tontara Romawi
(7:1-10)
(Mat. 8:5-13; Yoh. 4:46-53)
1Lopas jadi Yesus bopandir ko boko urakng banyaꞌ, ongko Yesus botula' ko Kapernaum sosamo agatn boko murid-Nyo. 2Di santai ado siku' powira tontara Romawi, ongko hulutnnyo sakit kuat, honda' matiam. Powira tontara nantai kotakan kidahnyo agatn hulutnnyo nantai. 3Jadi kali mondingaꞌ kisah mongonaꞌi Yesus, lalu io mongumpulan boko tokoh urakng Yahudi, ongko minto tulukng ko sia' pakai' monomu'i Yesus. Io monyiuh sia' minto Yesus datakng ko rumahnyo, oca' monyamani hulutnnyo nantai.
4Sia' pan botula' monomu'i Yesus. Pas botomu agatn Yesus, sia' muhun oca' Yesus datakng ko rumah powira tontara nantai ongko monyamani hulutnnyo. Kato sia', “Powira tontara nantai patut ditulukng ulih Duatn, 5powira tontara ni'in kotakan mongasihi banso kito, urakng Yahudi. Io nantai sampai bulahan koi rumah pakai' koi sombayakng.”
6Yesus botula' sosamo agatn sia' ko rumah powira tontara nantai. Apo kali sia' hampikng am ko rumah powira tontara nantai, powira tontara nantai monyiuh boko pokawalannyo monomu'i Yesus pakai' monyampaian posatn agi' ko Sio, “Duatn pompadohan nam datakam ko rumahku, obai aku kinyo patut Duatn dataki. 7Ia'an pan aku co datakng monomu'i Duatn tontai, obai aku moanggap diriku kinyo cucu' mohadap Duatn. Jadi porintahan doi' si'itn ja'am pasti hulutnku nyamanam, 8Aku mongoroti agatn kuaso, obai aku siku' gola' monaati porintah pimpitanku. Aku pan ado ana' buahku, sia' gola' tundu' agatn porintahku. Aman aku monyiuh sia' botula', sia' pasti botula' aman aku monyiuh inyo bukainyo datakng, sia' pasti datakng. Sama'an nian jam aman aku monyiuh inyo bukainyo bokorojo, la'apo pan pasti dikorojoannyo.”
9Yesus topocongo mondingaꞌ posatn powira tontara inyo dipadahan sia' nantai ko Sio. Ongko Yesus mongilikng boko urakng banyaꞌ inyo tuyut sosamo agatn Sio. Ongko bopandir, “Pondinga'anbo, Aku bolupm kalo monomu'i iman sobosar ni'in. Doi' bansoku siku', urakng Yahudi pan, bolupm ado inyo bondar-bondar pocayo ko Aku agatn soponuh hati samaꞌan powira tontara urakng Roma ni'in.”
10Lopas nian boko sonsiuhan powira tontara nantai pulakng. Kali datakng ko rumah, sia' moniant hulutn powira tontara nantai udah sehat samaꞌan biasonyo.
Yesus monulukng siku' botina' balu ongko bulah ana'nyo hidup agi'
(7:11-17)
11Kinyo manah lopas nantai, Yesus botula' ko kota Nain. Boko murid-Nyo ongko banyaꞌ jam urakng bukai inyo tuyut Yesus ko santai. 12Watu Yesus hampikng ko pintu gerbakng kota Nain, sia' botomu agatn boko urakng inyo tongahan momikul bangkai siku' bobia' muda' ko luar kota. Bobia' muda' nantai ana' tunggal botina' balu. Banyaꞌ boko urakng kota Nain tuyut momasar ana' botina' balu nantai.
13Watu Yesus moniant botina' balu nantai, Sio mooso kotakan kasih. Yesus bopandir ko botina' balu nantai, “Jadi am monangis indai.”
14Lalu Yesus mohampiki pompikulan lancakng bobia' muda' inyo mati nantai, ongko moncama'nyo. Boko urakng inyo momikul lancakng nantai botongga'. Kali sia' udah botongga' Yesus bopandir ko bobia' muda' inyo mati nantai, “Oi bujakng, huas cam!” 15Samo-jatu' bobia' muda' nantai huas ongko mula'i bopandir. Lalu Yesus monyorahan bobia' muda' nantai ko indainyo. 16Boko urakng moniant kojadian nantai, topocongo ongko kotakan hormat kapikng momuji Allah. Kapikng bopandir ko siku'-monyiku', “Siku' nabi bosar Allah udah hidup am di tongah-tongah kito, Allah udah monulukng kito umant-Nyo.” 17Borito mongonaꞌi la'apo inyo dipulah Yesus nantai todinga' di soluruh doerah Yudea ongko sokolitarnyo.
Yesus ongko Yohanes Pombaptis
(7:18-35)
(Mat. 11:2-19)
18Boko murid Yohanes Pombaptis monyampaian borito mongonaꞌi porbuatan Yesus ko Yohanes.#7:18: Yohanes Pombaptis ija' di ponjara apo totap ulih bodapat borito doi' boko kawalnyo. 19Ongko Yohanes moningkau duo urakng muridnyo, huatan monyiuh sia' botula' monomu'i Tuhatn Yesus pakai' botakutn ko Sio, “Apobai Duatn ninam kila'an Rajo Inyo Dijanjian Allah, kata'an koi gola' ija' monanti kodatakan urakng bukai?”
20Lalu koduo murid Yohanes nantai botula' monomu'i Yesus. Kalinyo udah botomu sia' bopandir, “Koi disiuh Yohanes pombaptis botakutn ko Duatn, ‘Apobai Duatn ninam kila'an Rajo Inyo Dijanjian Allah, kata'an koi gola' ija' monanti kodatakan urakng bukai?’ ”
21Timpu nantai, Yesus banyaꞌ monyamani boko urakng inyo boponyakit, huatan monundukng boko roh jahat doi' dalapm boko urakng inyo korasu'an, roh jahat nantai koluar tangga'i boko urakng inyo dirasu'inyo, huatan urakng buto moncolakng agi'. 22Ongko Yesus monimbas ko boko murid Yohanes nantai, “Kaitn bobali' pulakng cam! Padahan ko Yohanes, somuo la'apo pan inyo Ku labuhan udah kaitn tiat, huatan somuo pandir-Ku udah kaitn dinga'. Aku bulah urakng buto bobali' moncolakng, urakng lumpuh bobali' ulih bojalatn, urakng boponyakit kulit inyo bogola'i nyamanam samaꞌan biaso, urakng tingal ulih mondingaꞌ, urakng mati bobali' hidup agi'. Aku pan momandiran borito boi' doi' Allah ko boko urakng jaro. 23Diborokati boko urakng inyo co gangga'-gua'an ongko monorima' Aku.”#7:23: Somuo urakng Yahudi udah manah monantian kodatakan Rajo Inyo Dijanjian Allah timpu joman komai. Banyaꞌ urakng salah bopikir Rajo ni'in paca'an mombebasan ongko monyolamant'an banso Israel doi' kokuasa'an koraja'an dunia ni'in. Yesus mongajar mongonaꞌi pombebasan doi' dosa, kosolamant'an doi' kuaso jahat. Jadi, porbuatan ongko pomandiran Yesus kinyo cucu' agatn pikiran ongko kohonda' sia'. Apo dalapm perikop ni'in Yesus mombaba' urakng pakai' morenungan dalapm hati oca' pocayo obai Sio nantai Rajo Inyo Dijanjian Allah.
24Kali udah koduo murid Yohanes nantai pulakng, Yesus mula'i momandiran ko boko urakng banyaꞌ mongonaꞌi sopo sobondarnyo Yohanes nantai. Kato Yesus, “Timpu Yohanes di padakng pasir kaitn ko su'utan moniant la'apo. Pasti kaitn kinyo bayo moniant solamba'i doutn rumput inyo boguyakng dipuput angin.#7:24: Kiasan ni'in ado duo makna; Sia' datakng ko padakng pasir pakai' moniant Yohanes inyo jouh lobih pontikng doi' rumput ja'am. Yohanes pan kinyo gangga'-gua'an ubo rumput inyo mudah diguyakng obai angin. Yohanes pocayo huatan mongajar agatn kopastian. 25Jadi, kaitn botula' ko su'utn pakai' moniant la'apo? Pasti co pakai' moniant urakng inyo bopakaian boi'. Urakng dampu inyo hidupnyo bokocukupan pasti bodiapm dalapm istana kinyo di padakng pasir. 26Jadi, kaitn botula' ko su'utn pakai' moniant la'apo? Pasti pakai' moniant siku' nabi pan? Apo, dinga'an bo ni'in. Io lobih pontikng doi' siku' urakng nabi biaso. 27Joman komai ado nabi inyo monulis mongonaꞌi Yohanes ni'in. Tulisan nantai momandiran: ‘Dinga'an bo! Aku tajahan monyiuh utusan-Ku mondoholu'i Duatn. Utusan-Ku nian tajahan momposiapan boko urakng pakai' kodatakan Duatn.’#7:27: Doi' buku Nabi Maleakhi 3:1 28Jadi poniant'an, di dunia ni'in conyiant siku' pan inyo lobih pontikng daripado Yohanes. Apo, urakng inyo palikng babah kodudu'annyo dalapm koraja'an Allah lobih pontikng daripado Yohanes.”#7:28: Ado inyo salah pahapm ayat ni'in boroti Yohanes kinyo tomansu' dalapm Koraja'an Allah. Apo, masud Yesus pakai' monjolasan Koraja'an Allah lobih pontikng doi' dunia ni'in.
29(Somuo urakng, tomansu' boko ponagih pajak inyo mondingaꞌ pomandiran Yesus, mongaku'i caro Allah bondar. Sia' nantai boko urakng inyo udah dibaptis Yohanes. 30Apo boko pomimpitn agama doi' kolompok Farisi ongko boko guru agama Yahudi monula' kohonda' Allah pakai' monyolamant'an sia'. Sia' nantai boko urakng inyo co honda' dibaptis Yohanes.)
31-32Kato Yesus, “Boko urakng joman ni'in ulih disamoan agatn boko bobia' inyo monggaso di pasar. Boko bobia' samaꞌan nantai dudu' kapikng mondorah ko kawalnyo, ‘Koi moniup sulikng apo kaitn co bonari. Koi bonyanyi salu' apo kaitn co monangis.’ 33Yohanes Pombaptis datakng, kinyo bopua' roti, kinyo minum anggur, ongko sia' bopandir io korasu'an sitatn. 34Lopas nian Ana' Monsio datakng. Io makatn, minum, ongko sia' bopandir Io kaha', pomabu', kawal ponagih pajak ongko urakng bukai inyo bodosa. 35Apo hikmat Allah dibondaran ulih somuo urakng inyo monorima'nyo.”
Botina' bodosa mombasu'i kaki Yesus agatn minya' pakai' mohormati-Nyo
(7:36-50)
36Ado siku' urakng Farisi bodamo Simon, mohundakng Yesus datakng ko rumahnyo pakai' makatn sosamo. Jadi, Yesus datakng ko rumah urakng Farisi nantai, huatan dudu' makatn. 37Ado siku' urakng botina' inyo tokonal di kota nantai obai hala hidup dalapm dosa. Watu io mondingaꞌ Yesus tongahan makatn di rumah urakng Farisi nantai, datakam io mombaba' sobotul minya' harupm. 38Kapikng monangis, io bodiritn di bolikat Yesus, ongko tundu' di kaki Yesus. Io mombansahi kaki Yesus agatn ara'i matonyo huatan molapnyo agatn rambutnyo siku'. Lopas nian io monciupm kaki Yesus, monuyung minya' harupm nantai ko kaki Yesus.#7:38: Dalapm budaya Yahudi, sia' makatn mohadap ko meja babah. Jadi posisi dudu' makatn sotongah monggarikng singint huatan kakinyo mohunjur jouh doi' meja nantai.
39Urakng Farisi inyo mohundakng Yesus moniant porbuatan botina' nantai. Ongko, bopandir dalapm hatinyo, “Aman Sio bondar-bondar nabi, soharusnyo Sio tohu mongonaꞌi kohidupan botina' ni'in. Botina' inyo hidup dalapm dosa!”
40Jadi Yesus bopandir ko io, “Simon, ado lou' inyo honda' Ku pandiran ko kolai.”
Timbas Simon, “Pandiran cam, Guru.”
41 Lalu Yesus mongajarnyo agatn poumpamoan ni'in, “Ado duo urakng inyo bohutakng ko siku' urakng inyo mominjapan duit. Siku' urakng bohutakng lima' ratus dinar, ongko inyo siku' bohutakng bayo lima' puluh dinar mo.#7:41: Dinar = Duit logapm Romawi, inyo dipulah doi' pira'. So Dinar samo agatn upah siku' urakng bokorojo soari. Jadi inyo bohutakng 500 dinar nilainyo lobih bosar doi' gajih sotohutn. 42Sia' duo co ulih mombayar hutakngnyo ko urakng inyo moonji'i pinjapan nantai. Jadi agatn koboi'an hati io mohapusan hutakng sia'. Nah, sopo di antaro koduo urakng nantai paca'an lobih mongasihi io?”
43Timbas Simon, “Aku kiro io inyo palikng banyaꞌ dihapus hutakngnyo.”
Kato Yesus, “Bondar pondapat kolai nian.” 44Ongko, Yesus moniant ko arah botina' nantai. Kato Yesus ko Simon agi', “Tiat porbuatan botina' ni'in. Aku datakng ko rumah kolai. Kolai co monyodia'an ara'i pakai' momborosihi kaki-Ku doi' dobu jalatn; apo botina' ni'in udah momborosihi kaki-Ku agatn ara'i matonyo, dilapnyo agatn rambutnyo siku'. 45Kolai kinyo monyambut Aku agatn ciupan, apo doi' Aku datakng, botina' ni'in kinyo botongga' monciupm kaki-Ku. 46Kolai kinyo mohormati Aku agatn monuyung minya' di kopala'-Ku, apo botina' ni'in udah monuyung minya' harupm di kaki-Ku. 47Botina' ni'in samo samaꞌan urakng dalapm poumpamoan tontai inyo ado hutakng banyaꞌ ongko dihapus. Dosanyo inyo banyaꞌ nantai udah diamputi. Jadi, io monunju'an kasih ko Aku agatn banyaꞌ caro jam. Apo urakng inyo bopikir dosanyo bayo sodikit, ongko diamputi, jadi io bayo sodikit jam monunju'an kasihnyo.”
48Ongko Yesus bopandir ko botina' nantai, “Boko dosa kolai udah diamputi.”
49Mondingaꞌ nantai, sia' inyo dudu' makatn bosamo Yesus bopandir dalapm hati, “Urakng ni'in kinyo bohak pakai' moamputi dosa! Ongkah Allah inyo ulih ubo nian!”
50Apo Yesus totap bopandir ko botina' nantai, “Kolai disolamant'an doi' boko dosa kolai obai pocayo ko Aku. Botula'cam agatn sonang-asau.”
Currently Selected:
Lukas 7: TBDS
Highlight
Share
Copy
Want to have your highlights saved across all your devices? Sign up or sign in
