Lukas 5

Yesus momilih boboropo urakng nolayatn monjadi murid-Nyo

(5:1-11)

(Mat. 4:18-22; Mrk. 1:16-20)

1Pas ari nantai Yesus mongajar di pinggir Danau Genesaret. Watu Yesus mongajar, banyaꞌ urakng bonsonsongka'an mongorumuni Sio honda' mondingaꞌan pomandiran Allah. Obai nianam Yesus toganggu' dalapm monyampaian pongajaran-Nyo.

2Yesus moniant duo buah porohu di pantai nantai. Boko ponjalo udah turutam ongko tongahan mombasu'i jalonyo. 3Yesus noi' ko dalapm sobuah porohu umputn ponjalo bodamoan Simon Petrus, ongko monyiuh Simon Petrus monyurukan porohu nantai aga' ko tongah, oca' nyamanam Sio mongajar boko urakng banyaꞌ nantai. Jadi, Yesus dudu' kapikng mongajar doi' porohu.

4Kali udah mongajar, Sio bopandir ko Simon, “Kayuhcam ko tompat inyo dalapm. Huatan tibaran jalo kolai ko siatan pakai' monangkap ikatn.”

5Simon monimbas, “Guru, somalapm tumbas koi monjalo apo nyiant ado pongulih siku' pan. Apo, obai Duatn monyiuhnyo, aku totap labuh monibaran jalo agi'.”

6Kali udah ditibaran jalo nantai, sia' bulih ikatn kotakan banyaꞌ sampai pan jalo sia' udah mula'i birat. 7Ongko sia' mongkongkijap pokawalan bukainyo minto tulukng. Kali udah datakng porohu kawalnyo nantai, sia' moisi'i porohu sia' agatn ikatn. Koduonyo sarat sampai pan porohu sia' hampir karapm.

8-10Somuo nolayatn di santai hiratn obai banya' bondar sia' bulih ikatn. Ado di antaronyo kawal Simon di santai bodamoan Yakobus agatn Yohanes, poana'an Zebedeus. Moniant kuaso Yesus doi' Allah, Simon mooso kinyo cucu'. Io lansukng tundu' dihadapan Yesus. Kato io, “Jouhan diri Duatn doi' si'itn! Tinggalan aku obai aku urakng bodosa.”

Apo Yesus bopandir ko io, “Jangan gola'. Sokomai kolai ponjalo ikatn, apo mula'i ari ni'in jam kolai Ku jadian ponjalo monsio pakai' jadi murid-Ku.#5:8-10: Torjomahan ni'in pakai ponjolasan pakai' kiasan ‘monjalo monsio’.” 11Simon huatan pokawalannyo monari' porohu sia' ko pinggir, moninggalan somuonyo, ongko monjadi murid Yesus.

Yesus monyamani urakng inyo kona' ponyakit kulit inyo bogola'i

(5:12-16)

(Mat. 8:1-4; Mrk. 1:40-45)

12Pas ari nantai, watu Yesus di sobuah kota di doerah Galilea nantai, ado siku' lolaki bukakng-tubuhnyo bisi ponyakit kulit inyo bogola'i. Watu io moniant Yesus, io lansukng tundu' lalu muhun, “Habakng tulukng nyamani aku. Aman Duatn honda', pasti ulih monyamani aku.” 13Yesus mouluran longan-Nyo, moncama' urakng nantai. Kato-Nyo, “Aku honda'. Nyamancam!” Ponyakit kulit nantai samo-jatu' hilakam doi' bukakngnyo. 14Ongko Yesus morarakng urakng nantai mongisahannyo ko sopo pan. Kato-Nyo, “Botula'cam holu'ai ko Imam. Pakai' io momastiannyo obai kolai udah nyamanam. Ongko onju'cam posombahan sosuai agatn porintah Musa dalapm Hukupm Torat pakai' urakng inyo dinyamanan doi' ponyakit kulit. Ni'in buti ko boko urakng, obai kolai bondar-bondar udah nyamanam.” 15Apo borito mongona'i Yesus nantai toborito ko mono-mono jam, sampai banyaꞌ urakng datakng honda' mondingaꞌan Yesus. Sia' pan minto dinyamani doi' ponyakit sia' jam. 16Ongko Yesus opat monjouhan diri ko tompat inyo langunt pakai' bodoa.

Agatn monyamani urakng lumpuh, Yesus mombutian diri-Nyo bokuaso moamputi dosa

(5:17-26)

(Mat. 9:1-8; Mrk. 2:1-12)

17Pas ari nantai Yesus mongajar disobuah rumah. Di santai ado boboropo urakng guru hukupm Yahudi ongko boboropo urakng pomimpitn agama doi' kolompok Farisi. Sia' dudu' mondingaꞌan Yesus mongajar.#5:17: Timpu joman Yesus ado boboropo macapm pomimpitn agama Yahudi. Dalapm bagian ni'in, ado boko urakng Farisi inyo kotakng taat mongikuti poraturan agama. Ado jam boko guru inyo ahli mongonaꞌi porintah ongko poraturan agama Yahudi. Mosalahnyo, boko pomimpitn agama Yahudi ni'in kinyo pocayo Yesus nantai Rajo Inyo Dijanjian Allah Sia' datakng doi' boko laman di doerah Galilea ongko doerah Yudea, huatan doi' kota Yerusalem jam. Allah moonju' kuaso-Nyo ko Yesus pakai' monyamani urakng boponyakit. 18Timpu nantai boboropo urakng datakng mombaba' siku' urakng boponyakit lumpuh inyo diulit'an di tikar. Sia' bousaha mombaba' urakng nantai ko dalapm rumah oca' io dilota'an di hadapan Yesus pakai' dinyamani. 19Apo sia' culih mansu' obai kotakan banyaꞌ urakng di santai. Jadi sia' mombaba' io noi' tanggo di luar rumah ko pucu' hatap. Ongko sia' mongaro hatap nantai, huatan diuluran bosamo agatn tikarnyo. Sia' molota'annyo di tongah-tongah boko urakng banyaꞌ nantai pas dipohadapan Yesus.

20Watu Yesus moniant kotakng bosar iman sia'. Yesus bopandir ko urakng lumpuh nantai, “Somadikan, dosa kolai udah diamputi.” 21Boko guru agama Yahudi ongko pomimpitn agama doi' kolompok Farisi mula'i bopandir agatn siku'-monyiku', “Urakng ni'in conyiant haknyo bopandir bunyi nantai! Sio bopandir ubo Sio nanam Allah! Ongkah Allaham inyo ulih moamputi dosa!”

22Yesus tohu mo agatn pomikiran sia'. Jadi Sio bopandir ko sia', “Pomikiran di dalapm hati kaitn kotakan salah! 23Cubo kaitn pikir! Mono inyo lobih mudah momandiran, ‘Dosa kolai udah diamputi’ kata'an momandiran ‘Angkat ongko bodiritncam.’ 24Apo aman Aku monyamani urakng lumpuh ni'in, kaitn tajahan tohu obai Ana' Monsio#5:24: ‘Inyo Diutus Allah pakai' Monjadi Monsio’ = Yesus moaku'i Sio nantai urakng inyo udah dikisahan pado joman komai dalapm Buku Daniel 7:13-14. bokuaso moamputi dosa!”

Lalu Yesus bopandir ko urakng lumpuh nantai, “Bodiritn cam, baba' kotidu'an kolai, huatan pulakngcam!” 25Hagar urakng nantai angkat di pohadapan sia' somuo, ongko mombaba' kotidu'annyo lalu pulakam kapikng momuji Allah.

26Somuo urakng di santai hiratn, ongko momuji-muji Allah. Agatn porasa'an gola' sia' bopandir, “Ajaib bondar kojadian inyo kito tiat sari ni'in!”

Yesus moningkau boko urakng bodosa oca' borubah ongko monjadi boko murid-Nyo

(5:27-32)

(Mat. 9:9-13; Mrk. 2:13-17)

27Lopas nantai, Yesus koluar doi' rumah nantai. Di santai ado siku' urakng Yahudi tukakng ponagih pajak pakai' pomorintahan Romawi. Damonyo Lewi, tongahan dudu' di pos tompat pongumpulan pajak. Kato Yesus ko io, “Huncapm jadi murid Aku!” 28Lewi bodiritn, io moninggalan somuonyo. Lalu monjadi murid Yesus.

29Ongko di rumahnyo, Lewi moadoan pogai pakai' Yesus. Banya' ponagih pajak ongko boko urakng bukai jumpat makatn sosamo agatn sia'. 30Apo boko urakng Farisi ongko boko guru agama Yahudi botuta'-bomamai. Sia' bopandir ko murid Yesus, “Ma'apo kaitn makatn-minum bokawal agatn ponagih pajak ongko boko urakng bukai inyo bodosa?#5:30: Urakng bodosa= Boko pomimpitn agama Yahudi momakai sotilah ni'in pakai' mohayam boko urakng inyo dianggap kinyo cucu'. Ponagih pajak tomansu' jam obai biasonyo sia' monagih molobihi doi' biasonyo Nian salah!”

31Timbas Yesus, “Boko urakng inyo moanggap dirinyo sehat kinyo mooso pontikng agatn dokter; apo boko urakng boponyakit mooso pontikng agatn dokter. 32Aku kinyo datakng pakai' moningkau kaitn inyo moanggap dirinyo bondar. Apo Aku datakng pakai' moningkau boko urakng moninggalan boko dosanyo oca' ulih diamputi.”

Yesus monjolasan alasan boko murid-Nyo kinyo puaso

(5:33-39)

(Mat. 9:14-17; Mrk. 2:18-22)

33Boko urakng botakutn ko Yesus, “Boko murid Yohanes Pombaptis hala bopuaso ongko bodoa. Murid boko urakng Farisi samaꞌan nantai jam. Apo boko murid Duatn cado. Ma'apo sia' totap makatn-minum?”

34Timbas Yesus ko sia', “Apobai kaitn ulih monyiuh boko pokawalan pongantitn lolaki bopuaso, somanah pongantitn lolaki nantai bosamo-samo sia'? Tontuam cado. 35Apo watunyo paca'an datakng, pongantitn lolaki dikuti' doi' sia'. Watu nantai, sia' paca'an bopuaso.”

36Lalu Yesus mongajar agatn poumpamoan ni'in, “Co nyiant urakng inyo monambal baju buru' agatn kobiratan koitn doi' baju boharu. Obai baju inyo boharu nantai monjadi birat. Apotolagi' koitn doi' baju boharu kinyo cucu' agatn baju buru' nantai. 37Agatn contoh bukainyo, co nyiant urakng inyo monyimpatn anggur boharu ko dalapm ponyimpatan anggur doi' kulit inyo manah, obai watu anggur hoyu' boragi mongombakng, kantongnyo pasti pocah. Jadi kantongnyo rusa' ongko anggurnyo tumpah. 38Anggur inyo boharu gola' disimpatn ko dalapm kantong inyo boharu jam.#5:38: Koitn boharu ongko anggur boharu, molambakan porubahan inyo dironcanaan Allah sobolupm Sio monjadian dunia. Porubahan ni'in tojadi timpu Allah monyiuh Rajo Inyo Dijanjian-Nyo ko dunia ni'in. Agatn poumpamoan ni'in, Yesus monjolasan urakng gola' monyadari diri obai pikiran ongko hati sia' gola' diporboi'i-Nyo. Bayo urakng inyo pocayo obai Yesus nantai Rajo Inyo Dijanjian Allah, ulih diporboi'i. Ado hubukan agatn perikop sobolupmnyo (ayat 27-32) 39Conyiant urakng honda' minum anggur boharu lopas jadi minum anggur inyo manah, obai kantonyo anggur manah nantai lobih nyamanam.”

Currently Selected:

Lukas 5: TBDS

Highlight

Copy