Lukas 16

Yesus mongajar boko murid-Nyo pakai' monggunoan kodampuan sia' agatn caro inyo monyonangan Allah

(16:1-13)

1Yesus mongajar boko murid-Nyo agatn poumpamoan ni'in, “Ado siku' urakng bendahara inyo mourus kodampuan siku' urakng dampu. Bendahara nantai dituduh urakng bukai. Sia' bopandir ko urakng dampu nantai obai bendahara nantai bolobu'i kodampuannyo. 2Jadi urakng dampu nantai moningkau bendahara nantai. Katonyo, ‘Aku udah mondinga' borito inyo jahat mongona'i pokoroja'an kolai! Kolai paca'an ku tongga'an ongko kolai gola' moonji'i laporan ahir mongonaꞌi kodampuanku inyo kolai urus.’ 3Lalu, bendahara nantai koluar bopikir dalapm hati, ‘Akai! Aku tajahan ditongga'an. La'apo pogota'an ku nononyo. Monjadi tukakng cangkul, culihku obai aku co mampu. Monjadi urakng hala mominto, cuku-macal.’

4‘Nah, aku ado akal! Aku paca'an bulah ado aja', oca' boko urakng paca'an monorima' aku dalapm rumah huatan monulukngku watu aku ditongga'an nononyo.’

5Jadi io moningkau somuo urakng inyo bohutakng ko habakngnyo. Io botakutn ko salah siku' doi' sia', ‘Boropo banyaꞌ hutakng kolai di habakngku?’

6Urakng nantai monimbas, ‘Soratus topaian minya' jaitun.’

Bendahara nantai bopandir, ‘Ni'in surat hutakng kolai. Cocopat dudu', pulahi isinyo. Tulis monjadi lima' puluh topaian ja'.’

7Lopas nian io botakutn ko urakng inyo bukai, ‘Boropo banyaꞌ hutakng kolai?’

Urakng nantai monimbas, ‘Soribu karukng gandupm.’

Bendahara nantai bopandir, ‘Ni'in surat hutakng kolai. Tulis monjadi dolapatn ratus karukng jam.’ #16:7: Hutakng inyo dihapusan bonilai kiro-kiro upah korojo sotohutn sotongah.

8Lopas nian habakng nantai momuji bendahara inyo kinyo jujur nantai obai io cukup pandai, pakai' bodapat caro hidup lopas jadi ditongga'an.”

Lalu Yesus monyimpulan. Kato-Nyo, “Boko urakng inyo jahat cukup pandai tohadap sosamonyo. Sia' lobih pandai daripado boko urakng inyo hidup dalapm torakng. 9Dinga'anbo ni'in: Soharusnyo kaitn momakai kodampuan di dunia ni'in pakai' monulukng urakng bukai, oca' watu kodampuan nantai kinyo boguno agi', kaitn ditorima' dalapm sorugo.#16:9: Biar pan pogawai nantai jahat, io bopikir mongonaꞌi masa depannyo. Io monjalatan kodampuan habakngnyo oca' ulih hidup nononyo. Boko urakng inyo tuyut Yesus kinyo jahat. Sia' urakng boi'. Jadi sia' soharusnyo lobih corodi' daripado urakng jahat. Kito soharusnyo momakai kodampuan di dunia ni'in pakai' monyonangan Allah, monulukng urakng jaro, botina' balu, bobia' kumang, huatan inyo bukainyo.

10Aman urakng ulih dipocayo agatn urusan inyo kotakng kocit, io ulih dipocayo agatn urusan inyo kotakng bosar. Apo aman urakng culih dipocayo agatn urusan inyo kotakng kocit, io pan culih dipocayo agatn urusan inyo kotakng bosar.

11Jadi, aman kaitn bolupm ulih dipocayo agatn kodampuan di dunia ni'in, pasti kaitn co paca'an ulih dipocayo agatn kodampuan inyo bondar di sorugo.#16:11: Kodampuan inyo bondar nantai hidup inyo somanah-manahnyo huatan somuo borokat rohani inyo bukai inyo dionji'i Allah ko kito sobagai anggota koluarga Korajaan-Nyo. Tiat Matius 25:34. 12Aman kaitn culih dipocayo agatn kodampuan umputn urakng bukai, pasti kaitn co dionji'i paca'an kodampuan inyo tajahan monjadi umputn kaitn.#16:12: Somuo inyo umputn kito, tomansu' watu, komampuan, kosompatan, koluarga huatan kodampuan sobondarnyo umputn Allah, bukainyo umputn kito (1 Tawarikh 29:14). Somuonyo nantai poonju' doi' Sio inyo dipocayoan-Nyo ko kito pakai' somontaro. Kito gola' sotia monggunoan somuonyo agatn caro inyo monyonangan Allah bukainyo diri kito siku'.

13Co mungkitn siku' hulutn molayati duo habakng. Aman io molabuhan hal nantai, io paca'an bayo mongasihi salah siku' habakng apo mombonci' io siku'nyo. Io paca'an bayo taat ko siku' habakng, apo co taat ko io siku'nyo. Ubo nian jam kaitn. Co mungkitn kaitn monjadi hulutn Allah timpu inyo samo kaitn pan monjadi hulutn kodampuan.”#16:13: Yesus kinyo moajaran obai kito co ulih bisi bando barakng damo bokodampuan. Apo kito kinyo ulih bulah kodampuan lobih pontikng daripado molayati Allah. Kito gola' tundu' agatn Allah oca' Sio moarahan hidup kito, bukainyo kodampuan. (Kolose 3:5, 1 Timotius 6:9-10).

Yesus monogur boko urakng Farisi

(16:14-18)

(Mat. 11:12-13, 5:31-32; Mrk. 10:11-12)

14Nah, ado jam boboropo urakng Farisi mondingaꞌan somuo inyo Yesus pandiran nantai.#16:14: Somuo nantai pomandiran Yesus pado Luk 16:1-13, huatan mungkitn moncakup doi' 15:3. Sia' kotakng gala' agatn duit. Jadi, sia' rindakan Yesus. 15Apo Yesus bopandir ko sia', “Kaitn bousaha oca' di hadapan urakng bukai kaitn kotiat'annyo boi' huatan hala bondar. Apo Allah tohu isi hati kaitn inyo sobondarnyo jahat. Banyaꞌ hal inyo dirogo'i ulih monsio, kinyo dirogo'i ulih Allah.

16Komai urakng bolajar kohonda' Allah doi' boko buku porintah huatan poraturan Allah inyo ditulis Musa dalapm Hukupm Torat. Boko urakng pan bolajar doi' boko buku inyo ditulis boko nabi. Apo, doi' ija' Yohanes Pombaptis mo, borito boi' mongonaꞌi Koraja'an Allah diboritoan, Rajo Inyo Dijanjian Allah udah datakng. Sotiap urakng bousaha koras pakai' mansu' ko dalapm Korajaan-Nyo.#16:16: Yesus kinyo bomasud mongatoan obai Hukupm Torat kinyo bolaku agi'. (Tiat ayat 17.) Yesus bomasud, pado joman komai buku Porintah Allah huatan buku boko nabi mongisahan mongona'i kodatakan Rajo Inyo Dijanjian Allah. Ongko, Yohanes Pombaptis momboritoan kodatakan-Nyo paca'an copat tojadi. Borito Boi' nian rajo nantai udah datakng, Io nantai Yesus. Urakng ulih monjadi anggota koluarga Koraja'an Allah aman pocayo agatn Sio. 17Apo, boko Porintah Allah totap bolaku. Biar pan langit ongko bumi mungkitn ulih hilakng, apo Hukupm Torat kinyo paca'an mungkitn ado bagian kotakng kocit pan inyo tajahan balakng.

18Aman ado laki monyaya' bininyo ongko kawitn agatn botina' bukai, laki nantai bomporajoan agatn botina' nantai. Ubo nian jam agatn lolaki inyo kawitn agatn botina' inyo disaya' lakinyo. Lolaki nantai pan bomporajoan agatn botina' inyo disaya' nantai.”#16:18: Yesus moonji'i contoh Hukupm Torat inyo ija' bolaku. Banyaꞌ urakng Farisi moncubo monapsiran Porintah Allah oca' urakng ulih monyaya' bininyo pakai' alasan la'apo aja'. Apo, udah jolas Allah moanggap pokawitan bolaku sampai mati. Tiat Kojadian 2:24, 24:67, Koluaran 20:14, Ulangan 5:18, Maleakhi 2:14-16, Mat 5:32, 19:3-9.

Poumpamoan mongona'i siku' urakng dampu huatan siku' urakng jaro bodamoan Lazarus

(16:19-31)

19Ongko, Yesus bokisah, “Ado siku' urakng dampu. Hidupnyo boonsu'an tintikng ari. Pakai'an inyo dipakainyo mahal-mahal. Io hala bopogai rindakng-ramai. 20Di lawakng pagar rumahnyo, ado urakng jaro inyo monggarikng di santai. Damonyo Lazarus. Banya' bondar kurikng-kodal di soluruh bukakng-tubuhnyo. 21Sampai boko kudu' inyo bokoliaran di santai datakng monggilati boko kurikngnyo. Lazarus honda' bondar bopua' doi' boko sisa' pomakatn inyo dibuakan lopas urakng dampu nantai jadi makatn.#16:21: Ruponyo urakng dampu nantai kinyo momakai kodampuannyo pakai' monulukng Lazarus damo pan urakng jaro bukainyo. Doi' somuo poumpamoan Yesus, bayo dalapm poumpamoan ni'in ado tokoh poumpamoan inyo disobut damonyo. Damo ‘Lazarus’ boroti ‘Allah monulukng’. Allah inyo monulukng Lazarus, kinyo urakng dampu. Yesus pan datakng pakai' monulukng urakng jaro. (Tiat Lukas 4:16-21) Jadi, kito pan gola' monulukng sia'.

22Koponsuahannyo Lazarus matiam. Boko molekat mombaba'nyo ko sorugo dudu' di sopia' Abrahapm, tompat inyo tohormat. Urakng dampu nantai pan mati jam ongko dipasar. 23Urakng dampu nantai mansu' ko noraka. Io kotakng ajab sonsaro. Io monongadah ko pucu', moniant Abrahapm doi' jouh. Io pan moniant Lazarus di totai Abrahapm. 24Io mondongkakng-mondorah, ‘Bopai Abrahapm!#16:24: Urakng Yahudi nantai koturutan Abrahapm. Apo, porotian hal nantai kinyo monyolamant'an siku' urakng doi' hukupan somanah-manahnyo. Tiat jam Lukas 3:8. Aku kotakng ajab sonsaro di dalapm api ni'in. Kasihibo aku Bopai! Siuh Lazarus moncolupan jarinyo ko dalapm ara'i ongko datakng mondinginan lidahku agatn ara'i nantai.’

25Apo Abrahapm bopandir, ‘Ana'ku, ingant watu di dunia, kolai monorima' hidup inyo boonsu'an apo Lazarus monorima' hidup inyo ajab sonsaro. Ni'in, io sonang apo kolai ajab sonsaro. 26Apotolagi' Allah udah monotap'an sobuah jurakng di antaro kito. Jurakng inyo kotakng bosar sampai kinyo mungkitn disoboraki. Urakng doi' si'itn kinyo ulih ko su'utn. Urakng inyo di su'utn kinyo ulih ko si'itn.’

27Urakng dampu nantai bopandir, ‘Aman ubo nian, aku momuhun ko duatn, tulukng siuh Lazarus ko rumah bopaiku. 28Aku bisi lima' urakng somadikan inyo ija' hidup di dunia. Siuh Lazarus momporingant'i sia' pakai' botongga' bulah dosa huatan hidup monyonangan hati Allah oca' nononyo lopas jadi mati, sia' co mansu' ko tompat ajab sonsaro ni'in jam.’

29Apo Abrahapm bopandir ko urakng dampu nantai, ‘Boko somadikan kolai udah mondingaꞌ isi boko buku inyo ditulis Musa huatan boko nabi bukai. Sia' gola' borotian huatan monuruti somuo inyo totulis di boko buku nantai.’#16:29: Boko buku ni'in dibacoan di boko rumah sombayakng. Jadi boko urakng ulih mondingaꞌ mongonaꞌi kodatakan Rajo Inyo Dijanjian Allah, ia'an Yesus. Isi boko buku ni'in jam momporingantan boko urakng pakai' botongga' bulah dosa huatan monuruti Allah.

30Urakng dampu nantai bopandir, ‘Nantai kinyo cukup, Bopai Abrahapm. Apo aman siku' urakng doi' su'utn hidup agi' doi' komatian, ongko botula' ko sia', pasti sia' tongga' bulah dosa huatan hidup monyonangan hati Allah.’

31Apo Abrahapm bopandir, ‘Aman boko buku Musa huatan boko nabi kinyo cukup pakai' bulah sia' tongga' bulah dosa huatan hidup monyonangan hati Allah, pasti sia' pan paca'an kinyo pocayo biar pan siku' urakng hidup agi' doi' komatian.’ ”#16:31: Urakng dampu nantai molambakan boko pomimpitn Yahudi inyo opat mominto tando pakai' mombutian Yesus boasal doi' Allah. Apo obai sia' kinyo honda' mompocayo'i Buku Suci mongonaꞌi Rajo Inyo Dijanjian Allah, sia' kinyo paca'an mompocayo'i tando, biar pan siku' urakng hidup agi' doi' komatian. Malahan socopatnyo lopas ni'in, Yesus bondar-bondar bulah urakng bodamo Lazarus hidup agi' doi' komatian. Sia' totap kinyo pocayo. Malah sia' bohoupm pakai' mombunuh Yesus (Yohanes 11:38-53, 12:9-11).

Currently Selected:

Lukas 16: TBDS

Highlight

Copy