Lukas 13

Urakng tajahan mati bonaso aman co botongga' bulah dosa huatan co hidup monyonangan Allah

(13:1-9)

1Watu nantai, Yesus ditohu'i ulih boboropo urakng inyo datakng ko Sio. Sia' bopandir, “Ado boko urakng doi' doerah Galilea inyo botula' ko kota Yerusalem pakai' moonju' kurbatn posombahan borupo hayapm-inguan di Rumah Allah. Timpu sia' moonju' posombahannyo, Pilatus, gubernur pomorintah Romawi, monyiuh oca' sia' dibunuh.”#13:1: Doerah Galilea nantai wilayah boko pojuakng Yahudi inyo molawatn pomorintah Romawi. Boko urakng inyo diporintahan Pilatus pakai' dibunuh mungkitn nantai sobagi'an doi' boko pomborontak nantai.

2Mondingaꞌ borito nantai, Yesus bopandir ko sia', “Kaitn jangan bopikir boko urakng Galilea dibunuh agatn kojapm ubo nantai obai sia' lobih bodosa doi' somuo urakng bukai di Galilea. 3Pomikiran kaitn nantai kotakng kinyo bondar. Dinga'anbo aman kaitn co tongga' bulah dosa huatan co hidup monyonangan Allah, kaitn tajahan bonaso ubo sia' jam.#13:3: Ado duo tapsiran pakai' hukupan ni'in. 1) Yesus bomasud sia' paca'an dibunuh agatn caro inyo samo ubo boko pomborontak nantai. Sokitar tohutn 70 SM, tontara Romawi mohancuran kota Yerusalem huatan mombunuh somuo pomborontak urakng Yahudi. DAMO 2) Yesus bomasud sia' paca'an dihukupm Allah pado Ari Kiamant 4Sama'an nian jam borito mongonaꞌi dolapatn bolas urakng inyo mati watu monara Siloam di kota Yerusalem robah moninggakng sia'. Jangan bopikir nian tojadi ko sia' obai sia' lobih bodosa doi' boko urakng bukai di kota Yerusalem. 5Pomikiran kaitn nantai kotakng kinyo bondar. Dinga'anbo aman kaitn co botongga' bulah dosa huatan co hidup monyonangan hati Allah, kaitn tajahan bonaso ubo sia' jam.”

6Lalu Yesus mongajar sia' agatn poumpamoan ni'in, “Ado urakng inyo bisi kobutn anggur. Io monanam kayu ara di santai jam. Opat io ko su'utn honda' moniant sopo tohu kayu ara nantai udah bobuah. Apo sotiap io ko su'utn, kayu ara nantai kinyo bobuah.

7Jadi io bopandir ko ponjago kobutnnyo, ‘Udah tigo tohutn manahnyo aku monantian kayu ara ni'in bobuah. Apo co kalo ado. Tobakng ja'! Lobih boi' kayu nantai kinyo tumbuh di kobutn ni'in agi' oca' tanah kinyo monjadi pocumo.’

8Apo ponjago kobutn bopandir, ‘Bopai, biaram kayu ni'in totap hidup sotohutn agi'. Aku paca'an monyangkul tanah sokolilikngnyo ongko moonji'inyo pupuk. 9Agatn caro nantai, kohonda'ku kayu nantai paca'an bobuah tohutn nono. Apo aman tohutn nono kinyo bobuah, haja' ditobakam.’ ”#13:9: Isu'anu dalapm Buku Suci, tontanaman ara molambakan boko urakng Israel (Yeremia 8:13, 24:1-10; Hosea 9:10, Mikha 7:1-2). Dalapm poumpamoan ni'in tontanaman ara nian pan molambakan sotiap urakng, buahnyo molambakan buti obai boko urakng botongga' bulah dosa huatan monyonangan Allah (Yohanes 15:8, Galatia 5:22-23; Efesus 5:8-9), huatan urakng umputn kobutn anggur molambakan Allah, inyo paca'an mohukupm somuo urakng inyo monula' pakai' botongga' bulah dosa huatan pocayo ko Sio. Ponjago kobutn molambakan Yesus ongko boko utusan Allah inyo mominto ko Allah inyo sabar huatan kasih oca' boko urakng dionji'i kosompatan pakai' botongga' bulah dosa ongko disolamant'an.

Yesus monyamani siku' urakng botina' watu ari Sabat

(13:10-17)

10Watu Ari Sabat, Yesus mongajar di sobuah rumah sombayakng. 11Di santai ado siku' urakng botina' inyo udah dolapatn bolas tohutn ponyakit. Ado roh jahat di dalapm dirinyo inyo mombulah io ponyakit sampai monjadi bungku'. Io samo sokali culih bodiritn tontakng boi'.

12Watu Yesus moniant botina' nantai, Yesus moningkau io ko muka'. Ongko Yesus bopandir, “Indai, watu ninam kolai nyamanam doi' ponyakit kolai.” 13Lopas Yesus molota'an jari-Nyo, botina' nantai lansukng bodiritn tontakng boi' ongko momuji Allah.

14Apo kopala' rumah sombayakng nantai kotakng godi, obai io bopikir porbuatan Yesus nantai pokoroja'an inyo culih dilabuhan watu Ari Sabat obai Ari Sabat husus pakai' torahat. Jadi kopala' rumah sombayakng bopandir ko kumpulan urakng nantai, “Monurut Poraturan agama kito urakng Yahudi, ado onam ari pakai' bokorojo. Jadi, aman kaitn honda' dinyamani, datakng ko si'itn di ari-ari nantai. Jangan watu Ari Sabat!”

15Lalu Tuhatn Yesus bopandir ko io huatan somuo urakng inyo bopikir samo samaꞌan io, “Kaitn boko urakng inyo pompadah boi', apo sobondarnyo jahat! Sotiap ari, tomansu' Ari Sabat, kaitn molopasan sapi damo koledai doi' kandakannyo, mombaba'nyo ko luar oca' sia' ulih minum ara'i. Nantai pan pokoroja'an jam. 16Apo botina' ni'in koturutan Abrahapm banso inyo diborokati Allah. Huatan roh jahat, Rajo Sitatn udah bulah io sonsaro dolapatn bolas tohutn manahnyo. Io pasti jouh lobih dirogo'i Allah daripado sapi damo koledai. Cucu'am io dinyamani doi' sonsaro ponyakitnyo, biar pan ni'in Ari Sabat.”

17Timpu Yesus bopandir ubo nantai, somuo urakng inyo momusuhi-Nyo mooso malu, apo inyo bukainyo rindakng obai somuo mujisat inyo dipulah Yesus.

Koraja'an Allah soumpamo bigi' kocit huatan bopongaruh samaꞌan ragi

(13:18-21)

(Mat. 13:31-33; Mrk. 4:30-32)

18Ongko Yesus bopandir ko kumpulan urakng nantai, “Aku paca'an moumpamoan Koraja'an Allah ko kaitn. 19Koraja'an Allah soumpamo bigi' kocit inyo ditanam di kobutn. Bigi' nantai lantakng, monjadi tontanaman bosar, sampai boko burukng bulah sayakngnyo di boko dahatn tontanaman nantai.”

20-21“Koraja'an Allah pan soumpamo ragi di dalapm topukng-tumpi. Siku' urakng botina' mongurapmnyo dalapm duo puluh lima' kilu topukng. Koponsuahannyo, ragi nantai bulah somuo topukng-tumpi mongombakng.”#13:18-21: Bigi' nantai sosuatu inyo sangant kocit apo tumbuh tinggi sampai bosar. Pado joman Yesus bayo sodikit urakng mongoroti kohonda' Allah. Apo sampai joman ni'in mongkitn banyaꞌ urakng pocayo ko Yesus. Ragi monggambaran hal inyo samo ubo nantai, apo monggambaran pongaruhnyo jam. Anggota koluarga Koraja'an Allah, urakng inyo pocayo agatn Yesus bopongaruh inyo boi' di dunia ni'in.

Ado urakng inyo bopikir sia' tajahan bodapat hidup kokal di sorugo, apo sobondarnyo cado

(13:22-30)

22Tongahan dalapm pojalatan monuju ko kota Yerusalem,#13:22: Yesus momula'i pojalatan ni'in di Luk. 9:51. Sio ahirnyo sampai di Luk. 19:37. Yesus molalu'i boko kota huatan boko laman kapikng mongajar mongonaꞌi Koraja'an Allah. 23Lalu ado urakng botakutn ko Sio, “Habakng, bayo sodikit mo kiro urakng inyo tajahan bodapat hidup kokal di sorugo?”

24Lalu Yesus monimbas, “Koraja'an Allah soumpamo sobuah rumah agatn lawakng inyo songka'. Bousahacam pakai' mansu' molalu'i lawakng inyo songka' nantai, obai banyaꞌ urakng inyo moncubo mansu', apo bayo sodikit inyo ulih.#13:24: Banyaꞌ urakng kinyo paca'an ulih momansu'i Koraja'an Allah obai sia' moncubo momansu'inyo udah tolambat (samaꞌan di ayat 25-27). Damo sia' moncubo momansu'inyo agatn caro bukai. Apo lawakngnyo songka' boroti bayo ado sobuti' caro, nantai pocayo agatn Yesus (Matius 7:13).

25Nono umputn rumah tajahan monutup lawakngnyo. Ado di antaro kaitn inyo paca'an di luar, mongetok-ngetok kapikng bopandir, ‘Habakng, buka'bo lawakng pakai' koi!’ Habakng nantai paca'an monimbas, ‘Cado! Aku co konal agatn kaitn.’ 26Lalu kaitn paca'an momuhun, ‘Duatn pasti konal agatn koi! Koi udah opat makatn-minum sosamo agatn Duatn. Duatn pan opat mongajar di boko jalatn di kota koi.’ 27Apo Habakng nantai tajahan bopandir agi' ko kaitn, ‘Aku co konal agatn kaitn. Jojouhcam doi' pohadapan-Ku! Somuo kaitn urakng jahat.’ 28Watu nian, kaitn tajahan moniant angki-bayatn kaitn Abrahapm, Ishak, ongko Yakub huatan somuo nabi di dalapm Koraja'an Allah di sorugo, apo kaitn paca'an ditikapan ko noraka. Di santai kaitn tajahan monangis huatan monggorit'an gigi obai kotakng ajab sonsaro.

29Banyaꞌ urakng paca'an datakng doi' timur, barat, utara, solatatn. Sia' paca'an ditorima'. Sia' paca'an dudu' makatn di dalapm Koraja'an Allah di sorugo. 30Dinga'anbo: ado urakng inyo dianggap co pontikng watu ni'in, apo nononyo Allah paca'an bulah sia' pontikng. Ado jam urakng inyo dianggap pontikng watu ni'in, apo nononyo Allah paca'an bulah sia' kinyo pontikng.”#13:22-30: Urakng Yahudi pocayo obai sia' socaro otomatis monjadi anggota koluarga Koraja'an Allah huatan disolamant'an obai sia' nantai koturutan Abrahapm (Lukas 3:8). Sia' pocayo obai kobanya'an urakng bukai di dunia kinyo paca'an disolamant'an. Apo Yesus monjolasan di si'itn, Allah kinyo monuruti pandakan urakng samaꞌan nian. Momansu'i Koraja'an Allah kinyo togantukng suku, apo togantukng aman urakng pocayo agatn Yesus.

Yesus bopandir Sio tajahan mati di kota Yerusalem

(13:31-35)

(Mat. 23:37-39)

31Timpu nian jam, ado boboropo urakng Farisi datakng ko Yesus. Sia' bopandir, “Jangan bodiapm di si'itn obai Herodes honda' mombunuh Duatn! Lobih boi' botula' cam ko tompat bukai.”

32Apo Yesus bopandir ko sia', “Pandirancam ko Herodes inyo ulahnyo ubo payau nantai,#13:32: Bonatakng Payau bosipat morusa', ponggola'an huatan licik. Gubernur Herodes bosipat morusa' obai io mombunuh Yohanes Pombaptis huatan honda' mombunuh Yesus jam. Herodes bosipat ponggola'an obai io co honda' mohadapi Yesus lansukng di hadapan urakng banyaꞌ. Jadi socaro licik io momakai ancapan pakai' monundukng Yesus doi' wilayahnyo. ‘Sari ni'in ongko hobu' Aku paca'an totap monundukng boko roh jahat huatan monyamani boko urakng. Lalu, Aku paca'an monjadi'i pogota'an-Ku watu ari inyo kotigo. 33Apo sari ni'in, hobu' ongko lusonyo Aku gola' molajuan pojalatan-Ku ko kota Yerusalem, obai conyiant tompat bukai pakai' siku' urakng nabi Allah dibunuh cuali di Yerusalem.’ ”#13:33: Yesus momakai kato ni'in socaro bolawatan. Kato ‘Yerusalem’ boroti ‘kota damai’. Rumah Allah ado di santai. Kota utamo pakai' urakng Israel, umant pilihan Allah. Jadi, sangant salah aman boko nabi Allah dibunuh di santai.

34Lalu Yesus bopandir kotakan salu', “Ihai, boko urakng Yerusalem.#13:34: Yesus momakai Yerusalem sobagai ibu kota pakai' mowakili somuo urakng Israel. Allah moutus boko nabi ko kaitn, apo kaitn monikapi sia' agatn batu sampai mati. Aku honda' hala molinduki kaitn, samo sama'an indai manu' inyo molinduki boko ana'nyo di babah sayapnyo.#13:34: Porjanjian Manah opat momakai gambar samaꞌan ni'in, Allah molinduki umant-Nyo di babah sayap. (Rut 2:12, Mazmur 17:8, 36:7, 57:1, 61:4, 63:7, 91:4; Keluaran 19:4, Ulangan 32:10-11). Somuo urakng, tomansu' urakng Israel, gola' dihukupm Allah obai dosanyo. Yesus honda' molinduki urakng Israel doi' hukupan nantai, apo sia' kinyo pocayo agatn Sio. Apo, kaitn monula'. 35Obai nantai, nononyo Allah tajahan co poduli ongko kinyo molinduki kaitn. Sio co molinduki agi' Rumah Allah huatan soluruh kota Yerusalem.#13:35: Pomandiran ni'in monjadi nyata watu pomorintahan Romawi mombonasoan Rumah Allah huatan soluruh kota Yerusalem pado tohutn 70 M. Kaitn co tajahan moniant Aku agi' sampai kaitn bopandir mongonaꞌi Aku, ‘Sio ni'in datakng agatn kuaso Allah. Mara momuji Sio!’ ”#13:35: Doi' Mazmur 118:26. Ado tigo komungkitan pakai' watu inyo dimasud di si'itn: 1) Watu boko urakng monyambut Yesus timpu Sio momansu'i kota Yerusalem (Luk. 19:38), 2) Watu Yesus bobali' doi' sorugo ko dunia agi', damo 3) Watu boko urakng Yahudi pocayo Yesus nantai Rajo Inyo Dijanjian Allah.

Currently Selected:

Lukas 13: TBDS

Highlight

Copy