Yohanes 9
9
Yesus mombutian ongkah Sio nam torakng pakai' dunia
(9:1-41)
Yesus mombulah urakng buto moniant agi'
(9:1-7)
1Poluai Yesus lalu, Sio moniant siku' urakng inyo buto doi'nyo lahir. 2Boko murid-Nyo botakutn ko Sio, “Guru, sopo inyo bulah dosa sampai urakng ni'in dilahiran buto? Kata'an nantai obai dosa urakng ni'in siku'ai, kata'an obai dosa urakng tuhonyo ai?”
3Timbas Yesus, “Io buto bukainyo obai dosanyo siku' damo obai dosa urakng tuhonyo. Apo io buto oca' boko urakng ulih moniant lapo inyo paca'an tojadi agatn io, ia'an oca' boko urakng ulih moniant boko pokoroja'an Allah.#9:3: Masudnyo di si'itn, watu Yesus monyamani urakng buto nantai, boko urakng paca'an moniant nantai pokoroja'an Allah. Hal nantai jam mombutian obai Sio bobondar doi' Allah. 4Somanah ari ija' siakng, kito gola' mongorojoan boko pokoroja'an Sio inyo moutus Aku. Pas ari malapm, conyiant ado siku' urakng pan inyo ulih bokorojo. 5Somanah Aku ado di dunia, Aku ninam torakng dunia.”
6Lopas jadi Yesus momadahan nantai, Sio moigah ko tanah. Sio morocu'-rocu' igah-Nyo agatn tanah. Lalu Sio momalitannyo ko mato urakng buto nantai. 7Kato Yesus ko io, “Botula'cam, tapusicam mato-muho kolai di Kolapm Siloam.” (Kato Siloam rotinyo ‘diutus’.) Jadi, urakng nantai hingkasam mombasu'i mato-muhonyo. Watu io bobali', io udah ulih moniant am.
Boko totangga kinyo sopondapat mongona'i mujisat nantai
(9:8-13)
8Apo ado boko totangganyo huatan boko urakng inyo udah mongonal io inyo hala mominto-minto, sia' bopandir, “Bukainyo io ni'in urakngnyo inyo hala dudu' minto-mintokomai?”
9Ado inyo bopandir, “Bondar am, memang io ninam.” Ado inyo bopandir bukainyo, “Bukainyo, io ni'in bayo mirip agatn urakng buto nantai.” Apo io siku' bopandir, “Bondar, aku ninam urakng nantai inyo buto komai!”
10Lalu, sia' botakutn ko io, “Ubo apo caronyo kolai ulih moniant?”
11Timbas io, “Urakng inyo bodamoan Yesus nantai, morocu'-rocu' tanah, lalu dipalitan-Nyo ko matoku. Kato-Nyo ko aku, ‘Botula'cam, tapusicam mato-muho kolai di Kolapm Siloam.’ Jadi, aku botula' huatan lopas jadi aku monapusi, mato-muhoku, lalu aku moniant am.”
12Sia' botakutn ko io, “Di mono urakng nantai?”
Kato io, “Cuku tohu.”
13Lalu, sia' mombaba' urakng inyo tontainyo buto nantai ko boko pomimpitn agama Yahudi doi' kolompok Farisi.
Urakng inyo tontainyo buto dibaba' ko hadapan boko urakng Farisi
(9:14-17)
14(Watu Yesus morocu'-rocu' tanah agatn igah-Nyo lalu mombulah urakng buto nantai ulih moniant pas botopatan ari Sabat.) 15Obai nantai, kolompok Farisi pan botakutn ko io ubo apo caronyo io ulih moniant. Timbas io, “Urakng nantai momalitan luta' ko matoku. Lopas jadi nantai, aku monapusimato-muhoku, lalu aku ulih moniant.”
16Sobagi'an doi' kolompok urakng Farisi nantai bopandir, “Urakng nantai co datakng doi' Allah. Obai, Sio co monaati Ari Sabat.” Apo inyo bukai bopandir, “Co mungkitn siku' urakng bodosa tohu bulah boko mujisat samo sama'an inyo udah Sio pulah!” Jadi ado posolisihan di antaro sia'.
17Lalu, sia' botakutn agi' ko urakng inyo komainyo buto nantai, “Kolai ninam inyo Sio pulah monjadi ulih moniant. Jadi, la'apo pondapat kolai mongona'i Sio?”
Kato urakng nantai, “Sio nianam nabi!”
Boko urakng Farisi monanyo'i urakng tuhonyo
(9:18-23)
18Kolompok pomimpitn agama Yahudi nantai kinyo pocayo obai tontainyo io buto lalu ulih moniant. Jadi, sia' monggoyapi urakng tuhonyo. 19Kato sia' ko urakng tuhonyo, “Bondaram urakng ni'in ana' kaitn, uji kaitn inyo buto doi'nyo lahir? Ubo apo io ulih moniant ni'in?”
20Kato urakng tuhonyo, “Au, memang ni'inam ana' koi. Io buto doi'nyo lahir. 21Apo, koi co tohu ubo apo caronyo io ulih moniant ni'in. Koi pan co tohu sopo inyo bulah io ulih moniant. Takutan ja'am ko io, io nan bosaram. Io nan suba'mo monimbasi pakai' monjolasan lapo inyo tojadi agatn dirinyo siku'.” 22Urakng tuhonyo bopandir ubo nantai obai sia' gola' agatn boko pomimpitn Yahudi. Obai, boko pomimpitn nantai udah bulah koputusan bosamo-samo, obai sotiap urakng inyo momadahan Yesus nantai Kristus, Rajo Inyo Dijanjian Allah, jadi urakng nian paca'an diusir doi' rumah sombayakng. 23Obai nianam urakng tuhonyo bopandir, ‘Io udah bosaram. Takutan ja'am ko io.’
Boko urakng Farisi botakutn ko urakng nantai agi'am
(9:24-34)
24Jadi, udah koduo kalinyo boko urakng Farisi nantai monggoyapi urakng inyo tontainyo buto nantai. Kato sia' ko io, “Pandirancam inyo sobondarnya di hadapan Allah. Koi tohu obai Yesus nantai am urakng bodosa.”
25Katonyo, “Aku cuku tohu aman Sio nam urakng bodosa damo cado. Apo ado sobuti' hal inyo ku kotohu'i; tontainyo aku buto, ni'in aku udah moniant!”
26Kato sia' ko io, “Lapo inyo Io pulah agatn kolai? Ubo apo Io mombulah kolai ulih moniant?”
27Kato urakng nantai, “Udah ku kisahan ko kaitn, apo kaitn co honda' mondinga'an. Hibo kaitn monakutannyo agi'? Kata'an kaitn honda' monjadi murid-Nyo, bai?”
28Jadi sia' mohayam io. Kato sia', “Kolai nam murid Urakng nantai, apo koi ni'in boko murid Musa. 29Koi tohu obai Allah udah bopandir ko Musa. Apo koi co tohu doi' mono asal Urakng nantai.”
30Kato urakng inyo tontainyo buto nantai, “Aneh bondar ni'in! Kaitn co tohu doi' mono tompat asal-Nyo, sodakan io udah mombulah aku ulih moniant. 31Kito tohu obai Allah co mondinga'an boko urakng bodosa.#9:31: Pasti, Allah mondinga' aman boko urakng bodosa honda' moninggalan dosa lalu monyonangan hati-Nyo. Masudnyo di si'itn, pasti Yesus bukainyo urakng bodosa obai Allah momakai Sio pakai' bulah mujisat. Allah mondinga'an boko urakng inyo taat agatn Sio. 32Yesus nantaiam bulah aku, urakng buto tangga'i lahir, ulih moniant. Doi' mulo dunia, bolupm kalo kodinga'an ado urakng inyo sanggup molabuhan nantai. 33Soandainyo Sio nantai co datakng doi' Allah, co mungkitn Sio ulih molabuhan mujisat la'apo pan.”
34Timbas sia', “Kolai udah bodosa doi' kolai lahir! Apo kolai honda' mongajar koi?” Lalu, sia' mousir io koluar.
Urakng inyo tontainyo buto nantai monjadi pocayo agatn Yesus
(9:35-41)
35Yesus mondinga' obai sia' udah mousir io doi' rumah sombayakng. Pas Yesus botomu agatn io, Yesus bopandir, “Pocayo bai kolai agatn Ana' Monsio?”
36Kato io, “Sopo kironyo Sio? Tulukng ku bo Bopai padahan oca' ku pocayo ko Sio.”
37Kato Yesus ko io, “Kolainam udah moniant Sio. Sio inyo tongahan bopandir agatn kolai.”
38Katonyo, “Aku pocayo, Tuhatn!” Lalu, io tundu' monyungkapan ko Yesus.
39Kato Yesus, “Aku datakng ko dunia ni'in pakai' mohakipi, oca' boko urakng buto ulih moniant huatan ubo nian jam oca' boko urakng inyo ulih moniant, sia' monjadi buto.”#9:39: Yesus datakng pakai' monyolamant'an kinyo pakai' mohakipi (Yohanes 3:17). Masudnyo di si'itn, paca'an disongkayoan antaro urakng inyo pocayo agatn urakng inyo kinyo pocayo, samo sama'an inyo tojadi di kisah ni'in agatn totangga (ayat 9) huatan urakng Farisi (ayat 16). Aman urakng inyo bolupm mongoroti mongona'i Yesus apo sia' honda' mongoroti, Sio paca'an bulah sia' mongoroti (‘moniant’). Apo urakng inyo moanggap dirinyo udah mongoroti somuonyo huatan co honda' diajar agi' (samo sama'an boko pomimpitn agama), jadi sia' co paca'an mongoroti mongona'i Yesus (samo agatn buto).
40Boboropo urakng Farisi inyo ado di siatn nantai, sia' mondinga' pomandiran Yesus nantai. Sia' bopandir agatn Sio, “Koi co koi buto.”
41Timbas Yesus agatn sia', “Soandainyo kaitn buto, kaitn co bodosa. Apo kaitn mongatoan kaitn ulih moniant. Jadi, ija' ado dosa kaitn.”#9:41: Masudnyo di si'itn, aman kito bopikir obai kito co bodosa, jadi kito co diamputi doi' dosa.
Currently Selected:
Yohanes 9: TBDS
Highlight
Share
Copy
Want to have your highlights saved across all your devices? Sign up or sign in
