Yohanes 6
6
Yesus nam Roti inyo moonji'i kohidupan
(6:1-71)
Yesus bulah mujisat pakai' moonji'i pomakatn ko lima' ribu urakng#6:1: Ado banya' botina' huatan boko bobia' jam, apo kinyo tomansu' hitukan.
(6:1-15)
(Mat. 14:13-21; Mrk. 6:30-44; Luk. 9:10-17)
1Lopas nantai, Yesus botula' ko soborakng Danau Galilea, inyo disobut jam Danau Tiberias. 2Banya' urakng hala tuyut Sio, obai sia' moniant boko mujisat-Nyo monyamani boko urakng sakit. 3Yesus noi' ko pucu' bukit lalu dudu' di santai agatn boko murid-Nyo. 4(Watunyo udah dampikam pakai' urakng Yahudi morayaan Paskah.) 5Watu Yesus borotian sokolilikng-Nyo, Sio moniant banya' bondar urakng inyo datakng ko Sio. Jadi, Sio bopandir ko Filipus, “Di mono kito dapat momboli roti, oca' somuo urakng ni'in dapat makatn?” 6(Sobondarnyo Yesus udah tohu lapo inyo paca'an Sio pulah. Apo, Sio botakutn nantai pakai' mouji Filipus.)#6:6: Yesus honda' mouji aman Filipus paca'an bosandar ko Sio pakai' momonuhi kopontikan nantai DAMO Filipus pocayo Yesus ado kuaso pakai' mombulah mujisat nantai. Yesus tohu Filipus bayo paca'an momakai pikiran monsio, apo lopas Yesus bulah mujisat nantai, mungkitn Filipus ulih pocayo lobih kuat obai Yesus monanyoan ni'in sobolupmnyo.
7Timbas Filipus ko Sio, “Biar sayakan sodikit, roti sorogo duo ratus dinar#6:7: Satu dinar ia'an duit pira' inyo bonilai upah soari korojo. Jadi duo ratus dinar nilainyo samo agatn upah urakng inyo bokorojo hampir tujuh bulatn. pan kinyo cukup pakai' urakng sobanya' ni'in.”
8Siku' murid-Nyo inyo bukai, ia'an Andreas, somadikan Simon Petrus, io bopandir ko Yesus, 9“Di si'itn ado siku' bobia' inyo ado lima' pingkai' roti sonjoli huatan ado duo iku' ikatn. Apo, nantai pocumo jam pakai' urakng pombanya'an ni'in.”
10Yesus bopandir ko boko murid-Nyo, “Siuh cam boko urakng nantai dudu'.” Di tompat nantai padakng rumputnyo kotakan luar. Jadi, somuo urakng nantai dudu' di santai. (Ado kiro-kiro lima' ribu urakng lolaki dewasa di santai)#6:10: Ado boko botina' huatan agatn boko bobia' jam, apo kinyo mansu' hitukan. 11Yesus monguti' roti nantai, moucap'an torima' kasih ko Allah, lalu mombagi-bagiannyo ko somuo urakng inyo dudu' di siatn tai. Ubo nian jam, Sio mombagi-bagian ikatn nantai. Somuo sia' makatn sampai konyang. 12Lopas sia' konyang, Yesus bopandir ko boko murid-Nyo, “Kumpulan ba kolobihan pomakatn nantai, jangan sampai ado inyo dipolobu'i.” 13Jadi, boko murid-Nyo mongumpulan sisa'nyo. Duo bolas kobudu' bisi doi' lima' roti inyo dipua'i urakng pombanya'an nantai.
14Pas boko urakng nantai moniant mujisat inyo udah dipulah Yesus, sia' bopandir, “Pasti Sio ninam Nabi#6:14: Tiat catatan di Yoh. 1:21. inyo koi tantian paca'an datakng ko dunia!” 15Yesus tohu obai sia' honda' datakng pakai' mombaba' Sio, momoso Sio monjadi rajo sia'. Jadi, Sio botula' agi' ko doerah bukit oca' ulih sonsiku'an-Nyo.
Yesus bojalatn di pucu' ara'i
(6:16-21)
(Mat. 14:22-33; Mrk. 6:45-52)
16Pas ari hampir malapam, boko murid Yesus turutn ko danau, 17lalu jumpat ko dalapm porohu. Sia' monyomborakng danau nantai monuju ko kota Kapernaum. Ari udah potakng am apo Yesus bolupm datakng jam ko sia'. 18Golumbakng mongkitn bosar obai bonakau bosar. 19Lopas sia' bokayuh kiro-kiro lima' damo onam pal, sia' moniant Yesus bojalatn di pucu' ara'i mondampiki porohu nantai. Sia' gola' bondar.#6:19: Boko murid Yesus gola' obai pikir sia' Yesus nantai hantu. (Tiat kisah di buku Mat. 14:26 damo Mrk. 6:49.) 20Apo Sio bopandir ko Sia', “Jangan gola'! Ni'in Aku!” 21Jadi, sia' monjumpatan Sio ko dalapm porohu. Watu nantai jam, porohu nantai tuntukng ko pinggir danau tompat tujuan sia'.
Boko urakng monggoyapi Yesus
(6:22-24)
22Kohobu'annyo, boko urakng inyo ija' tinggal di soborakng danau nantai, moniant obai conyiant ado porohu di santai. Ongkah somamanam ado sobuah porohu, inyo udah dipakai boko murid Yesus. Boko urakng nantai sadar Yesus kinyo tuyut monyomborakng bosamo agatn boko murid-Nyo, apo bayo boko murid-Nyo mo inyo jumpat porohu. 23Lopas nantai ado boboropo porohu inyo datakng doi' kota Tiberias. Boko porohu nantai datakng ko dampikng tompat Tuhatn Yesus moonji'i roti ko boko urakng banya' somamannyo lopas jadi Sio moucap'an torima' kasih ko Allah. 24Jadi, watu urakng banya' nantai moniant obai Yesus huatan boko murid-Nyo conyiant am di santai, sia' jumpat ko boko porohu nantai lalu monyomborakng ko Kapernaum pakai' monggoyapi Yesus.
Yesus monyamoan diri-Nyo agatn Roti kohidupan
(6:25-59)
25Pas urakng banya' nantai botomu Yesus di soborakng danau, sia' botakutn ko Sio. Kato sia', “Guru sombilo Duatn tuntukng ko sintai?”
26Kato Yesus ko sia', “Pondinga'anbo bobondar inyo Ku pandiran ni'in: Kaitn monggoyapi Aku bukainyo obai kaitn ngoroti masud doi' boko mujisat. Apo kaitn monggoyapi Aku obai kaitn udah makatn roti nantai sampai konyang. 27Jangan bokorojo pakai' bogoyap pomakatn inyo copat buru' ongko habis. Apo bokorojocam pakai' mondapat'an pomakatn inyo tahatn sampai hidup somanah-manahnyo. Ana' Monsio inyo paca'an moonji'i pomakatn nantai ko kaitn. Obai, Allah Bopai udah mombutian obai Sionam moutus Ana' Monsio.”
28Obai nantai, sia' bopandir ko Sio, “La'apo kironyo gola' koi pulah, oca' koi monggaian boko pokoroja'an inyo Allah kohonda'i nantai?”
29Timbas Yesus ko sia', “Ni'in pokoroja'an inyo dikohonda'i Allah:#6:28-29: Porotian dalapm potanya'an urakng banya', sia' momakai ‘boko pokoroja'an’. Dalapm pikiran sia', ado ‘daptar porintah huatan poraturan’ inyo gola' dilabuhan pakai' monyonangan Allah. Apo, Yesus monimbas obai bayo sobuti' ‘pokoroja'an’ inyo dipontikan, ongkah pocayo ko Sio am. ia'an oca' kaitn pocayo ko Io inyo udah diutus Allah.”
30-31Kato sia' ko Sio, “Tando mujisat la'apo inyo paca'an Duatn pulah oca' koi ulih moniant lalu pocayo ko Duatn? Aman angki-bayatn kito, sia' ulih bopua' manna di padakng pasir. Samo sama'an inyo udah totulis di Buku Suci, ‘Sia' dionji'i-Nyo pomakatn roti doi' sorugo.’ Jadi, tando mujisat la'apo inyo paca'an Duatn korojoan?”#6:30-31: Doi' buku Mazmur 78:24. Kisahnyo ado di buku Koluaran 16.
32Timbas Yesus ko sia', “Pondinga'an bobondarcam inyo Ku pandiran ni'in: Bukainyo Musa inyo moonji'i kaitn roti doi' sorugo. Apo Bopai-Ku inyo moonji'i kaitn roti doi' sorugo, ia'an roti inyo sobondarnyo.#6:32: Yesus mongomboi'i pikiran urakng banya' nantai dalapm tigo hal. 1) Yesus mongatoan mujisat nantai doi' Allah, bukatnnyo doi' Musa. 2) Mujisat nantai udah tojadi watu komai. Apo Allah torus-monorus moonji'i ‘roti’. 3) Makatan ‘manna’ nantai am makatan duniawi. Allah moonji'i roti inyo bondar. 33Obai, roti doi' Allah ia'an Sio inyo turutn doi' sorugo, inyo moonji'i hidup inyo sobondarnyo ko boko urakng di dunia.”
34Kato sia' ko Sio, “Bopai, tulukng hala moonji'i koi roti nantai.”
35Kato Yesus ko sia', “Aku ninam roti inyo moonji'i hidup. Somuo urakng inyo datakng ko aku, co kalo kolaparan agi'. Somuo urakng inyo pocayo ko aku, co kalo korahakan agi'. 36Apo Aku udah bopandir ko kaitn sobolupmnyo: Biar pan kaitn udah moniant Aku, kaitn totap co pocayo. 37Apo, somuo urakng inyo Allah Bopai-Ku onju' ko Aku, sia' paca'an datakng ko aku. Somuo urakng inyo datakng ko aku, sia' kinyo paca'an Aku tula'. 38Obai, Aku udah turutn doi' sorugo bukainyo pakai' molabuhan kohonda'-Ku siku', apo Aku molabuhan kohonda' Allah inyo udah moutus Aku. 39Ninam kohonda' Sio inyo udah moutus Aku: ia'an oca' somuo urakng inyo dionju' ko aku paca'an Ku hidupan agi' di ahir joman. Jangan ado siku' pan urakng doi' sia' inyo kinyo solamant. 40Obai, ni'in kohonda' Allah Bopai-Ku: ia'an oca' somuo urakng inyo moniant Ana' huatan pocayo ko Io, sia' paca'an mondapat'an hidup somanah-manahnyo huatan Aku paca'an mombulah sia' hidup agi' watu ahir joman.”
41Ado boko urakng Yahudi inyo botuta' bomamai mongona'i Yesus obai Sio bopandir: “Aku ninam roti inyo turutn doi' sorugo.” 42Kolompok urakng Yahudi nantai bopandir, “Yesus ni'in bayo ana' Yusuf pan? Kito konal agatn indai bopai-Nyo. Ubo apo Io ulih bopandir, Aku turutn doi' sorugo?”
43Kato Yesus ko sia', “Jangan botuta' bomamai. 44Conyiant ado siku' urakng pan ulih datakng ko aku kocuali Allah Bopai mombaba'nyo ko Aku inyo diutus Allah. Aku paca'an mombulah io hidup agi' watu ahir joman. 45Di dalapm Buku boko nabi, ado tulisan ni'in: ‘Allah paca'an moajari sia' somuo.’#6:45: Doi' buku Yesaya 54:13. Jadi, somuo urakng inyo mondinga' huatan bolajar doi' Allah Bopai, sia' datakng ko aku. 46Nantai bukainyo boroti obai ado urakng inyo udah moniant Bopai. Ongkah Io am inyo datakng doi' Allah, udah moniant Sio.
47Pondinga'an bobondarcam inyo Ku pandiran ni'in: Sotiap urakng inyo pocayo agatn Aku, sia' ado kohidupan inyo somanah-manahnyo. 48Aku ninam roti inyo moonji'i hidup. 49Angki-bayatn kaitn bopua' manna di padakng pasir. Apo sia' mati jam. 50Kinyo sama'an nantai agatn roti inyo turutn doi' sorugo. Urakng inyo bopua' roti nantai kinyo paca'an mati. 51Aku ninam roti hidup inyo udah turutn doi' sorugo. Urakng inyo bopua' roti ni'in paca'an hidup somanahnyo. Roti ninam isi-Ku inyo paca'an Ku sorahan pakai' boko urakng di dunia oca' sia' ulih hidup inyo sobondarnyo.”
52Mondinga' nantai, boko urakng Yahudi nantai botikakng agatn siku' monyiku'. Kato sia', “Ubo apo Sio ulih monyorahan isi-Nyo ko kito pakai' dipua'i?”
53Jadi, Yesus bopandir ko sia', “Dinga'an bo! Kobondaran inyo Aku pandiran ni'in: Kaitn gola' bopua' isi Ana' Monsio huatan minum darah-Nyo. Aman cado, kaitn kinyo bondar-bondar hidup. 54Sotiap urakng inyo bopua' isi-Ku huatan minum darah-Ku, sia' paca'an monorima' hidup somanah-manahnyo. Aku paca'an mombulah sia' hidup agi' watu ahir joman. 55Obai, isi-Ku nam bondar-bondar pomakatn. Darah-Ku nam bondar-bondar minuman. 56Sotiap urakng inyo bopua' isi-Ku huatan minum darah-Ku, sia' nam inyo bosatu agatn Aku huatan Aku bosatu agatn sia'. 57Allah Bopai inyo hidup moutus Aku. Aku hidup doi' Sio. Samo sama'an nantai jam, urakng inyo bopua' isi-Ku, io paca'an hidup doi' Aku. 58Ninam roti inyo udah turutn doi' sorugo. Roti ni'in bukainyo ubo inyo dipua'i angki-bayatn kaitn. Sia' udah mati. Apo urakng inyo bopua' roti ni'in paca'an hidup somanah-manahnyo.”
59Yesus momadahan somuo nantai timpu Sio mongajar di rumah sombayakng di kota Kapernaum.
Banya' murid Yesus moninggalan Sio
(6:60-66)
60Lopas jadi mondinga' pomandiran Yesus nantai, banya' murid-Nyo bopandir agatn siku'-monyiku', “Ajaran nantai tolalu borat. Sopo ulih monurutinyo!”
61Apo Yesus mongotohu'i di dalapm hati-Nyo obai boko murid-Nyo botuta' bomamai mongona'i hal nantai. Jadi, Sio bopandir ko sia', “Kata'an ajaran nantai mombulah hati kaitn co honda' pocayo agi' ai? 62Ubo apo pikiran kaitn soandainyo kaitn moniant Ana' Monsio noi' agi' ko sorugo, tompat-Nyo bodiapm sobolupmnyo? 63Inyo bulah monsio hidup ia'an Roh Allah. Kokuatan monsio co nyiant gunonyo pakai' nantai. Pomandiran inyo Ku padahan nantai boasal doi' Roh Allah. Pomandiran nantai ulih moonji'i hidup inyo sobondarnyo. 64Apo di antaro kaitn ado inyo kinyo pocayo.” Yesus momadahan nantai obai Sio udah tohu doi' mulonyo sopo-sopo inyo co paca'an pocayo ko Sio. Sio pan mongotohu'i sopo inyo paca'an monyorahan Sio ko musuh-Nyo. 65Lalu Yesus bopandir agi', “Nianam sobabnyo Aku momadahan ni'in ko kolai: Conyiant siku' pan ulih datakng ko aku, kocuali aman Allah Bopai mombulah nantai tojadi.”
66Lopas nantai, banya' murid-Nyo moninggalan Sio. Sia' co honda' tuyut Sio agi'.
Petrus bopandir io huatan boko rasul paca'an sotia ko Sio
(6:67-71)
67Lalu Yesus bopandir ko koduo bolas murid-Nyo, “Kata'an kaitn honda' moninggalan Aku jam ai?”
68Timbas Simon Petrus, “Tuhatn, conyiant ado siku' urakng bukai inyo koi paca'an tuyut! Pomandiran Duatn moonji'i hidup inyo somanah-manahnyo. 69Koi pocayo huatan mongotohu'i obai Duatn nianam Inyo Suci doi' Allah!”#6:69: Golar Ni'in monjolasan obai Yesus co bodosa, apo ado hubukan jam agatn golar Kristus, Rajo Inyo Dijanjian Allah.
70Timbas Yesus ko sia', “Aku siku' udah momilih kaitn, koduo bolas urakng ni'in pan? Apo salah siku' di antaro kaitn nan sitatn!” 71(Yesus bomasud Yudas, ana' Simon Iskariot. Obai, Yudas paca'an monyorahan Yesus ko musuh-Nyo, biar pan Yudas ia'an salah siku' urakng doi' koduo bolas muridnyo nantai).
Currently Selected:
Yohanes 6: TBDS
Highlight
Share
Copy
Want to have your highlights saved across all your devices? Sign up or sign in
