Yohanes 18
18
Yesus ditangkap
(18:1-11)
(Mat. 26:47-56; Mrk. 14:43-50; Luk. 22:47-53)
1Lopas jadi Yesus momandiran somuonyo nantai, Sio botula' ko soborakng sungai Kidron bosamo agatn boko murid-Nyo. Di santai ado kobutn. Sio agatn boko murid-Nyo mansu' ko kobutn nantai. 2Obai Yesus hala bokumpul di santai agatn boko murid-Nyo. Yudas ia'an murid Yesus inyo mohianati Sio pan tohu tompat nantai. 3Yudas datakng ko santai mombaba' kolompok urakng pakai' monangkap Yesus. Ado boboropo ponjago Rumah Allah inyo disiuh boko imam kopala' huatan boko pomimpitn agama Yahudi doi' kolompok Farisi. Ado jam pasukan tontara Romawi. Kolompok urakng nantai datakng agatn mombaba' obor huatan sonjato. 4Apo, Yesus udah mongotohu'i boko hal inyo paca'an tojadi tohadap diri-Nyo. Jadi, Sio mohampiki sia', lalu botakutn, “Kaitn monggoyapi sopo?”
5Timbas sia', “Koi monggoyapi Yesus doi' laman Nazaret.”
Kato Yesus, “Aku ninam Io nantai.”
(Yudas inyo honda' monyorahan Yesus, ko boko musuhnyo, io pan bodiritn bosamo agatn sia'). 6Watu Yesus momadahan “Aku ninam Io nantai,” jadi sia' somuo mundur, ongko tokorobah.#18:6: Ado boko ahli Buku Suci inyo bopikir Yesus momakai damo Allah di si'itn (AKU NAM AKU), hususnyo obai sia' ‘jatu'’ udah mondinga' nantai.
7Yesus botakutn sokali agi' ko sia', “Kaitn monggoyapi sopo?”
Kato sia', “Koi monggoyapi Yesus doi' laman Nazaret.”
8Timbas Yesus, “Udah-Ku padahan ko kaitam Aku ninam Io nantai. Jadi, aman kaitn monggoyapi Aku, longahan boko murid-Ku ni'in botula'.” 9(Nantai tojadi oca' pomandiran Yesus tontai monjadi nyata, ia'an pomandiran Yesus timpu Io bodoa ko Allah Bopai-Nyo. Kato-Nyo, “Doi' boko urakng inyo Duatn onju' ko aku, co nyiant inyo bonaso.”)
10Watu nantai Simon Petrus ado podakng. Io moncabut podakng nantai, ongko molabuhi siku' urakng polayatn Imam Agukng. Damo polayatn nantai Malkus. Petrus momopat kolindakan buai kanannyo sampai pogat. 11Apo Yesus bopandir ko io, “Sarukan podakng nan ko sarukngnyo. Apo bai kolai pikir Aku co paca'an minum doi' cangkir pondorita'an inyo dionju' Bopai ko Aku?”
Yesus diadili Imam Agukng huatan rasul Petrus bopandir co io mongonal Yesus
(18:12-27)
(Mat. 26:57-75; Mrk. 14:53-72; Luk. 22:54-71)
12Lopas nian, komandatn pasukan bosamo agatn somuo rombokan nantai monangkap Yesus lalu mongobat longan-Nyo. 13Mulonyo sia' mombaba' Yesus ko Hanas, obai Hanas montuho lolaki Kayafas, huatan Kayafasnam Imam Agukng watu tohutn nantai. 14Kayafasnam inyo kalo bopandir ko boko pomimpitn urakng Yahudi, katonyo, “Lobih boi' aman siku' urakng ja'am mati pakai' banso kito.”#18:14: Tiat Yohanes 11:49-50
15Simon Petrus huatan siku' murid inyo bukainyo mombodapan Yesus. Murid inyo bukai mongonal Imam Agukng. Jadi, io mansu' ko tongah lamanan rumah Imam Agukng nantai bosamo agatn Yesus agatn rombokan nantai. 16Apo Petrus tinggal di luar mo, dampikng sambakng lawakng pagar rumah nantai. Jadi, murid inyo bukai nantai bobali' ko luar, lalu bopandir agatn polayatn botina' inyo monjago lawakng nantai. Lalu, io ulih mombaba' Petrus mansu' ko tongahlamanan rumah nantai jam. 17Botina' polayatn nantai sampat botakutn ko Petrus, “Kolai ni'in pan murid Urakng inyo ditangkap nantai pan?” Timbas Petrus, “Cado!”
18Malapm nantai kotakan dingin bondar. Jadi, boko polayatn Imam agatn boko ponjago Rumah Allah udah monyalo'i api doi' harakng. Sia' botindu. Petrus bodiritn bosamo agatn sia' botindu jam.
19Watu nantai, Imam Agukng botakutn ko Yesus mongona'i boko murid-Nyo huatan mongona'i ajaran-Nyo. 20-21Apo Yesus bopandir ko io nantai, “Hibo kolai botakutn ko Aku? Aku hala bopandir torus-torakng di muka' umum. Aku hala mongajar di boko rumah sombayakng, huatan di Rumah Allah jam, tompat somuo urakng Yahudi bokumpul. Kinyo kalo Ku bumbutn. Takutan ja'am ko sia' inyo udah mondinga' boko ajaran-Ku. Pasti sia' tohu lapo inyo Ku katoan.”
22Ado ponjago inyo bodiritn di santai. Pas Yesus bopandir bunyi nantai, io monompilikng mato-muho Yesus. Katonyo, “Jangan bopandir ubo nian agatn Imam Agukngnan!”
23Timbas Yesus, “Soandainyo, Aku mongatoan sosuatu inyo salah, tunju'anbo salah-Ku. Apo, aman Aku mongatoan inyo bondar, hibo kolai monompilikng Aku?”
24Lopas nian, Hanas monyiuh oca' Yesus dibaba' ko Kayafas, Imam Agukng. Watu nantai, longan Yesus ija' dikobat.
25Simon Petrus ija' botindudi santai. Ado boboropo urakng inyo bopandir ko io, “Kolai ni'in pan murid Urakng inyo ditangkap nantai bai?” Apo Petrus monyangkal. Katonyo, “Cado!”
26Lalu, ado polayatn Imam Agukng di santai. Io ado hubukan koluarga agatn polayatn inyo Petrus popat kolindakannyo. Io bopandir, “Tontai aku moniant kolai di kobutn nantai bosamo-samo agatn Sio. Bondaram pan?”
27Apo Petrus bopandir agi' obai io co konal agatn Yesus. Watu nantai jam, manu' bokuku'.
Yesus dibaba' mohadap Gubernur Pilatus
(18:28-38a)
(Mat. 27:1-2, 11-14; Mrk. 15:1-5; Luk. 23:1-5)
28Sunsukng pukau, boko sia' urakng Yahudi nantai mombaba' Yesus doi' rumah Kayafas ko istana gubernur, pomorintahan Romawi. Sia' co mansu' ko dalapm istana nantai. Sia' co honda' monjadi kotor socaro agama obai sia' honda' jumpat makatn pas Ari Rayo Paskah. 29Obai nantai, gubernur Pilatus koluar monomu'i sia'. Io botakutn, “La'apo tuduhan kaitn ko Urakng ni'in?”
30Timbas sia', “Soandainyo Urakng ni'in co bosalah koi co mombaba'-Nyo ko duatn.”
31Kato Pilatus ko sia', “Kaitn ja' mombaba' Io lalu moadili Io sosuai agatn hukupm kaitn.”
Apo boko urakng Yahudi nantai bopandir, “Pomorintah Romawi morarakng banso koi mohukupm mati urakng.” 32(Nantai tojadi oca' pomandiran Yesus monjadi nyata, ia'an nantai pomandiran Yesus mongona'i caronyo Sio paca'an mati).#18:32: Yesus momandiran Sio paca'an mati di kayu salib (Tiat Yohanes 3:14 huatan 12:32). Nantai caronyo urakng Romawi mohukupm mati urakng, kinyo caronyo urakng Yahudi. Urakng Yahudi mohukupm mati agatn caro monikapi batu.
33Pilatus mansu' agi' ko dalapm istananyo lalu monyiuh oca' Yesus dibaba' mansu'. Pilatus botakutn ko Sio, “Kata'an kolai ni'in rajo urakng Yahudi ai?”
34Timbas Yesus, “Potakutan nantai doi' kolai siku', kata'an ado urakng bukai inyo udah momadahan ko kolai mongona'i Aku ai?”
35Kato Pilatus, “Aku bukainyo urakng Yahudi! Banso kolai siku' huatan boko imam kopala' inyo monyorahan kolai ko aku. Kosalahan lapo inyo udah kolai labuhan?”
36Timbas Yesus, “Koraja'an-Ku kinyo boasal doi' dunia ni'in. Soandainyo Koraja'an-Ku doi' dunia ni'in, jadi boko urakng inyo molayati Aku udah bojuakng oca' Aku co disorahan ko boko pomimpitn Yahudi. Apo memang Koraja'an-Ku bukainyo doi' dunia ni'in!”
37Lalu Pilatus botakutn ko Yesus, “Aman ubo nian kolai memang rajo ai?” Timbas Yesus, “Kolai mo inyo monyobut obai Aku ninam rajo. Ninam alasan Aku lahir, Aku datakng ko dalapm dunia ni'in. Ia'an, oca' Aku momadahan mongona'i lapo inyo bondar. Somuo urakng inyo honda' hidup dalapm kobondaran, sia' monuruti pomandiran-Ku.”
38aKato Pilatus ko io, “Lapo kobondaran nantai?”
Koputusan pakai' Yesus dihukupm mati
(18:38b–19:16a)
(Mat. 27:15-31; Mrk. 15:6-20; Luk. 23:13-25)
38bLopas jadi Pilatus mongatoan nantai, io koluar agi', monomu'i boko urakng Yahudi nantai. Katonyo ko sia', “Aku udah momoriso Urakng nantai. Aku co botomu sobuti' kosalahan pan di Inyo. 39Apo, biasonyo, sotiap Ari Rayo Paskah, aku molopasan siku' urakng tahatan pakai' kaitn, urakng Yahudi. Honda' cadoai kaitn oca' ku molopasan Urakng nantai, Rajo urakng Yahudi?”
40Apo, sia' mondongkakng-mondorah, “Jangan! Jangan dilopasan Sio nan. Lopasan ja'am Borabas!” (Nah, Borabas ninam porampok inyo molawatn pomorintah Romawi.)
Currently Selected:
Yohanes 18: TBDS
Highlight
Share
Copy
Want to have your highlights saved across all your devices? Sign up or sign in
