Yohanes 16

Yesus mombaba' boko murid-Nyo oca' pocayo ongkah ko Sioam

(16:1-4a)

1Aku momadahan somuo nantai oca' kaitn co botongga' pocayo ko aku. 2Paca'an ado boko urakng inyo monundukng kaitn doi' rumah sombayakng urakng Yahudi. Nononyo, boko urakng inyo mombunuh kaitn paca'an monyangko sia' molayati Allah agatn molabuhan nantai. 3Sia' paca'an molabuhan boko nantai obai sia' kinyo mongonal Bopai boi' pan agatn Aku. 4aApo watu ni'in Aku momandiran somuonyo nantai ko kaitn oca' watu hal nantai tojadi, kaitn paca'an ingant obai Aku udah momadahannyo ko kaitn.”

Pokoroja'an Roh Allah

(16:4b-15)

4b“Mulonyo, Aku co momadahannyo ko kaitn mongona'i boko hal nantai. Obai, Aku ija' bosamo agatn kaitn. 5Apo watu ni'in Aku bobali' pulakng ko Bopai inyo udah moutus Aku. Biar pan ubo nian, co nyiant ado doi' antaro kaitn inyo botakutn ko aku, ‘Ko mono pojalatan Duatn?’ 6Apo ni'inan, hati kaitn salu' obai Aku momadahan mongona'i boko hal nantai ko kaitn. 7Apo sobondarnyo, lobih boi' pakai' kaitn aman Aku botula'. Pomandiran-Ku nantai bondar! Obai, aman Aku co botula', Ponulukng kinyo datakng ko kaitn. Apo aman Aku botula', Aku paca'an moutus Ponulukng nantai ko kaitn. 8Watu Sio datakng, Sio paca'an bulah boko urakng di dunia sadar mongona'i boko hal ni'in: mongona'i dosa, huatan mongona'i la'apo inyo bondar, huatan mongona'i hukupan. 9Sio paca'an bulah sia' sadar mongona'i dosa obai sia' kinyo pocayo ko Aku. 10Sio paca'an bulah sia' sadar obai Aku bondar, obai Aku bobali' ko Bopai lalu kaitn kinyo moniant Aku agi'. 11Sio paca'an bulah sia' sadar mongona'i hukupan doi' Allah obai Rajo Sitatn inyo monguaso'i dunia ni'in udah dihukupam.

12Ija' ado banya' hal inyo honda' Ku padahan ko kaitn. Apo watu ni'in, kaitn bolupm sanggup monorima'nyo. 13Apo nononyo, timpu Roh Allah datakng, Sio paca'an moirikng kaitn oca' mongoroti somuo inyo bondar. Obai, Sio co paca'an mongatoan doi' diri-Nyo siku', apo Sio paca'an momadahan pomandiran inyo Sio dinga' doi' Bopai-Nyo. Sio pan paca'an momadahannyo ko kaitn boko hal inyo paca'an tojadi nononyo. 14Sio paca'an momboritoan ko kaitn pomandiran inyo Sio torima' doi' Aku. Agatn caro nantai, Sio paca'an momuliaan Aku. 15Somuo umputn Bopai nian umputn-Ku jam. Nantai sobabnyo Aku bopandir: Sio paca'an momboritoannyo ko kaitn pomandiran inyo Sio torima' doi' Aku.”

Murid Yesus mooso salu' apo digonti agatn sonang-nyamanam

(16:16-33)

16 Yesus pan momadahan, “Ija' sobontar cam, kaitn co paca'an moniant Aku. Apo sobontar agi' lopas nantai kaitn paca'an moniant Aku agi'.”

17Mondinga' nantai, boboropo murid Yesus bopandir ko siku'-monyiku', “La'apo masudnyo Sio bopandir ko kito, ‘Ija' sobontar cam, kaitn co paca'an moniant Aku, apo ija' sobontar agi' cam lopas nantai kaitn paca'an moniant Aku agi'?’ La'apo masudnyo Sio bopandir, ‘Obai Aku botula' ko Bopai?’ ” 18Jadi sia' totap monakutannyo, “La'apo masudnyo, ‘Sobontar agi'?’ Kito co mongoroti pomandiran-Nyo.”

19Yesus tohu obai ado inyo honda' sia' takutan ko Sio. Jadi Sio bopandir, “La'apo inyo kaitn pandiran ko siku'-monyiku', kaitn honda' botakutn ko Aku mongona'i pomandiran-Ku tontai sobontar agi', kaitn co paca'an moniant Aku. Apo sobontar agi' lopas nantai kaitn paca'an moniant Aku agi'. Nianam bai inyo honda' kaitn takutan ko Aku tai? 20Pondinga'an boboi' cam inyo Ku padahan ni'in! Sobontar agi' kaitn paca'an gugu'-gogal monangis obai la'apo inyo paca'an tojadi ko Aku. Apo boko urakng di dunia ni'in inyo co pocayo, sia' paca'an rindakng-totawo. Memang kaitn paca'an salu', apo nononyo kaitn monjadi sonang-nyamanam. 21Hal nantai samo sama'an siku' botina' tongahan mohidap-porut. Timpu io honda' boana', io jorih uyuh obai mondorita'. Apo lopas io jadi boana', io co ingant agi' pondorita'annyo nantai. Obai, io sonang udah boana'am. 22Ubo nian jam agatn kaitn. Watu ni'in kaitn salu'. Apo Aku paca'an botomu agi' agatn kaitn. Timpu nantai, hati kaitn paca'an sonang. Conyiant ado siku' urakng pan inyo ulih monguti' kosonangan kaitn nantai. 23Timpu nantai, kaitn co paca'an botakutn la'apo pan agi' ko aku. Pondinga'ancam boboi'cam inyo Ku padahan ni'in: Bopai-Ku paca'an moonji'i ko kaitn lapo ja' inyo kaitn pinto ko Sio dalapm damo-Ku. 24Sampai watu ni'in, kaitn bolupm minto lapopan dalapm damo-Ku. Mintocam, lalu kaitn paca'an monorima'. Kaitn paca'an monorima' oca' sonang-nyamanam kaitn monjadi sompurna. 25Aku momadahan somuonyo nantai ko kaitn momakai poumpamoan. Apo nononyo Aku co ija' momadahannyo ko kaitn momakai poumpamoan. Aku paca'an momandiran torus-torakng ko kaitn mongona'i Allah Bopai-Ku. 26Timpu nantai, kaitn paca'an minto ko Bopai dalapm damo-Ku. Aku co pontikng minto doi' Bopai pakai' kaitn. 27Sio paca'an mondinga'an kaitn obai Sio siku' mongasihi kaitn. Sio mongasihi kaitn obai kaitn mongasihi Aku huatan pocayo obai Aku datakng doi' Allah. 28Aku boasal doi' Bopai huatan datakng ko dalapm dunia. Apo, sobontar agi', Aku moninggalan dunia ni'in lalu bobali' ko Bopai.”

29Lalu, boko murid-Nyo bopandir, “Nah, watu ni'in Duatn bopandir torus-torakng, co momakai poumpamoan. 30Watu ni'in, koi tohu obai Duatn mongotohu'i boko la'apo pan. Duatn co pontikng urakng monakutan la'apo pan ko Duatn obai Duatn udah tohu. Obai nantai, koi pocayo obai Duatn datakng doi' Allah.”

31Kato Yesus ko sia', “Kaitn bondar-bondar pocayoam watu ni'in? 32Pondinga'ancam! Nononyo paca'an sampai watunyo, malahan udah datakam watunyo nantai, kaitn paca'an bosongkayo. Kaitn paca'an pulakng ko rumah siku'-monyiku', moninggalan Aku sonsiku'an. Apo, sobondarnyo Aku co sonsiku'an obai Bopai ado bosamo agatn-Ku. 33Aku momadahan somuonyo nantai ko kaitn oca' hati kaitn ado sonang-asau obai kaitn bosatu agatn Aku. Kaitn paca'an mondorita' di dunia ni'in. Apo, pontokuhancam hati kaitn! Aku udah mongalahan kuaso di dunia ni'in!”

Currently Selected:

Yohanes 16: TBDS

Highlight

Copy