Kisah Boko Rasul 4

Petrus ongko Yohanes Diadili Kolompok Pomimpitn Urakng Yahudi

(4:1-22)

1Timpu Petrus ongko Yohanes ija' bopandir ko urakng banya' nantai, sia' duo didataki boko pomimpitn urakng Yahudi. Ado kopala' ponjago Rumah Allah, boboropo imam, huatan boboropo urakng doi' kolompok Saduki.#4:1: Kolompok Saduki: Kobanya'an anggota kolompok Saduki nantai boko pomimpitn agama, tomansu' banya' imam. Sia' bayo pocayo ko kolima' buku potamo dalapm Porjanjian Manah (ia'an boko buku inyo ditulis ulih Musa: Kojadian, Koluaran, Imamat, Bilangan, ongko Ulangan). Sia' pocayo obai dibali' komatian monsio co nyiant kohidupan agi'. Tiat Mrk. 12:18 ongko Kis. 23:8. 2Boko pomimpitn nantai kotakan godi obai Petrus ongko Yohanes momboritoan mongona'i Yesus ko urakng banya'. Petrus ongko Yohanes mongajar ni'innan: obai Yesus udah hidup agi' doi' komatian, urakng inyo pocayo ko Yesus paca'an bobali' hidup doi' komatian jam. Monurut boko pomimpitn, ajaran nantai sangant salah. 3Jadi boko pomimpitn monyiuh koduo rasul nantai ditangkap ongko dimansu'an ko dalapm ponjara. Obai ari udah malapm,#4:3: Poraturan agama Yahudi morarakng moadoan pongadilan pado malapm ari. sia' duo ditahatn di santai sampai kohobu'annyo. 4Apo banya' urakng inyo udah mondinga' ajaran Petrus ongko Yohanes monjadi pocayo agatn Yesus. Jadi jumlah urakng pocayo monjadi kiro-kiro lima' ribu boko urakng bujakng bosar ongko boko urakng tuho lolaki.#4:4: Ado botina' huatan bobia' jam, apo kinyo tomansu' hitukan.

5Kohobu'annyo, boko pomimpitn Yahudi inyo kotakan pontikng bokumpul di Yerusalem. Sia' moadoan potomuan pokaro. Ado boko pomimpitn agama, boko tokoh masrakat, bosamo boko guru Poraturan Agama Yahudi. 6Imam Agukng datakng ko potomuan nantai jam. Damonyo Hanas. Ado jam boko urakng pontikng doi' koturutan Hanas nantai, tomansu' Kayafas, Yohanes,#4:6: Ni'in bukainyo rasul Yohanes. Mungkitn io nantai Yonatan inyo lopas nian monggonti posisi Kayafas sobagai imam agama Yahudi inyo bokodudu'an Kotakan Tinggi. huatan Aleksander. 7Somuo pomimpitn nantai monyiuh oca' Petrus agatn Yohanes dibaba' ongko bodiritn di hadapan sia'. Sia' monakutan, “La'apo inyo kaitn duo labuhan? Kaitn duo pakai kuaso sopo sampai urakng lumpuh nantai nyamanam?”

8Lopas nian, Roh Allah monguaso'i Petrus. Kato io, “Boko Totuho pomimpitn banso huatan agama. 9Ari ni'in koi duo diadili obai bulah koboi'an ko urakng lumpuh ni'in. Koi ditanyoi mongona'i kuaso doi' sopo inyo udah monyamani io. 10Jadi oca' kaitn somuo tohu. Somuo urakng banso kito Yahudi gola' tohu jam! Urakng ni'in bodiritn sehat di hadapan kaitn sokarakng obai io nyamanam agatn kuaso Yesus Kristus doi' Nazaret. Kaitn udah monula' Sio sampai Sio dihukupm mati di kayu salib. Apo Allah udah bulah Sio hidup agi' doi' komatian. 11Nantai samo sama'an ado totulis dalapm Buku Suci. Yesus, Kristus diumpamoan sama'an batu inyo ditula' boko tukakng bangunan. Dinga' ni'innan bunyi tulisan nantai:

‘Kaitn#4:11: Di Mazmur 118:22, co nyiant kato ‘kaitn’. Petrus monambahan nantai pakai' monokatan boko pomimpitn nantai inyo monula' Yesus. Sia' samo sama'an tukakng bangunan obai sia' cubo ‘mombangun’ umant agatn caro bulah urakng monaati somuo hukupm huatan poraturan agama daripado pocayo agatn Yesus. samo sama'an boko tukakng bangunan inyo monula' Batu.

Apo Allah udah bulah Batu nantai monjadi Batu inyo kotakan pontikng.’#4:11: Boko urakng Yahudi bulah bangunan doi' batu. Batu inyo palikng pontikng dalapm sobuah bangunan nantai batu ponjuru. Batu ponjuru nantai batu bosar di kutukng boko bucu rumah di mono duo dindikng bontomu. Batu nantai monyatuan boko dindikng rumah sampai soluruh bangunan monjadi kuat. Tiat Efesus 2:19–21; Yesaya 28:16.

12Jadi ongkah Yesus nam inyo dapat monyolamant'an monsio doi' hukupan dosa. Obai di soluruh dunia bayo Sioam dionji'i kuaso ulih Allah pakai' monyolamant'an monsio. Co nyiant inyo bukai.”

13Watu boko pomimpitn mondinga' rasul Petrus ongko rasul Yohanes bopandir agatn borani ubo nantai, sia' hiratn obai koduo rasul nantai bayo urakng biaso. Koduo rasul nantai kinyo bopondidikan.#4:13: Boko pomimpitn Yahudi moanggap obai urakng biaso co tohu mongona'i Buku Suci (tiat Yohanes 7:49). Biar pan somuo ana' lolaki urakng Yahudi diajar caro baco tulis, bayo sodikit inyo mongikuti sokolah husus pakai' mompolajari Poraturan agama Yahudi. Apo Petrus ongko Yohanes ado pongotohuan obai sia' nantai murid Yesus, ongko obai Roh Allah monguaso'i sia' jam. Boko pomimpitn nantai jam monyadari aman Petrus ongko Yohanes nantai murid Yesus. 14Apo urakng inyo udah nyamanam nantai bodiritn bosamo Petrus ongko Yohanes. Obai nantai am, boko pomimpitn nantai kinyo dapat bopandir la'apo pan pakai' molawatn koduo rasul nantai.

15Jadi sia' monyiuh oca' koduo rasul nantai dibaba' ko luar ruakan tompat potomuan nantai. Ongko, boko pomimpitn nantai bohoupm. 16Kato sia', “La'apo inyo paca'an kito labuhan ko sia' duo nantai? Somuo urakng di Yerusalem udah tohu sia' duo inyo molabuhan mujisat luar biaso nantai. Kito co dapat monyangkal hal nantai. 17Apo jangan sampai borito nantai mongkitn tosebar ko urakng banya'. Kito gola' moancapm sia' duo oca' sia' co bopandir sobagai utusan Urakng Nazaret nantai. Sia' pocayo Urakng Nazaret nantai am#4:17: Sia' udah tohu damo ‘Urakng’ nantai Yesus, apo sia' pakai kato Urakng nantai pakai' mohayam Sio huatan boko rasul-Nyo inyo moonji'i kuaso pakai' molabuhan mujisat nantai. Apo kito gola' morarakng sia' duo oca' co momboritoan ko sopo pan agatn kuaso Sio.”#4:17: ‘Agatn kuaso Yesus’ ulih boroti ‘mowakili Yesus’. Yesus moutus boko rasul-Nyo pakai' momboritoan mongona'i Sio, mowakili Sio huatan momakai kuaso Sio. Yesus mongajar sia' mongona'i Koraja'an Allah huatan mongona'i sopo Sio sobondarnyo, ia'an Yesus nantai Rajo Inyo Dijanjian Allah. Ajaran inyo Yesus sampaian ko sia', sia' jam gola' monyampaian ko urakng bukai. (Samo sama'an boko nabi gola' monyampaian pomandiran Allah. Ulangan 18:18-20). Apo, boko pomimpitn urakng Yahudi co honda' boko rasul Yesus molabuhan somuo tugas nantai.

18Jadi sia' monyiuh oca' Petrus agatn Yohanes dibaba' mansu' agi'. Sia' morarakng koduo rasul nantai pakai' mongajar mongona'i Yesus damo bopandir sobagai utusan Urakng nantai ko sopo pan.

19Apo Petrus ongko Yohanes monimbas, “Kaitn ja' inyo bopikir mono inyo bondar: Taat agatn Allah kata'an taat agatn kaitn! 20Koi duo co paca'an langunt. Koi gola' momboritoan la'apo inyo udah koi tiat huatan dinga' doi' Yesus.”

21-22Urakng banya' momuji Allah moniant mujisat nantai obai urakng nantai lumpuh doi' lahir apo udah boumur lobih doi' ompat puluh tohutn hoyu' dinyamani. Jadi, boko pomimpitn urakng Yahudi nantai co ulih monomuan caro pakai' mohukupm koduo rasul nantai agatn co bulah urakng banya' godi. Koponsuahannyo boko pomimpitn urakng Yahudi nantai mombebasan koduo rasul nantai, apo totap morarakng sia' agatn ancapan ni'in: oca' sia' jangan agi' momboritoan ko urakng bukai ajaran inyo jadi diajaran Yesus.

Kolompok urakng pocayo bodoa

(4:23-31)

23Lopas jadi dibebasan, Petrus ongko Yohanes bobali' ko kolompok urakng pocayo. Ongko sia' duo mongisahan somuo inyo dipandiran boko imam kopala' huatan boko pomimpitn Yahudi inyo bukai. 24Watu boko urakng pocayo mondinga' nantai, sia' somuo bosatu dalapm doa ko Allah. Kato sia', “Au Tuhatn inyo Maho Kuaso, Duatn nam inyo monjadian langit, bumi, lout, huatan somuo isinyo.#4:24: Doi' Mazmur 146:6a. 25Pado joman komai, angki-bayatn koi, Rajo Daud molayati Duatn. Duatn mongiripm Roh Duatn ko io, ongko io monulis pomandiran Duatn. Ni'innan bunyinyo:

‘Pocumo ja' boko banso bukai Yahudi moncubo molawatn Allah agatn boko ponggodi hati.

Pocumo ja' boko urakng Yahudi bohoupm molawatn Sio.

26Boko rajo di dunia bososiap boparakng.

Ongko boko pomimpitn bukai bogabukng agatn sia' pakai' molawatn Tuhatn Allah

huatan Rajo Inyo Dijanjian-Nyo.’#4:26: Doi' Mazmur 2:1-2.

27Oh, Tuhatn! Tulisan Rajo Daud nantai udah monjadi nyata. Di kota Yerusalem ni'in Gubernur Herodes, Gubernur Pontius Pilatus, boko urakng bukai Yahudi bosamo agatn boko urakng Yahudi udah bogabukng molawatn Yesus. Sio nantai Hulutn Duatn inyo kinyo bodosa, ia'an Rajo Inyo Duatn janjian. 28Apo Duatn Maho Kuaso inyo moatur somuonyo doi' joman komai. Somuonyo nantai udah tojadi obai sosuai agatn kohonda' Duatn.

29Jadi ni'inan, Au Tuhatn, porotiancam ancapan sia' ko koi. Tulukngcam koi boko hulutn Duatn. Pulahcam koi borani pakai' momboritoan pomandiran Duatn, ia'an Borito Boi' mongona'i Yesus. 30Pakaicam koi pan, Tuhatn, pakai' monyamani boko urakng sakit. Pakaicam koi pakai' bulah mujisat agatn kuaso Yesus, Hulutn Duatn inyo kinyo bodosa.”

31Lopas jadi bodoa, tompat sia' bokumpul nantai boguyakng. Roh Allah monguaso'i sia' somuo, jadi sia' mongkitn borani momboritoan pomandiran Allah.

Urakng pocayo salikng bobagi kodampuan di antaro sia'

(4:32-37)

32-33Agatn kuaso inyo luar biaso, boko rasul hala momboritoan mongona'i Tuhatn Yesus udah hidup agi' doi' komatian. Allah kotakan monunju'an kasih-Nyo ko somuo urakng inyo pocayo nantai. Sia' hala sohati sopikiran. Co nyiant doi' sia' inyo moanggap kodampuannyo nantai umputn io siku'. Somuo inyo umputn sia' digunoan pakai' kopontikan bosamo. 34Jadi, co nyiant siku' pan inyo kokurakan obai banya' doi' sia' inyo monjual lakaunyo damo rumahnyo. Hasilnyo dibaba' 35ongko disorahan ko koduo bolas rasul. Duit nantai sia' pombagian ko urakng inyo momontikannyo.

36Sama'an nantai jam inyo dilabuhan Yusuf. Io urakng Yahudi inyo boasal doi' koturutan suku Lewi apo io lahir di Pulau Siprus. Boko rasul moningkau Yusuf nantai Barnabas, obai dalapm Baso Yahudi Barnabas nantai rotinyo ‘urakng inyo hala monulukng urakng bukai.’#4:36: Monurut Poraturan agama Yahudi, urakng Lewi co ulih bisi tanah di Palestina (Bilangan 18:20–24; Ulangan 18:1–2). Mungkitn tanah Barnabas ado di Pulau Siprus, damo bininyo inyo umputn tanah nantai, damo poraturan inyo morarakng urakng Lewi bisi tanah udah kinyo diolikan agi'. Ni'in Barnabas inyo lopas nian monjadi kawal Paulus momboritoan Kabar Boi' (Kisah 11:26; 13:2). 37Barnabas monjual lakau umputnnyo. Io mombaba' duit hasil ponjualan lakaunyo ongko monyorahan ko boko rasul oca' ulih dipobagian ko urakng inyo ado kopontikan.

Currently Selected:

Kisah Boko Rasul 4: TBDS

Highlight

Copy