Kisah Boko Rasul 2

Roh Allah turutn doi' sorugo moisi'i boko urakng inyo pocayo agatn Yesus

(2:1-13)

1Watu Ari Pentakosta,#2:1: Dalapm Porjanjian Manah, Pentakosta dikonal sobagai Ari Rayo Tujuh Minggu (Koluaran 34:22) huatan Ari Rayo Bohanyi (Koluaran 23:16). Ribuan urakng Yahudi botula' ko Yerusalem pakai' morayaan poraya'an ni'in bososamo. Pentakosta (inyo boroti ‘lima' puluh’) dirayoan lima' puluh ari jadiam Poraya'an Paskah (huatan Yesus huas doi' komatian). somuo urakng inyo pocayo agatn Yesus bokumpul. Sia' bokumpul di sobuah rumah. 2Sia' somuo dudu' di santai. Timpu sia' dudu', kali-labuh ado bunyi doi' langit. Bunyinyo ubo bonakau. Bunyi nantai kotakan borakng, somuo urakng di dalapm rumah mondinga'nyo. 3Lopas nian sia' moniant sosuatu inyo kotiat'annyo sama'an boko lidah ubo lidah api. Ongko moroit huatan ninggur ko sia' masikng-masikng. 4Roh Allah moisi'i somuo sia', ongko bulah sia' masikng-masikng bopandir pakai boko baso inyo bukai mombuka'i doi' baso sia' siku'.

5Watu nantai, di kota Yerusalem banya' jam urakng Yahudi inyo boasal doi' boko banso bukai di dunia.#2:5: Ratusan tohutn sobolupm joman Yesus, negara Asyur ongko Babel mongalahan banso Israel. Banya' urakng Yahudi toposo tinggal di boko doerah bukai. Sia' mompolajari baso boko doerah di mono sia' bodiapm. Sia' nantai boko urakng inyo monyombah huatan monaati Allah agatn sotia. 6Watu urakng banya' nantai mondinga' bunyi bonakau inyo borakng tontai, sia' datakng bokumpul mohampiki rumah nantai jam. Tokonyant ongko topocongo sia' obai mondinga' boko murid Yesus tongahan bopandir pakai baso sia'. 7Somuo sia' hiratn bondar. Kato sia' siku'-monyiku', “Boko urakng inyo bopandir nantai somuonyo urakng Galilea. 8Apo sia' kotakan tohu bondar bopandir pakai baso doerah kito! Somuo kito boasal doi' boko doerah bukai, 9tomansu' Partia, Media, Elam, huatan pondudu' Mesopotamia, Yudea, Kapadokia, Pontus, ongko Asia. 10Tomansu' jam doerah Frigia, Pamfilia, Mesir, huatan boko bagian Libia inyo dampikng kota Kirene. Ado jam inyo datakng doi' ibu kota Roma, 11doi' pulau Kreta, huatan boko urakng Arab. Kito inyo bokumpul kinyo bayo urakng Yahudi asli, apo urakng doi' banso bukai jam inyo udah mansu' agama Yahudi. Jadi aneh bondar, boko murid Yesus ulih bopandir pakai baso kito ni'in! Sia' bopandir mongona'i boko hal luar biaso inyo dilabuhan Allah.”

12 Boko urakng nantai hiratn huatan topocongo. Ado di antaro sia' inyo bopandir ko siku'-monyiku', “Kito co mongoroti la'apo inyo tojadi ni'in.” 13Apo ado jam boboropo urakng bukai inyo monontao'i boko murid Yesus nantai. Kato sia', “Ah, boko urakng nantai udah minum anggur manis tolalu banya'. Sia' bayo mabu'mo!”

Rasul Petrus monjolasan Yesus nantai Rajo Inyo Dijanjian Allah

(2:14-42)

14Lopas nian Petrus maju bosamo kosobolas rasul inyo bukai. Agatn saro borakng io bopandir ko somuo urakng banya' nantai, “Boko somadikan urakng Yahudi huatan somuo urakng inyo bodiapm di Yerusalem! Dinga'anbo pomandiranku ni'in. Aku paca'an monjolasan masud doi' somuo inyo tojadi ni'in. 15Ado di antaro kaitn inyo monyangko koi ni'in mabu'. Nantai kinyo bondar obai ni'in hoyu' japm sombilatn sunsukng.#2:15: Urakng Yahudi minum anggur bayo watu makatn dagikng. Mongikuti Koluaran 16:8, sia' makatn roti watu sunsukng huatan makatn dagikng watu malapm ari. Tiat jam 1 Tesalonika 5:7. 16Sobondarnyo watu joman komai Allah udah mombori'tohuan molalu'i Nabi Yoel mongona'i poristiwa kodatakan Roh Allah ni'in. Nabi Yoel monulis,

17Allah bopandir, ‘Watu ahir joman,#2:17: ‘Ahir Joman’ nantai watu antaro kolahiran Yesus (tiat 1 Korintus 10:11, Ibrani 1:2, 9:26, 1 Petrus 1:20 huatan 1 Yohanes 2:18) sampai Sio datakng ko bumi pakai' inyo koduo kalinyo. Ari hukupan Allah).

Aku paca'an moonji'i Roh-Ku ko somuo urakng.

Ongko boko ana' kaitn, lolaki huatan botina' tajahan monyampaian posatn-Ku ko boko urakng.

Boko bujakng muda' kaitn paca'an bodapat boko poniant'an,

Boko urakng tuho kaitn paca'an bodapat boko mimpi husus.

18Watu ahir joman nantai jam,

Aku paca'an moonji'i Roh-Ku malahan ko boko hulutn-Ku, lolaki huatan botina'.

Sia' paca'an monyampaian posatn-Ku ko boko urakng.

19Aku pan tajahan bulah boko tando mujisat inyo luar biaso

di langit huatan di bumi.

Watu nantai paca'an ado darah, api ongko ansap tobal.#2:19: Mungkitn darah, api huatan ansap tojadi obai poparakan di dunia. Tiat Lukas 21:9-10.

20Matoari paca'an monjadi golap.

Bulatn paca'an monjadi mirah ubo darah.

Boko hal nantai paca'an tojadi sobolupm Tuhatn datakng. Ari kodatakan Tuhatn nantai ari inyo pontikng huatan luar biaso.

21Watu ari nantai, somuo urakng inyo mondorah mominto potulukan-Nyo,

sia' paca'an disolamant'an.’#2:17-21: Doi' Yoel 2:28-32

22 Petrus molajuan pandirnyo, Watu ni'in boko somadikanku urakng Israel, dinga'an pomandiranku ni'in. Yesus doi' laman Nazaret diutus ulih Allah. Allah udah mombutian nantai obai Allah molabuhan somuo macapm mujisat di tongah-tongah kaitn somuo molalu'i Sio. Kaitn udah mongotohu'i nantai. 23Biar pan kaitn mongotohu'i nantai, kaitn monyorahan Sio ko boko urakng inyo kinyo mongonal Allah. Kohonda' kaitn oca' Sio dihukupm mati di kayu salib. Apo somuonyo nantai tojadi sosuai agatn kohonda' Allah. Hajat Allah nantai udah ditotapan-Nyo doi' joman komaimo. 24Jadi, co mungkitn Yesus ija' totap mati. Obai nantaiam, Allah udah bulah Sio bobali' hidup huatan mombebasan Sio doi' ajab sonsaro komatian.

25 Kito udah mongotohu'i nantai obai joman komai Rajo Daud monulis mongona'i Sio. Dinga' ni'in bunyinyo:

‘Aku, monyadari obai Duatn, Tuhatn, hala monyoroto'iku.

Aku cuku paca'an gola' agatn boko musuh-Ku obai Duatn hala monulukng-Ku agatn kokuatan Duatn.

26Obai nantai, hati-Ku rindakng,

mulut-Ku momuji Duatn,

malahan bukakng-tubuh-Ku pan mooso logo hidup boharap ko Duatn.

27Aku mooso logo obai Duatn co paca'an mombiaran Aku totap mati.

Duatn co paca'an mombiaran utusan Duatn inyo Suci sampai momburu' di pasaran

obai Aku hala taat huatan sotia agatn Duatn.

28Duatn udah mombori'tohu ko Aku obai Aku paca'an hidup agi' doi' komatian.

Aku paca'an hala rindakng obai Aku dapat hidup bosamo agatn Duatn.’#2:25-28: Doi' Mazmur 16:8-11.

29 Petrus torus bopandir, Watu ni'in boko somadikan, aku pontikng bopandir torus torakng ko kaitn. Daud, rajo angki-bayatn kito nantai pasti io co monulis pomandiran nantai mongona'i dirinyo siku'. Io udah mati huatan dipasaram. Pasarannyo sampai ni'in ija' ado. 30Apo io nantai nabi. Io udah mongotohu'i la'apo inyo paca'an tojadi. Io ado janji doi' Allah. Janji nantai kuat bondar. Ni'innam janji-Nyo: siku' urakng doi' koturutan Daud paca'an monjadi rajo. Rajo nantai paca'an momorintah umant Allah. 31Jadi, watu Daud monulis ‘Allah co tajahan mombiaran Aku totap mati’ huatan ‘Allah co paca'an mombiaran bangkai-Ku monjadi buru' di pasaran’, sobondarnyo Daud monulis pomandiran Rajo Inyo Dijanjian Allah nantai. Daud udah tohu Allah paca'an bulah Rajo nantai hidup agi' doi' komatian.

32 Boko somadikan, Yesus nanam Rajo nantai! Lopas Yesus mati, Allah bulah Sio hidup agi' doi' komatian. Koi somuo udah moniant Sio. Koi moniant agatn mato kopala' koi siku'. 33Lopas nantai, Sio udah noi' ko sorugo obai kuaso Allah. Yesus pan udah monorima' Roh Allah obai Roh Allah nantai udah dijanjian Bopai-Nyo. Jadi, watu ni'in Yesus moonji'i Roh Allah ko koi. Nanam kojadian inyo udah kaitn tiat huatan dinga' molalu'i boko urakng inyo bopandir agatn bomacapm baso di si'itn.

34 Nah Daud siku' kinyo noi' ko sorugo, apo io monulis pomandiran ni'in:

‘Tuhatn bopandir ko Tuhatnku:#2:34: Rotinyo, Allah bopandir ko Rajo Inyo Dijanjian-Nyo

Dudu'cam di tompat inyo tohormat di sopia' kanan-Ku.

35Dudu'cam di santai sampai Aku bulah boko musuh Duatn ubo kotonja'an kaki Duatn.’#2:35: Doi' Mazmur 110:1

36 Ongko Petrus monyimpulan, Obai somuo buti nantai, ongko somuo urakng Israel gola' tohu ni'in agatn pasti: Allah monotap'an Yesus monjadi Tuhatn inyo bokuaso. Allah jam monotap'an Yesus monjadi Kristus, ia'an golar pakai' Rajo Inyo Udah Dijanjian Allah doi' joman komai. Apo kaitn bulah Sio dihukupm mati di kayu salib.”

37Timpu urakng banya' mondinga' hal nantai, hati sia' sangant monyosal. Sia' botakutn ko Petrus ongko boko rasul bukai, “Boko somadikan, la'apo inyo gola' koi labuhan?”

38Timbas Petrus, “Tinggalan cam dosa kaitn ongko hidup monyonangan hati Allah. Kaitn gola' dibaptis pakai' monunju'an obai kaitn pocayo ko Yesus Kristus. Agatn ubo nian, ongko dosa kaitn paca'an diamputi, ongko kaitn paca'an monorima' Roh Allah. 39Obai Roh nantaiam Allah janjian ko kaitn, ko boko poana'an kaitn, huatan ko boko urakng di tompat inyo jouh,#2:39: Dalapm ayat ni'in kato ‘jouh’ ulih monunju'an holat damo watu. ‘Holat inyo jouh’ boroti janji Allah jam pakai' urakng inyo bukainyo urakng Yahudi. ‘Watu inyo jouh’ boroti janji Allah jam pakai' gonorasi di masa nononyo. Mungkitn jam kato ‘jouh’ di si'itn ulih boroti kododuonyo, holat ongko watu. ia'an somuo urakng inyo ditingkau Tuhatn Allah kito pakai' monjadi umant-Nyo.”

40Petrus bisi banya' pomandiran inyo bukai agi' pakai' monguat'an hati sia' huatan moingant'an sia'. Katonyo, “Allah tajahan monjatu'an hukupan ko boko urakng joman ni'in inyo jahat. Culih hala sonjumpat'an sia' oca' kaitn disolamant'an doi' hukupan nantai.” #2:40: Petrus bomasud somuo urakng inyo monula' Yesus. Di si'itn Petrus mungkitn momakai sobut'an ni'in socaro husus pakai' boko pomimpitn agama Yahudi.

41Watu ari nantai, ado banya' urakng inyo pocayo pomandiran Petrus nantai, kiro-kiro tigo ribu urakng. Sia' dibaptis jam. Jadi, jumlah urakng inyo pocayo agatn Yesus botambah agi'. 42Sia' hala tuyut somuo ajaran boko rasul. Somuo sia' opat bokumpul bosamo boko urakng bukai inyo pocayo. Sia' opat makatn#2:42: Socaro harapiah, ‘momocahan roti.’ Pomandiran nantai dipakai sobagai sotilah pakai' inyo sokarakng disobut Porjamuan Kudus, ia'an poraya'an inyo ditotapan ulih Yesus pakai' makatn roti huatan minum anggur pakai' momporingant'i Sio (Luk. 22:14-20). Pado watu nantai, poraya'an nantai dilabuhan timpu sia' makatn bosamo. huatan bodoa bosamo.

Caro hidup boko urakng inyo pocayo agatn Yesus

(2:43-47)

43Watu nantai, boko rasul molabuhan bomacapm mujisat Obai nantai, somuo urakng di Yerusalem mooso hiratn. 44Somuo urakng inyo pocayo totap bosatu. Sia' somuo mooso umputn sia' nantai umputn bosamo. 45Jadi opat ado doi' antaro sia' inyo monjual kodampuan umputnnyo. Hasil doi' ponjualan nantai, sia' pombagi-bagian ko boko urakng bukai inyo momontikan bantu'an. 46Sotiap ari sia' bokumpul di tongahlamanan Rumah Allah, pusat kogiatan koagamaan urakng Yahudi. Sia' bokumpul agatn sohati sopikiran. Sia' pan opat hala mohundakng pakai' makatn bosamo di boko rumah sia', huatan sia' morayaan Porjamuan Kudus jam. Sia' molabuhan somuo nantai agatn tulus hati huatan kotakan rindakng, 47kapikng momuji Allah. Somuo urakng sonang agatn sia'. Kolompok urakng inyo pocayo nantai botambah banya' obai sotiap ari ado boko urakng inyo disolamant'an Tuhatn.

Currently Selected:

Kisah Boko Rasul 2: TBDS

Highlight

Copy