MATIUS 6

Ininggi dek mende inake bugwi wene

1 # Mat. 23:5 “Kir agama paga eru wene mbalek ndak-ndak eku dogolir, akuni inil ninawak nen yiluk telekma eritagwi eti maduk ekwima, maga o. Kir etegerogon ar ekwi kalok, Kinombae mbogor paga mendek nen, kir onggo mondok wokiragin dek o. Ma wene endi kinilu togo dogoni o.

2Etegerogon ma, kir kinamendek akuni ininggi dek mendek wogoragun kalok, an yegerogon erir taga o yiluk, wogokbatar akuni ambi yoragik inaruk paga yurak mondok maga o. Ir akuni ininggi dek mendek inake wogoragu dogolir kalok, tamban erir tagama inom, tuan nggok paga inom, akuni nen woguk binanuwak nen yiluk ekwi eti maga o. Nen etegerogon ekwi kalok, kir nen onggo mondok arar kodar tagwi o. 3Ogwe, kir nen akuni wogorau yiluk andalok kalok, akuni ininggukdek kinakla nen andalok kimagago wogoraurak o. 4Nen kir ekop eti akuni nen inil kinagwi dek ogwe, Ar ilu kwak eti Kinombae mbogor paga mendek adigar o. Ma Ar nen kir kirago ekwi mende eti, il kinagerik mo onggo wokiragin o.”

Tamban eku dogorak yorarige wene

(Luk. 11:2-4)

5 # Luk. 18:10-14 “Kir tamban eruwok nen yiluk kalok, ir akuni inil ninawak nen yiluk, tamban erir tagama mendek dogolir tamban ekwi, nen tuwan paga akuni nen inil ninawak yiluk tamban ekwi, etegerogon ekwi eti ndak-ndak erugup o. Nen etegerogon ekwi kalok, kir nen onggo arar kodar tagwi o. 6Ogwe kir tamban eruwok nen yiluk kalok, kinuma tu larogo ari unggiluk, nen Kinombae akuni inil ketagodek mendek enogo oba tamban erurak o. Kir ekwi eti, Kinombae mbogor paga mendek adigar il kinar taga ma, Ar nen arar onggo wokiragin o.

7Kir nen tamban eku dogolir kalok, ir akuni Tuhan ininggukdek tekmana mendek ekwi ndak-ndak erugup. Ir inakla nen, nir tamban idu wadu ekwi paga, onggo worniragin andugwi o. 8Ir inobabur waganugup o. Kir auwan nggino yigikdek kigik, kir wadok mendek eti, Ar Kinombae eti obok ilu o. 9Ma, kir tamban yegerogon eku dogoni o,

‘Ninombae mbogor paga mende:

Kar Allah kaitok mende kadik ar o.

Kar kalon palku dogolir wogokbagagwi dogogun o.

10Nir mendek Raja Kar arar o.

O agar paga yoma, o mbogor paga

Kar andar tagan mende ekwi ndak-ndak ar eku dogowak o.

11O yogondak ninagarom

nau ndak-ndak worniran o.#6:11: Nau ndak-ndak: Kubenen ake inom; nen o yiga ndagalka ake inom obogar o.

12Nir maduk erninaka mende,

ir obok maga bago eti ndak-ndak,

Kar nen, nir maduk eko mendek eti maga binanin o.

13Nir niniliti kwaka eti paga, ebebar andarugu mendek, mi erogo bu enogo yiluk, togok binanugup o,

Ogwe ar maduk mendek inggimu nen kede pigalogo binanin o.

[Kar kebe Raja kobarne ambik, yogondak nen dogogun kudi, kaitok mondok Kar arar o. Amin.]’

14 # Mrk. 11:25-26 Kir maduk ekinakwi eti maga bagwi kalok, Kinombae mbogor paga mendek nen, kir maduk ekwi eti maga binagagin o. 15Ogwe, kir kinogari ambetak maduk ekinakwi mendek, maga bagun dek kalok, Kinombae mbogor paga mende nen, kir maduk ekwi mendek ogwe, maga binagagin dek ar o.”

Nonggwa mendek kwan erogo tamban ekwi wene

16“Kir nen puasa#6:16: Puasa eti: Nonggwa mendek kwan erogo biluk dogolir tamban ekwi yiluk Indonesia wene paga. eruwok nen yiluk kalok, ir akuni nen puasa erir tagwi mende yenggak ninawak yiluk erugup o. Nenaluk, ir akuni puasa eku lagarik inakla andawak nen yiluk, ineloktenggen paga warek-warek ekwi eti paga, onggo arar koda tagwi o. 17Kir puasa eruwok nen yiluk kalok, kinanggoma watalok, kiniri pipak mbililogo nen, tamban eku dogorak o, 18Eti nenaluk, akuni nen nonggwa mendek kwan erogo tamban eku lagarik, yiluk inilu agunem ake, Ogwe arte Kinombae mbogor paga mendek kimago enogo adigar ilu o. Kir kiragoma ekwi eti, Ar obok ilu ma, onggo wokiragin o.”

Inamendek mbogor paga bataurak wene

(Luk. 12:33-34)

19 # Yak. 5:2-3 “Kir agar paga yoma, kinadik kinamendek wonggalogo bartagup o, nenaluk, o yoma yibal bega, maduk etaga, inimudu waganggwi, erir tagama o. 20Etegerogon ar, kinamendek mbogor paga batagu dogoni o, nenaluk, etoma yibal bigikdek, maduk agikdek, nen inimudu wagani tagodekma o. 21Kir kinamendek etoma werek kalok, kiniliti etoma ar werek o!”

Kinebe akbinak wene

(Luk. 11:34-36)

22“Kir kinil eti kinebe akbinak ekinabi taga mendek o. Kir kinil pano kalok, kinoba etoma akbinak ndedalek-wedalek etarigin o. 23Kir kinil maduk kalok, kinoba amum mondok etarigin o. Etegerogonma, kir kinakla iragal akbinak mondok dek kalok!” amum mondok dogogun o.

Ar Allah o nen ye mendek nde mendek o wene

(Luk. 16:13, 12:22-31)

24“Akuni ambi nen ap mbere ininggi werek ineyabu eritagodek o. Nenaluk, ar ambi kwak iliti kunik eka, nen ambi kwak iliti kunik dek eka erirtaga mende o. Etegerogonma, ap inggi werek ambi kwak oba eyabu tebe yiluk eka dogolir, nen ambi kwak oba eyabu tebe yiluk erigin dek o. Etegerogon ar, kir Ar Allah eyabu ekwi, nen ye mendek nde mendek ake eyabu ekwi, etegerogon erurak ndak dek o.

25Etegerogonma, kinakla eberni o; kir kiniluk dogu ake nen, kinagarom nau paga inom, kinagi nau paga inom, kiniyom yirtau paga inom, kiniliti pirik erugup o. Nonggwa mendek ake paga inom, ninebe ake tu yikwi paga inom, eta kwak nggok mondok lektek a? 26Tewe mbogor paga etoma kinil lakdani o. Ir inarom ai yata tagodek, nen yakbatalok ebe endakta tagodek, endak batalok kuwak erogo bakta tagodek o. Eti ar ogwe, Kinombae mbogor paga mendek nen, paginarek dogir taga mende o! Nen kir kinake paga eti, kinebe mondok ebegirak arar o, nen kir kinebe tewe ndak-ndak yiluk andar tagwi? 27Kar ta nen kiliti pirik, niluk idu ambi inom dogik nen yiluk, idu togon we bugudak ogwe, eru ndak o?#6:27: We bugudagar kigik, iluk dogu ake nen ambi inom idu eru: we bugudagar kigik ogona togon bi dagu.

28Kir tu kinoba yiru paga kiniliti pirik pakalok eritagwi eti nenaluk? Ongga bakung erogi yugu etoma kinil lakdani! Ir nen inenggen pano yiru paga ake nen, yabu ekwi dek, tuguluk inebe mendaktugwi dek ar o. 29#1Raj. 10:4-7; 2Taw. 9:3-6Ap nggok Raja Salomo amindik amendek pakalok werek ogwe, ar tu pano mendek, o bakung erogi eti eloktenggen ndak-ndak ambi yika dogudek o! 30Irikngga kadengga yogondak anggup wulke werek mendek takborogo kubenen obogar kali bigin o. Eti ar ogwe, Ar Allah nen pikpak agubak kigirogo baktaga mendek ma, nen kir kwak eti ebiluk mondok arar pakirek dogogin o! Ogwe kir kiniliti dibigidek agotik o! 31Kir nen, ‘Nir erom ngga mendek nugun’, nen ‘nir ninagi ngga mendek nugun’, nen ‘nir niniyom ngga mendek yitagun, yiluk kiniliti pirik erugup o’? 32Wene etoma ir a akuni Ar Allah inom kunik dek mende nen mutok nugwi o. Nen kir kinakla andar tagwi etoma, Kinombae mbogor paga mendek obogar ilu dogi taga mendek o. 33Eti paga, kir ibanini erurak eti Allah apma binagurak mendek ndak kwaku dogolir, Ar akla andar taga ndak-ndak eku dogorak o. Eti ekwi kinalok, Ar Allah nen ambetak inom pakalok erogo wokiragin o. 34Ebe eta ar ma, o kubenen ake paga kiniliti pirik parik mondok erugup o. O kubenen ake paga, kubenengge ar kiniliti pirik etno o. Yogondak dek mendek eti, yogondak kudi arar o. Ambi inom niniliti pirik erugup o,” yiluk yorarige o.

Currently Selected:

MATIUS 6: WLW

Highlight

Copy