MATIUS 20

Wene ir ap anggur yabula ekwa mende inoba lirogo yoragage wene

1“Ar Allah apma binani waga kigik etarigin mende ake, wene oba lirik yi ndak-ndak o: akuni ambi anggur yabu leger waganek onde werek nen, o keyalek mondok akuni eyabula yabu eku dogu kwaginabir wulkige. 2Ar enogo akuni yemenogo, o ambi paga onggo uang perak#20:2: Uang perak eti; Uang pae enggen, yogondak koin etnogo ndak-ndak. mende ambiar wokiragin o, yiluk inom inane dambul diluk, yabu erni o, yiluk yorarige. 3Anggur yabu ondewerek enogo, ar jam sembilan paga pasar etoma lagage mende, wadigi ineyabu dek mende ma, wedek ar welagwi il darige. 4Daga lagagerek, ir yoraga dogolir, ‘Kir an neyabu anggur yabula eri lani o. Ekwi kinalok, an nen kir onggo amor negen ar wokiragin o, yiluk yorarigemo, ir enogo arar lagugwa.’ 5Tuguluk ar ap eyabu werek ernogo, jam dua belas o odo kirogon paga o, nen jam tiga o keyanggwi paga o, etegerogon ndak-ndak ar ekige o. 6Tuguluk o keyanggune tebek togon jam lima paga, ar ap enogo akuni amberak il dalok, yoraga dogolir: Kir o yogondak widik wedek mondok, kinoba nen ki aga yoma edo nenaluk? 7Ir akuni enogo nen onggo yogu dogolir, ‘Ir akuni ineyabu eru paga, yokniragwi dek ar kalok agorik o.’ Ar nen onggo yoraga dogolir, ‘Eti kalok, kir an neyabu anggur yabula eri lani o,’ yiluk yoragage.

8 # Im. 19:13; Ul. 24:15 O arar tebek togo etagagemo, ar ap eyabu onde werek enogo nen, yabu kepala birige mende yoga dogolir, ‘Yogo, ir akuni yabu eka mende obogar wai yoralok, ir yabu o keyanggune irep paga onggega mende kudi nen, ir yabu inalep o keyalek onggega mende kudi, obogar onggo wogoran o,’ yiluk yorige. 9Yirigemo, ir ap yabu mende, jam lima nen yabu eri unggirugwa mende ndak wagugwa. Wagugwama, ir inadik ndak onggo satu uang perak wogoragage. 10Wogoragagemo, tuguluk ir yabu mende, yabu o keyalek nen eri unggirugwa mende wagugwa. Ir inakla andagu dogolir, ir kwak idu negen wogoragin, yiluk inakla andarugwa. Andarugwa mende, ir enogo onggo satu uang perak ar wogoragage o. 11Ir enogo uang wogoragage mende, ir mondok takmu mbakmu, ar ap eyabu werek ernogo yogu dogolir: 12‘Ir yabu mende, irep paga wagiya mende ernogo, ir yabu we satu jam arar eka. Nen nir kwak yabu o keyalek nen, pia ninoba mbalka kigik, o ki aga, ogwe kar ir kwak yabu onggo nir ninom ndak-ndak begen etare!’ yiluk yorugwa. 13Yorugwama, Ar ap yabu onde werek enogo nen, ap ambi yoga dogolir, ‘Nogar, an kar koba maduk ekabu dek o. Kar an neyabu o yogondak yi paga eka keyalok, onggo satu uang perak wokirigin o, yiluk yirigimo, kar nen ndak ar o, yiluk yegen kwak etnogore? 14Etiar ma, onggo bigi endi, ibar kodalok kuma lan. An wadok eti, ir akuni yabu, o irep paga eri unggi wagiya mende eti, ir onggo kar kinom ndak-ndak wokerau nakla andagirik ma o. 15An nagarek kalok, ma an wadok andagi ndak-ndak eru ndak dek a? An niliti pano obok inakba eti, kar ka'ir neyagen a?” yiluk yorarige.

16 # Mat. 19:30; Mrk. 10:31; Luk. 13:30 Ar Yesus nen, wene ambi inom yega dogolir, “Ir Akuni yabongga mende eti, ir inalep arugun o, nen ir akuni inalep mende eti, yabongga etarugun o.”

Ar Yesus wataru mende, inggi a mbere ambi paga yirige wene

(Mrk. 10:32-34; Luk. 18:31-34)

17Ar Yesus o Yerusalem laga dogolir, Ar mutok lagwi mende inebe dua belas etnogo, tuan paga lagu dogolir, wonggal dalok wene men yirige, 18“Kinaruk dogoni o! Nir yogondak o Yerusalem lektagwi o. Etoma ari lamo, Ar Akuni Inakbur etnogo, ir ap imam-imam kepala o, nen guru-guru agama o, ininggimo wogoramo, ir nen Ar mondok min arar warurak yiluk yugun. 19Yugu dogoluk, ir akuni Yahudi mende dek, ir ap ninggalok mende ar wogoramo, ir nen puduk padak yogwi, anggon panggon erogo biluk, o kari karo paga lambologo biluk, mondok min arar warugun o.”

Ir Yakobus Yohanes inagwiya nen nggino yirige mende wene

(Mrk. 10:35-45)

20Tuguluk Ap Zebedeus agwe, ar agwi inom Ar Yesus oba wagugwa. Wagugwarik ar kwe enogo, ngginongge negen yik nen yiluk yega lagagerek, Ar Yesus apma tebe yi wagage.

21Wagagemo, Ar Yesus nen yoga dogolir, “Kole, kar nena wadok andalok wagan?” yiluk yorige.

Yorigemo ar kwe enogo nen yoga dogolir, “Yabungga, Kar Ap Raja menarigin arar kalok, an nagwi ya, ambi kinggi ebema nggwe, nen ar ambi kinggi mbaik mo nggwe, imbirak mendau yiluk, nggino yigi o,” yiluk yorige.

22Yorigemo ar Yesus nen, “Kir nggino yogop eti, kir nen nena nggino yogop eti, kir kinungguk dek kigik ar, nggino yonogop o. Kir i piala#20:22: Piala eti; I ap nggaindak inake todogo birtaga mende. anggon panggon an erurak mende todek eti, kir nau ndak a?”

Ir onggo yogu dogolir, “Nir nen nau ndak ar o.”

23Yorugwa ar Yesus nen, ebebar o, “Piala An nake i todek eti, kir nugun ar ogwe, wene An neragalu mbaikmo nggwe a, ebe ma nggwe a, eti ake paga, An nen ap yi kwak yiluk, meninabu eti nobatne dek o. Tani nen etoma menarugun eti, An Nombae nen obok pulogo barigemo werek o,” yiluk yoragage.

24Wene eta yirugwa mende, ir ap inebe sepuluh Ar mutok lagwi mende amberak inaruk kolalku lagugwarik, ir wenemuk pakalok mbalkugwa. 25#Luk. 22:25-26Eti paga nen, Ar Yesus ir obogar wai yoralok yega dogolir, “Kir ap nggok ndak inalebunu dombok o pago etoma, Ar Allah inunggukdek mende ma, ir akuni inapma werek mende tebelogo balok, anggon panggon erinakwi, nen ir ap nggok ndak adek nen, tibik tebek erogo bagwi o. 26#Mat. 23:11; Mrk. 9:35; Luk. 22:26Etiar ogwe, kir etegerogon eru maga o. Kir eru kalok eti yegerogo, akuni ta kwak nen, kir kinanggedekla nen nggok aru wadok kalok, ar akuni eti, ar ebe akuni yedoman mende ndak-ndak etarurak o. 27Nen kir kinanggedekla, ta nen alep-alep etaru wadok kalok eti, ar akuni eti, ebe eyabu yedoman mende ndak etarurak o. 28Eti, Ar Akuni Inakbur ekige ndak-ndek; Ar wagage eti, yamakugu dogowak nen yiluk, watukdek ogwe, ar nen yamak daga, nen ar ebe warek paga, akuni pakalok arar ndilogo baga erik nen yiluk, wagage o.”

Ar Yesus nen akuni inebe mbere inil mbuk mende pano erinakige wene

(Mrk. 10:46-52; Luk. 18:35-43)

29Ir o Yerikho dambe kalok wulkunem, akuni pakalok Ar Yesus mutok lagugwa. 30Lagunem, akuni inebe mbere inil mbuk mende tuan paga korek darugwa. Ir inaruk kolalku dogolir, Ar Yesus yi lektaga, yirugwa kwak ernogo, inaruk ndaguk togo kolalku lagugwarik, “Aii Daud Akbur wae, ninakba kan o, lak!” yiluk yorugwa.

31Ir akuni pakalok etanogo welagwi mende nen, wene mberiralok, kinane dek atni, yiluk yorarugwa. Yugu lagugwa, ir enogo ibiluk inane lek ar kalok yugu dogolir, “Ai kar Daut Akburak wae, ninakba kan, o lak!” yiluk yirugwa.

32Yugwi agagemo, Ar Yesus yungguk togo puk aga lagagerek, “An kir nena ekbinagu kinakla andak tagwi?”

33Yiluk yoragagemo, Ir nen onggo yogu dogolir, “Aii ambo, nir ninil bengge laru wadok nen o!” 34Yiluk yorugwama, Ar Yesus inakba nggok togo kega lagagerek, Ar Yesus inggi inilmo paktega kigik, eta nogo ar, ir inil arar pano atuk bengge lagugwa o. Nen ir etnogo Ar Yesus mutok arar lagugwa.

Currently Selected:

MATIUS 20: WLW

Highlight

Copy