MATIUS 18

Ap nggok kwak ta?

(Mrk. 9:33-37; Luk. 9:46-48)

1 # Luk. 22:24 Etinem, ar Yesus aworomi oba wagugwarik, Ar kinok men yorugwa, “Akuni Ar Allah akburi mende yoma, ta kwak ap nggok negen andaurak kegen?” yiluk kinok yorugwa.

2Ar Yesus nen, elege bugudak mende ambi waituk, ir inika paga mendirige. 3#Mrk. 10:15; Luk. 18:17Mendiluk Ar Yesus nen yoraga dogolir, “Kiniliti ebebar andani o! Kir kinabel medo yiluk, kinebe elege bugudak mende yi ndak-ndak etarugun kalok, kir Ar Allah akburi arar etarugun o.” 4Ir akuni iniliti tebe yiluk, nen ir inebe elege bugudak mende yi ndak-ndak etarugun kalok, ir akuni Ar Allah akburi inakla etoma, ar eti kwak nggok mende arar etarigin o. 5Ir akuni ta nen, An nake paga, ir elege bugudakndak eti wogonakwi kalok, ir eti An wornakwi arar o, yiluk yorarige.

Ir akuni ambetak maduk eruwak nen yiluk inakla nggagalkwi wene

(Mrk. 9:42-48; Luk. 17:1-2)

6“Ar ta nen akuni bugudak ndak yi, An noba ebebar andau mende non mbalogo bagin kalok, ar akuni eti ake paga, nggir ndamuli taga mende paga, ar enggadobak kol yidilogo nen, i laut agup mondokma etoma arar, mbo wukburak o. 7Agar paga yoma, yi wene ndik wene, ir akuni maduk etaruak nen yiluk etarir taga mende eti, arar nuk atanek o. Wene maduk edo etegerogon mende, mondok dogogin ar ogwe, ir akuni maduk edo kwakwa eti perak, arar nuk atagun o!

8 # Mat. 5:30 Kar kinggi nen a, kar kiyok nen a, maduk erogo koba bega kalok, mbalogo mbo lakburak arar o. Nenaluk, pano kwa eti, kar kinggi mbere inom, nen kiyok mbere inom, pudugu indu aikmo lakbagu eti kwak pano a, kar kinggi penak dek kigik, nen kiyok penak dek kigik, ogwe kar kebe Ar Allah kimbirak kiluk dogu kwak eti pano a. 9Nen kar kil paga maduk edo koba aga kalok, kil enggen ebe kidilogo mbo lakburak o. Nenaluk, kil ambiar kigik ogwe, Ar Allah kimbirak dogorak kwak eti pano o, dek kalok kil eberek inom pudugu indu aikmo mbo lakbagurak o.”

Domba bulagage wene oba lirogo yoragage wene

(Luk. 15:3-7)

10“Ir akuni bugudak ndak yi, wene maduk puduk padak yoragup o. Nenaluk, kinakla eberek dogoni o, ir malaikat-malaikat eti, o ninggi nanggi Ar Allah inil birogo dogir tagwi o.

[11#Luk. 19:10Eti kalok, Ar Akuni Inakbur wagage eti, ir akuni nuk agugwa mende etoma kwarogo ndilinabik nen yiluk, wagage o!]

12Wene yi kinakla eberni nda? Ma, ar ap ambi anggumi domba inebe seratus paga ma, nen domba yemenogo inakla nen ambi ar bulagagemo, ar ap enogo nen nenggerogon erigin? Ar nen erigin mende eti, doma inebe sembilan puluh sembilan yemenogo ado paga dambe dalok, ar nen bulagage mende enogo kwarir ligin o. 13Wene ya ebebar mende yokeragin o, Nen domba enogo ebebar kwak biluk kalok, domba bularudek mende yemenogo dagik ar ogwe, ar ap enogo, domba bulagage mende enogo ake paga kwak perak, adeknggen pakalok erigin o. 14Etegerogon ar, Ar Ninombae mbogor paga werek eti, ir akuni An Noba ngger yogondak ebebar andega mende yi, ambiar bularu a'ir mondok o.”

Kinogar ambi maduk eka kalok wene

15 # Luk. 17:3 “Kar kogar ambi nen, kar maduk ekaka kalok, ar oba lalok, kar yi maduk ernaken o, yiluk yorurak o. Eti kar kimbirak kinadik lakbi lakbo erurak o. Nen kar wene yorigin enogo, ar nen waganigin kalok, kar kogar enogo iyok paga ndilkodagin o. 16#Ul. 19:15Ogwe ndak dek kalok, akuni inebe mbere a, ambi ar a, wogorek lalok kinom yurak o. Nenaluk Alkitab akla diru mbalek yegerogon, ‘Akuni ebebar maduk eke o yiluk, oba denggek togon burak kalok, akuni inebe mbere a, mbere ambi a, saksi negen inuwagam yoruak o.’ 17Nen ir akuni eti nen ar wene aruk warugun mende kolalka dek kalok, ar awene eti wolok jemaat paga nen yurak o. Nen ar wene ir jemaat nen yorugun mende wagangga dek ar kalok, ar eti pajak kuwak ekwa, nen akuni Ar Allah eti unggukdek mende arar yiluk andano o.”

Erurak dek mende inom erurak mende inom wene

18 # Mat. 16:19; Yoh. 20:23 “Wene yi kinilu togon o: o agar paga yoma, kir nen erurak mondok dek arar o yiluk, yugun mende eti, mbogor paga ogwe erugun mondok dek ar o. Tuguluk kir nen, agar paga yoma erurak ndak o yiluk yugun mende eti, mbogor paga ogwe erurak ndak ar o yiluk yugun o.

19Nen ambi yi, kinilu ar dogoni o: kir kinanggedekla nen inebe mbere nen, inane dambuk togon ar, wene ambi mende ake tamban erugun kalok, tamban erek eti, An Nombae mbogor paga mende kir nggino yugun mende eti wokeragin o. 20Nenaluk, ir akuni inebe mbere a, mbere ambi a, An nendaga paga wonggalki kalok, An ir eti inakla ninom dogogin o.”

Yedoman ambi akuni maga bau a'ir mende oba lirogo yirige wene

21 # Luk. 17:3-4 Ar Petrus nen, Ar Yesus oba wagagerek kinok yoga dogolir, “Tuhan wae, an nogar ambi nen maduk an noba erigin kalok, an nen ninggi mende paga, ar eti maga burak kegen? Maga bega kigik, ninggi tujuh kali paga yungguk medak erurak kegen a?”

22Yorigemo, Ar Yesus nen wene onggo yoga dogolir, “Kar nen kinggi tujuh kali paga yungguk medak maga burak dek o. Ogwe tujuh puluh kali tujuh kali paga yungguk medak arar maga burak o. 23Nenaluk, Ar Allah nen apma arar binani waga kigi, o elokte etarigin eti, wene oba lirik yi talek o: Ar ap raja endaga nggok ambi nen, ar ayedoman mende inanomar dek erogo bau wadok nen ekige. 24Eka dogolir, yambenir lagage mende, ar yedoman ambi anomar juta-juta mondok arar ma, 25ar nen onggo wogorurak ndak arar agage o. Etegerogon agagemo, ar ap raja nggain enogo nen yega dogolir, ar yedoman mende enogo inom, akburi inom, amindik amendek inom, inonggo kunogo nen, anomar etoma onggo burak o, yiluk yirige. 26Nen ar ap yedoman mende enogo, ar raja nggain enogo alon palogo, apa tebe yiluk, ‘Ae Tuan wae, we il ambi ar torneyan o, an nanomar etoma erogar onggo bigin o, yiluk yorige.’ 27Yorigemo ar ap raja nggain enogo nen, akba kega lagagerek, anomar yemenogo obogar dek erogo arar birige o.

28Erogo birigemo, ar enogo wundiluk lagagerek, ar ogar ambi ar anomar seribu, we mende negen ar oba werekma imbirak abuk agagerek, kede waka, anggodobak nggumulka dogolir, ‘kanomar noba werek mende ibar onggo bin!’ yiluk yorige. 29Yorigi nanggige, ar ogarak enogo nen, ar ika paga ebe tebe yega lagagerek, ae puk arin o nogar, obogar etoma an onggo bigin! yiluk, yorige. 30Ogwe ar ap yedoman enogo akba eru dambe karige o. Dambe kalok, ar ap ebe kede warogo penjara arar malbirigemo, yemenogo werek kigik onggo birige o. 31Nen ir yedoman amberak nen, ar ekige mende enogo inil kalok, ir inakla maduk agagemo, ir nen ar ap raja nggain mende enogo arar yori lagugwa. 32Yorugwama, ar raja nggain enogo nen, ap yedoman maduk mende enogo wai yotuk, yoga dogolir, ‘Yedoman maduk mende kar arar o! Kar kanomar mende, noba nggino nggano mondok ar yegen paga, obok ar dek erogo bagagi o. 33Ma ebebar erurak kwak eti, an nen kar kakba eki ndak-ndak, kar nen ar kogar eti akba etep o?’ 34Yega lagagerek, ar ap raja nggain enogo, wenemuk ambik arar yega dogolir, ar yedoman mende eti, ebe kede warogo lembaga arar bini o, nen ebe etoma werek kigik, ar anomar etoma onggo buak nen o.”

35Etegerogo Ar Yesus nen wene mbililka lagagerek, wene yegerogon yirige, “Wene eti ndandak arar, An Nombae mbogor paga nen, kir kinogari maga balok, inakba erugun dek kalok, kir kinaditak dombok etegerogon arar ekinabigin o.”

Currently Selected:

MATIUS 18: WLW

Highlight

Copy