MATIUS 16

Akuni Farisi mende nen Ar Yesus erukbuk mende erin yorugwa wene

(Mrk. 8:11-13; Luk. 12:54-56)

1 # Mat. 12:38; Luk. 11:16 Ir Akuni Farisi mende inom, Saduki mende inom, inebe we mende negen, Ar Yesus wene yega kalok, yiduk kwaruok nen yiluk Oba wagugwa. Wagugwarik, Ar Ebe ebebar Ar Allah nen lakbi wagama yiluk inilu arurak ake paga, erukbuk mende elalin ambi erin o, yiluk nggino yorugwa. 2Ar Yesus nen onggo yoraga dogolir, [“Mo il nggoro-nggoro wuka dogolir, elokte mep-mep aga kalok, kir nen yugu dogolir, ‘O pano yigin o, yiluk yir tagwi o.’ 3O keyalek, kir nen yugu dogolir, ‘O elokte amum mondok o, muk miyo perak togon warigin arar o,’ yiluk yugwi o. Etegerogon ma, mbogor elokte eka kinil lak kigik, o etaru mende elokte mbenarogo yugwi ogwe, o yabungga nena etarigin eti, kir nen kinil kaurak ndak dek mondok o!”] 4#Mat. 12:39; Luk. 11:29“Kir akuni o yogondak mende yi, kinakla maduk nggirik mende arar o. Kir nen An erukbuk elalin ambi erin yoknogotip ogwe, kir kinake erukbuk elalin mende ambi erigin mondok dek o. We ar Nabi Yunus ekige eti kwak perak, dogogin arar o.”

Etegerogon yoraga lagagerek, Ar Yesus dambek dalok, arar lagage.

Ir Farisi mende inom nen Saduki mende inom, wene ir mende ragi abok yirige wene

(Mrk. 8:14-21)

5Ar Yesus mutok lagwi mende, ir i danau aik alibagan nggwe undarugwarik nen kwak, ir roti waganu inakla mi agagemo inilu agage o. 6#Luk. 12:1Ma Ar Yesus nen ir yoraga dogolir, “Ir ap Farisi mende inom, nen ir ap Saduki mende inom, ir mende ragi eti pik pak wogalino o.”

7Wene Ar Yesus nen yirige enogo, Ar Awurumi inaruk kolalku lagugwarik nen, ir inane mumun, ar ambi yogik eku dogolir, “Wene yege eta, nir roti wolok warukdek kalok yege o,” yiluk inane mumun yugwi, aru kolalkige.

8Ir wene yugwi etoma Ar Yesus ilu ar ma, Ar nen wene yoraga dogolir, “Wene kir mende roti dek abok eti, yedo nggodo yitagwi etoma nenaluk? Kir kinakla ebebar kwak eti andagwi dek o. 9#Mat. 14:17-21Kir kinakla dikbigikdek ar werek kinagi o? Akuni lima ribu paga, we roti lima paga mende ar, ugurogo wogoragagi yemenogo, kir kinakla dibigidek ar kinagi? Ndinogo birugwa mende kir keranjang mende akla yagar kugup nogo? 10#Mat. 15:34-38Nen roti we tujuh paga ar mende, akuni empat ribu paga narugwa eti nenggedek kogop? Nen mburim yago akla, roti ndin agage mende, mende paga yagadogo bogop enogo? 11Nenaluk kir mondok kiniliti dikbigidek werek, An nen roti eti ake paga, kir yokiragidek o? Ogwe, kir kinebe pipak wogalek dogu yiluk, roti akuni Farisi mende inom, nen ir Saduki mende inom, eti pik pak wogalku dogoni o!” yiluk yigi o.

12Etegerogon yorarigemo, Ar aworomi yemenogo, wene ragi roti piruak nen yiluk biktagwi eti ake paga yege dek ogwe, nir nen ir ap Farisi mende inom, nen ir ap Saduki mende inom, inawene emekwi mende eti pikpak elokte mbenaku dogorak paga yegemo o, yiluk inilu agage.

Petrus nen Yesus ebebar mende yorige wene

(Mrk. 8:27-30; Luk. 9:18-21)

13Yesus o kota Kaisarea Filipi eragalu etoma lagage. Etoma lagagerek ar aworomi kinok yoraga dogolir, “Akuni yoma nen yugu dogolir, Akuni Inakbur eti ta andartagwi kogop?”

14 # Mat. 14:1-2; Mrk. 6:14-15; Luk. 9:7-8 Ar aworomi nen onggo yogu dogolir, “Ir akuni ambetak nen yugu dogolir eti, Yohanes Pembaptis yugwi. Nen ir ambetak nen yugu dogolir eti, Elia yugwi. Nen ir ambetak nen yugu dogolir eti, Yeremia yiluk yugwi o, ogwe ir amberak nen eti, ar Nabi inom mende arar o, yiluk yitagwi o.”

15Yiluk yorugwama, Ar Yesus nen wene onggo yoraga dogolir, “Ogwe kir kinakla nen kwak, An yi ta andar tagwi?”

16 # Yoh. 6:68-69 Ar Simon Petrus nen onggo yoga dogolir, “Ninombae kebe ap Endaga Nggok, akuni ndilinakwa mende, Ar Allah Iluk Mende Akbur eti Kar arar o.”

17Ar Yesus nen onggo yoga dogolir, “Simon ar ap Yona akbur yi wae, kar yogondak onde agan arar o. Ma wene yi, akuni nen kar yokegama yegen dek o, An Nombae mbogor paga mende nen yokegemo nen yegen o. 18Etiar ma, kar eti Petrus, nggir akber pakalok mende eti arar o. Nen makbil nggir yi paga, An Nanggereja obatne ambik, tebelurak ndak dek mende, kambiluk lektagama mende nen ogwe, tebeligin dek mende arar paligin o! 19#Mat. 18:18; Yoh. 20:23Ar Allah werekma, o ngger erogo bigin mo etoma mende tugurin, kar arar wokirigin o. Agar taga yoma, kar nen kede warigin kalok, mbogor paga etoma kede warigin ar o. Nen agar taga yoma, kar nen kede pigalogo bagin mende, mbogor paga etoma nen kede pigalek ara ari lugun o. Nen agar paga yoma, kar nen ebebar erogo bigin mende eti, mbogor paga etoma etegerogon ar, ebebar erogo bigin o.”

20Etegerogon yoraga lagagerek, ar Yesus nen, ir Ar mutok lagwi mende ernogo, wene An eti Ar Ap Nggok Ndilinakwa mende enogo arar o, yiluk akuni ambi yorau mondok maga arar o, yiluk inilu erogo, inaruk wakige.

Ar Yesus kener waka dogoluk watarigin mande abok yorarige

(Mrk. 8:31–9:1; Luk. 9:22-27)

21Eti kudi nen, Ar Yesus Aworomi wene telekma bagalogo yoraga dogolir, Ar ebe o Yerusalem mondok laurak arar o, nen laga dogomo, ir ap nggok ndak inewai mende, imam-imam kepala mende inom, guru-guru agama mende inom, ir nen oba anggin panggin erogo biluk, nen Ar ebe warugun o. Ogwe ininggi nogo mbere ambi yiluk, Ar ebe iluk erogo mekbigin o.

22Yigi nanggige, ar Petrus ane obarne paga yoga dogolir, Ar Yesus akdin wirak togon eragalu mendiluk yegerogon yirige, “Tuhan kar yegen eti, Ar Allah nen dek erogo buak o. Nen wene yegen eti Tuhan kar koba etaganem arar o,” yiluk maga yirige!

23Yirigemo, Ar Yesus elokte medok togon ar Petrus yoga dogolir, “Iblis yi kane a, kebe ya nen arar mbugulin! An naruan non mbanaka maga. Kar Ar Allah akla andaga mende ebeka agandik dek o, ogwe akuni andar tagwi mende ebeka agandik o.”

24 # Mat. 10:38; Luk. 14:27 Tuguluk Ar Yesus nen, Ar mutok lagwi mende yoraga dogolir, “Ir akuni An mutnarek warugun mende kalok, ar ake etau akla wadok mende eti, mondok oba mi erogo bega, nen ao kari karo eti piyalkodega, ekbiluk perak An murnarek nomo yegekdek mondok, laga dogorak o. 25#Mat. 10:39; Luk. 17:33; Yoh. 12:25Nenaluk, ir iniluk mondok dogu paga etagun ar ogwe, iniluk mondok dogu mende eti dek ar arigin o. Ogwe An nake paga, ir akuni iniluk dogu mende eti dek arigin kalok, ir iniluk mondok dogu mende eti kodagun arar o. 26Nen ir akuni, ye mende nde mende agar taga yoma werek mende, obogar ondewerek etarugun ar ogwe, ar iluk pano dogu mende eti bularigin kalok, etoma nena ake nda? Iniluk mende eti ye mende nde mende paga onggo kunu ndak?

27 # Mzm. 62:13; Mat. 25:31; Rm. 2:6 Ar Akuni Inakbur eti, Ar mende malaikat-malaikat mende inom, Ar Ombae obarne paga inom, dogoluk dek, muk warigin yi arar o. O eta ari waga paga, ir akuni, Ar Eyabu eku dogogun ndak-ndak, onggo wogoragin o. 28Kinakla eberek togon o! Kir ya agoktip mende obogar, ar ambi kwak, Ar Ir Akuni Inakbur eti, Ebe Raja ertatuk waga il kigikdek kigik, kambigin mondok dek o.”

Currently Selected:

MATIUS 16: WLW

Highlight

Copy