LUKAS 23
23
Ar Yesus ap Pilatus oba wolok lagugwa wene
(Mat. 27:1-2,11-14; Mrk. 15:1-5; Yoh. 18:28-38)
1Ir akuni, Ar Yesus andokma waganggunem korek welagugwa mende yemenogo obogar menatuk, Ar Yesus Pilatus oba arar wolok bi lagugwa. 2Bilagugwarik, ye ekemo nde ekemo yiluk, ir nen yogu dogolir, “Ar yi nen, akuni ambigar nugurinaka kogo o. Ambi Ar nen akuni yoma Kaisar endaga paga pajak bugu dogorak dek o, nenaluk Ar nen An nebe eti ap nggok akuni ndilinakwa Kristus eti arar o yiluk yega laga o,” yiluk ar Pilatus yorugwa.
3Yorugwama, ar Pilatus, Ar Yesus kinok yoga dogolir, “Kar ir akuni Yahudi mende inewe kendaga mbogor raja eti kar arar a?” Yorigemo Ar Yesus nen wene onggo yoga dogolir, “Kar kane yegen endi ar o,” yiluk yorige.
4Yorigemo, ar Pilatus nen, ir ap imam-imam kepala inuwagam, akuni obok inom yoraga dogolir, “Ar yi maduk eke mende wene yi paga wako o, yiluk yurak mende, wene enggen dek arar kigi o,” yiluk yirige.
5Ogwe ir nen inane obatne togo ar yogu dogolir, “Ar Ap yi nen, akuni o Yudea paga obogar inom, nen o Galilea paga mende inom, wene enggal mende akuni iniliti nomalogo yorar, nir werek ma yoma kudi arar unggi waga o.”
Ar Yesus Herodes oba wolok lagugwa wene
6Eta aruk kolalka lagagerek, Pilatus nen ir kinok wokdaga dogolir, “Ar Ap yi ai Galilea mende a?” yiluk yirige. 7Nen ir nen Yesus ai ap Herodes werekma mende o yiluk yorugwama, ar Pilatus nen, Ar Yesus ebe wolok Herodes oba lani o yiluk yoragage. Nenaluk, o eta paga, ar Herodes ebe o Yerusalem paga inggi pago arar werekma oba wolok lagugwa. 8Ar Yesus arar wolok lagugwama, ar Herodes nen Yesus ebe il kalok, Ar akla adeknggen ambik karige. Nenaluk, Ar Yesus erir nega obok mende, o pagane ar kolalka dogolir, Ar ebe il kau wadok yiluk andaga lagagerek ma, yogo nanonggal arar ma, erukbuk mende ambi eka nil kak yiluk andarige. 9Etama, Herodes nen wene ambigar kinok wokarige mende, Ar Yesus nen wene onggo ambi yogikdek mondogar ekige. 10Nen ir imam-imam kepala inom, guru-guru agama Yahudi mende inom nen, ye ekemo nde ekemo yiluk, wene inane ambigar oba wurakugwa. 11Tuguluk ar Herodes awurumi tentara nen, aik dagok mbaik dagok yogwi, miyuk-meyak ekwi, tu ap nggok ndak yirir taga mende dakor paga yikbugwi, ekbiluk ap Pilatus oba lakbirugwa. 12Nen o alep ar Pilatus nen Herodes imbirak agorek welagugwa mende, o eti paga arar imbirak dambul lagugwa o.
Ar Yesus mondok min warurak yirugwa wene
(Mat. 27:15-26; Mrk. 15:6-15; Yoh. 18:39–19:16)
13Ar Pilatus nen, ir imam-imam kepala inom, ir Yahudi mende ap nggokndak inom, akuni ugun ar mende amberak inom, kuwak erirnakige. 14Kuwak ekbalok, Ar Pilatus nen, ir obogar yoraga dogolir, “Kir nen, Ar yi nen akuni yoma nugurinabi taga o yiluk yogopma, an nen bikigi mende, Ar nen maduk eke mende ebe ambi nil kigi dek arar o. 15Eti ndak-ndak ar, ar Herodes nen kega lagarik, Ar Yesus ebe ninoba lakbi waga yi. Ap yi maduk ambi yi eke paga wako yiluk yurak wene enggen mondok dek arar kigi o. 16Eta paga ma, An nen ndugi wakdiluk, kede pigalogo bigin o,” yiluk yirige.
[17O Paska ake nggok dakwi paga, ir akuni obogar inake nen, ar Pilatus nen ap kede warek mende pigalinaka lagage.] 18Ma, akuni kuwak ekugwa yomanogo nen inane nggok paga yugu dogolir, “Ar ebe mondok warurak o, nen Barabas kwak nir ninake pigalogo wulnira eme o,” yiluk yorugwa. (19Ar Barabas eti, o kota etoma o piyalkwa mende, nen akuni warinaka, eka kalok kede warogo birugwama welagage.)
20Kede warek werekma, Pilatus nen Yesus kede pigalogo wulabik yiluk andarigerek ma, akuni dogalek etoma ane ambi inom ar yorarige. 21Ogwe ir inane ambigar yogu dogolir, “Ar ebe o kari karo paga warogo burak o! Ar ebe o kari karo paga warogo burak o!” yiluk inane yirugwa.
22Nen inggi kenagan paga ar Pilatus nen ane nggok ar yoraga dogolir, “Ogwe, Ar maduk eke kwak ebe nggi o? Ar ebe mondok min warogo burak kwak eti, wene edo ebe an nil kigi ambi mondok dek arar o! Etiar ma, an nen Ar ndugi mban wakdiluk, nen kede pigalogo wuldigin o.”
23Yoragage mende, ir akuni inane nggok paga yogu dogolir, Yesus mondok o paga warogo burak o, yiluk yirugwa. Nen ir akuni nen inane yirugwa mende kwak obarne agage. 24Ma, ir akuni inane yirugwa ndak-ndak, ar Pilatus nen Yesus mondok min arar warurak o, yiluk yoragage. 25Nen ar ap o piyalkwa, nen akuni inaka, ekanem kede warogo birugwa mende ernogo, ir inane nggino yirugwa paga pigalogo wogoragage. Nen tuguluk Ar Yesus ernogo, ir eru wadok yirugwa ndak-ndak eruak nen yiluk wogoragage.
Yesus o paga warogo birugwa wene
(Mat. 27:32-44; Mrk. 15:21-32; Yoh. 19:17-27)
26Etegerogo yirigemo, ir nen Ar Yesus arar wolok lagugwa. Nen tuan paga, ap ambi endaga Simon ai o Kirene mende, o kota etoma unggigi nanggige pakbiluk, o kari karo enogo Ar Yesus ambotna nggwe waganin yiluk, inane akber paga mondok ar yorugwa.
27Nen ir akuni pakalok negen ar inom, nen ir inakla kumi inebe mende negen, Ar Yesus laganem ambudik yidikduk agan mutok lagu dogolir, ir kumi etoma nen, Ar Yesus ade arir lagugwa. 28Ogwe Ar Yesus meda togon amborna il bikdalok, Ane yoraga dogolir, “Kumi Yerusalem kumi yi wae, An nade arugup o, kir kinade inom, kir kinagwi inade inom, kinade artani o, yiluk yoragage. 29Nenaluk, o yabungga ari warigin eti paga, akuni nen yegerogon yugun o, ‘Kumi yibidi mende inom, nen kumi inagwi endaginatukdek mende inom, nen kumi inidak elege kuninatukdek mende inom, ir eti perak inadeknggen pano yoragun o!’ 30#Hos. 10:8; Why. 6:16O eta aga kigik, ir akuni nen yugu dogolir, ado dombok etoma nen nir tebel ninabi watni o, yiluk yugwi. Nen kulik ado etoma yoragu dogolir, nir tebelninabi watni o, yiluk yoragwi erugun o. 31Etiar ma, ir akuni nen, o ngger kigik ogwe yegerogo eka o, nen ir o mbuk mende kwak eti yabongga nenggerogon erugun kogop nda!” yiluk yirige.
32Ap maduk ekwa inebe mbere ma, imbirak Ar Yesus inom warogo bawok nen yiluk wogorek lagugwa. 33Ir wogorek o endaga inalubak nggililikmo yirtagama etoma, Ar Yesus warogo menogo bugwi, nen ap mbere maduk ekwa enogo, Ar Yesus eragalilu, ambi inggi ebema nggwe, nen ambi inggi kwarema nggwe warogo barugwa. 34Nen Ar Yesus tamban eka dogolir, “Nombae o, ir ekwi mende eti inunggukdek dogolir ekwi ma, maga bano o!” yiluk tamban ekige.
Tuguluk Ar Yesus iyom nggolalek mende ernogo, ar ta kwak kodagin yiluk, ir ap tentara nen o mbuk tenggelogo yi kwa yi kwa eku lagugwa.
35Ekwi dalok, ir akuni ambigar mendek inil welagugwa. Nen ir akuni Yahudi inewai mende nen, Ar Yesus kenggadia yiluk yogu dogolir, “Akuni ambetak kwak ndilninaka lagan mende, Kar kendaga mbogor ndilninakwa Allah nen denogo bagarige mende ebebar kalok, yogondak Kar kebe ndilkodan nde,” yiluk yorugwa.
36Ir tentara nen kenggadi endi kegen a, yiluk yogwi, tuguluk ir nen anggur amburu ade werek mende, Ar wogogik ekugwa o. 37Nen ambi inom yogu dogolir, “Kar ir Yahudi mende inewe kendaga mbogor kalok, kebe ndilkodan nde,” yiluk yogu lagugwa.
38Nen Ar Yesus warogo birugwama alubakma, “Ir Yahudi mende inewe endaga mbogor ebe yi arar o,” yiluk diru mbalogo birugwa.
39Ap maduk ekwa Yesus eragalilu warogo birugwa mende ambi nen “Kar kendaga mbogor ndilninakwa arar kalok, Kar kebe ndilaga, nen nir ndilninaka erin nde lak,” yiluk yorige.
40Ar ap maduk ekwa ogar ambi nen, ar ogarak wenemuk yoga dogolir, “Nena yegen, Kar Ar Allah oba kobade dek a? Kar maduk ekwa mende kimbirak ndak-ndak warogo bagaga yoma kegen a, yiluk yorige 41Nir ninaka yoma, nir ninobabur paga ninarka o, ogwe Ar maduk mondok erudekma kigik ar waka o!” 42Nen, tuguluk Ar Yesus yoga dogolir, “Yesus wae, kar yabungga ndilninakwa mende raja ertatuk waga dogolir kalok, an noba mi arugup o,” yiluk yorige.
43Yorigemo Ar Yesus nen wene onggo yoga dogolir, “Kar kiliti ebebar andega dogon o, o yogondak yi paga arar, kar Nimbirak o Firdaus arar unggugun o,” yiluk yorige.
Ar Yesus ebe kanggige wene
(Mat. 27:45-56; Mrk. 15:33-41; Yoh. 19:28-30)
44O dinggaga odo kirogon jam dua belas paga, molinggi akbinak dek agage. Nen o etoma obogar amum tebek yirige kigik, jam tiga keyanggwi arar agage. 45#Kel. 26:31-33Nen Ar Allah Ai Palek ma etoma, kain odo laborek welagage mende, odo kirogon ndeda liluk wuka ekige. 46#Mzm. 31:6Eka kigik, Ar Yesus ane kwa yega dogolir, “Nombae An nebe kinggimo bigi o!” yiluk yega lagagagerek, Ar ebe arar kanggige o.
47Nen ar ir tentara inewe enogo etoma etaga il kega lagagerek, Allah wogokdega dogolir, “Ebebar o, Ar maduk erudek o!” yiluk yirige.
48Ir akuni o etoma ertaga inil kuwok nen yiluk wagugwa mende, etegerogo ertaga inil kalok inuma lagu dogolir, iniliti mondok watar lagugwa o. 49#Luk. 8:2-3Ir Ar Yesus awurumi mende inom, nen kumi Ar mutok nugu lagugwa, ir inai o Galilea mende inom, inebe ndorogo mendek etoma dogolir, ertagage mende etoma, obogar inil waganggu lagugwa.
Ar Yesus warek kwiyonla bi lagugwa wene
(Mat. 27:57-61; Mrk. 15:42-47; Yoh. 19:38-42)
50Ar ap ambi endaga Yusuf, ar ai Arimatea o Yudea etoma mende. Nen ar obabur pano mondok ma, ar alon werek mende arar welagage. Werek ma, Ar Allah nen o yoma inggimo wokbiluk, apma pakninarek dogorak mende eti menda arigin yiluk, torek mondok welagage. 51Ar ebe ir Mahkamah Agama inom mende ar ogwe, ir wene mbalkugwa mende inom, inobabur ekugwa mende inom, ar a'ir darige. 52Etegero arar ekugwama, ar Yusuf yi nen, ap Pilatus oba lagagerek, Yesus ebe warek woknirin o, yiluk nggino yorige. 53Yoga lagagerek, Ar Yesus ebe o kari karo paga nen nggorogo wurabi waga lagagerek, kain kafan eti paga pirik perek erogo, kwiyon nggir elo ngger mendagago birigemo etoma arar wolok bi lagage o. 54O etinem, hari eti Jumat paga ekugwa. Nen hari Sabat erurak korok arar panggok yi wagagemo. 55Kumi Galilea nen Ar Yesus inom wagugwa mende, ar Yusuf nen Yesus warek wolok laganem inil kuwok nen yiluk mutok lagugwa. Ir nen Yesus ebe kubur ekwi kuburan inil karugwa. 56#Kel. 20:10; Ul. 5:14Kubur bugwi inil kalok inuma lagugwarik, obari pano mende inom, minyak amburu obari inom, obogar Yesus ebe paga waruok nen yiluk nduguri lagugwa.
Nen hari Sabat paga, wene agama ake yugu ndak-ndak, yabu ekikdek puk arar welagugwa.
Currently Selected:
LUKAS 23: WLW
Highlight
Share
Copy
Want to have your highlights saved across all your devices? Sign up or sign in
