LUKAS 21

Kwe togwe nen Allah ake birige wene

(Mrk. 12:41-44)

1Ar Yesus nen, ir ap ininggi werek mende, o Allah Ai Palekma, uang Allah ake biktagama akla bugwi il darige. 2Nen kwe togwe inggi mondok dek mende ambi nen uang tembaga mberendak yagarka il karige. 3Ekwi il daga lagagerek, Ar Yesus nen yega dogolir, “Kinaruk kolini o, kwe togwe yi ar amende yugar yagaka kigi o, nen akuni amberak ar yagake ndak-ndak yagakwi dek kinagi o. 4Nenaluk ir akuni ininggi werek nen birugwa etoma, ndindu dirugwa mende birugwa o. Nen ar kwe togwe yi, ar akuni inggi dek mende arar ogwe, ar iluk dogu paga ake pugurik mende, obogar bega kigi o.”

Yesus nen Allah Ai Palek tagalarigin yirige wene

(Mat. 24:1-2; Mrk. 13:1-2)

5Ir akuni nen yugu dogolir, Allah Ai Palek yi yigom pano mende paga mban palek o, nen inamendek panindik panondak Allah ake birugwa mende baga inomar palek o, yiluk yugwi agagemo, 6Ar Yesus nen yoraga dogolir, “O ambi ari waga paga, kir kinil ketagwi mende yoma, obogar tagalogo lagabigin o. Yugum ambiar nen yugum ambi oba mor-mor pano dulik eti dogogin mondok dek o!” yiluk yoragage.

Akuni anggin panggin inoba arigin wene

7Yirigemo, ir nen Ar Yesus kinok wokugu dogolir, “Guru wae, wene yegen etoma, o menda nen etarigin o? Nen etarik yiluk panggo yega kigik, nir nen nena etaga kalok ninilu arigin?” yiluk kinok yorugwa.

8Yorugwama, Ar Yesus nen yoraga dogolir, “Akuni nen nugur kinakunem, tuwam panorogo watagu dogoni o. Ir akuni yugar An nendaga paga warugun o. Watuk, ir nen yugu dogolir ‘Ar ebe An arar o; Nen o arar etagama o!’ yiluk yugwi dalok, kir nen ir mugurek lagup o, yiluk yoragage. 9Wim ekwi wene abok kinaruk kolalkwi nen ye wene nde wene maduk mende akpir ar yugwi kalok, kinobade arugup o. Etoma obogar alep etarir warigin o. Etoma etaga paga nen, o ugu paga arar etarigin dek o.”

10Ar Yesus wene ambi inom yoraga dogolir, “Ap inalebunu ambi nen, inalebunu ambi inom wim bugwi, inai ambi nen inai ambi inom wim bugwi erugun o. 11O ya nda etoma lugur nggok eka, erom no dagaga, u elokte maduk mende kenam arir waga kugun o. Nen mbogor taga etoma, idim wuwarek inobade kaurak mende, etaga kugun o. 12Ogwe, etoma auwan etagakdek kigik, kir kinebe kede makinakwi, ndugi kinakwi ekinabugun o. kir tamban erir tagama binagi lalok, kinuwak dolkwi, kede marogo lembaga malkinakwi erugun o. Kir An nane pagoma, ponggo kinar wokirek ap nggokndak werekma binagi lagwi, inarige werek werekma binagi lagwi erugun o. 13O eta, Pano Wene Allah nen yirige mende eti, abok yorau telek etari warigin o. 14Kiniliti obatne togon dogolir, nir nena paga ninerakde mbalagun yiluk, kiniliti pirik erugup o. 15An nen wene kinakla nggagalogo yokiraga, nen kiniliti koderaka erigin ma, ir kinawim mende nen kinane uwak dagalkwi, nen kir yoragwi mende kinenggal yugwi erugun dek o. 16Kir kinagwiya kinombae nen, kir kinogari nen, kir kinagwi kinakburi nen, kinebe min kinaru paga erugun arugun ar o. 17Kir An mutnarek lagwi paga, akuni obogar nen inair kungginakwi dogogun o. 18Eta ekinabugun mende, kiniri edo ambi kenok togon dek arigin mondok dek o. 19Etegerogon ekinakwi dagik, kir kiniliti kumbu biluk dogomo, kinagap endartagun o.

Yesus nen o Yerusalem miyalarigin yoragage wene

(Mat. 24:15-21; Mrk. 13:14-19)

20Ir ap tentara nen, o Yerusalem arar wak kunggwi kinil dalok, yogo o kota eti dogoluk dek arar miyalarigin eti, yiluk kinilu arigin o. 21Eta etaga kalok, akuni o Yudea werek mende, kode ado paga nggwe dagagwi, ir kota abel akman nggwe welagwi mende, kode tekman nggwe wundi lagwi, ir kota abel tekman nggwe werek mende kota unggurak maga o. 22#Hos. 9:7O eta paga, hukuman wurabu paga wurabir warigin ma, eta eka kigik, wene Alkitab akla diru mbalek mende, arma arar nggedok yigin o. 23O eta etaganem, kumi inagwi inabuda mende inom, kumi inagwi inidak kuninakwi mende inom, idik wuwarek mende eka paga, kode wundu dibi yugun o! Ar Tuhan nen akuni etoma inomba hukuman wuraka paga, o etoma inoba anggin nggok mende arar etarigin o. 24Akuni yoma amberak mbirok paga warinakwi, amberak kugul wogorek inuma ndelak wulkwi, nen ir akuni Allah inonggokdek mende nen, o Yerusalem iniyok kendan mburak kedak ekwi, erugun o. Tuguluk Ar Allah nen ir inai telek kudi warogo barige eti kudi aga kalok, kudi arar arigin o,” yiluk yoragage.

Akuni Inakbur warigin wene

25 # Yes. 13:10; Yeh. 32:7; Yl. 2:31; Why. 6:12-13 Yabonggane etoma, mo paga inom, tur paga inom, dadi paga inom, oba adik-adik erir waga kugun o. I laut tarin adik-adik eka, erir waga kalok, ap alebunuh dombok agar taga yoma inobade atuk, dibi yugun o. 26Agar paga yoma obogar erir warigin etoma nen, akuni inobade nggok mondok etarugun o. Nenaluk ir o aya paga#21:26: Aya paga eti: Agar wukigik nen mbogor ilik kigik we odo yoma. Nen Indonesia wene paga eti ruang angkasa. welagwi mende eti nadok kadok etarugun paga ma o. 27#Dan. 7:13; Why. 1:7Eta eka amor-amor ar, Akuni Inakbur endago obatne ambik ernogo, amirakor akla etoma waga kugun o. 28Ye wene nde wene, ye ekik nde ekik eka kalok, kinur pudarogon dogono o. Nenaluk, korok medarogon eta arar, muk ndilkinabi warigin o.

O Ara agarip wagangga kinil dogono yorarige wene

29Ar Yesus nen o ara oba lirogo wene yoraga dogolir, “Kir o ara inom, nen o ambetak inom, kinil waganggu dogono o. 30O agarip wundir waga kalok, yogo o kibi arurak panggo yege o, yiluk kir kinilu ari taga o. 31Kinakla andalokma, o kibi ebebar etari taga mende eti kwak, kir Ar Allah nen apma binagurak mende enogo arar panggo yege o, yiluk kinilu arugun o.

32Wene etoma obogar, akuni yogondak werek yoma kanggikdek iniluk kigik, erir warigin ma, kinilu togo dogoni o! 33Mbogor agar dek arigin ogwe, An nane eti dek arigin dek, aitok mondok dogogin o.”

Tuwam waku dogorak wene

34Kir nen dago nggok dago ner nugwi, Anggur amburu iniliti mbali taga mende ner nugwi, kiniliti nir nengger tarugun yiluk nggok ar eberir lagwi ekunem, o eta andalok dekma ar etarigin ma, tuwam panorogo dogono o. 35O eta paga etarigin eti, akuni o agar paga yoma obogar, inagade kunik mo ndak-ndak arar etarigin o 36Akuni Inakbur warigin eti ilka paga menaru inom, nen ye wene nde wene etarir warigin etoma nen debelkinaka kau, tuwam panorogo waku dogolir, nen tamban eku dogoni o.

37 # Luk. 19:47 O dinggane paga, Ar Yesus Allah Ai Palekma wene emeriraga lagagerek, nen o kukbagane agagemo, ado Zaitun paga etoma dagaluk welagage. 38Nen Ar Yesus Tuhan Ai Palek ma etoma, akuni o keyalek mban, wene emeriraga lagage.

Currently Selected:

LUKAS 21: WLW

Highlight

Copy