LUKAS 19

Ar Yesus Zakeus imbirak ekugwa wene

1Ar Yesus o Yerikho arar panggo yi lagagerek, Ar tuan o kota etoma yenggelogo laga mban ar ekige. 2O kota etoma, ap ambi pajak nandode inggi werek mende, endaga Zakeus eti welagage. 3Ar Zakeus nen, Ar Yesus eti ebe nenggedek yiluk, il kagaluk ekige mende, ebe kuwagadak ar ma, il kau ndakbuk arar etagage o. 4Ma, ar nen akuni dogalek etoma dambe dalok, Ar Yesus lamo nggwe etoma, ar alep mbu agan lagagerek, o ara paga ari dagaluk, torek ari lagage. 5Nen, Ar Yesus o edoma panggo yi lagagerek, ar Zakeus enogo o paga, il ilikalok yoga dogolir, “Zakeus wae, yogondak kar kuma nimbirak luwok nen, wurame o,” yiluk yorige.

6Nen ar Zakeus enogo ibar-ibar wura wagagerek, iliti adeknggen paga, Ar Yesus, ar Zakeus imbirak uma arar lagugwa. 7Ir akuni yomanogo, Yesus etegerogo eka inil kugu lagugwarik, “Iyai, Ar Yesus ap ilimodo nggar maduk ekwa ernogo, imbirak uma laga a?” yiluk yirugwa.

8Tuguluk uma arar ari lagugwarik, ar Zakeus menatuk, Tuhan yoga dogolir, “Tuhan wae, An namende amberak munggulogo akuni ininggi dek mende wogoraga, ugu ap amberak inamendek kimaka lagi mende, onggo ninggi empat paga yungguk medak wogoragin o,” yiluk yorige.

9Yirigemo, Ar Yesus nen Zakeus yoga dogolir, “O yogondak yi paga, Ar Allah nen kar inom, keyak kakbur inom, arar ndilkinake o. Nenaluk, kar eti Abraham umbu wigalek mende arar ma o. 10#Mat. 18:11Ar Akuni Inakbur wagage eti, akuni nuk agwi mende, kwagago ndilinabik nen yiluk, wagage o.”

Uang emas paga oba lirogo yoragage wene

(Mat. 25:14-30)

11 # Mat. 25:14-30 Ir akuni Ar Yesus wene yoraga inaruk kulkwi dagik, Ar nen wene oba lirogo ambi yoragage. Nenaluk, o eta, ar ebe o Yerusalem korok negen dogolir ma, Ir akuni nen, Ar Allah o yoma inggimo wokbiluk, apma pakninarek dogorak arar kenam ari taga o, yiluk andarugwa. 12Ar Yesus nen wene oba lirogo yoraga dogolir, “Ap ambi endaga werek mende, akuni inuma nen raja arar menogo banuwak nen yiluk laga lagagerek, tuguluk arar wagage. 13Awan lagikdek kigik, ar eyabu mende inebe sepuluh paga wai yoralok, uang satu keping uang emas mende ambindak-ambindak inadik ndak tumburogo wogoraga dogolir, ‘Kir nen uang yi paga, onggo kunogo oba lambolku dogono o,’ yiluk yoralok arar lagage. 14Ir akuni o etoma nen, ar ap yi, nir ninewe raja menaru nina'ir o, yiluk andagwi werek ma, Ar arar ir inoba laga agagemo, ir nen ap amberak wene wolok lakbagu dogolir, ‘Ap yi nir mende raja dogorak nir nina'ir arar o,’ yiluk wene warogo lakbarugwa.

15Lakbarugwa mende, ar ap endaga werek ernogo, raja arar dogon o, yiluk menogo birugwa. Birugwama nen ar ebe uma arar wagage. Ar Wagagerek, ar eyabu mende inebe sepuluh enogo wai yoralok, ir nen uang wogoragage ernogo, oba mende lambolka yiluk, ilu aru paga inayonggo birige. 16Ar eyabu mende ambi alep oba laga lagagerek, yoga dogolir, ‘Tuan wae, kar uang emas ambi wotnegen ernogo, an nen sepuluh paga oba lambolki o,’ yiluk yorige. 17Yorigemo ar Tuan mende nen, ‘Pano arar eken o nakbur, kar eti yedoman mende mondok pano arar o! Wene we bugudagar koba bigi mende, erurak ndak ar keyagi eti paga, an nen, kar o kota inebe sepuluh paga kapma dogowak nen yiluk erogo bagagin o.’ 18Eyabu mende ambi yabongga waga lagagerek men yorige, ‘Tuan wae, uang emas ambi wotnegen ernogo, an nen lima paga oba lambolki o,’ yiluk yorige. 19Nen ar Tuan enogo nen yoga dogolir, ‘Kar eti o kota inebe lima paga, kapma balok dogogin o.’ 20Nen ar yedoman mende ambi waga lagagerek, yoga dogolir, ‘Tuan kar uang emas ambi wotnegen ernogo, tula kimagago biluk welagwi o. 21An kar koba nobade nen, kebe kobabur akuni lirogo babuk, kar nen kar mendear waganukbuk, kar kinggi nen yakikdek mende inom ar waganurak kobabur eti paga, kimagago biluk welagwi o.’ 22Ar Raja enogo nen yedoman mende enogo wenemuk yoga dogolir, ‘Kar yi, yedoman maduk mende kar arar! Kar yegen, an nobabur akuni lirogo babuk, an nen, an namende ar waganukbuk, an ninggi nen yakikdek mende inom ar mbalurak yegen eti ma, 23kalok, an nauang eti lambolek inom koda waruwak nen yiluk, bank bigikdek ar eken eti nenaluk?’ yiluk mberirige. 24Tuguluk ar Raja enogo akuni yemenogo werek mende yoraga dogolir, ‘Uang ap yi inggimo ndilogo nen, ap auang sepuluh lammbolke mende eti, wogokni o,’ yiluk yirige. 25Ogwe ir akuni yemenogo nen yugu dogolir, ‘Tuan wae, ar ap eti auang obok sepuluh paga werek o.’ 26#Mat. 13:12; Mrk. 4:25; Luk. 8:18Yorugwama, ar Raja nen yega dogolir, ‘Kinilu togo o: ap ambi amende werek kalok, oba tebelogo ambigar wogorigin o, nen ap ambi amendek dek arar kalok, ar amende agarik mende, ar inggimo nen ndilogo waganigin arar o. 27Nen, yogondak akuni an raja dogorak ina'ir yega mende eti, an nawim mende arar ma, wogorek noba watni o. Napma ba watuk, obogar mondok min warinatno o!’ ”

Ar Yesus o Yerusalem unggeganem wogokdirugwa wene

(Mat. 21:1-11; Mrk. 11:1-11; Yoh. 12:12-19)

28Eta obok yoraga lagagerek, Ar Yesus alep atuk o Yerusalem etoma arar unggi lagage. 29Nen o Betfage o nen Betania o, korok ado Zaitun paga panggo yi lagugwarik, ar nen ir Ar mutok lagwi mende inebe mbere inalep lakbarige. 30Ma ir lakbaga dogolir, Ar Yesus nen wene men yorarige, “Yogo, o kinilka mor-mor etila lani o. Ari lalok kinil bikugun mende, keledai akuni ambor paga koktagikdek mende yidilik werek etnaga, pigalogo wolok watno o. 31Akuni nen, ‘Kir keledai eti nena eruwok nen yiluk pigalkop,’ yiluk yugwi kalok, ‘Ar Tuhan#19:31: Tuhan: eti amende werek. wadok nen wolok watno yegemo o,’ ” yiluk yorano o.

32Ir Ar Yesus mutok lagwi mende inebe mbere enogo lagugwarik, inil birkarugwa mende, Ar yirige ndak-ndak arar ka lagugwa. 33Ir enogo arar lagugwarik, keledai enogo kede pigalku nanggugwa, keledai onde werek nen, “Wadigi, kir keledai yi nena eruwok nen yiluk pigali tagwi?”

34Ir nen onggo yogu dogolir, “Ar Tuhan wadok nen wolok watno yegemo o.” 35Nen ir nen keledai enogo arar wolok Ar Yesus oba lagugwa. Wolok bi lagu lagugwarik, ir iniyom jubah, keledai amborowak paga Ar Yesus korek tarumo ndalogo bugwi, nen Ebe kotari daguak nen yiluk yama kugwi, ekugwa o. 36Nen Ar keledai enogo paga laga kigik, ir akuni nen Ar tuan lamo yemenogo, iniyom jubah paga tabul ndalir lagugwa.

37Ar Yesus o Yerusalem paga arar panggo yi lagagerek, kur Zaitun paga wuragik mo negen ma, wuku dogolir, akuni obogar mutok wagugwa mende inane inom, nen akuni etoma mende inom, inane Allah endaga wogokdugwi, Allah wa yiluk yogwi, erir wukugwa. Nenaluk elalin erir waga inil karugwa etoma paga, wi wa o, yiluk yirugwa. 38#Mzm. 118:26Inane nggomoku dogolir, “Ar Tuhan raja endaga paga waga eti, adeknggen o! Mbogor paga etoma adeknggen arar ma, nir nen Ar Allah endaga mban wogokbugu dogowok o.”

39Ap Farisi mende amberak nen Yesus yogu dogolir, “Guru wae, Akuni yoma kinane dek atni yiluk yoran o,” yiluk yorugwa.

40Mende Ar Yesus nen onggo yoraga dogolir, “Ir inane dek arumo, nggir yoma inane yugun o. Eta ma wene endi ebebar andani o!”

Ar Yesus nen o Yerusalem ade akige wene

41Ar Yesus o Yerusalem korok arar panggo yi lagagerek, kota ebe il kalok ade akige. 42Nen de yega dogolir, yegerogo yirige, “Kakba o, pano dambulik dogu eti nena paga yiluk, hari yi paga ibar kilu aktep dogolepma, pano aktep mende o! Ogwe yogondak kar kil kaurak ndakbuk o. 43Kar kawim mende nen, karuwan mbalku dogomo, kar dida yigin o. Ir nen yagaragi kunogo bagaluk, penok-penok nen kar ibar wundin yiluk, yokirugun o. 44Ir nen akuni o yoma werek mende, tebelogo kendan mbural kinabugun o. Yugum welagama eta, oba dulik ambi togok bugun mondok dek o. Nenaluk, Ar Allah nen ndilkaburak paga wagagerek, ane yega kigik, karuk kulkikdek arar welagagen o.”

Ar Yesus Allah Ai Palekma unggirige wene

(Mat. 21:12-17; Mrk. 11:15-19; Yoh. 2:13-22)

45Ar Yesus Allah Ai Palek ma onggega lagagerek, ap onggo kungga mende mugogo wulinakige. 46#Yes. 56:7; Yer. 7:11Ir yanogo yoraga dogolir, “Alkitab mbalek akla yegerogo mbalek werek o, ‘Ar Allah nen yega dogolir, Numa yoma tamban erir tagama o.’ ” Mende kir nen o akuni o piyale inuma erogo bogopma o!

47 # Luk. 21:37 Ar Yesus nen kunik kanik, Ar Allah Ai Palekma dogolir, wene emeriraga lagage. Nen ir Imam-imam kepala o, guru-guru agama o, ir ap Yahudi mende inewai o, Ar Yesus waruwok nen yiluk, ekulagugwa. 48Eketek ar ogwe, Ar ebe warurak wene edo, dek mondok ar aga lagage. Ir akuni nen, Ar ane kolalu wadok mondok ar ekulagugwa. Ar Ane yega paga, akuni iniliti wagangga lagage.

Currently Selected:

LUKAS 19: WLW

Highlight

Copy