LUKAS 18

Ap hakim nen kwe togwe awene mbalkige wene

1Eta ekdiluk, Ar Yesus nen wene ambi oba lirogo, aworomi emeriragage. Ir iniliti anggin dek dogolir, tamban mban kunik kanik eku dogowak nen yiluk, yoragage. 2Ar Yesus nen yega dogolir, “O kota ambi mo, ap hakim ambi, Ar Allah oba um palek dek mende welagage. Nen ir akuni inoba, ar akla dakor mondogar welagage. 3Etegerogon welagunem, ar kwe togwe ambi, o kota etila welagage. Nen ar kwe togwe eti nen hakim yoga dogolir, hakim wae, ‘An nawene ambi, ir an ninom wene agorek mende wene kunggirik ma, ninom aredo warurak paga, yamak neyaurak o, yiluk nggino yorige.’ 4Kwe enogo nggino yega kigik ar ogwe, ar hakim nen kwe togwe enogo yamak kigikdek ar welagage o. Ogwe yabongga nen hakim enogo akla eberka dogolir, ‘An Ar Allah nen naru nobade dek ar, nen akuni inoba nakla dakor ar o. 5Ogwe, kwe eti ane yi waga mondok ar ma, nen ane yorniri wagik mban eka dogu eti na'ir o, ma an kwe eti awene mbalik o, yiluk yirige.’ ”

6Tuguluk Ar Tuhan nen yoraga dogolir, “Ap hakim obabur wene nggodo mbalkwa mende, wene yirige eti dikbini o! 7Ar Allah nen, Ar akburi mende nen, ir inawene dindaga kukbaga nggino yogwi kalok, Ar nen inerakde mbaligin dek andagop a? 8Ar Allah nen akburi inerakde ebebar mbaligin o, yiluk kinilu dogoni o. Eta ar ogwe, Ar Akuni Inakbur eti arar waga kalok, ir akuni Ar oba ebebar andarugwa mende eti, o agar taga yoma ambi kinil dagun a?”

Ap Farisi mende o nen ap pajak nandode o inoba lirik wene

9Ar Yesus nen wene oba lirogo, ir akuni inakla nen, nir kwak nggakberek andugwi, nen ir akuni amberak kwak, nggakberek dek mende andugwi paga yoragage. 10Ar Yesus nen yega dogolir, “Ap mbere tamban eruwok nen yiluk, Allah Ai palekma lagugwa. Ar Ambi ap Farisi mende, nen ar ambi ap uang pajak nandodi taga mende. 11Ar ap Farisi mende nen adigar ndorogo menari lalok#18:11: Tayorogo menari lalok tamban ekige: Diru alep kwak mbalek mende paga nen yegerogo: menatuk ilitimo nen tamban ekige o. tamban eka dogolir, ‘Allah nombae wa, an nen keyagi warkaki o. Nenaluk, An eti ir akuni amberak, nggok mban kwarir nugwi, inane medok yugwi, ap inakburi mbainak erinakwi, etegerogon erirtagodek o. Nen an eti, ar ap pajak nandodi taga mende yi ndak-ndak degarma, waa yiluk yigi o. 12An erom ninggikdek tamban ambiar paga, ninggi mbere paga eka, An nen kake perpuluhan nggok ar birtaga mende o.’ 13Mende, ar pajak nandodi taga mende ernogo, ndorogo dogolir, elokte mbogor taga ilik taru obade nen, amik inggi tebek diluk, ‘Allah wae, an nebe ap maduk ekwa mende arar ma, nakba kan o,’ yiluk yorige.”

14 # Mat. 23:12; Luk. 14:11 Nen ar Yesus nen yoraga dogolir, “Ebebar andani o, ma ir ap mbere enogo arar inuma lagwi kigik, ap pajak nandodi taga mende eti tamban ekige perak, Ar Allah nen waganggige o, kwe ar Farisi mende tamban ekige mende waganukdek arar o. Nenaluk, ebe ya o, akuni nen wogok dartagwi kalok, tebek bagin o. Nen ir akuni nen tebek bartagwi kalok, yadek bagin o.”

Yesus nen elege inake tamban ekige wene

(Mat. 19:13-15; Mrk. 10:13-16)

15Ar Yesus nen, ir akuni amberak inakburi, inggi paginaka, nen wogonaka eruak nen yiluk, Ar oba wogorek lagugwa. Ogwe ir Ar Yesus aworomi ernogo, akuni yemenogo ekwi inil dagu lagugwarik, akuni yemenogo wenemuk yorarugwa. 16Ogwe Ar Yesus nen, ir elege eti wogonaka lagagerek, Ar aworomi yoraga dogolir, “Elege etoma An noba waruwak nen, togok dani o, yiluk mberiragage. Nenaluk, ir akuni yi ndak-ndak mende mban Ar, Ar Allah akburi mende etarugun o. 17Kinakla eberek dogoni o! Ir akuni nen elege yi ndak-ndak ertatuk, Ar Allah oba wagikdek kalok, Ar Allah akburi mende arugun mondok dek arar o,” yiluk yoragage.

Ap amende ambik wene

(Mat. 19:16-30; Mrk. 10:17-31)

18Ap Yahudi inewe ambi nen Yesus kinok wokega dogolir, “Guru obabur pano yi wae, An niluk nabedal kabedal naitok mondok dogorak mende kodaurak paga, an nena erurak o?” yiluk yorige.

19Yorigemo Ar Yesus nen wene onggo yoga dogolir, “Kar nen An pano nenaluk yonegen? Ar Allah pano eti ndak-ndak, akuni wedek mende amberak yoma pano mondok dek arar o. 20#Kel. 20:12-16; Ul. 5:16-20Kar Allah ane wene yirige kilu ar o, ‘Kwe mbainak erugup, ap warugup, kilmudu waganugup, wene akuni inabok kenggal mende yugup. Kagwiya kombae inalon palogo dogono o.’ ”

21Yorigemo ar nen onggo yoga dogolir, “Wene yirige eta, an elege paga nen yogondak kudi, obogar eka agarik o,” yiluk yorige.

22Yorigemo Ar Yesus aruk kulka lagagerek men yirige, “Kar nen mondok erurak mende ambi werek o: kamindi kamende obogar onggo kuni lalok, nen uang taburik mende etoma, akuni ininggi dek mende tumburogo wogora lan o. Eti erigin paga, kar onggo mbogor paga koda ligin o. Nen eti eka dogoluk kalok, An mutnarek watno o,” yiluk yorige. 23Ap eti wene eta aruk kolalka lagagerek, ar amende ambik ma, iliti buru yirige.

24Ar Yesus ap eti iliti buru yiluk eka yenggak kega lagagerek, yegerogon yirige, “Ir Akuni inamendek ambik mende, Ar Allah akburi etarurak mondok ndak dek arar o. 25Unta eti, jarum elola unggurak akbi dek negen ogwe, akuni inagarek ambik mende eti, o Ar Allah werekma unggurak ndak dek arar o,” yiluk yorige.

26Tuguluk ir akuni Ar Yesus eta yega inaruk koldiluk, kinok waganggu dogolir, “Etegerogo kalok, yogo ta kwak nen ebe ndilkodagin kegen?” yiluk kinok yorugwa.

27Nen Ar Yesus nen wene onggo yoraga dogolir, “Akuni nen eru ndak dek yiluk andagwi ernogo, Ar Allah nen eru ndak arar dogir taga mende o!”

28Tuguluk, ar Petrus nen ambi yoga dogolir, “Kakla eberek togon o! Nir nen, ninamindi ninamende obogar dambe kalok, Kar mukarek waritagwi o,” yiluk yorige.

29Ar Yesus nen onggo yoga dogolir, “Kar kiliti panorogo panggolin o! Ar Allah eyabu eru paga, ai palek inom, agwe inom, ogarak inom, agwiya ombae inom, akburi inom, dambe dalok ligin kalok, 30ap eti yogondak ya nen, onggo nggok mende arar kodega, nen o yabungga ari waganem, ap eti ebe iluk pano aitok mondok dogogin o,” yiluk yorige.

Yesus nen inggi kenagan paga, ar warurak mende yoragage wene

(Mat. 20:17-19; Mrk. 10:32-34)

31Yesus aworomi inebe dua belas enogo inadik ar kuwak ekbalok, wene yoraga dogolir, “Kinaruk dirogon kolalini o, Nir yogondak o Yerusalem unggwi lektagwi o. Etoma ari lalokma, ap nabi nen, Akuni Inakbur oba erogo bugun mende ake, wene diru paga birugwa mende etoma, obogar akma dik yigin o 32Ar ebe, ir akuni nin mende ininggimo wogoramo, ir nen, Ar aik dagok mbaik dagok yogwi, miyuk meyak erogo bugwi, inawori oba wagwi, erugun o. 33Nen ir nen ndugi wakwi, ebe mondok min wakwi erugun o. Ogwe Ar ebe warek inggi mbere dogoluk, inggi ambi paga Ar ebe iluk arigin o,” yiluk yorarige.

34Etoma yorarige mende, ir nen wene eti inakla mondok unggukdek, nen wene enggen ebe mende kimagago birige. Nen ir Ar wene yi, enggen nggi mende yirtaga, yiluk andalokdek mondok o.

Ar Yesus nen ap il mbuk mende pano ekige wene

(Mat. 20:29-34; Mrk. 10:46-52)

35Ar Yesus o Yerikho korok ari lagagerek paga, ap il mbuk mende ambi, ande nggino mban yirtaga mende ma, ar eti imbirak abuk agugwa o. 36Akuni ambigar lagwi kalok, Ar nen yega dogolir, “Yoma nenaluk letagwi ogwe?” yiluk yigi nanggige, 37ir akuni nen yogu dogolir, “Ar Yesus ai o Nazaret mende, eti lektaga o,” yiluk yorugwa.

38Yorugwama, ap il mbuk enogo ane kwa yega dogolir, “Ar Yesus Daud akbur wae, an nakba kan o!” yiluk yirige. 39Ir akuni tuan lagu dogolir, kane a, yiluk mberirugwa. Mende, ar ane nggok ar yega dogolir, “Daud akbur, ai, an nakba kan o!” yiluk yega lagage.

40Yega kalok, Ar Yesus puk aga lagagerek, ap il mbuk enogo oba wolok waruak nen yiluk yirige. Nen ap enogo arar oba panggo yi wagagemo, Ar Yesus nen kinok yoga dogolir, 41“An nen nena ekdagu wadok andagen?”

Ar ap il mbuk enogo nen, “Tuhan wae, An nil kaurak paga,” yiluk yorige.

42Yorigemo, Ar Yesus nen onggo yoga dogolir, “Kil yogondak bikan o, kakla ebebar andagen paga, kidi etegen o,” yiluk yorige.

43Eta yoga kigik, il enogo arar pano agage o. Nen Ar Yesus mutok inom laga dogolir, Ar Allah wa, yiluk yorir laga lagage. Nen ir akuni eka inil karugwa mende, obogar nen Allah endaga wogok birugwa.

Currently Selected:

LUKAS 18: WLW

Highlight

Copy