LUKAS 15

Domba ak bulagage wene

(Mat. 18:12-14)

1 # Luk. 5:29-30 O ambi paga, ir akuni pajak kuwak ekwa mende inom, nen ir akuni yiduk maduk mban ekwa mende inom, Ar Yesus wene yega inaruk kolali wagugwa. 2Ir akuni Farisi mende o, nen ir akuni guru-guru agama o, ir nen popok yugu dogolir, “Weh, Ar akuni yi, ir akuni maduk mende wogonaka lagarik, nen ir inom erom nertaga kani!” yiluk yirugwa. 3Eti kalok, Ar Yesus nen wene oba lirogo yi, mbililogo yoraga dogolir,

4“Kir ya agoktip mende kwak ambi nen, kanggumi domba inebe 100 kwak dogomo, nen ak ambi bendok togon bularumo, erurak kwak nenggerogon? Ar erigin mende eti, domba inebe sembilan puluh sembilan enogo o onggama etoma dambe dalok, nen bulagage mende enogo nggoma agarik yiluk, kwarir laga ar kigik, nen kwagago wolok warigin o. 5Nen kwak biluk kalok, akla adeknggen nen domba enogo omak paga piyalogo uma wolok laurak o. 6Uma bilalok, nen ar ogariyak inom, akuni o korok-korok inom welagwi mende inom, wai yoralok yoraga dogolir, ‘Ninadeknggen eruwok nen eruwok nen watni o, An mende doma bulaga mende enogo obok kwagago bi wagarik o!’ 7Eti ndak-ndak, akuni maduk ekwa ambi ar nen, ar iliti kwak batalok, nen maduk eka dogogin dek o, yiluk omaduk mbo bega kalok, o mbogor paga etoma inakla adeknggen nggok mondok ketaga mende o. Nenaluk ir sembilan puluh sembilan eti, obok pano welagwi nen maduk obok mbo birugwa, eti paga arar o.”

Uang bulagage mende wene

8“Eti ndak-ndak ar, kwe ambi auang sepuluh uang perak ma, nen ambiar bendok togon bularumo, ar nen erurak mende nena? Ar nen erigin mende eti, indu akda kalok, uma sapu erogo kwaka, nen nenggedek manggwe bulaga yiluk kwaka ar kigik, kwarigin kudi arar o. 9Nen ar uang enogo il kalok, ar nen ogariyak inom, nen akuni o korok-korok inom werek mende inom, wai yoralok yoraga dogolir, ‘An nauang bulaga mende enogo obok kwatagirik ma, nakla adeknggen ambigar kigi o. Ma ninadeknggen eruok o yiluk yigin o!’ 10Eti ndak-ndak, ar akuni maduk ekwa mende ambi nen, iliti kwak batalok, yabongga maduk eka dogogin dek o, yiluk omaduk mbo bega kalok, Ar Allah mende malaikat ir nen, inakla adeknggen ambik arar kugwi o!”

Elege ambi bulagage mende wene

11Ar Yesus wene ambi inomar yega dogolir, “Ap ambi akburi wadigi inebe mbere welagugwa. 12Elabodak kwak nen inombae yoga dogolir, ‘Ae, Nombae o, nir ninamindi ninamende onde agorik mende obogar, an nake wokniru mende kwak, yogondak arar woknirin o.’ Yiginanggige, ar inombae enogo nen, inamindi inamendek yemenogo ar mende munggulogo arar wogorige. 13Wogorigemo, elege enogo inggi eta na mende negen welagagerek, ar aminidi amende yemenogo obogar onggo kungga, eka lagagerek o adik monggwe walegar etoma arar lagage. Etoma lagagerek, ye mende nde mende, nau mende, nakbuk mende, eru mende, erukbuk mende, yemenogo paga auang tabik tabok erir nega ekalagage. 14Erir nega werekma, auang arar takbok yiluk, nen o yemenogo nogado nggok mende arar wulkigerek ma, ar enogo nuk ataurak paga arar dengge yirige. 15Ar enogo mondok-mondok nuk aga lagagerek, ap ambi ai werek mende etoma, oba arar yabu eru yiluk lagagemo, ap enogo nen yabu wam inaruam nggonakma dogon o, yiluk pagago birige. 16Ar enogo erom abu ambik arar eketekma, we elabur ake paga, wam inarom yemenogo arar nengga lagage. Nen ar enogo erom abu ambik arar kigik ogwe, ar akuni ambi nen kwak erom ugunar wogoru ina'ir arar welagugwa. 17Tuguluk ar elege ernogo, akla eka dogolir, ‘Ir akuni yabu an nombae oba ekwi mende, erom engga naungge mende kakder pakder kigik yabu ekwi, nen an yoma erom abu, nen kamburak paga dengge yege! 18An nombae oba arar lamore, nen lalok nen men yorigin: Nombae o, An Allah ilka paga inom, nen kar kilka paga inom, obok maduk arar eki o. 19An kar kakbur yiluk yokniru enogo ndak dek mende arar ertaga o. Kar kakla nen elege yi, we yabu mende arar kakla andano o, yiluk yorigin o,’ yiluk ebekige. 20Ebeka lagagerek, arar ombae oba uma arar lagage.

Uma nen walek ar waga kigik ogwe, ar ombae nen waga muk il lakega lagagerek, akla daguk yiluk, mondok mbu agan eloktekma lagagerek, kudik kambuk eka, elokte ande taduk eka ekige. 21Elege enogo nen, ‘Nombae’ yiluk yoga dogolir, ‘An Ar Allah ilka paga inom nen Nombae kar kilka paga inom, maduk nggok mende arar eki o. Ma an yi, Nombae kar kakbur yiluk yokniru eti mondok ndak dek arar aga o.’ 22Ogwe, ar ombae nen, ir yedoman mende obogar wai yoralok yoraga dogolir, ‘Ibar-ibar mondok o! Tu pano kwak mondok mende etiar wolok watuk, yikbi watni o. Nen cincin#15:22: Cincin: Eti emas mende arar ekulagugwa. Ma elege eti inggi enggangga paga yikbirugwa eti, elege yi an nakbur arar o, yiluk ar elege eti inom nen akuni obogar inilu aru ake paga yikbirige. enggabir paga yikbugwi, nen sepatu iyok paga yikbugwi, erni o. 23Eti eku dogoluk, sapi ak pirik nggok kwak eti ar warogo dakno o. Nen nir dago nunggwi, nen ninadeknggen nggok mende arar erugun o, yiluk yorarige. 24Nenaluk an nakbur yi obok kangge arar o, ogwe yogondak obok iluk aga arar o; ar obok bulagage arar o, ogwe yogondak kwako o,’ yiluk yega lagagerek, ir enogo adeknggen arar ekugwa.

25Ir etegerogon eku nggodek, ar elege anggok kwak ernogo, yabumo nggwe welagage. Welagagerek nen kwak, uma nggwe panggo yi waga lagage, musik#15:25: Musik: Eti ye mende nde mende inane ndai wakwi aluk-luk erogo ekwi mende. walkigik nenggen eti, gitar kwak. ekwi, akuni ndai nggidik eku dogolir inakmbir-mbir ane aruk ndaguk togo koli wagage. 26Ar enogo akuni yedoman mende ambi wai yotuk, kinok yoga dogolir, ‘Uma yoma nena etagama?’ 27Ar yedoman mende enogo nen onggo yoga dogolir, ‘Tuan kar kaworak enogo iyok paga wagama o! Nen Tuan mende, kar kombae nen yoneraga dogolir, sapi ak nggok kwak mende etiar warogo dakni o, nenaluk ar akbur obok bulatep mende, iluk pani pano ar kwaktigi o, yiluk yegemo eritagwi o!’

28Ar elege manggwiya enogo anini amik atuk, uma unggi lau dambe kalok, tekman nggwe arar puk agage. Etegerogon ekigemo, ar ombae nen iliti yonggonogo wolok unggirige. 29Ogwe ar nen yega dogolir, ‘An kwak ye tahun nde tahun paga, Nombae keyabu nggwirir nggwarir erir wagalagi. Yabu eru Kar nen yegetek mende, ambiar ogwe dambe kalok, nomok togon lagagi dek mondok o. Ogwe Nombae kar nen an nena wotnegen? Kambing agadak ambi ar ogwe, an nogariyak ninom warogo ninadeknggen etau yiluk ambi woknirigen mondok dek arar! 30Ar elege Nombae kar kakbur eti, kar kamindi kamende wolok kumi ndononggwa ya ekbagik mende inom, takbik takbok erir nege-nege nen, wagama, kanggo sapi ak pirik kwak ar, warogo adeknggen eken,’ yiluk yorige. 31Yiluk yorigemo ar ombae nen onggo yoga dogolir, ‘Nakbur o, kar yoma nimbirak mondok dogi tagwi, ye mende nde mende an namende yoma, obogar kar kamende ar. 32Ogwe nir nen ninadeknggen paga, ar adeknggen arar erurak eti nenaluk, kar kaworak eti obok wartaga arar o, ogwe yogondak obok iluk aga o; ar obok bulaga, ogwe yogondak obok ar kwaktago o,’ ” yiluk yorige.

Currently Selected:

LUKAS 15: WLW

Highlight

Copy