YOHANES 5

Ar Yesus nen ap ambi u warek mende, kolam Betesda aik paga u palkige wene

1Tuguluk Ar Yesus o Yerusalem paga etoma, ir Yahudi mende inaredo mende ambi komarurak ma, etoma arar lagage. 2O Yerusalem etoma tu bak ambi endaga eti “Pintu Domba”#5:2: “Pintu Domba” eti “Domba Tukande” yiluk: Ogwe nin yugu dogolir “Kolam Domba” yiluk yugu lagugwa mban, ma eragalu korok eta endaga. mbalek werek ma, korok eragalu eta, i kolam enggelek ambi welagage. I enggelek eti ir Yahudi mende inane paga endaga Betesda#5:2: Betesda: Alep kwak etoma diru mbalkugwa paga yugu dogolir eti: Betzata yugu lagugwa. yugu lagugwa. Nen i kolam Betesda eti eragalu etoma, o lambimo lima paga welagage. 3Nen o lambimo nggwe etoma, akuni u warek, amberak inil mbuk inom, amberak iniyok tuan laurak ndakdek mende inom, amberak inendop nggedalek mende inom, etoma arar welagugwa. [Ir obogar etoma i kolam akla yemenogo, abodok yega kau torek onggolagik welagugwa. 4Nenaluk ir malaikat Tuhan mende nen, ima etoma we ninggi mban wura watuk, i yemenogo abidik abodok eri wagu lagugwa. Nen ir akuni u warek yemenogo, ta nen ndak alebagik i abodok yeganem yemenogo unggigin kalok, alep unggigin mende enogo, ar u oba mende enogo arar dek aga lagage.] 5Etiar ma, etinem ap ambi u warek kigik, inggi tiga puluh delapan tahun ekige mende ambi, korok eta welagage. 6Etegerogon ma, Ar Yesus nen etoma windik il karige. Nen ar ap eti u pagane kwak ar nen warek welagage eti muk ilu aga lagagerek, men yorige, “Kar koba u dek aru wadok a?” yiluk yorige.

7Yorigemo, ar ap u warek enogo nen yoga dogolir, “Ai Nombae o, i abodok yigi nanggetek, akuni kambok togon ibibir ima wukbanu dek ma, auwan i kolam aik paga laga nagik, ir ambetak muk inalep wuketek ma, etegero eka yi dogirtaga o,” yiluk yorige.

8Yorigemo Ar Yesus nen yoga dogolir, “Yogo kebe ibar metarin, nen katikar ndalek mende endi kodalok lan,” yiluk yorige. 9Etanogo yoga kigik, ar ap enogo u oba mende arar dek agage o. Dek atuk nen, atikar ndalek welagage mende enogo, arar kodalok lagage.

Ma wene eti hari Sabat paga ekige o. 10#Neh. 13:19; Yer. 17:21Eti paga nen, ir ap Yahudi mende inewai nggaindak mende nen, ap oba u ngger dek agage mende enogo yogu dogolir, “Hari yi hari Sabat o. Kar tikar ndalek welagan mende lek kalok waganurak eti mondok maga o,” yiluk yorugwa.

11Ogwe ar ap enogo nen yega dogolir, “Ar ap an u panake werek mende nen yoknega dogolir, katikar ndalek endi ibar kuma kodalok lan yotnege mo o,” yiluk yirige.

12Tuguluk ir nen onggo yogu dogolir, “Ap kar katikar ndalek kodalok lan yokege eti ta?” yiluk yorugwa.

13Yorugwa mende, ar ap u oba dek agage mende ernogo, Ar Yesus akuni pakalok inakla yemenogo nen, arar medok togon dek agarek ma, ap ta nen u panake yiluk pik pak dikbiluk dek ar o.

14Tuguluk Ar Yesus ap enogo imbirak, o Tuhan Ai Palekma abuk atuk yoga dogolir, “Yogondak kar koba u obok dek aga o. U ibiluk anggin nggok mondok mende koba aga kau, maduk ambi kiyok paga mondok erurak maga o,” yiluk yorige.

15Wene enogo yorigemo nen iluk atuk, ar ap enogo nen, ir akuni Yahudi mende inewai ap nggok ndak yemenogo, ainelak an enogo Ar Yesus nenar u palnake o, yiluk yora lagage. 16Etnogo yirige inilu atuk, Ar Yesus akuni u hari Sabat paga kigik, u palke nenaluk yiluk, o eta paga nen arar Ar Yesus nggedalogo buwok nen yiluk ekugwa o.

17Ogwe Ar Yesus nen yoraga dogolir, “Ar An Nomba eti yabu eka mondogar kigik, o yogondak agorik kudi yi arar ma, An ogwe yabu eka mondogar agarik o.”

18Wene yirige eti paga, ir ap Yahudi mende inewai nggok ndak enogo, Ar ebe waru paga yabu nggok negen ar ekugwa o. Ir eti ekugwa eta, wene agama ake kolek hari Sabat paga eku dogorak kolek kigik, dadol kige eti paga ar dek ogwe, wene ambi Ar nen yega dogolir, Ar Allah eti An Nombae yiluk yirige eti paga o. Ma wene eti paga, ir nen andugu dogolir, kalok Ar yi nen, Ar Allah eti, An nimbirak ndak-ndak yiluk andartaga o yiluk eberku lagugwarik, wene enggen Ar waru edo eti arar birugwa o.

19Ar Yesus nen onggo ir yoraga dogolir, “Kinaklah ebebar andani o, Ar Akbur adik obatne paga nen, ye ekik ndek ekik erirtaga dek o. Ar nen ye ekik nde ekik erirtaga eti, Ar Ombae eka il kalok mban eri taga mende o. Nenaluk Ar Ombae nen, nena-nena eri taga eti, Ar Akbur nen enogo arar erir taga mende o. 20Nenaluk Ar Ombae eti nen, Ar Akbur eti iliti kunik mondok ma, nena-nena Ar erir taga mende etoma, Ar obogar yorir taga mende o. Ma kir nen wi'au yiluk bi waruak nen yiluk, Ar Ombae nen, ye wene nde wene nggok ndak mende edo etoma, obogar Ar eruak nen yiluk wogorigin o. 21Ar Ombae nen, akuni warek mende iniluk baga, nen iniluk mondok dogolir nabedal kabedal eku dogowak nen yiluk wogoraga, ekige eti ndak-ndak, Ar Akbur nen, ir akuni iniluk nabedal kabedal eku dogowak nen yiluk wogoragin o. 22Ar Ombae nen ir akuni kede warogo balok inendokma wagani tagodek o. Nen wene akuni inendokma waganogo inuwak dolku dogorak mende eti, aktibar waganogo Ar akbur arar wogogemo o. 23Ar Ombae nen etegerogon eri taga eti, ir akuni nen, Ar Ombae wogokbi tagwi eti ndak-ndak, Ar Akbur etegerogon Ar woguk buak nen yiluk o. Nen ir akuni Ar Akbur woguk bigikdek kalok, Ar Akbur lakbi wagage werek Ombae eti wogukbugwi dek o.

24An wene yigi mende yoma ebebar o: Ir akuni An wene yigi mende dikbega, nen An lakbani wagage mende Ar oba ebebar andega kalok, ar eti iluk mondok-mondok dogolir, nabedal-kabedal kodagin o. Nen ar ebe wene anggin panggin mende oba mondok bigin dek o; nen ar ebe warek mende nen iluk mondok dogorak mende obok kodage o. 25Wene yi kinakla ebebar andani o: Wene ambi etari waga kinil kugun o, nen eti etaru mende arar panggo yi waga kalok, ir akuni kanggugwa mende etoma nen, Ar Allah Akbur eti Ane inaruk kolalugun o. Nen ir akuni Ane inaruk kolalugun mende eti, ir iniluk arugun o. 26Nen Ombae eti iniluk edo onde werek eti ndak-ndak, Ar Akbur eti iniluk edo onde werek mban erogo bigin o. 27Ar nen Ar Akbur eti akuni inendokma waganogo inuwak dolinaka dogowak nen yiluk eyabu wogorige o. Nenaluk Ar eti Akuni Inakbur eti paga nen o. 28Kir kinakla paga nen, wene kolalkop etoma paga nen, wi'au yiluk bi wakup o, nenaluk ir akuni watagugwa mende etoma, inao telek ambi enam ari waga paga, Ar Ane inaruk kolalugun o. Ane inaruk kolalbiluk wundi warugun o. 29#Dan. 12:2Ir akuni inobabur pano mban eku lagugwa mende etoma monggarma etoma nen wundi watuk, iniluk dogogun o. Ogwe ir akuni inobabur maduk mban eku lagugwa mende eti, inoba wene hukuman anggin baurak paga iniluk erogo bagin o.”

Ar Yesus eti ebebar o yiluk di burak mende wene

30“An Nakla wadok andak taga paga, ye ekik nde ekik, erurak mondok ndak dek o. An nen wene edo mbenagago uwak dolurak kalok eti, Ar Allah nen erurak dik duk yirige ndak-ndak mban arar o. Nen wene An nen mbaligin eti odo ki togon ebebar mende mbaligin o. Nenaluk An nen An wadok andar taga paga mutok eka dek eti paga nen o. Ogwe Nombae An lakbani wagage eti wadok kektaga mutok, wene mbaligin o.

31We walkigik negen, An nen An nabok mban bagalagin kalok, akuni nen ebebar yiluk andugun mondok dek o. 32Ogwe ar ambi nen An nabok bagalka kalok, nen An nilu Ar eti An nabok ebebar mende mban bagaligin o. 33#Yoh. 1:19-27, 3:27-30Kir nen akuni ar Yohanes oba lakbarugup mo, ar nen wene An nabok eti ebebar mende ar bagalkige o. 34Wene An yigi yi ake paga, An ir akuni nen nabok bugalu korane atuk yiluk yigi dek o, ogwe kir ndilkinabu paga yigi o. 35Ar Yohanes eti, indu lampu akbinak o liya erir taga enogo ndak-ndak o. Nen we dudu yogondak ya ake paga, akbinak eti kir nen waganir tagwi o. 36Ogwe wene ar Yohanes bagalkige eti we ar kigik, nen An bagaligin mende eti, mondok nggok mende arar o. 37#Mat. 3:17; Mrk. 1:11; Luk. 3:22Nen An Nombae lakbani wagage werek eti nen, An nabok bagalir taga ar o. Nen Ar ebe Ane inom, nen Ar ebe elokte inom, kir auwan kinil kigikdek o. 38Ar Ane yugu etoma kinakla ari onggegekdek o, nenaluk kir nen An Ar lakbani wagage mende yi, noba ebebar andagwi dek eti paga o. 39Kir kinakla nen, Alkitab endaga talogo akla kibili tagwi eti paga, niniluk mondok dogorak mende o, nen nabedal kabedal eti o, nir nen kodagun andak tagwi o. Nen Alkitab eti nen wene An nabok bagalir taga o. 40Ogwe kir An noba nabedal kabedal eti kodau paga waru kina'ir o.

41An ir akuni nen woguk banuwak nen yiluk kwarir nega dek o. 42Kir kinebe An Nilu o. Ar Allah eti kiniliti odo enggen paga akba kugwi dek o. 43An wagagi eti, Ar Nombae eti obatne paga wagagi o, ogwe kir an woknabu dambek banunggwi o. Ogwe, ir akuni ambi ir inobatne paga wagwi kalok, kir nen ir wogonakwi wadok kugwi o. 44Kir kinakla etoma ebebar andaurak eti nenggerogon o, kir nen ir akuni kinom mende nen woguk binanuwak yiluk ebekwi, nen Ar Allah omanggi omangga etiar nen woguk binanuwak yiluk andugwi dek ma o. 45Kir kinakla paga An nen Nombae ilka paga, kir maduk erogo binagagin yiluk andagup o. Ogwe ap kir maduk o yiluk kinuwak doligin eti ar Musa arar o, yiluk wadok ketagwi o. 46Nen kir Ar Musa ebebar andugwi kwak dogomo, eti An yi noba kinakla ebebar andaurak o. Nenaluk wene ar diru mbalkige etoma, wene an nabok mende arar diru bagalogo birige o. 47Ogwe kir ar Musa diru mbalkige mende eti ebebar andagwi dek kalok, wene An yokiragi mende yemenogo, ebebar andaurak eti nenggerogo?” yiluk yoragage o.

Currently Selected:

YOHANES 5: WLW

Highlight

Copy