YOHANES 1

Wene enogo ap agage wene

1Agar paga yoma kenamer bigikdek kigik, o ibibir etoma, ar Wene eti welagage o.

Wene eti, Ar Allah imbirak welagage

Nen ar Wene eti, Ar Allah arar o.

2O ibibir mondok, Ar Wene eti, Ar Allah imbirak welagage.

3Ye mende nde mende Ar obaru mban kenam ekbega lagage,

nen ye mende nde mende werek yoma,

Ar ebe dek kigik kenam erogo biluk dek mende dek arar o.

4Nen Ar Wene eti iniluk edo arar o,#1:4: Ar Wene eti iniluk edo: Ye mende nde mende Ar nen kenam ekbirige mende etoma, iniluk edo eti, Ar Wene eti oba mban kunik o.

nen iniluk eti nen akuni akbinak erinabi taga mende.

5Nen ar akbinak eti nen, o amum mo etoma lia eka,

nen ar o amum eti nen, ar akbinak eti nagulogo burak ndak dek o.

6 # Mat. 3:1; Mrk. 1:4; Luk. 3:1-2 Ar ap ambi Ar Allah nen lakbi wagage mende, arar waga yi o.

Ar endaga eti Yohanes.

7O akbinak mende eti abok, ar nen yorar warumo,

ir akuni iniliti ar oba ebebar andawak nen yiluk arar o.

8Ar ebe akbinak mende eti dek o,

ar eti wene akbinak eti abok mban yorar wagage o.

9Akbinak naguk yitagodek mende akuni lia erogo bak nen yiluk,

agar paga yoma waga o.

10Wene eti ebe agar paga yoma werek,

o agar paga yoma, ar pagaru mban kenam ekbirige o,

ogwe o agar paga yoma, Ar ebe inunggukdek o.

11Ar ai edo paga arar wagagerek ogwe, ir akuni Ar mende yemenogo nen agur malu dambe karugwa o.

12Ogwe ir akuni amberak nen agur malbiluk, nen Ar ebe oba ebebar andarugwa;

nen ir yemenogo inobok ar, Ar Allah akburi mban ar dogowak nen yiluk onde erogo barige.

13Onde erogo bagin eti, akuni paga endak tagwi mende ake yiluk dek ogwe,

nenaluk iniluk ngger mende erogo bagin edo eti, Ar Allah nen arar o.

14Wene enogo akuni agage o,

Ar ebe nir akuni ninanggedekla agarik o.

Ar obabur lektek mondok mende eti, nir obok ninil kogo ar o,

obabur lektek mende eti, Ar Allah akbur idak ambi endago arar o.

Nen Ar ebe paga nggweru mban, Ar Allah ebe inil kugun o,

nen eti paga mban, nir iliti kunik erninabir taga o.

15Ar Yohanes wagage eti, Ar Abok bagalu paga wagage o,

ma ar nen akuni yoraga dogolir:

“An yigi enogo Ar Ebe yi kinil kani o:

an eti nebe bugudagar o, nen Ar yabongga warigin eti, Ebe nggok lektek mende,

ogwe an nebe bugudagar nagik, Ar kwak eti Ebe nggok mondok arar o.

Nenaluk an auwan kenam agikdek kigik, Ar ebe obok welagage.”

16Ar ebe akuni inakba nggok werek arar o,

akuni adeknggen inoba baga kigik,

irep kudi arigin mondok dek o.

17Wene Sepuluh Hukum Tuhan mende ernogo, ar Musa oba nggweru waganggugu o.

Ogwe ninakba mende o, nen ebebar mende o,

Ar Yesus Kristus ebe paga kenam ari wagage o.

18Ap ambi ta nen kwak, Ar Allah yitagwi eti il karige ambi mondok dek o,

ogwe il karige mende eti elege idak ambi Ninombae akbur eti arar o,

Ar ebe Ombae imbirak ndak-ndak, nen Ar Ombae imbirak iliti mondok kunik.

Ar eti nen, Ar Ninombae ebe nir ninoba kenam erogo yoknirarige.

Ar Yohanes nen wene bugalkige wene

(Mat. 3:1-12; Mrk. 1:1-8; Luk. 3:1-18)

19Ir ap Yahudi mende inewai, o Yerusalem etoma nen, ir ap imam-imam inom, ir akuni Lewi mende inom, ar Yohanes oba wene kinok, “Kar yi ta?” yiluk kinok yori lani yiluk lakbarugwa mende nen, ar kinok yori wagugwa.

20Ar Yohanes nen wene onggo telekma yangguk togon yoraga dogolir, “An nebe ap Raja Ndilinakwa eti dek o,” yiluk yoragage.

21Yiluk yirigemo, ir nen onggo yogu dogolir, “Kalok kar yi ta kwak? Kar Elia dogu a?”

Yorugwama, Ar Yohanes nen onggo yoraga dogolir, “An ar dek o.”

Yigi nanggige, ambi inom ar kinok yogu dogolir, “Kalok kar ap Nabi mende a?”#1:21: Ap Nabi: Ap Nabi eti menatuk, Raja Ndilinakwa eti warurak mende abok, bagali warigin yiluk inilu welagugwa. yiluk kinok yorugwa. Ogwe ar nen yoraga dogolir, “Eti dek ar o,” yiluk yirige.

22“Eti kalok, kar yi ta kwak, ibar yokneran. Nen wene eta yoneramo, nir ir akuni wene kinok yori lani yiluk, lakbinani wagiya werek eti yora luok nen o. Ma wene kar ta endi ibar yokneran,” yiluk yorugwa.

23 # Yes. 40:3 Ar Yohanes nen onggo yoraga dogolir, “An yi ar Nabi Yesaya nen yega dogolir,

‘O waganekma todi enggama etoma nen, ap ambi ane kum yega dogolir:

Ar Tuhan atuan mondok enagago yarni o, yiluk yigin yirige etnaga an arar o,’ ” yiluk yoragage.

24Ir akuni ap Farisi nen lakbarugwa mende enogo amberak, ir Farisi mende ar ma, 25ir nen kinok yogu dogolir, “Nen kar ap Raja Ndilinakwa mende dek yegen, nen Elia dek ar yegen, nen ap Nabi mende ogwe dek ar yegen, kalok nenaluk kar akuni ima wukbar tagan?” 26Yiluk yorugwama, ar Yohanes nen wene onggo yoraga dogolir, “An akuni inebe, ebe i paga ima wukbar taga o. Ogwe Ar ap ambi kir kinanggedokla kinungguk dek mende mendek agarik o. 27Ar eti an nambotna mutnarek warigin o. Ogwe iyok ogi agede marek mende, an nen pigalu eti mondok ndak dek o,” Yiluk yorarige.

28Etoma obogar ertagage eti, o Betania paga, i Yordan abel Timur nggwe etoma nggwe, ar Yohanes nen akuni ima wukbaga lagage o.

Ar Yohanes nen Yesus ebe telekma birige wene

29O kubenengge, ar Yohanes Yesus oba waga il karige. Il kalok ar Yohanes nen yega dogolir, “Ar Allah Adomba Ak akuni o agar paga yoma, ninomaduk dek erogo bigin enogo ebe eli, kinil lakani o. 30Ar yi an nambotna yabongga warigin yega lagi enogo arar o, ogwe Ar ebe nggok mende arar o, nen an yi nebe bugudagar o. Nenaluk an auwan endak lagikdek kigik, Ar obok welagage o. 31Alep kwak, an nen Ar yi ta, yiluk dik bigik dek ar. Etegerogon kigik ar, ir akuni Israel mende, Ar ebe inilu aruwak nen yiluk, wedek ebe i paga, an nen ima wukbaga agarik o.”

32Nen ar Yohanes nen wene bagalka dogolir, “Roh Allah tewe yogu talek, mbogor paga nen putuk Ar oba lakbi waga lagagerek, welaga nil karigi o. 33O eta paga, Ar eti ta, yiluk, an dik bigik dek paga o. Ogwe Ar Allah akuni ima wukbano, yiluk yornirige werek nen, alep ar yoknega dogolir, ‘Akuni ambi Roh Allah wura watuk, oba laka kalok, Ar akuni eti nen perak, Roh Allah paga ima wukbagin o,’ yiluk yornirige o. 34Etiar ma, An nil nebe nen kigi o, ma an nane bagalir taga yi, Ar Allah Akbur yi arar o,” yiluk ar Yohanes nen yoragage.

Ar Yesus mutok lagu dogu ibibir inayonggo birige mende wene

35Kubenengge ar Yohanes aworomi inebe mbere inom, o etanogo ar lagugwa. 36Lagugwa mende, Ar Yesus laga il lakalok, ar nen yega dogolir, “Ar Allah Adomba Ak enogo ebe yi arar o.”

37Ar Yohanes aworomi inebe mbere ernogo, wene yega inaruk kolalku lagugwarik, Ar Yesus mutok lagugwa. 38Nen ar Yesus il ambotna nggwe medak togon lak taga lagage, ir mutok lagwi darige. Daga lagagerek yoraga dogolir, “Kir ta kwarir?”

Yiluk yoragagemo, ir nen onggo yogu dogolir, “Rabi wae, Rabi kar o nggoma dogi tagan o?” (Rabi eti guru yiluk yugu lagugwa).

39Ar Yesus nen yoraga dogolir, “Kir nen kinil kobagik nen watni o.” Yoralok, Ar enogo inom, Ar dogi tagama inil kowak nen yiluk, wogonarek lagage. O eta paga keyanggwi jam empat arar agage. Etagagemo, o etinen, ir obogar Ar inom welagugwa.

40Ir inebe mbere Yohanes wene yega inaruk kolalku lagugwarik, Ar Yesus mutok lagugwa ernogo, ar ambi endaga Andreas, Simon Petrus ogar. 41Nen ar Andreas ogarak Simon ernogo, ibar-ibar kwari lagagerek yoga dogolir, “Nir ap endaga Mesias yitagwi ernogo, ninom arar abuk agorik o!” (Mesias eti Kristus yiluk, nen wene enggen eti Raja Ndilinakwa yiluk.)#1:41: (Mesias: Ndilinakwa): Kamus paga etoma Kristus endaga enggen mutok bikaurak. 42Yoga lagagerek, Ar Andreas enogo nen, ar Simon eti Ar Yesus oba wolok lagage.

Lagugwama, Ar Yesus Simon enogo il lakega lagagerek, yoga dogolir, “Kar Simon ap Yona akbur arar keyagi o. Kar eti Kefas yokugu dogogun o.” (Kefas eti Petrus endaga ar, ogwe wene enggen eti nggir ado yiluk.)

Ar Yesus Filipus o, Natanael o wai yorarige wene

43Kubenengge Ar Yesus nogo, o Galilea paga etoma lugun o, yiluk yirige. Nen ar Filipus imbirak abuk aga lagagerek, yoga dogolir, “An mutnarek eme!” yiluk yorige. 44Ar Filipus ai edo eti o Betsaida, ir Andreas o, Petrus o, ir inuma. 45Nen ar Filipus enogo Natanael imbirak abuk atuk yoga dogolir, “Nir ap Musa diru mbalkige mende, Hukum Allah paga abok yugwi, nen ir ap nabi-nabi nen abok bagalkwi, eku lagugwa ernogo, obok ninom abuk ago o. Ar ebe ai edo eti, o Nazaret etoma, nen ombae endaga eti Yusuf o.”

46Ogwe ar Natanael nen wene onggo yoga dogolir, “O Nazaret nen Wene pano mende ambi kenam arigin yirigemo a?”

Ar Filipus nen onggo yoga dogolir, “Kar kengga werek nen, kil kanok nen eme o.”

47Ar Yesus enogo Natanael waga il kega lagagerek, ar ebe ake paga yoga dogolir, “Ap ebebar Israel mende, yi arar o. Wene enggal mondok oba dek arar o.”

48Yorigemo ar Natanael nen, “Ai Nombae, An nedo mende nenggerogon kar kilu agan o.”

Ar Yesus nen wene onggo yoga dogolir, “Ar Filipus nen auwan wai yokiri lagikdek kigik, kar o ara edoma welagan etnaga, An obok nil keyagi o.”

49Yorigemo, ar Natanael nen, “Ai Guru Nombae o, Nombae Kar eti Allah Akbur arar o! Nombae Kar, akuni Israel mende Raja Kar arar o,” yiluk yorige.

50Ar Yesus nen wene onggo yoga dogolir, “Wene we bugudak, kar o ara edoma keyagi yigi eta paga, kiliti ebebar andagen a? Ye wene nde wene, nggok dombok mende elalarir waga kar kil kigin o!” 51#Kej. 28:12Ar Yesus nen, ambi inom ar yoga dogolir, “Mbogor odo keyalbiluk, ir malaikat Allah mende nen, Akuni Inakbur enogo oba, dagagik wukik ekwi kil dagin ma, ebebar andan o,” yiluk yorige.

Currently Selected:

YOHANES 1: WLW

Highlight

Copy