RASUL-RASUL EKUGWA WENE 28

Ar Paulus o Malta eta nen ekige wene

1Nir obogar pano ndegelek wulku lagagurik, nen o etanogo endaga Malta yiluk ninilu agage. 2Ir akuni inai werek o Malta mende nen, nir pik pak ar wokninakugwa o. O tir kunik mondok ar eka, ima nen nggoma wulkugu togi a, erninaka agagemo, ir akuni inai werek nen, indu nggok kunogo biluk, kinarogi weraktani o yoneragugwama, nir togi weratarugu o. 3Togi weraku dogolir, ar Paulus kali uri lagagerek indu kungganem, wado kali aik nen kode leloktogo wundi wagage. Wundi waga lagagerek Paulus inggi paga peral diluk aik mbalkige o. 4Nen wado enogo, ar Paulus inggi aik kunik mondok puk agagemo, ir akuni inai werek etoma mende nen, ir nen ar ambi yogik eku dogolir, “Yogo, ap yi akuni inakwa ebe yi arma, ima nen kode ligin yiluk waga mende, kwe ilu werek yinogo nen, wake yi kogop a,” yiluk yirugwa. 5Paulus nen wado enogo pedek togo yamburogo indumo mbo maldirige. Nen ar wado aik mbalnake yiluk kener wakikdek ar puk agage. 6Ir inakla nen Paulus ilpuduk bigin a, inggi pirigin a, ebe kambigin a, yiluk andarugwa mende, dek ar agagemo, eka inil kuwok nen yiluk to karugwa mende, Paulus oba pano aitok arar agagemo, ir nen, wadigi, ap yi maga mende arar kogo o, yiluk yirugwa.

7O korok eta, agar ambi ap Gubernur o etila mende endaga Publius agar werekma, ar nen uma binani unggiluk erom dado palninaka, pano pakninarek kigik noge kenagan yirugu. 8O eti paga ap Publius ombae u warek, iliti aik, nen alakbi eka uma welagage. Paulus uma oba onggega lagagerek, inggi alubak tebelogo ake tamban ekigemo, ap enogo u oba arar dek agage o. 9Eti ekige inaruk kulku lagugwarik, akuni amberak o etila nen, ir inebe ambigar ar Paulus oba wagugwama, ar nen tamban eginaka kalok, u inoba mende dek agwi, eka lagage o. 10Ir akuni etoma, nir ninom pano ar welagagurik lagunem, nir nau mende inom, noge yir lau ake inom, mondok ndik nduk erogo binanunggwi ekugwama, nir arar lagagu.

Ar Paulus o Roma unggwi lagage wene

11Nir o etoma ninagik, tur kenagan ndagalkige, nen to ambi o Aleksanderia nen wagage mende, o miyo nen etoma welagagerek, o Roma laganem, nir ninom unggiluk lagagu o. To enogo agubakma ngge etoma, inumbui kuduk mbere inendaga Kastor inom, Poluks inom tugunikma, to kapal eti paga dagaluk lagagu. 12Lagagurik nir o Sirakusa unggugu lagagurik, etoma noge nininggi kenagan yirugu. 13Etoma nen ima nggwe lambok-lambok o Regium etoma binani lagage. Nininggi ambi welagagurik nen, o wiya selatan nen pul ka wagage. Nininggi mbere noge yiluk o Putioli unggi lagagu. 14Etomala unggi lagagurikmo, ir anggota jemaat ninom abuk atuk, ninom doguwok yirugama, ninom ninagik tujuh hari welagagu. 15Eta welagagurik nen, nir o Roma lagagu. Ir nir ninogariyak Yesus ane waganggugwa mende, etoma werek mende nen, nir waritagwi o yiluk yoragugwama, ninaruwam werekma, o pasar Apius inom, Pasanggrahan Tiga etoma ninom abuk agagu. Ar Paulus Yesus akburi etoma il dalok, Allah wa, yiluk keyagi wakige. Yanogo nen ar Paulus iliti oba didu yirige o.

Ar Paulus akuni o Roma mende inom wene mbalkugwa wene

16Roma ari lagagurik nen, ar Paulus kar o kadik ar dogon o, yiluk adikne o ambimo kigik, ap tentara nen aruwam welagugwa.

17Noge kenagan yugu lagagurik, ar Paulus nen ap Yahudi inewai inayonggo bega lagagerek, wagugwama yoraga dogolir, “Ae nakburi, an nen akuni nir mende inoba inom, nir ninombayelak ninumbui inoba inawene kindirik inom, oba maduk erogo bigikdek mende, o Yerusalem nen pagago akuni Roma mende ininggimo nggedalogo banggama o. 18An nawene mbalku dogolir, birneya waga mende, ar maduk yi eke paga wako yurak negen ambi inil mondok kalok dek nen, kede pigalogo banurak yega mende, 19#Kis. 25:11ir ap Yahudi nir mende nen, ar warurak mondok o yugunangga, an nen nawene Kaisar nen mbenak naburak yigimo, o yoma woknarek wagiya o. Eta an nen, ap ninom agarak kunik nen yiluk dek o. 20An akuni Israel mende nen, ap ndil ninaburak mende ambi yabongga warigin ma, menda warigin yiluk tokugwi werek enogo, wene waganggigimo kede warnaka o. Eti paga nen, an kir ninom ninilagi wakwi, wene ninom mbalkwi, eruwok nen yiluk kinayonggo bigi o, wanelak.”

21Yiluk yoragagemo, ir nen ar yogu dogolir, “Wene eti nir ninonggokdek mondokma yegen o, nir yoma, ir ap nir mende nen surat paga inom, akuni inane paga inom, maduk yi ekemo o, yiluk kabok ambi yoneragakdek ma arar yegen o. 22Nen yogondak nir yoma nen, wene kar waganggen yi ebe nenggerogo mende ma, akuni nen wene yi nir nina'ir o, yiluk aredo warir wagwima, kar nen wene endi ambi mbilil neranok nen o,” yiluk yorugwa.

23Yorugwama, ar Paulus nen pano o, yiluk ir inom, o yi paga yomala nen yugu doguwok nen o yiluk inane dambulkugwa. O yi paga yomala nen yugu dogowok o, yirugwa enogo paga, akuni inebe pakalok dogalek ar wagu lagugwa. Ar nen yoraga dogolir, Allah werekma dogolir eku dogorak wene eti, edo Musa wene paga nen inom, ap nabi-nabi nen diru mbalkugwa paga nen inom, Ar Yesus yi nen eruwam, ir ap pagane etoma yugu lagugwama o, yiluk dirogo mbililogo yoragage. 24Yoragagemo, ir akuni nandorkugwa yomanogo nen, ir amberak nen wene yi, ebebar o yiluk waganggugwa, nen ir amberak nen wene eti waganu nina'ir yiluk monogo damber karugwa ar o. 25Ir ap yanogo wulku dogolir, wene inane ambi dambul kikdek, iniliti adik ndak inuma mbugulir lagugwa edo eti, ar Paulus nen wene men yorarige paga arar, “Roh Allah nen, nir ninumbui ar ap Nabi Yesaya obaru yoragage eti mondok ndak-ndak arar o! 26#Yes. 6:9-10Ma Ar Allah nen yega dogolir,

‘Kar nen ir akuni yi inoba lalok yoraga dogolir:

Kir kinaruk kulukwi mondogar erugun ogwe, kinakla unggigin mondok dek o.

Kir kinil kugwi mondogar erugun ogwe, ebe yi o yiluk kinil nen kugun mondok dek o.

27Ir akuni yi inakla andar tagwi mende eti, mondok aik dek agama o,

ir inaruk obogar dogu agama o,

ir inil obogar nggudu agama o.

Yi etaga eti ir inil kugwi kau arar,

ir inaruk paga inaruk kolalkwi kau arar,

ir inakla paga inakla eberkwi kau,

nen ir iniyok paga An noba wagwi kau,

nen An nen ir u palinaka kau arar o,’ ” yiluk yirige o.

28Yoralok Paulus nen ir yoraga dogolir, “Wene pano ndil ninaburak wene yi, waganogo akuni nin mende, Yahudi akuni dek mende kodawak nen yiluk inoba begemo waganir tagwi o,” yiluk yoragage. [29Etegerogo yoragagemo, ir akuni inuma lagu dogolir, kar kobabur paga, kar kobabur paga agan yir inuma lagugwa o.]

30Ar Paulus o ambi adik onggo mbalogo dogolir, dua tahun ekige. Dogolir akuni kuro oba wagwi dalok, uma wogorek unggiluk, inom wene mbalku lagugwa. 31Oba wagwi dalok, ar Allah werekma dogolir, eku dogorak wene inom, Tuhan Yesus Kristus wene inom, telekma ar mbililogo yoraga eka lagage.

Currently Selected:

RASUL-RASUL EKUGWA WENE 28: WLW

Highlight

Copy