RASUL-RASUL EKUGWA WENE 19

Ar Paulus o Efesus nen ekige wene

1Ar Apolos o Korintus kigik, ar Paulus odo podok o etoma nen, o Efesus wundi wagage. Nen o etoma, ir akuni Ar Yesus ebebar o yiluk andarugwa mende, inebe amberak inom abuk agage. 2Inom abuk atuk, ir kinok wokdaga dogolir, “Yesus oba ebebar o yiluk waganggwi kinagik, kir nen Roh Allah eti waganggugup a auan a?”

Yiluk yoragagemo, ir nen onggo yogu dogolir, “Auan o. Nen Ar Roh Allah eti werek o yiluk, nir ninaruk kolkikdek ar o,” yiluk yorugwa.

3Yorugwama ar nen onggo yoraga dogolir, “Eta kalok kir ta ane paga ima wurkinakugwa?” yiluk ar Paulus nen yoragage. Tuguluk ir nen onggo yogu dogolir.

“Yohanes nen ima wurinaka lagage paga, ima wurninakugwa o,” yiluk yorugwa.

4 # Mat. 3:11; Mrk. 1:4,7-8; Luk. 3:4, 16; Yoh. 1:26-27 Yiluk yorugwama ar Paulus nen, “Ir akuni nen nir maduk eko mende, arar mbo bogo o yiluk, yugwi dalok, ar Yohanes nen ima wurinaka lagage o. Ar Yohanes Pembaptis nen Yahudi mende yoraga dogolir, ap ambi an nambudik warigin eti perak, kir ar oba kiniliti panggolino o, yiluk yega lagage etnaga, Ar Yesus yi arar o,” yiluk yoraga lagage o.

5Eta yoragage mende ir inaruk kolalkugwama, Ar Tuhan Yesus endaga paga, ir ima wukdarige o. 6Wukdalok ar Paulus inggi inalubak paga tebel daga kigik, Roh Allah inoba lakbi wagagemo, wene elalin wene yugwi, Allah awene yorar lagwi, eku lagugwa. 7Ir inebe dambulik dua belas ndak-ndak negen arar.

8Ar Paulus inggi tiga bulan paga, ar obade dek mondok dogolir, ir akuni Yahudi tamban erir tagama, akuni iniliti Yesus oba eberogo waganuwak nen yiluk, ap wene kinok waganggwi kalok, wene onggo lakbigik wakbigik, Ar Allah endaga mbogor nen wene pago dogu mende yoraga lagage o. 9Ogwe, ir ap amberak nen iniliti mondok mbuk welagugwa. Ir nen wene yi ebebar o yiluk andau ina'ir welagugwa o. Nen ir akuni ambik kuwak ekugwa inuwagam, Ar Allah nen, ir akuni Ar Yesus paga nen ndil inabigin yiluk yirige wene mende, obogar al taguk mbaguk yogwi ekugwa. Etegerogo ekwi agagemo, ar Paulus nen dambe dalok, ir amberak Yesus ane waganggugwa mende wogorek, sekolah endaga Tiranus eti erir tagama unggwi lagugwarik, wene emeriraga lagage o. Etoma dogolir ir akuni etoma inom, ir wene kinok waganggwi kalok, mbililogo yoraga eka lagage. 10Akuni Yahudi mende inom, akuni Yunani mende inom, o kuri Asia mende etoma, Allah Ane yoraga waganggwi dagik, dua tahun welagage.

Ap Skewa akburi nen ekugwa wene

11Ar Paulus erir nega kigik, Ar Allah nen erukbuk mende ambik eka lagage o. 12Ir akuni u warek kalok inom, irimbo inilitimo werek kalok inom, ar Paulus iyom yugu welagatek mende inom, aredok pigalek mende inom, wolok ir akuni u inoba kunik mende ambi inoba bi lagik ekwi kalok u dek agwi, irimbo inakla nen kode wulkwi, eku lagugwa. 13Ir ap Yahudi ubale mende amberak nen, o ya nda nugu dogolir, akuni irimbo inakla werekma mugogo wulinaku lagugwa o. Etegerogon ma, Ir ap ubale enogo nen, Ar Tuhan Yesus endaga paga, ir kugi irimbo yemenogo mugogo wulinabu walkarugwa o. Ir nen irimbo yoragu dogolir, “Ar Yesus Paulus nen yorar netaga eti endaga paga, irimbo yi wundilan, yiluk yoragu lagugwa.” 14Ar ap ambi kepala imam mende endaga Skewa, ar akburi inebe tujuh ma, ir nen eta ndak-ndak ekugwa o.

15Ekugwa mende, ar irimbo nen yoraga dogolir, “Ar Yesus inom, nen ar Paulus inon, ir eti an nilu ar o, ogwe kir yi tani?” 16Ap irimbo akla werek mende enogo nen, inoba werak yigi nanggige, elege enogo kode wulku dogolir, iniyom likbik ndedok, inumo ya mbalek nda mbalek erek kode mbugulir lagugwa. 17Ir akuni Yahudi mende inom, nen ir akuni wedek mende inom, o Efesus paga welagwi mende, wene eti inaruk kulku lagugwarik, inobade atuk, Tuhan Yesus endaga ambi inom ar wogok dirugwa o. 18Ir akuni ambigar, Ar Yesus ane ebebar yiluk waganggugwa mende, akuni obogar inuwagam watuk, inomaduk alep ar ekulagugwa mende, bugalogo mbo bugwi, eku lagugwa. 19Ir ap u erinabuok nen yiluk, buku kimagago bikigik erir taga mende diru mbalek, akuni inil paga telekma kali kunggwi, ekugwa. Buku-buku etoma onggo kunumo, lima puluh ribu uang perak negen ndak-ndak. 20Etegerogon etarir waga dogolir, Tuhan awene ernogo, alon obatni obatne etatuk, abok arar wiga larir wulkige o.

O Efesus etoma inane ambigar yirugwa wene

21Wene etoma obogar etarir wagagemo, Ar Roh Allah nen ar Paulus yorigemo wene mbalka dogolir, An o Makedonia lalok nen, Akhaya nggwe ligin o. Etoma nen lok-lok o Yerusalem unggigin o. Yega lagagerek, ar Paulus nen ambi inom yega dogolir, “Etoma lalok nen kalok, o Roma etoma mondok arar ligin o,” yiluk yoragage. 22Ar ebe, we il ambi ar o provinsi Asia eta dogolir, awurumi inebe mbere, Timotius o, Erastus o imbirak, o Makedonia inalep lakbarige.

23O eta amor-amor, ar Yesus ane enogo nggogar wigalarir wulka dogolir, o Efesus etoma wene aredo nadok kadok nggogar yirugwa o. 24O kota etila, ap ambi yigom perak mende agabak kigikwa endaga Demetrius welagage. Ar eti nen, odewa ao ndak-ndak Dewi Artemis ake palogo bega lagage. 25Ar Demetrius nen ar eyabu mende inom, ap yigom perak agabak kigikwa amberak inom, inayonggo biluk, ar nen yoraga dogolir, “Wadigi naworomi! Nir ya, yabu yi ekwi paga, ye mende nde mende nininggimo ambigar waganir tagwi o. 26Nen yogondak ap Paulus taldega eti nen, erir waga obogar kinaruk kolkwi, kinil kugwi ekop o. Ar nen yega dogolir, akuni ininggi paga agabak kigirik etoma ebe obatne dek mende o, yiluk yir waga paga, akuni yoma obogar, ar ane waganir tagwi o. Wene eta, o Efesus nir agorikmo yoma mban dek o. O daerah Asia yi paga, obogar ane wagangga o. 27Anggin negen arigin eti, nir nineyabu yi, endaga arar maduk erigin o. Nir akuni Asia mende obogar inom, akuni o kuri ya nda etoma inom, Dewi Artemis endaga nggok wogokdugwi mende, mondok tebelogo binanengga arar o,” yiluk yoragage.

28Eta yoragagemo ir yomanogo inanini ambik dagaga lagagerek, inane naik yugu dogolir, “O Efesus mende dewi#19:28: Dewi: Eti Dewa kwe mende (Kis. 12:22 etoma bikani). Artemis a, kar ar kendaga nggok dogowak o!” yiluk yirugwa. 29O Efesus etoma, ap angguk nggur agaga mondok, adik negen ekige, ap wene inoba birugwa mende wagu dogolir, Paulus ebe dekma, ogariyak inom dogir taga mende, ir inebe inao o Makedonia mende, Gayus o, Aristarkhus o, imbirak pagago wogorek, o akuni wonggalek inil dogirtagama, o nggok palekma arar ba lagugwa o. 30Paulus mugurek unggik nen yiluk ekanem, ir Yesus waganggugwa mende etoma nen, kar unggugup o, yiluk yorugwa. 31Ap nggok ndak provinsi Asia pago dogir taga mende, ar Paulus inom pano mende nen, Paulus ebe kimago dogowak nen yorno, yiluk wene warogo lagarkugwa. 32Ir akuni kuwak ekugwa yomanogo nen wene ambi yogik, ambi yogik, kulitaga ta telek mondok nadok-kadok yugu lagugwa. Ir nir yi mende erugun yiluk, mondok inonggodek ugun ar, amikmir ambudak dagagu lagugwa. 33Ap ambi endaga Aleksander eti, ar ebe ap Yahudi mende nen wene yuwak nen yiluk waganogo malakugwa. Ar wene yigiluk, kinane, yiluk inggi paga tebe kigik eki nanggige, akuni yomanogo nen, yi ap Yahudi mende nen wene yigiluk yi, yiluk inane ambik yugu dogolir, “Akuni o Efesus mende, Dewi Artemis mondok dogowak o!” yiluk yugwi dagik dua jam ar ekugwa. 34Yabungga ap kota Efesus mende sekretaris, ar nen akuni inane dek erogo birige. Ar nen yega dogolir, “Akuni o Efesus mende dewi eti ar Artemis yi ar o!” yiluk yirige.

35Nen o irep paga ar sekretaris kota nen akuni yemetnogo iniliti yanggolka dogolir, yegerogo yoragage, “O Efesus yoma mende Dewi Artemis awo palogo biluk werek inilu o. Ar ebe yigom pano mende, o mbogortaga nen wura wagage ninilu o. 36Akuni nen wene yi dek erogo bugun dek o. Etama, kir ye ekik nde ekik ibar-ibar erugup. Kinabodok dek arnio. 37Ap wogorek wagop mende ya, ir nen ar dewa ake begetek mende kirakwi dek, endaga tibik tebe ekikdek mende mban wogorek wagopma o. 38Demetrius inom, eyabu mende inom nen, ap ambi wene oba biluk kalok, pengadilan tu kurik werekma, etoma wolok lani o. Pemerintah inil agarik ar ma, ir inoba wolok lau ndak ar o. 39Nen, wene ambi eru kinakla ebekop mende werek kalok, wene nggok mbalirtagama eku dogolir nen yurak o. 40Yogondak ekop yi nir akuni yoma obogar maduk erninakop o. Kir o dade luwok nen yiluk ekop mende yoneramo, onggo yurak edo mondok dek o. Nir ya pano eko o yurak mondok ndak dek mende arar o.” 41Ar sekretaris kota Efesus nen, wene arar yoraga lagagerek, yogo kir kinuma arar lani o, yiluk yoragage.

Currently Selected:

RASUL-RASUL EKUGWA WENE 19: WLW

Highlight

Copy