OBAJA 1
1
Mawu sarung muhukung Edom
1 #
Yes. 34:5-17, 63:1-6; Yer. 49:7-22; Yeh. 25:12-14, 35:1-15; Am. 1:11-12; Mal. 1:2-5 Ko i'i niul᷊i i Obaja; i sie nuhabari tatanata ngu Mawu U Ko Karangetange hal᷊i u bangsa Edom:
Mawu seng nundoho ngu raroi-E su manga bangsa, dang i kite seng nakaringihi tatanata ko niul᷊i kere tuhue i'i, “Panadiako guna ngu muparang! Maite i kite matamai mangalo Edom.” 2Dang su Edom, Mawu muhengetang, “I kau Daku ikoa pakal᷊ome, hakiu ihinakaneng u kaul᷊i u bangsa. 3I kau ikaakal᷊eng u naung u ko maoboti. Pusati u soa ngu ko wul᷊uri u watu ko matoghasi; tampa katanakengu su pusu u wul᷊uri ko marange. Ual᷊ingu e'e i kumu musipiri, ‘I sai ko botonge mupakanawo u ia?’ 4Manengwe wal᷊engu ikoau kere karange u sal᷊ehi u burung kumba, l᷊au kere karange u manga wituing su l᷊angi, i kau nal᷊ahe sarung Daku ipakanawo.
5Mananako arako mul᷊ahampasi ko musumongo su tempo ngu huwi, kitang mangal᷊a ko ikaoe. Taumata ko manipo anggori su awuhi, sintinia mul᷊umbei wuange pira mbau. Arawe i kau sarung ipakasue u manga rokau. 6Ei hintou ngi Esau, i kau isahisiri dang rarotongu ko kawawuni l᷊ai ipal᷊aho. 7I kau iakal᷊eng u manga ringangu, dang itokol᷊i bou wanuau. I kau ipakawata u manga ghaweu, iakal᷊eng u taumata ko mukumang singkahindou. I sire mukakina hal᷊i u watangengu, ‘Ko su apa orasi i'i apang kapandenge?’
8Su l᷊ou Ia muhukung Edom, manga taumatange ko mapapilesa Daku ipakawinasa. Dang apang kapapilesa ngi sire sarung mailang, takoae l᷊inae. 9Manga ko wawahani bou Teman sarung su katatakutang, dang kaul᷊i u sordado ngu Edom sarung mate.”
Hal᷊i ko nakakoa Edom ihukung
10“I kau seng nutingkai su manga ana u simbau u#1:10: simbau u: Manga tau Israel e'e ko hintou ngi Yakub tuari ngi Esau. Esau e'e ko i upung u bangsa Edom. hintou ngi Yakub. Watu'u e'e i kau sarung ipakawinasa, dang iheghesang u taumata su kanandu u tempo. 11I kau murumarisi su raunge, su l᷊ou roka manope tukari u Yerusalem dang mamata soa e'e. I kau mangkate marumasi su tempo ngu i sire mumbawa kaul᷊i u kakakala u Yerusalem dang mupapahia su tal᷊oara i sire. I kau musul᷊ung kal᷊al᷊aie dingang u roka e'e. 12Ta hinonge i kau mal᷊uasi su sisipi ko dal᷊ai u tau Yehuda dang mul᷊umiaghi su l᷊ou ana u simbau u e'e mawinasa. Ta hinonge i kau muwuke ngu l᷊eo su tempo ngu i sie su l᷊al᷊ung u kasasusa. 13Ta hinonge i kau musumu soa ngu umati-Ku, dang mukumiha u l᷊iaghi su manga taumata ko su l᷊al᷊ung u singsara, apal᷊ai muhampasi rarotonge su l᷊ou ngu singsarae! 14Ta hinonge i kau murumarisi su pulengang u l᷊al᷊eng, tadeau mundola manga taumata ko katal᷊ange bou roka, arako manarakang i sire su roka su l᷊ou i sire nikahino ngu kasasusa.”
Mawu Ruata sarung mamonesi manga bangsa
15“Tingari, seng masandighi temponge. Ia, Mawu, mamonesi manga bangsa. Apa ko nikoa u Edom sarung iwal᷊isang si sie. I sie sarung makapundang l᷊ai apang ko nikoae. 16Su wawo u wul᷊uri-Ku ko susi#1:16: wul᷊uri-Ku ko susi: (Putuhung kamusi). umati-Ku seng nanginung inung ko mul᷊ahe u hukumange. Kateho inung u manga bangsa su dunia i'i lebe mapai l᷊ai. Hukumang e'e ta ikatihokang i sire. I sire mambeng manginung e'e sarang pakasue, mbuhue i sire sarung mailang takoae l᷊inae.”
Kal᷊auntung u Israel
17“Kateho su wul᷊uri u Sion, sarung pia ko masal᷊amati, dang wul᷊uri e'e sarung makoa tampa ko nitani guna ngu Ia. Kuteu hintou ngi Yakub sarung managhuang sau tana pusaka i sire. 18Umati-Ku Israel sarung kere putung ko manutung pakasue hintou ngi Esau, kere putung manutung pakasue rahami su anseri. Takoae sarang singkatau bou hintou ngi Esau sarung mal᷊iwiri, Ia, Mawu seng nuhengetang!
19Manga taumata ngu Yehuda bahageang u timuhi sarung matana su Edom. Manga taumata bou manga wul᷊uri su simbuka ngu wahe sarung mamata bahageang u Filistin. Suku ngu Benyamin sarung matana su Gilead, dang Israel umati-Ku sarung mangawasa kaul᷊i u Efraim l᷊au Samaria. 20Taumata ngu Israel bahageang u sawunahi sarung musul᷊e bou pundandumekang dang mangawasa Fenisia murating sarang Sarfat. Manga taumata ngu Yerusalem ko nirume su Sardis, sarung musul᷊e dang managhuang manga soa bahageang u timuhi Yehuda. 21I sire ko natana su Yerusalem ko matatoghasi sarung mangalo dang mangawasa Edom. Kuteu Ia, Mawu sarung mamarenta kere ratu.”
Currently Selected:
OBAJA 1: PLT
Highlight
Share
Copy
Want to have your highlights saved across all your devices? Sign up or sign in
