NAHUM 3

1Kasasilaka su soa i'i ko napene u l᷊eo l᷊au pamamate;

napene u sal᷊iumpuhi ko nihampasi arako nipal᷊aho.

2Pundaringihiko papahe u samboki dang tingihi u roda,

tatal᷊ang u kawal᷊o l᷊au ghio u kereta.

3Pasukang u sumasake kawal᷊o nangalo marehe,

pera ko pia sinange l᷊au l᷊al᷊eang ko kukerong.

Taumata ko nate ta ikarekeng,

bangke ngi sire pia owol᷊i,

makasangko manga taumata.

4Niniwe tahasundal᷊i e'e kahionggol᷊ang u hukumang.

Kasasidadae tinga-tingari makawirahi.

Maul᷊i bangsa ko seng niraghusange,

dang nil᷊okenge#3:4: nil᷊okeng arako: nikoa l᷊ange. dingang u akal᷊i.

5 Mawu Ko Makawasa nuhengetang,

“Ei Niniwe, i kau sarung Daku ipahangeng!

Wal᷊i u Daku iwingkahi su tingo ngu manga bangsa,

hakiu kakakoau ko tintal᷊ang nikawua ngi sire.

6I kau Daku koateng kere barang ko makararinting,

i kau Daku ipal᷊o dingang u l᷊amuhu;

I kau Daku ikoa puwawiang.

7Ko makawua si kau sarung mutingkaghea ngu watangenge dang mangul᷊i,

‘Niniwe seng kate ghaghoronge!

I sai masusa dingange?

Takoae ko mo mangonggo l᷊ahibori si sie.’ ”

8Ei Niniwe, tumaniuwe i kau lebe mapia bou Tebe, pusati u soa ngu Mesir? Tebe l᷊ai mapapilo su wiwihi u sal᷊uhi ko nanirung si sie kere meseli. Ore, Sal᷊uhi Nil e'e ko tatinda mudadiagae. 9Tebe namarenta su Sudan l᷊au Mesir, dang kawasange takoae sarae; Libia l᷊au Put e'e ko ghawe'e. 10Maneng kere'e, taumata ngu Tebe nitaweng dang niwawa sarang pundandumekang. Su kaul᷊i u pul᷊engang, manga anae ipahangeng sarang pakapate. Manga tumbonange ikitang u hante dang ipupapahia su tal᷊oara i sire mananawenge.

11Ei Niniwe, i kau l᷊ai sarung mapinsang ual᷊ingu bukang. I kau l᷊ai sarung mutawakal᷊i tadeau mal᷊iwiri bou apang rokau. 12Apang tatindau sarung kere kau ara ko napene u wuange ko masasasa. Boko kau e'e ighio, manga wuange sarung manawo sarang l᷊al᷊ung u mohong u taumata ko mo mukumang. 13Manga parajuritiu ko l᷊ome kere kowawine dang wanua ngu ta makakoa manga apa mutumatingo roka. Putung sarung manutung manga papal᷊e ngu tukari u soa ngu. 14Panimbae ake guna ngu sasadia su kanandu u i kau il᷊iwung, dang pakatoghasiko manga tatindau! L᷊al᷊indaiko l᷊ota guna ngu pukoateng manga tela, dang panadiako manga pastakae! 15Apang ko koateng u, sarung takoae gunange, watu'u i kau nal᷊ahe sarung masue matutung arako mate su l᷊al᷊ung u parang. I kau sarung mailang kere suke ngu anseri nikang u kumbati.

I kau seng nuhite kere kumbati! 16Manga mudadagangu nangilebe bou rekenang u manga wituing su l᷊angi! Arawe orasi i'i i sire seng nailang, kere kumbati ko namingkahi tatilae bou e'e nutumila nutingkailang. 17Manga tumbonang u l᷊au mapapangkati u kere ghapang u kumbati ko nusirung su manga meseli su tempo ngu matinoung. Arawe suapang matangutiti nusuminang, i sire turusi nutumila nutingkailang; takoae sarang singkatau ko matitong nakoa sarang apa i sire.

18Ei ratu wanua ngu Asyur! Manga gubernur i kumu seng nasue nate, dang manga bupati ngi kumu nikapatikilang sarang kal᷊iwuenge. Ana u kawanua ngu nukaesi su manga wul᷊uri, dang takoae sarang singkatau ko botonge makawawa si sire sau mapul᷊e. 19Pehou ta ikaundangeng, dang manga l᷊esi u ta maul᷊e. Kaul᷊i u taumata ko makaringihi habari u kaghaghorongu mutaloka u l᷊iaghi. Watu'u kaul᷊i u taumata seng nutatahang u singsara ual᷊ingu kal᷊al᷊ai u ko ta masasue e'e.

Currently Selected:

NAHUM 3: PLT

Highlight

Compare

Copy