MATIUS 8

I Yesus nupakaul᷊e ngu singkatau ko pia sakie pisi ko makatataku

(Mrk. 1:40-45; Luk. 5:12-16)

1I Yesus nurumusung bou wul᷊uri, dang taumata maul᷊i nutumuhu si Sie. 2Su tempo e'e nusumongo singkatau ko pia sakie pisi ko makatataku.#8:2: pia sakie pisi ko makatataku: tumuhu atorang u agama Yahudi, saki i'i makakoa masasaki e'e ta wotonge manumba Mawu Ruata su tampa pukakal᷊iomanengang. I sie nusuba su saruang I Yesus, dingang nangul᷊i, “Tuang, boko i Tuang mo, i Tuang pupakaul᷊e ko si sia.”

3I Yesus nuhinggo tau e'e dingang nangul᷊i, “Ia mo, kaul᷊ete!” Singkatempo e'e sakie dingang nailang. 4#Im. 14:1-32Bou e'e I Yesus nangul᷊i si sie, “Tinaungete! Kumbahang muwuke si sai-sai. Kateho dakote tamai sarang koa i imam, dang pundo si sie pangul᷊i i kau seng tinga-tingari naul᷊e. Bou e'e pangonggoko sasumbau kere niparenta ngi Musa makoa kere tatia su taumata i kau seng tinga-tingari naul᷊e.”

I Yesus nupakaul᷊e paparentang u singkatau parwira ngu Roma

(Luk. 7:1-10)

5Su tempo ngi Yesus nusumu su Kapernaum, pia singkatau parwira ngu Roma nusumongo nusombang i Sie, dingang nundo tul᷊ung si Sie. 6“Tuang,” angkung i parwira e'e, “Paparentangku masaki su wal᷊e. I sie l᷊oka-l᷊oka su l᷊al᷊okang ko kesohi ko masingsara kahingang.”

7I Yesus nangul᷊i, “Hindo Ia matamai mupakaul᷊e ngi sie.”

8“Tawahal᷊uasi Tuang,” nisimbahi u parwira e'e, “Ia ta hinonge manarima i Tuang su wal᷊eku. I Tuang piange puparenta. Paparentangku e'e seng maul᷊e. 9Watu'u ia mang mambeng tumuhu parenta ngu tumbonang. Dang su al᷊ungku l᷊ai pia manga parajuriti ko mambeng tumuhu parentaku. Boko ia muparenta singkatau parajuriti, ‘L᷊al᷊eng!’ i sie tamai rumal᷊eng. Ia mangul᷊i si sire ko wal᷊inge, ‘Mai si'i!’ i sire mamai; dang boko ia mamarenta paparentangku, ‘Koako i'i!’ e'e mang koatenge.”

10Suapang I Yesus nakaringihi apang ko niul᷊i u parwira e'e, i sie naherang. Bou e'e i Sie nangul᷊i su taumata ko katuhue si Sie. “Wal᷊inge gampang taumata i'i. Su tal᷊oara tau Israel Ia mborong ta nakahombang pangangimang ko kiri'i kal᷊aboe! 11#Luk. 13:29Tingari! Maul᷊i taumata sarung sumongo bou simbuka ngu raki dingang bou wahe tadeau mural᷊uasi dingang i Abraham, Ishak, dingang i Yakub su kararatuang u Mawu Ruata. 12#Mat. 22:13, 25:30; Luk. 13:28Arawe manga taumata ko hinonge makoa umati u Mawu Ruata, i sire sarung irume su l᷊ikuri sarang l᷊al᷊ung u kararundung. Pai se'e sarung mumpal᷊ehe mutatahang u singsara.” 13Bou e'e I Yesus nangul᷊i su parwira e'e, “Kapul᷊ete, apang ko niakingu e'e sarung mariadi.”

Dang singkatempo e'e l᷊ai paparentange e'e naul᷊e.

I Yesus nupakaul᷊e taumata maul᷊i

(Mrk. 1:29-34; Luk. 4:38-41)

14I Yesus nakoa sarang wal᷊e ngi Petrus. Su e'e i Sie nakawua si emponge Petrus kowawine l᷊oka-l᷊oka kal᷊ahange. 15I Yesus nuhinggo l᷊imange, l᷊ahange e'e dingang nailang. I sie nuwangung dingang nutal᷊ung si Yesus.

16Seng kawawul᷊aenge, taumata nahunsongo sarang koa I Yesus numbawa taumata maul᷊i ko nikasukang u roh ko dal᷊ai. Dingang u didato singkamohong, I Yesus nanguseri roh ko dal᷊ai e'e dingang nupakaul᷊e taumata ko masaki. 17#Yes. 53:4Kaul᷊ie nikoa I Yesus, dang dingang u e'e nariadi apang ko niul᷊i i Nabi Yesaya, “I Sie seng nananggong singsara ngi kite dang nupakaul᷊e ngu saki i kite.”

Manga taumata ko mo makoa tumatuhu I Yesus

(Luk. 9:57-62)

18Pia taumata napene nuhumung si Yesus. Su tempo ngi Yesus nakawua si sire, i Sie nundoi manga tumatuhu-E pul᷊iu rano. 19Bou e'e pia singkatau meteri agama nusumongo si Sie dingang nangul᷊i, “Tuang, ia mo tumuhu si Tuang maning sarang apa!”

20I Yesus nusumimbahi, “Sarigala pia l᷊iange, dang burung pia sal᷊ehi, arawe Ahusi Taumata takoae tampa katikilange.”

21Bou e'e l᷊ai singkatau tumatuhu-E ko wal᷊inge nangul᷊i, “Tuang, kere wotonge ia mapul᷊e horo mul᷊uwing i papaku.”

22Kateho I Yesus nusumimbahi, “Tuhute si Sia, walate kere tau ko nate nae pul᷊uwing taumata ko seng nate sisane.”

I Yesus nupakal᷊enehi u anging mauha

(Mrk. 4:35-41; Luk. 8:22-25)

23I Yesus nusumake su sakaeng dang manga tumatuhu-E nutumuhu si Sie. 24Singkawawua su rano e'e nitiukang u anging ko mauha-uha hakiu sakaeng i sire nibungkusi u l᷊ua. Su tempo e'e I Yesus katikie. 25Kuteu manga tumatuhu-E tamai nusumandighi namuko si Sie. Angkung i sire, “Tuang! L᷊ul᷊ung ko! I kite seng masilaka!”

26I Yesus nangul᷊i, “Apa makataku si kumu? Kadio-dio we pangangimang i kumu si Sia!” Bou e'e I Yesus nurumarisi nuheang anging dingang u l᷊ua su rano e'e. Bou e'e rano mangkate ko mal᷊ene-l᷊enehi.

27Manga tumatuhu-E kaul᷊ie naherang. I sire nangul᷊i, “Taumata ko kirapa i'i, sarang anging dang l᷊ua nutumuhu parenta-E!”

I Yesus nupakaul᷊e dua ngkatau ko nikasukang roh ko dal᷊ai

(Mrk. 5:1-20; Luk. 8:26-39)

28I Yesus nahumpa su simbuka ngu rano su tana Gadara. Pai se'e pia dua ngkatau nikasukang u roh ko dal᷊ai, nusumongo si Sie. I sire rua kaul᷊ie wahani, hakiu takoae taumata ko wahani sumahe su se'e. 29I sire rua nusumuwang bou l᷊ohang u kubul᷊i dang nukumiha. “Ahusi u Mawu Ruata, sarung pakuraneng-U i kami? Apa i kau seng mo mamahang si kami maning mborong wal᷊inge temponge?”

30Ta marau bou e'e, pia wawi maul᷊i kapundeae kang i sire. 31Roh ko dal᷊ai e'e nundo si Yesus, “Boko i Kau muparenta si kami pasuwang, parentaite i kami pasu su manga wawi tamai e'e.”

32“Dakoe!” angkung i Yesus. Roh ko dal᷊ai e'e nusumuwang bou tau darua e'e, bou e'e nusumu su manga wawi. Dang manga wawi e'e nasue nutumal᷊ang nutumumpa su towae sarang l᷊al᷊ung u rano, bou e'e nal᷊umisi.

33Apang mundadiaga wawi e'e nasue timal᷊ang sarang soa, bou e'e nuwuke apang ko nariadi, dang l᷊ai hal᷊i i sire rua ko nikasukang u roh ko dal᷊ai. 34Taumata kaul᷊ie su soa e'e natamai mundea si Yesus. Suapang nakawua si Yesus, i sire nundo singapang botonge tadeau i Sie panintang u tampa i sire.

Currently Selected:

MATIUS 8: PLT

Highlight

Copy