MATIUS 27

I Yesus niwawa sarang koa i Pilatus

(Mrk. 15:1; Luk. 23:1-2; Yoh. 18:28-32)

1Mal᷊uka-l᷊ukari, kaul᷊i u manga tumbonang u imam l᷊au pangaha u tau Yahudi namutusi mamate si Yesus. 2I sire nuhapusi si Sie, l᷊au numbawa si Sie, bou e'e nanarakang I Sie si Pilatus, gubernur ngu Roma.

Papate ngi Yudas

(Wuk. 1:18-19)

3 # Wuk. 1:18-19 Su tempo ngi Yudas musasingking e'e nakawua si Yesus seng niponisi pateng, i sie nusisili. Bou e'e i sie nanul᷊e doi sal᷊aka tilumpul᷊o e'e su manga tumbonang u imam l᷊au manga pangaha u tau Yahudi. 4I sie nangul᷊i, “Ia seng nubardosa nusingking taumata ko takoae sal᷊ae, sarang i Sie ihukung pateng!”

Arawe i sire nusumimbahi, “Apawe ipudidato ngi kami? E'e ko urusangu!”

5I Yudas namal᷊o doi e'e sarang l᷊al᷊ung u Wal᷊e ngu Mawu, mbuhue tamai nunggantong badange.

6Manga tumbonang u imam nangemong doi e'e dang nangul᷊i, “Doi i'i hariga ngu daha. Tumuhu atorang u agama, doi i'i ta botonge ipunderma sarang l᷊al᷊ung u Wal᷊e ngu Mawu.” 7Bou e'e suapang i sire nusingkanaung, doi e'e nipuluang i sire tana ko nisigho Tana Mukakoa Kuring. Tana e'e nipake guna ngu pul᷊al᷊uwingang u tau raghi. 8E'e sabapie sarang l᷊ou i'i tana e'e nisigho “Tana Daha.”

9 # Za. 11:12-13 Dingang u e'e naganapi apang ko niul᷊i i Nabi Yeremia, “I sire nanarima doi sal᷊aka tilumpul᷊o, hariga ko nikire ngu tau Israel kere wawaehi si Sie. 10Dang doi e'e nipuluang i sire Tana Mukakoa Kuring, kere niparentang u Mawu si sia.”

I Pilatus namariksa parkara ngi Yesus

(Mrk. 15:2-5; Luk. 23:3-5; Yoh. 18:33-38)

11Su tempo ngi Yesus nupasaruang i Pilatus, gubernur su soa e'e, i Pilatus nukina, “Apa I Kau ratu ngu tau Yahudi?”

“Kere wisara ngu,” nisimbahi Yesus. 12Kateho su tempo ngu manga tumbonang u imam l᷊au manga pangaha u tau Yahudi mul᷊ahabari u maul᷊i l᷊aantang si Yesus, I Sie mang ta nusumimbahi sarang singkamohong.

13Ual᷊ingu e'e i Pilatus nangul᷊i si Sie, “Apa I Kau ta nakaringihi, kaul᷊i u ko nipakabuha i sire si Kau e'e?”

14Kuteu I Yesus mang ta nusumimbahi sarang singkamohong, hakiu gubernur e'e ta nasue herange.

I Yesus niponisi hukumang papate

(Mrk. 15:6-15; Luk. 23:13-25; Yoh. 18:39–19:16)

15Suapang tempo sal᷊iwang u Paska, i gubernur sintinia mul᷊iu ngu singkatau taumata ngu hukumang tumuhu ko nipile ngu taumata maul᷊i. 16Su tempo e'e pia singkatau taumata ko nateleng nihukung. Arenge i Yesus Barabas. 17Inau, su tempo ngu taumata maul᷊i seng nakomol᷊i, i Pilatus nukina si sire, “I sai kao i kumu daku il᷊iu guna ngi kumu? I Yesus Barabas arako I Yesus ko nisigho si Kristus?” 18I Pilatus nangul᷊i kere'e watu'u i sie matitong, apang mangangawasa ngu Yahudi nanarakang I Yesus si sie ual᷊ingu saki u naung.

19Su tempo ngi Pilatus kakaiang su tampa pusidangeng, kawinge nundoho ngu tatanata i'i si sie, “Kumbahang i kau mul᷊al᷊au dingang u parkara ngu taumata ko takoae sal᷊ae i'i, watu'u ual᷊ing I Sie, kalonge ia nipi ko dal᷊ai-l᷊ai.” 20Kateho manga tumbonang u imam dang manga pangaha u tau Yahudi kasaunge naniti taumata maul᷊i e'e tadeau pundo si Pilatus i Barabas pakiliu dang I Yesus pakihukung u papate. 21Bou e'e i gubernur sau nukina si sire, “Bo i sire rua e'e, i sai kao i kumu daku il᷊iu guna ngi kumu?”

“I Barabas,” nisimbahi sire.

22“Boko kere'e apa mambeng daku koateng si Yesus ko isusigho si Kristus?” kakina i Pilatus si sire.

“Ghantongte I Sie!” sasimbahi sire kaul᷊ie.

23“Kateho apa hal᷊i ko dal᷊ai ko seng nikoa-E?” kakina i Pilatus.

Sau i sire nukumiha mauha, “Ghantongte i Sie!”

24 # Sau. 21:6-9 Panginsuenge i Pilatus nakapundang i sie seng ta makakoa manga apa l᷊ai, dang singkawawua taumata maul᷊i e'e nanulu. Inau i sie nangal᷊a ake su tingo ngu taumata maul᷊i e'e i sie nanguhasi l᷊imange dang nangul᷊i, “Kapapate ngu taumata i'i wal᷊ingewe makoa tanggongangku! E'e hal᷊i i kumu!”

25Kaul᷊i u taumata e'e nusumimbahi, “Ore, walate i kami l᷊au manga ana i kami mananggong hukumang watu'u papate-Nge!”

26Bou e'e i Pilatus nupasuwang i Barabas guna ngi sire, dang nuparenta pul᷊uwaghi si Yesus; dang nanarakang I Sie pakighantong.

I Yesus nipunang u manga sordado

(Mrk. 15:16-20; Yoh. 19:2-3)

27Bou e'e manga sordado ngi Pilatus numbawa si Yesus sarang l᷊al᷊ung u istana ngi gubernur, dang kaul᷊i u pasukang nukomol᷊i nutatal᷊iwung si Yesus. 28I sire nul᷊ua l᷊aku I Yesus, mbuhue I Sie nil᷊ohokang u kakingkaeng ko bung kulurie. 29I sire nukoa makota bou wul᷊anta, dang nipake su timbo I Yesus. Bou e'e i sire nanile tiking simbau su l᷊ima-Nge ko kuaneng, mbuhue nusuba su saruang-E dang nuheghesi si Sie. “Sal᷊amati Ratu ngu Tau Yahudi!” angkung i sire. 30I sire nanguru si Sie, dang nangal᷊a tiking e'e, namukul᷊i si Sie su timbo-E. 31Nasue bou nutingkai si Sie, i sire nul᷊ua kakingkaeng ko bung kulurie e'e, bou e'e sau nil᷊ohokang u pakeang-E sisane. Bou e'e I Sie niwawa sarang l᷊ikuri tadeau ighantong.

I Yesus nighantong

(Mrk. 15:21-32; Luk. 23:26-43; Yoh. 19:17-27)

32Su l᷊al᷊eng, i sire nusombang u singkatau bou Kirene arenge i Simon. I sire nanihasa si sie pamasang kau salipi Yesus. 33Bou e'e i sire nurating u tampa simbau arenge Golgota, ko mangal᷊enge “Tampa u Duhi ngu Timbo.” 34#Mzm. 69:22Su se'e i sire nupanginung I Yesus dingang u anggori mapai. Kateho I Yesus bou nanemang anggori e'e, I Sie seng nandi nanginung.

35 # Mzm. 22:19 Bou e'e i sire nunggantong I Sie, dang nupapahia u pakeang-E dingang niundi. 36Bou e'e i sire nukumangiang nundiaga si Sie su se'e. 37Su kau salipi su wawo u timbo-E, niwohekang i sire hal᷊i u l᷊aantang si Sie, wisarange: “I'i I Yesus, Ratu ngu Tau Yahudi.” 38Nuhindo I Sie i sire l᷊ai nunggantong tau ko tahahampasi dua ngkatau, singkatau su kuaneng, singkatau l᷊ai su kuihi-E.

39 # Mzm. 22:8, 109:25 Manga taumata ko sumahe su se'e kaul᷊ie kakilinge,#27:39: kakilinge: kakakoa u tau Yahudi boko muhinakang taumata. dang kapuhinakange si Yesus. 40#Mat. 26:61; Yoh. 2:19I sire nangul᷊i, “I Kau ko mo mul᷊engge Wal᷊e ngu Mawu Ruata, dang mupararisi su l᷊al᷊ung u tilu l᷊ou! Boko I Kau ko Ahusi Mawu Ruata, lintue nae bou kau salipi e'e, dang pangambangte badang-U!”

41Kere'e l᷊ai manga tumbonang u imam, l᷊au manga meteri u agama, dingang u pangaha u tau Yahudi kapuheghesi si Yesus. Angkung i sire, 42“I Sie nangambang taumata ko wal᷊inge, arawe badang-E sisane I Sie ta nakaambang! Boko I Sie Ratu ngu Tau Israel, mapiang i'i I Sie l᷊intu bou kau salipi, i kami mbuhue mo mangimang si Sie. 43#Mzm. 22:9I Sie mangimang su Mawu Ruata, dang muhabari uare I Sie ko Ahusi Mawu Ruata. Ho, maite tuhungang i kite minsang Mawu Ruata mo mangambang si Sie orasi i'i.”

44Tahahampasi darua ko nighantong dingang-E mang l᷊ai nuhinakang si Sie kere'e.

Papateng I Yesus

(Mrk. 15:33-41; Luk. 23:44-49; Yoh. 19:28-30)

45Su kal᷊ihae, tilu ngkaorasi l᷊iwuenge, kaul᷊i u soa e'e narundung. 46#Mzm. 22:2Pukul᷊i tatilu wawul᷊aeng, I Yesus nukumiha dingang u tingihi-E ko mauha, “Eli, Eli lama sabakhtani?” mangal᷊enge, “O Mawu Ruata-Ku, o Mawu Ruata-Ku, nakurawe I Kau nanintang u Ia?”

47Pira ngkatau taumata su se'e nakaringihi tingihi-E e'e, nangul᷊i, “I Sie kakuinge si Elia!” 48#Mzm. 69:22Singkatau bo i sire dingang nangal᷊a bungang u huso, nil᷊awu su anggori ko mahingisi. Bou e'e nisusu su pondol᷊i kau simpoto, dingang nitogori sarang wiwihi Yesus.

49Arawe taumata singga nangul᷊i, “Hindoko, maite tuhungang i kite, minsang i Elia sumongo mangambang si Sie!”

50Bou e'e I Yesus sau nukumiha dingang u tingihi ko mauha, mbuhue namal᷊usi sinango panginsuenge.

51 # Sasu. 26:31-33 Pampele kawawiting su l᷊al᷊ung u Wal᷊e ngu Mawu Ruata naghehe napahia darua bou rasie sarang wawae. Dunia nurinuhi dang manga wul᷊uri u watu nawuka. 52Manga kubul᷊i nawuka, dang maul᷊i umati Mawu Ruata ko seng nate sau nipuwangung. 53I sire nusumuwang bou manga kubul᷊i samuri ngi Yesus nuwangung bou papate, dang i sire nusumu su Yerusalem. Dang pai se'e napene taumata kaputuhunge si sire.

54Timbo u pasukang dingang manga sordado ko kapudiagae si Yesus kaul᷊ie su katatakutang su tempo nakapundang rinuhi dang nakawua apang ko nariadi e'e. I sire nangul᷊i, “Tingari, I Sie i'i Ahusi u Mawu Ruata!”

55 # Luk. 8:2-3 Su se'e l᷊ai pia kowawine maul᷊i katuhunge bou raunge. I sire e'e ko seng nutumuhu nutul᷊ung I Sie mborong bou Galilea. 56Su tal᷊oara i sire pia i Maria Magdalena, i Maria mama ngi Yakobus sire rua ngi Yusuf, l᷊au i mama ngu manga ana i Zebedeus.

Pul᷊al᷊uwing I Yesus

(Mrk. 15:42-47; Luk. 23:50-56; Yoh. 19:38-42)

57Su huwi e'e nusumongo singkatau ko kala bou Arimatea, arenge i Yusuf. I sie l᷊ai tumatuhu I Yesus. 58I sie nakoa sarang koa i Pilatus nundo badang I Yesus. I Pilatus nuparenta tadeau badang I Yesus pakisarakang si sie. 59Kuteu i Yusuf nangal᷊a badang e'e, nipikunge dingang u heka ko mawira ko wuhu. 60Bou e'e i sie namilo badang I Yesus su l᷊al᷊ung u kubul᷊i sisane ko nikoa su l᷊iang u wul᷊uri u watu simbau. Bou e'e i sie nul᷊unggi ngu watu ko l᷊abo simbau nipuhumping kubul᷊i e'e, bou e'e napul᷊e. 61I Maria Magdalena dingang i Maria ko wal᷊inge natana nukumangiang su se'e nupasaruang kubul᷊i e'e.

Mundadiaga su kubul᷊i

62Ndai mal᷊ou, su l᷊ou ngu Sabati, manga tumbonang u imam l᷊ai manga tau Farisi natamai singkatamai nusombang i Pilatus, 63#Mat. 16:21, 17:23, 20:19; Mrk. 8:31, 9:31, 10:33-34; Luk. 9:22, 18:31-33dang nangul᷊i, “Tuang, i kami nakatinaung su tempo ngu taumata ko tahal᷊eo e'e mborong wiahi, I Sie mbuae nangul᷊i, ‘Mal᷊iu tilu l᷊ou Ia sarung sau muwangung’ 64Ual᷊ingu e'e, parentaiko taumata pudiaga kubul᷊i pakapia-pia sarang murating u l᷊ou katilunge, tadeau manga tumatuhu-E ta makapanako badang-E bou e'e mbuhue mul᷊ahabari su manga taumata i Sie seng nuwangung bou papate. Dang l᷊eo samuri i'i seng nangilebe kal᷊al᷊aie bou horo.”

65“Si kumu pia sordado mundadiaga,” angkung i Pilatus, “tamaite diagate kubul᷊i e'e pakatoghasi.”

66Bou e'e i sire natamai sarang kubul᷊i, nitungkal᷊eng i sire watu l᷊ahumpinge dang nipilonang u mudadiaga su tingonge, tadeau takoae ko makapunakali kubul᷊i e'e.

Currently Selected:

MATIUS 27: PLT

Highlight

Copy