MATIUS 10

Mapul᷊odua Rasuli

(Mrk. 3:13-19; Luk. 6:12-16)

1Pia su silou I Yesus nukumui tumatuhu-E sire mapul᷊odua pukomol᷊i. Mbuhue i sire nionggol᷊ang-E kawasa panguseri roh ko dal᷊ai dang mupakaul᷊e ngu kaul᷊i u haghi ngu saki dingang u apang kurang u badang. 2Areng u manga rasuli mapul᷊odua e'e: kahimotongange, i Simon (ko nisigho l᷊ai si Petrus) dingang u ana u singkataunge i Andreas, bou e'e i Yakobus dingang u ana u singkataunge i Yohanes, manga ana i Zebedeus. 3Tuhue i Filipus, Bartolomeus dingang i Tomas, i Matius mananuntu balasteng, dang l᷊ai i Yakobus ana i Alfeus dingang i Tadeus; 4bou e'e panginsuenge i Simon tau Selot dang i Yudas Iskariot ko nusingking si Yesus.

I Yesus nangoro si sire mapul᷊odua

(Mrk. 6:7-13; Luk. 9:1-6)

5I sire mapul᷊odua rasuli e'e niparentang I Yesus dang nitanata ngu i'i. “Kumbahang makoa sarang wanua ngu taumata ko wal᷊inge tau Yahudi. Kumbahang l᷊ai makoa sarang soa ngu tau Samaria. 6Kateho dakoe tamai sarang koa u taumata ngu Israel, kahimotongange si sire ko napal᷊iri. 7#Luk. 10:4-12Pangul᷊i si sire, seng maehong tempo ngu Mawu Ruata mamarenta kere Ratu. 8Pakaul᷊e ko manga taumata ko masaki; sauko puwiahi apang ko seng nate; pakaul᷊e ko apang ko pia sakie pisi ko makatataku, dingang useri ko apang roh ko dal᷊ai. I kumu seng nanarima kaul᷊i e'e dingang takoae l᷊uange, inau onggoe l᷊ai kere'e. 9Kumbahang mumbawa doi wul᷊aeng, doi sal᷊aka arako doi witu. 10#1Kor. 9:14; 1Tim. 5:18Kumbahang l᷊ai mumbawa sinasa arako l᷊aahusi dua mpari, arako sapatu, arako tiking su l᷊al᷊al᷊engangu. Watu'u taumata ko muhal᷊i, seng hinonge i puwiahi.

11Boko i kumu mahumpa su soa arako kampong, pundeako singkatau ko mal᷊uasi manarima si kumu. Katanae se'e ringange sarang i kumu sau rumal᷊eng. 12Su tempo ngi kumu musumu su wal᷊e pangul᷊i ko, ‘Mal᷊umbako Mawu mangal᷊amati si kumu.’ 13Boko i sire su wal᷊e e'e manarima si kumu, walate al᷊amati e'e tatapi si sire. Boko i sire ta manarima si kumu, sul᷊ete sau al᷊amatiu e'e 14#Wuk. 13:51Arawe boko pia wal᷊e arako soa ta manarima si kumu, arako mandi mundaringihi si kumu, tintangte tampa e'e, bou e'e tontongko awu bou l᷊aeri u. 15#Kar. 19:24-28; Mat. 1:24Tinaungete! Su L᷊ou Kiamati, tataho u Sodom dang Gomora mborong nangilebe mal᷊owo ampungang u Mawu Ruata, bou manga taumata su soa e'e.”

Papahang ko sarung ruminta

(Mrk. 13:9-13; Luk. 21:12-17)

16 # Luk. 10:3 “Putuhungko i'i: Ia mundoi si kumu kere domba ko l᷊ome su tal᷊oara ngu sarigala ko wahani. I kumu mambeng pakatiho kere katoang dang pakatulasi kere paluma. 17#Mrk. 13:9-11; Luk. 12:11-12, 21:12-15Pakadiaga, watu'u i kumu sarung samekang wawaneng putingo ngu pangadilang. I kumu sarung ipahangeng su wal᷊e pukakal᷊iomanengang. 18I kumu sarung wawaneng sarang tingo ngu mangangawasa dingang u manga ratu ual᷊ing i kumu tumatuhu si Sia. Dang e'e tempo ngi kumu musaksi ngu Ia si sire dingang su manga taumata ko wugha ngu Mawu Ruata. 19Arawe boko i kumu wawaneng tadeau ihukung, kumbahang mataku apang ko hinonge ipuwisara ngi kumu arako apa ko hinonge ipudidato ngi kumu. Watu'u apang ko hinonge ipuwisara ngi kumu e'e, sarung ipakatitong si kumu su temponge. 20Watu'u ko mudidato su tempo e'e wal᷊inge we i kumu, kateho Roh I Yamang su sorga bou mohong i kumu.

21 # Mrk. 13:12; Luk. 21:16 Sarung mariadi taumata manarakang ghe'e sisane pakipate. Dang e'e ko sarung mariadi su tal᷊oara iyamang dingang anae. Manga rario sarung mundoka si mama papange dang manarakang i sire pakipate. 22#Mat. 24:9, 13; Mrk. 13:13; Luk. 21:17I kumu sarung ipubunsi u taumata, watu'u i kumu tumatuhu si Sia. Arawe taumata ko mutatahang sarang panginsuenge sarung i pakasal᷊amati. 23Boko i kumu pahangeng su soa simbau, tal᷊angte sarang soa tuhue. Ia mangul᷊i si kumu: Su horo u kaul᷊i u soa ngu Israel masue l᷊uhunge si kumu, Ahusi Taumata seng tuwei sumongo.

24 # Luk. 6:40; Yoh. 13:16, 15:20 Tumatuhue ta mangilebe l᷊aboe bou meteri, dang l᷊ang ta mangilebe l᷊abo bou mawunge. 25#Mat. 9:34, 12:24; Mrk. 3:22; Luk. 11:15Seng masidada boko singkatau tumatuhu makoa musul᷊ung u meteri, dang singkatau l᷊ang makoa musul᷊ung u mawunge. Boko timbou tataho u wal᷊e seng isigho Beelzebul, apa l᷊ai tataho u wal᷊enge. I sire sarung nggilenang l᷊ai areng ko lebe l᷊al᷊ai.”

Katakuko su Mawu Ruata

(Luk. 12:2-7)

26 # Mrk. 4:22; Luk. 8:17 “Tawahal᷊uasi mataku u taumata. Takoae ko mawawuni, ko ta sarung ikawua dang takoae ko i pakarumasi ko ta sarung iwombeng. 27Apang ko Daku puwisara si kumu su rundunge, mambeng sau puwisara ngi kumu su suange. Dang apang ko niwurung su tul᷊iu, wohang ko e'e pakal᷊iku! 28Ariwe kataku si sire ko tahapate badang u taumata, kateho ko takoae kawasa mamate jiwa. Katakute su Mawu Ruata ko kawasa mupakawinasa ngu badang dang l᷊ai jiwa su l᷊al᷊ung u naraka. 29Sal᷊umpito darua kal᷊uangeng u doi simbau ko kadiokange. Maning kere'e takoae sarang simbau manawo su tana boko wal᷊inge su kao I Yamangu. 30Kaul᷊i u uta su timbou seng mararekeng. 31Watu'u e'e ari kataku! I kumu nangilebe mahariga bou sal᷊umpito!”

Mangaku ngi Yesus su tingo ngu hape

(Luk. 12:8-9)

32“I sai-sai mangaku su tingo ngu hape ko i sie tumatuhu si Sia, Ia sarung mangaku ngi sie l᷊ai su saruang I Yamang-Ku su sorga. 33#2Tim. 2:12Arawe i sai-sai musunial᷊i u Ia su tingo ngu hape ko i sie tumatuhu si Sia, Ia l᷊ai sarung musunial᷊i sie su sarung I Yamang-Ku su sorga.”

Wal᷊ingewe purarame, kateho purarendehi

(Luk. 12:51-53, 14:26-27)

34“Kumbahang manika Ia mumbawa purarame su dunia i'i. Ia ta mumbawa purarame, kateho puraroka. 35#Mi. 7:6Ia musumongo sarung mukoa ana ko ese mundoka si papange, ana kowawine mundoka si mamange, manuhang kowawine mundoka si emponge kowawine. 36Kuteu sarung makoa roka kal᷊abokange, seng tataho u wal᷊e ngu watangeng.

37Taumata ko mukumindaghi si papange arako si mamange nangilebe bou Ia ta hinonge makoa tumatuhu-Ku. Kere'e l᷊ai taumata ko makindaghi anae ko ese arako anae kowawine ko mborong nangilebe bou Ia. 38#Mat. 16:24; Mrk. 8:34; Luk. 9:23Dang taumata ko mandi mamikul᷊i salipie l᷊au tumuhu si Sia, ta hinonge makoa tumatuhu-Ku. 39#Mat. 16:25; Mrk. 8:35; Luk. 9:24, 17:33; Yoh. 12:25Taumata ko mutatahang u puwawiahie, sarung kailangeng puwawiahie, arawe taumata ko kailangeng puwawiahie watu'u satia tumuhu si Sia, sarung makahombang puwawiahie.”

Wawal᷊isi kakanoa ko mapia

(Mrk. 9:41)

40 # Mrk. 9:37; Luk. 9:48, 10:16; Yoh. 13:20 “Taumata ko manarima si kumu, manarima si Sia. Dang taumata ko manarima si Sia, manarima si Sie ko nundoi si Sia. 41Taumata ko manarima singkatau nabi, ual᷊ing i sie nabi, sarung makatarima wawal᷊isi u singkatau nabi. Dang i sai ko manarima singkatau taumata ko mapia, sarung makatarima wawal᷊isi u taumata ko mapia. 42I sai ko munggile inung, maning kitang ake matinoung su singkatau ko kahinange, ual᷊ing i sie tumatuhu si Sia, pangimangte i sie seng nal᷊ahe sarung makatarima wawal᷊isi.”

Currently Selected:

MATIUS 10: PLT

Highlight

Copy