YOHANES 11

Kapapate ngi Lazarus

1 # Luk. 10:38-39 Pia singkatau arenge i Lazarus natana su Betania dingang u manga wawinenge i Maria l᷊au i Marta. 2#Yoh. 12:3I Maria e'e tau kowawine ko l᷊inau mbuae naniwohi l᷊anisi su l᷊aeri u Mawu, dang nangumu dingang u utae. Pia singkatempo i Lazarus nasaki. 3Manga wawinenge nuhabari si Yesus, “Mawu mahuane ngi kami ko ikukindaghi u Mawu e'e masaki.”

4Suapang I Yesus nakaringihi habari e'e, i sie nangul᷊i, “Saki i'i ta makapate. I'i nariadi tadeau Mawu Ruata ipakawantughi, dang tadeau ual᷊ingu e'e Ahusi Mawu Ruata ipakawantughi.”

5I Yesus nukumindaghi i Marta, i Maria l᷊au i Lazarus. 6Kateho suapang I Yesus nakarea habari i Lazarus masaki, I Sie nutaturi natana l᷊ai dua l᷊ou su tampa katanakeng-E. 7Bou e'e I Sie wuhue nangul᷊i su manga Tumatuhu-E, “Maite i kite tamai musul᷊e sarang Yudea.”

8I sire nusumimbahi, “Tuang Guru mang wuhu-wuhu i sire tau Yahudi mo mamal᷊o watu si Tuang dang i'i Tuang mo sau musul᷊e tamai?”

9Angkung I Yesus, “Wal᷊ingewe l᷊iwue ngu l᷊ou sil᷊ou mapul᷊odua su kaorasi? Taumata ko l᷊umal᷊eng l᷊ou, ta masangkong, watu'u i sie makawua kasasua ngu dunia i'i. 10Arawe taumata ko l᷊umal᷊eng huwi i sie masangkong, watu'u takoae kasasua si sie.” 11Kere'e angkung I Yesus. Bou e'e I Sie nangul᷊i l᷊ai, “Ghawe ngi kite i Lazarus katikie, kateho Ia mang matamai mamuko si sie.”

12Manga Tumatuhu I Yesus nangul᷊i, “Mawu boko i Lazarus katikie, i sie sarung maul᷊e.”

13Pandung I Yesus i Lazarus seng nate. Kateho su tika i sire pandung I Yesus i Lazarus mangkate kitang katikie kere'e. 14Ual᷊ingu e'e I Yesus nangul᷊i tingari si sire, “I Lazarus ko seng nate. 15Arawe Ia l᷊ai mang mal᷊uasi Ia tarie'e pai se'e watu'u seng kapiange si kumu, tadeau i kumu mangimang. Maite i kite tamai sarang koa i Lazarus.”

16I Tomas ko nisigho “Si Ana hindua” nangul᷊i su manga ghawe'e tumatuhu I Yesus, “Maite i kite tamai tumuhu, walate maneng i kite mate dingang I Sie!”

Ko sau mupuwiahi dang ko munggile u puwawiahi

17Suapang I Yesus nurating u tampa e'e, i Lazarus seng pa u l᷊ou l᷊iwuenge su l᷊al᷊ung u kubul᷊i. 18Betania masandighi u Yerusalem, patehang manga tilu ngkilo raunge. 19Seng maul᷊i tau Yahudi nusumongo mutiwo si Marta l᷊au i Maria tadeau makahibori si sire rua ual᷊ingu nikapateng u mahuane ngi sire rua.

20Suapang i Marta nakaringihi I Yesus nasongo, i sie dingang turusi nusumuwang nanginsomahi si Yesus, arawe i Maria mang su wal᷊e. 21Angkung i Marta si Yesus, “Mawu, kiko Mawu ene su si'i tempo e'e, tantu mahuaneku ta nate. 22Kateho maneng kere'e ia matitong su orasi i'i l᷊ai Mawu Ruata mang sarung munggile l᷊ai apang ko ipundokang Mawu si sie.”

23“Mahuaneu sarung sau muwiahi,” Angkung I Yesus si Marta.

24I Marta nusumimbahi, “Ia matitong i Lazarus hindo sau muwiahi su tempo ngu taumata ko nate ipuwangung su L᷊ou Kiamati.”

25I Yesus nangul᷊i si Marta, “Ko Ia mupuwangung dingang mupuwiahi u taumata ko nate. Taumata ko mangimang si Sia sarung muwiahi, maning i sie seng nate. 26Dang taumata ko wiahi ko mangimang si Sia i sie ta sarung mate sarang kal᷊iwuenge. I kau mangimang su hal᷊i e'e?”

27“Mawu,” sasimbahi Marta, “ia mangimang Mawu Ahusi Mawu Ruata, Ratu Mananal᷊amati ko sarung sumongo su dunia i'i.”

I Yesus nusumangi

28Suapang i Marta nangul᷊i kere'e, i sie natamai nukui si Maria, ana u singkataunge dingang namurung si sie, “Tuang Guru ene su si'i, i Sie nukina si kau.” 29Nakaringihi e'e, i Maria masahawu-sahawu nuwangung, bou e'e natamai nusombang I Yesus. 30Su tempo e'e I Yesus mborong ta nusumu su kampong. I Sie mborong su tampa i Marta nusombang I Sie. 31Apang tau Yahudi ko kapuhibori si Maria su wal᷊e, nakawua si Maria nuwangung, dang masahawu-sahawu nusumuwang; inau i sire natamai nutumuhu si sie, watu'u su naung i sire i sie tamai mukahuang su kubul᷊i.

32Su tempo ngi Maria nurating u tampa I Yesus dang nakawua si Sie, i Maria turusi nusuba su saruang-E dang nangul᷊i, “Mawu, kiko su tempo e'e Mawu ene su si'i, nal᷊ahe mahuaneku ta nate.”

33Suapang I Yesus nakawua si Maria kasangie, dang apang tau Yahudi ko namai dingang i Maria e'e l᷊ai kasangie, naung I Yesus nasusa, dang tuhungang I Sie kere'e kasusange. 34Inau I Sie nukina si sire, “Su apa tampa i sie nul᷊uwing i kumu?”

“Maite putuhung, Mawu,” sasimbahi sire.

35Bou e'e I Yesus nusumangi. 36Kuteu apang tau Yahudi e'e nangul᷊i, “Putuhungte, wal᷊inge gampang kakindaghi-E si Lazarus!”

37Kateho pia ko bou tal᷊oara i sire nangul᷊i, “I Sie mukoa taumata ko wuta makawua, nakurawe I Sie ta nakapaeri si Lazarus tadeau i sie tawe mate?”

I Lazarus sau nipuwiahi

38I Yesus kere'e kasusange, bou e'e nakoa sarang kubul᷊i. Kubul᷊i e'e ko simbau l᷊iang ko nihumpingang u watu ko l᷊abo.

39I Yesus nangul᷊i, “Enso ko watu e'e,” i Marta wawine ngu taumata ko nate e'e, nusumimbahi, “Kateho Mawu, i sie seng pa u l᷊ou su kubul᷊i. Nal᷊ahe seng nundaruru.”

40I Yesus nangul᷊i si Marta, “Wal᷊ingewe Ia seng mbuae nangul᷊i si kau: Boko i kau mangimang, i kau sarung makawua kirapa kal᷊aboe kawasa ngu Mawu Ruata!” 41Kuteu i sire nangenso watu e'e. Bou e'e I Yesus nul᷊umingara sarang l᷊angi dang nangul᷊i, “Tarima kase, si Yamang, watu I Kau seng nundaringihi si Sia. 42Ia matitong I Kau sintinia mundaringihi si Sia, kateho Ia nangul᷊i i'i, guna ngu apang taumata ko ene su si'i, tadeau i sire mangimang himoneu I Kau ko nundoi u Ia.” 43Suapang mbuae nangul᷊i kere'e, I Yesus nangul᷊i mauha, “Lazarus, suwangte!” 44Kuteu tau ko nate e'e nusumuwang. L᷊ima l᷊au laerie mborong mapapikung u sapu, dang pahesie matataka u tatimbukung. I Yesus nuhabari su manga taumata se'e, “Bukako sapue tadeau i sie makal᷊al᷊eng mapia.”

Komol᷊ang ko mundoka si Yesus

(Mat. 26:1-5; Mrk. 14:1-2; Luk. 22:1-2)

45Maul᷊i bou tal᷊oara tau Yahudi ko nusumongo nutiwo si Maria, nangimang si Yesus su tempo ngi sire nakawua hal᷊i ko nariadi e'e. 46Arawe pirangkatau bou tal᷊oara i sire natamai nakoa sarang tau Farisi dang nuhabari apang ko seng nikoa I Yesus. 47Ual᷊ingu e'e apang tau Farisi dingang u manga tumbonang u imam nukomol᷊i nudidato dingang u Pangadilang u Agama. I sire nangul᷊i “Apa hino ngu koateng i kite? Taumata i'i seng nukoa ko makal᷊aherang maul᷊i! 48Boko i kite mamala ngi Sie turusi kiri'i apang taumata sarung mangimang si Sie. Dang panginsuenge mangangawasa ngu Roma sarung sumongo dang mundusa Wal᷊e ngu Mawu dang kaul᷊i u bangsa ngi kite!”

49Singkatau bo i sire ko arenge i Kayafas, imam ko mawantughi su taung e'e nangul᷊i, “I kumu wugha ngu manga apa. 50Apa i kumu ta nakasipiri himoneu guna ngu kaul᷊i u ana u kawanua, mapiang singkatau mate sul᷊ung u kaul᷊i u kawanua mawinasa?” 51I Kayafas nangul᷊i e'e su hinonge, wal᷊inge bou sipirange sisane. Kateho i sie kere singkatau imam ko mawantughi su taung e'e, i sie muhabari himoneu I Yesus sarung mate guna ngu tau Yahudi. 52Dang wal᷊inge kitang guna ngu tau Yahudi, kateho tadeau l᷊ai pangomol᷊ang dang mupakasimbau manga ana u Mawu Ruata ko nahungkaesi.

53Nanita bou silou e'e manga mangangawasa ngu Yahudi nughaghighili tadeau mamate si Yesus. 54Ual᷊ingu e'e I Yesus ta nutingkaandaghi su tingo ngu hape su komol᷊ang u taumata ngu Yahudi. I Sie nanintang u Yudea, bou e'e natamai nakoa sarang soa ko nisigho Efraim masandighi u tana ko l᷊inggi. Pai se'e I Sie natana dingang u manga tumatuhu-E

55Su tempo e'e masandighi u L᷊ou Paska ngu tau Yahudi. Maul᷊i taumata bou apang kampong seng nakoa sarang Yerusalem tadeau mupal᷊al᷊eng u tundu pamursi ngu watangeng su horo u sal᷊iwang e'e. 56I sire mundea si Yesus, dang su tempo nukomol᷊i su Wal᷊e ngu Mawu, i sire nukina simbau dingang ko wal᷊inge, “Kirapa su sipirangu? Pari I Sie ta sumongo su sal᷊iwang i'i.” 57I sire nangul᷊i e'e watu'u manga tumbonang u imam dang manga tau Farisi seng nupasuwang u parenta tadeau taumata ko matitong su apa tampa I Yesus, mambeng mupakatitong tadeau I Sie ikasame.

Currently Selected:

YOHANES 11: PLT

Highlight

Copy