WUKE NGU MANGA RASULI 12

Putatingkai mang katatambange

1Su tempo e'e l᷊ai Ratu Herodes#12:1: Ratu Herodes: ko i Herodes Agripa I, ratu su kaul᷊i u soa ngu bangsa Yahudi. nanita nanira manga tataho u jamaati. 2Ual᷊ingu parentange, i Yakobus, tamahuari dingang i Yohanes nate nipili. 3Suapang i Herodes nakawua himoneu ko nikoae e'e makal᷊al᷊uasi naung u manga tau Yahudi, i sie nukoa sau l᷊ai kere'e; i sie nundoi taumata paname l᷊ai si Petrus. Hal᷊i e'e nariadi su L᷊ou Putatinaungang Boroti Takoae Raginge. 4#Sasu. 12:1-27Suapang bou nisame, i Petrus nipasu su l᷊al᷊ung u tutupang. Pa u kamonang sordado niparentang pudiaga si Petrus su se'e – singkamonang taha pa u katau. Hindo masue sal᷊iwang u Paska, mbuhue i Herodes mamariksa si Petrus su tingo ngu hape. 5Inau i Petrus nitaho su tutupang; arawe manga tataho u jamaati mangkate turusi kapukal᷊iomanenge dingang kal᷊abo u naung su Mawu guna ngi Petrus.

I Petrus nipasuwang bou tutupang

6Su sihuwi suhoro i Herodes mupupatingo ngi Petrus su saruang u hape, i Petrus katikie mal᷊aiki dingang u hante darua su tal᷊oara u dua ngkatau sordado mudadiaga. Su tukari u tutupang pia l᷊ai mundadiaga ko wal᷊inge kapudiagae tutupang. 7Singkawua pia malaikati u Mawu kararisi su se'e dang pia kasasua nusuminang su l᷊al᷊ung u kamari u tutupang e'e. Malaikati e'e nunggio-gio si Petrus sarang i sie napuko. Bou e'e malaikati e'e nangul᷊i, “Ei wangungte kaehong!” Singkatempo e'e l᷊ai hante uase nanawo bou l᷊ima ngi Petrus. 8Bou e'e malaikati e'e nangul᷊i, “L᷊ohoe l᷊aku'u dang ikie tal᷊i ngu sapatu'u.” Kuteu i Petrus dingang nul᷊oho l᷊akue dang nangiki tal᷊i ngu sapatue. Bou e'e malaikati e'e sau nangul᷊i, “L᷊ohoe juba ngu dang tuhue si sia.” 9Kuteu i Petrus nutumuhu malaikati e'e nusumuwang bou tutupang. Kateho i Petrus wugha himoneu apa ko nikoa u malaikati e'e mang tinga-tingari nariadi. Su naung i Petrus e'e ko kitang simbau kawawua. 10Su tempo ngi sire seng nul᷊umiu tampa u pundadiagateng kahimotongange l᷊au karuange, i sire nurating u tukari uase, ko makoa sarang soa. Tukari e'e nawuka ngu naunge, bou e'e i sire nusumuwang dang nul᷊umal᷊eng bou l᷊al᷊eng maninta. Singkawua malaikati e'e nanintang i Petrus.

11Bou e'e i Petrus mbuhue nakahingang apa ko seng nariadi si sie, bou e'e i sie nangul᷊i, “I'i ia mbuhue natitong himoneu Mawu tinga-tingari seng nundoho malaikati-E guna ngu mul᷊iwiri ia bou kawasa ngi Herodes dang bou kaul᷊ie ko sarung ikoa u bangsa Yahudi si sia.”

12Suapang nakahingang hal᷊i e'e, i Petrus nakoa sarang wal᷊e ngi Maria. I mama ngi Yohanes ko nisigho l᷊ai i Markus. Su se'e maul᷊i taumata ko nukomol᷊i dang kapukal᷊iomanenge. 13I Petrus nanengkohi tukari sasukang, bou e'e pia paparentang kowawine arenge i Rode, namai guna ngu mamuka tukari. 14Turusi i sie nakakil᷊al᷊a tingihi Petrus. Watu'u l᷊iaghi, i sie tangkeng namuka tukari seng masahawu-sahawu sau nusumu nuhabari su manga taumata su se'e ko i Petrus ene su l᷊ikuri. 15“I kau mang ko dong!” angkung i sire. Arawe i Rode mang mangul᷊i ko e'e mang tinga-tingari i Petrus. Bou e'e i sire nangul᷊i, “E'e ko malaikati!”

16Saritau e'e i Petrus turusi kapanengkohi tukari. Kuteu su tempo ngi sire namuka tukari, dang nakawua si Petrus, i sire naherang kahingang. 17I Petrus nangode dingang u l᷊imange, tadeau i sire pakarumasi, bou e'e i sie nuwuke kirapa Mawu seng numbawa si sie nusumuwang bou tutupang. Bou e'e i sie nangul᷊i, “Habariko habari i'i si Yakobus dang su manga ana u simbau ko wal᷊inge.” Bou e'e i Petrus nanintang u tampa e'e dang nakoa sarang tampa ko wal᷊inge.

18Ndai mal᷊ukari pia gara nariadi su tal᷊oara u sordado mundadiaga. I sire nubingo kahingang hal᷊i u apa ko seng nariadi si Petrus. 19Bou e'e i Herodes nundoi taumata pundea si Petrus, kateho i sire ta nakahombang si sie. Inau i Herodes namarenta tadeau manga mundadiaga e'e pakipakinate mbuhue pakipate.

Bou e'e i Herodes nakoa sarang Yudea dang natana pira l᷊ou su Kaisarea.

Papate ngi Herodes

20I Herodes nuwawal᷊uang kahingang su manga tau Tirus l᷊au tau Sidon. Ual᷊ingu e'e i sire singkahindo nutumatingo si sie. Kahimotongange i sire nul᷊oke si Blastus, tumbonang u istana ngi Herodes, hakiu i sie nanimbuka si sire. Bou e'e i sire natamai nutumatingo si Herodes, bou e'e nundo mudame, watu'u wanua ngi sire muharapi makarea kang bou wanua ngi Herodes.

21Pia su silou ko seng nitantu, i Herodes nul᷊oho l᷊aku u mararatu bou e'e nukumangiang su kadera ngu kararatuange dang nanita nuwisara su tingo ngu ana u kawanua. 22Kaul᷊i u ana u kawanua ko kapundaringihi e'e nukumiha, “I'i ko tingihi u dewa, wal᷊inge tingihi u taumata!” 23Su orasi e'e l᷊ai malaikati u Mawu namal᷊eri si Herodes, watu'u i sie ta mangadati Mawu Ruata. I Herodes nikang u ul᷊iri bou e'e nate.

24Kuteu didato ngu Mawu Ruata kakakekenge dang katatoghasi.

25Suapang i Barnabas l᷊au i Saulus nanginsue hal᷊i i sire, i sire nusul᷊e bou#12:25: bou: pira mbau wohe horo: sarang. Yerusalem namaringang si Yohanes Markus singkahindo dingang i sire.

Currently Selected:

WUKE NGU MANGA RASULI 12: PLT

Highlight

Copy