ማርቈስት ወንጌል 4
4
ፈወነ 4
ዚረ ፊዘተዙ ተከድ
(ማቲ. 13፡10-17፤ ሉቃ. 8፡4-8)
1እየሱስም እንደ ገነ ባኽሪዝ ጋቢል ኣቕ ክንስጠ ኪርሙ፤ ጘጝ ፅበው ጅልወይል ጭቕጘ ንቕፀው ኽዝቭ ኣኽቭሻንስቅ፣ ባኽሪል ፅብረይ ታኰየንትል ጥው ጐዩ፤ ኽዝቭድ እጝቅ ባኽር ደዪል ፅበው ስፍረይል ዊኑ።#ሉቃ. 5፡1-3። 2ጘጝም ንቕፀቍ ዊቅ ተከዝ ክንሱ፤ ክንሳንድም እንት ዩ፦ 3«ወጭጥን፤ ላው ኣርሸ ዚረ ፊዝጠ ፊሩ። 4ፊዛንድም ላው ላው ዚረድ ጒደን ደዪል ሊቩ፤ ዚልቅም ተርጝ ሊቅምጝ ዅⶖ። 5ላው ላው ዚረድም እቀጘ ብጥ እጀው ፃፀይል ሊቩ፤ ዝቨድም ሲፍ የው ኣቓንስቅ በውዝ ቢቍሉ። 6ዊገድ ግን ኰረድ ፋንድ በውዝ ፃምልዉ፤ ስር ሲቭየው ኣቓንስቅም ይዙ። 7ላው ላው ዚረድ ቈሽ ኣምቃነው ቊጥቋጥ ማኽሊል ሊቩ፤ ኣምቃነው ቍጥቋጠድም ሊግዝ ቢቈለድየንት ኻንቓንስቅ ፍር ፍርዝየውም። 8ላው ላው ዚረድ ቈሽ ቀሰው ስፍረይል ሊቭ ሊግዙ፤ ፍርም ይዉ፤ ላውድ ሰውርጝን ፍር፣ ላውድ ዋልጥርጝን ፍር፣ ላውድም ላ ፍር ፍርዙ።» 9ዊግት ኻተጘም፦ «ወሸው ቀርዝ ፃየውድቅ ወሽነ» ዩ።
10ጝለ ኣቓንድም ፅጭ ሊጘይዝመ ላብጠ ዊነቍ እቂዝ ተከጢዙ ትርጕምድ ዋቕርⶖ። 11ጘጝም፦ «ክታጭስ እደረት ምጝግስቲዙ ምስጢርድ ኣርቐነው ነይሽትኩ፤ ቢዘይዝቍዝ ግን ዊገድ እጝቅ ተከዝ ድቊሽተኵ። 12እንም ኣቐውድ ጛይ እደረ ትጐ ዋጥርጝ ጝታኽጥያትድ ይቅር ይሽታየጘ፦ «ቓለነውድ ቓልጘኵ፤ ዊገድ ግን ኣስክሳቍም፤ ወሸነውድ ወሽጘኵ፤ ዊገድ ግን ልብታቍም» ይሽተውድ ፋፅምሻንስ የጝ።#እሳ. 6፡9-10።
13እንዝ ግረም እንት ዩ፦ «እኒን ተከድየንት ተረድሽቲርነቅመ? እድስለ ላጥ እጝቅ ተከጥድዛት ኣውሽርን የጝ ተረድሽትትርነ ቸልድርነውድ? 14ኣርሸድ ቃልድየንት ፊዘኵ። 15ላው ላው እቅድ ጒደን ደዪል ሊቨው ዚረድ ተክጘኵ። ቃልድ ወሽጋንድ ሲጣን በውዝ ተር ጝታዘኒል ፊተው ቃልድየንት ፊሰኵ። 16እኒዝጘም ላጥድ ፃፀ ዝቨይል ፊተው ዚረድ ተክጘኵ፤ ቃልድየንት ወሽጛንድ ዲስተዝ ለምርጘኵ። 17ዊገድ ግን ስር ሲቭየቍ ኣቕጛንስቅ ዊቱ ግርየ ጭቝ የጝ ዊንጘውድ፣ ቃሊዝ ምላሰንዝ ሚከረ ዊንም ስድት ተራንድ በውዝ ፅጋርጘኵ። 18ላጥድ ቈሽ ኣምቃነው ቍጥቋጥ ማኽሊል ፊተቍ ዚረድ ተክጘኵ፤ ቃልድየንት ወሸነውድ ወሽጘኵ። 19ዊገ ግን እን ኣልሚዙ ኻሰቭድ፣ ኻፍትዙ ፍቅርድ፣ እኒዝጘም ላየ ዊገዙ ምርቕፀድ ቃልድየንት ኻንቕ ፃየነውዝ ፍር ፍርዛየጘ ፃቨኵ። 20ላጥድ ቈሽ ቀሰው ዝቨይል ፊተቍ ዚረድ ተክጘኵ፤ እንዛይም ቃልድየንት ወሽጝ ለምርጝ ሰውርጝን፣ ዋልጥጝን፣ ላም ፍር ፍርዘቍ ጛይ።»
መቅረዚዙ መቭራቲዝ ተከድ
(ሉቃ. 8፡16-18)
21እየሱስም፦ «መቭራት ነስርን ቃቀ ኣቒል ዊንም ኣረት ኣቒል እቝርድርነኵመ? መቅረዚል ኣየውቀ እቚርድርነውድ?#ማቲ. 5፡15፤ ሉቃ. 11፡33። 22እኒዝጘም ጭቭርሸው ጋልፅሽቲጝቀ ሲውርሸውም እትሊጝቀ እዳቓውም።#ማቲ. 10፡26፤ ሉቃ. 12፡2። 23ወሸው ቀርዝ ፃየውድቅ ወሽነ» ዩ።
24እንደ ገነም፦ «ወሽርነው ዊገይዝቍዝ ጣጝቅቅጭጥን፤ ሚክርድርነው ሚክረነይዝ ክታጭስም ሚክርሽጡ፤ እንድያውም ጝጊስ ዲቈው ቈሺትጡ።#ማቲ. 7፡2፤ ሉቃ. 6፡38። 25ፃየው እጅሪዝ ቈሺተኵ፤ እጀው እጅሪስ ግን ፅብረየን እኳ ፊስሽተች» ዩ።#ማቲ. 13፡12፤ 25፡29፤ ሉቃ. 19፡26።
ቢቊለው ዚረይዙ ተከድ
26እየሱስም፦ «እደረት ምጝግስትየን ዝቨይል ዚረ ፊዘው እጅርድየንት ተከች። 27እጅርድ ኻር ኽርየኵ፤ ጊርቀም ነቃቐኵ፤ ዊገ ግን ጘጝ ኣርቒጝቀ ዚረድ ቢቊል ሊግዘኵ። 28ዝቨየን ጝርቕም ኣፍለ ቢቈለ፣ እግረም ዘለለ፣ ጝዝ ግረ ቈሽ ፍር ይወች። 29እጅርድም ኣረድ ችጛንድ ማፅወ ችጛንስቅ ኣይርጠ ጝመይር ኣስለነው ኪርመኵ» ዩ።#እዩ. 3፡13።
ስናፍጭ ዚረት ተከድ
(ማቲ. 13፡31-34፤ ሉቃ. 13፡18-19)
30ቈሽም፦ «እደረት ምጝግስትየንት ወረጘ ጅቅ ተከተክዝንቅ? ወረጘ ተከዝስ ጝርት ጋልፅንቅ? 31ስናፍጭ ዚረት ተከች፤ ጚ ዝቨየንትል ፊተው ዚረይስቅ ጭቕጘ እጥን ጚ። 32ፊትር ሊግዝረት ግረ ግን ኣታክልቲዙ ስፍረይል ፅበቍ ኣታክልታኒስቅ ጚ ኽየች፤ ኽየቍ ቅርንጫፋንም ፊሰች፤ ዚልቅም ጝርፃመይል ፈወነው ቸልጘኵ» ዩ።
33እየሱስም እቅድ ተረድሸነው ቸልጥጚስቅ፣ እንዛት ተከቍ ንቕፀቍ ተከጥዝ ድቁ። 34ተከዝ ኣዪጝቀ ውረውረቅ ድቋውም ዊኑ፤ ጝታለ ኣጛንድ ግን እጝቅ ዊገድየንትቅ ጝክንደጢዝ ኣስርድዛⶖ ዊኑ።
እየሱስ ማቨልድየንት ችብሰጘ
(ማቲ. 8፡23-27፤ ሉቃ. 8፡22-25)
35ጘጝ ግርየድም ኵናንድ ጝክንደጥድዛት፦ «ባኽሪዝ እጂ ከርነ» ዩ። 36ጛይም ኽዝቭድ በርጝ እየሱስ ታኰይል ዊነጘ ጝዝ ጝዝ ፃይጝ ፊርⶖ፤ ላጥ ታኵጥም ጝጅቅ ዊንⶖ። 37ኣይንድም ኻይሉ ማቨል ጉ፤ ማቨልድም ታኰድየንት ኣቝዝ እቻጢስቅ ኣናውጥዛⶖ ዊኑ። 38እየሱስ ግን ታኰይዝ ግርገይዙ ክፍሊል ቍርሸነ ቍርሽ ኽርይ ዊኑ፤ ጝክንደጥድም ጒስጝ፦ «ክንሰተወ! ድዝናንድመ ዝም ይራ?» ይⶖ።
39እየሱስም ጕ ፊግየድየንት ጋስፁ፤ ባኽርድየንትም፦ «ዝም ይ! ፀጥ ይ!» ዩ፤ ፊግየድም ዝም ዩ፤ ኽየው ፀጥተም ኣቑ። 40እየሱስም ጝክንደጥድዛት፦ «ውር ቃጥ የጝ እነይርን ጐውትርነድ? ውር ቃጥስ የጝ እምንት ብርነውድ?» ዩ።
41ጛይም ጭቕጘ ጐውትጝ ጛስ ጛይ፦ «ፊግየዝመ ባኽርዝ ኣዚትጘው እኒን ኣውፈ!» ይሽተይሽትⶖ።
Currently Selected:
ማርቈስት ወንጌል 4: ኽምጣኣኪ
Highlight
Share
Copy
Want to have your highlights saved across all your devices? Sign up or sign in
