ማርቈስት ወንጌል 3

ፈወነ 3

1እየሱስም እንደ ገነ ምኵራቪል ጥዉ፤ ጝግልም ጝናንድ ሲለው እጅር ዊኑ። 2ጛጊስም ላው ላውድ ምላሰንዝ ኪስጥጘ በንጝ፦ «እስቲ ቅዳምሲንቭት ግርየዝ ቓዘው ኣቕሽ ቓልነ» ይጝ ጝት ጝት ቓልጛ ዊን። 3እየሱስም ጝናንድ ሲለው እጅርድየንት፦ «ኣኽቭሸው ኽዝቭዝ በዊል ጕር ችብጭ» ዩ። 4እየሱስም፦ «ቅዳምሲንቭት ግርየዝ ፊቅድሸውድ ቀሰው ፃቨነውመ ዊንስ ጭቓ ፃቨነው? ርዅየ ቓዘነውመ ዊንስ ድሰነው?» ዩ፤ ጛይ ግን ዝም ይⶔ። 5ጘጝም ጝታዘንድ ዲንድነው ኣቓንስቅ ኻዝን፣ ጝት ኪብጝ ችብረቊድዛት ቍጠዝ ቓሉ፤ እጅርድየንትም፦ «ክናንድ ዘርጋቕ» ዩ፤ እጅርድም ዘርጋቑ፤ ኣይንድም ጝናንድ ቓዱ። 6ፈሪሳንድም ኣወሽጝ ጝት ድስጥጘ ኺረውድስት ዊግኒጅቅ ማኽርኽርሸነው ኪርም።

ንቕፀቍ እቅ እየሱስት ቲክንጘጘ

7እየሱስም ጝክንደጢጅቅ ባኽሪዝጐ ፊሩ፤ ገሊለስ ተረው ንቕፀው ኽዝቭም ጝት ቲክኑ። 8ሰራሸው ዊገድቅ ወሽጛንድ ንቕፀው ኽዝቭ ይዅዳስ፣ እየሩሳልየምስ፣ የደውምያስስ፣ ዮርዳኖስት እጂ ፅበቍ ኻግራኒስ፣ ቈሽም ጢረውስስመ ሲዱነታጐይስ ተሩ። 9ኣኽቭሸው ኽዝቭድም ጝት ኣፂሳየጘ፣ ጝክንደጥድዛት፦ «መልወ ታኰት ኣስልጥን» የው ኣዙ።#ማር. 4፡1፤ ሉቃ. 5፡1-3። 10ንቕፀቍ እቅ ቓዛንስቅ ፅውዘዝ ተሰቃይሽተቊድቅ ዳቕጥጘ ቀድምድምሽጛⶔ ዊን። 11ርኵሳን መንፈሳንድም ጝት ቓልጘው ጨቨቅ ጝበዊል ሊቭጛⶔ፦ «ክት እደረት ዅር የጝ!» ይጛ ቓፅጛⶔ ዊንⶔ። 12እየሱስ ግን ጝጝ ኣው ኣቐጘ ጋልፃይጘጘ ቐናዝ ጣጝቅቅሱ።

እየሱስ ፅጭ ሊጘ ኻወርየታንድዛት ይመጘ

(ማቲ. 10፡1-4፤ ሉቃ. 6፡12-16)

13እየሱስም ኣበል ፍ ጘጝ በነቍ እቅድዛት ጝጐ፦ «ላቝጥን» የው ጭጙ፤ ጛይም ጝጐ ተርⶖ። 14ጝጅቅ ኣጛንስ፣ ሲቭክጛንስም እፃጠ፣ ጛጊስ ፅጭ ሊጘ ይሙ፤ ጛትም፦ «ኻወርየታን» የው ጭጙ። 15ጋኒናንድዛት ፊስጛንስም ስልጣን ይዉ። 16ይምሸቊ ፅጭ ሊጘድም፦ ጘጝ ቢጥሮስ የው ሽ ፊሰው ስሙን፣ 17በኣኒርገስ ዊንም ነጐድጓድዝ ቝር የው ጭጘቍ ዘቭዲወስት ቝር ያይቈቭስመ ጝዝን ይዃንስስ፤ 18እንድርያስ፣ ፊልበውስ፣ በርተለሚወስ፣ ማቲወስ፣ ተውማስ፣ እልፊወስት ዅር ያይቈቭ፣ ታዲወስ፣ ቀንየተ ስሙን፣ 19እየሱስት ዲቊስ ይወው ኣስቈረቱ ይዅዳ ጛይ።

እየሱስ ብየልዘቩልዝ ጋኒናን ፊሰኵ ይሽተጘ

(ማቲ. 12፡22-32፤ ሉቃ. 11፡14-23፤ 12፡10)

20ጝዝግረም እየሱስ ላው ጝንል ጥዉ፤ ጝስመ ጝክንደጢዝ ሚ ዀነ ብጥጚስቅ ንቕፀው ኽዝቭ እንደ ገነ ኣኽቭሹ። 21ጝዚምዳንድም እን ዊገድ ወሽጛንድ፦ «ጝኣይምረውድ ቀርኩ» ይጝ ጝት ፊስጥጘ ተርⶔ። 22እየሩሳልየምስ ተረቍ ወሪትት ኽግ ክንሰጥድም፦ «ብየልዘቩልዝ ፃይሽኩ፤ ጋኒናንድ ፊሰውድም ጋኒናነ ኻልቀዝ የጝ» ይⶖ።#ማቲ. 9፡34፤ 10፡25። 23እየሱስም ጛት ጭጝ፦ «ሲጣን ሲጣንድየንት ፊስጠ ቸልጡመ? 24ጝስመ ጝስ ቲተቲተው ምጝግስት ፀናጠ ቸላውም። 25በተሰቭም ጝስመ ጝስ ቲተቲተውዝየ ፀናቕ ፅብጠ ቸላውም። 26እኒዝጘም ሲጣን ጝቕም ቲተቲተው፣ ጝቕምትም ተፃርርሸው ኣቐውዝየ ድዘኵጚ ፀናቕ ችብርጠ ቸላውም። 27እኒዝጘም ላው እጅር በውርስ ኻይሉ እጅርድ እፅቊጝቀ ኻይሉ እጅሪዝ ጝኒል ጥው ንቭርትድ ዚርፍጠ ቸላውም፤ ዚርፈነው ቸለውድም ኻይሉ እጅርድየንት እፅቋንድ ጭቝ የጝ። 28እማንቱ የኵን! እቀ ኽጥያትዝመ ዛሽጘው ዛንዝድቅ ይቅር ይሽትጡ። 29ዊገድ ግን መንፈስ ቅዱስትል ዛንዙ ቃል ዊግተው እጅርድቅ እጝቅ ዘላልምዙ ኽጥያት ቢን ጕርየ ኣቐኵጚ ዘላልም ይቅር ይሽታውም» ዩ።#ሉቃ. 12፡10። 30እኒንትም የውድ፦ «ርኵስ መንፈስዝ ፃይሽኩ» ይጛንስቅ የጝ።

እየሱስት ኘስመ ጝፅንስ

(ማቲ. 12፡46-50፤ ሉቃ. 8፡19-21)

31እንዝ ግረ ጝኘስመ ጝፅንስ ተርⶖ፤ ቢዘይል ኣቕጝም እጅር እፃቕጝ ጭጝስⶖ። 32ጝጋቢል ጐይጝ ዊነቍ እቅድም፦ «እንወ! ክኘስመ ክፅንስ ቢዘይል ክት ደምዝጘኵ» ይ። 33እየሱስም፦ «ይኘየን ኣውጚ? ይፅንድስ ኣውታይ ጛይ?» ዩ። 34ጝጅልወይል ጐየቍ እቅድዛትም ቓላⶖ፦ «ይኘየንም ይፅንድም እንዛይ ጛይ። 35እደረት ፍቃድድ ፋፅመውድቅ እጝቅ ጘጝ ይዝን፣ ይስን፣ ይኘም የጝ» ዩ።

Currently Selected:

ማርቈስት ወንጌል 3: ኽምጣኣኪ

Highlight

Copy