ማርቈስት ወንጌል 2

ፈወነ 2

እየሱስ ድውይ እጅር ቓዘጘ

(ማቲ. 9፡1-8፤ ሉቃ. 5፡17-26)

1ዊትቍ ግርቅዝ ግረም እየሱስ ቅፍርናዀም ዋጥር ተሩ፤ ኽዝቭድም እየሱስ ጝግል ጝኒል ፅበጘ ወሹ። 2ኣቓንስቅም ጝንድም ቢዘድም እቻቕ ስፍረ ብሽትጢስቅ ንቕፀው ኽዝቭ ኣኽቭሹ፤ ጘጝም እደረት ቃልድየንት ሲቭኩ። 3እቅም ላው ድውይ እጅር ሲዘ እቅዝ መውስጝ ጝጐ ነሰⶖ። 4ኽዝቭድ ጭቕጘ ንቕፅ ድውይድየንት እየሱስ ትጐ ኣልሰነ ብጛንስቅ ኽድምድየንት እየሱስት ጭቅተይዝ ባቝዝጝ ድውይድየንት ኣረቲጅቅ ጊምዝⶖ። 5እየሱስም ጝታእምንትድ ኣርቕ ድውይድየንት፦ «እፈረ ክተ! ክኽጥያትድ ይቅር ይሽትኩ» ዩ። 6ኣይንድም ጝግል ጐይጝ ዊነቊ ላው ላው ወሪትት ኽግ ክንሰጥድ ጝታዘኒዝ፦ 7«እን እጅርድ ወረጘ የጝ እነየው ዛንዙ ዊገ ዊግተውድ? ላው እደረትለ ኽጥያት ይቅር ይጠ ቸለውድ ኣው የጝ?» ይⶖ።

8እየሱስም በውዝ ጝታእዘኒዙ ኻሰቭድድየንት ጝመንፈሲዝ ተረድሽ፦ «ውር ቃጥ የጝ ክታእዘኒዝ እንት ይርን ኻስቭርነውድ? 9ድውይድየንት፦ ‹ክኽጥያትድ ይቅር ይሽትኩ› የነውድመ ዊንስ፦ ‹ጒር ክኣረትድ መውትር ፊጥ› የነውድ ኣውየን ቀለኵ? 10ዊገድ ግን እጅር ዅር ዝቨይስ ኽጥያትድየንት ይቅር ይጠ ስልጣን ፃየው ኣቐጘ ኣርቕትርነ ማጥን የጝ» የው ድውይድየንት፦ 11«ጕር ከኣረትድየንት መውትር ክጝን ፊጥ የኵን» ዩ። 12እጅርድም ጕ እጝቅቅ ቓልጛⶖ ጝኣረትድየንት መውር ፊሩ፤ ጘጝ ስፍረይል ዊነቍድም እን ዊገይዝ ዲንቅሽጝ፦ «እነየው ዊገ ቓልንም ኣርቓይነቅ» ይጛⶔ እደረስ ሚዝየነ ኣልስⶖ።

እየሱስ ማቲወስ ይሽተው ለዊት ጭጘጘ

(ማቲ. 9፡9-13፤ ሉቃ. 5፡27-32)

13እየሱስም እንደ ገነ ባኽሪዙ ደርቸይል ፉ፤ ንቕፀው ኽዝቭም ጝጐ ተሩ፤ ጘጝም ክንሱ። 14ጝዝ ዲቋንድም እልፊወስት ዅር ለዊት ቀረጥ ቀቨነ ስፍረይል ጐይ ቓሉነ፦ «ለው ይት ቲክን» ዩ፤ ጘጝም ጕ ጝት ቲክኑ።

15እየሱስም ለዊት ጝኒል መድል ጐይ ፅባ፣ ንቕፀቍ ቀረጥ ቀቨቍዝመ ኽጥያትኝጥዝ ጝስመ ጝክንደጢዝዛጅቅ ዅጛ ዊን፤ ጝት ቲክነቍድም ንቕፀቍ ዊንⶖ። 16ፈሪሳኒዝ ዊግን ኣቐቝ ወሪትት ኽግ ክንሰጥድም ቀረጥ ቀቨቊዝመ ኽጥያትኝጢዝዛጅቅ ኣቕ ዃንድ ቓልጝ፣ ጝክንደጥድዛት፦ «ውር ቃጥ የጝ ቀረጥ ቀቨቊዝመ ኽጥያትኝጢዝዛጅቅ ዀውድ?» ይጝ ዋቕርⶔ።

17እየሱስም ዊግትጘውድየንት ወሽ፦ «ኻይክም በንዘውድ ፅውዝጅንጥዝጚ ትኽንቊዝም ኣየው፤ ያንም ኽጥያትኝጥድጚ ፃድቃንድ ጭጝጨም ተጢቀር» ዩ።

ፃምዝቍዝ ኣልተው ዋቕረ

(ማቲ. 9፡14-17፤ ሉቃ. 5፡33-39)

18ይዃንስት ክንደጢዝመ ፈሪሳኒዝ ፃምጛⶔ ዊንⶖ፤ ላው ላው እቅም ተርጝ እየሱስት፦ «ይዃንስት ክንደጢዝመ ፈሪሳነ ክንደጢዝ ፃምጛ፣ ወረጘ የነት የጝ ክክንደጥድ ፃማይጘውድ?» ይⶔ።

19እየሱስም፦ «ኣስንድ ጛጅቅ ፅባⶔ መጭድ ፃምጥጘ ጥውሽጡመ? ኣየውም፤ ኣስንድ ጛጅቅ ኣቕ ፃምጥጘ ጥውሻውም። 20ዊገድ ግን ኣስንድ ጛጊስ ቲተው ግርየ ተርጡ፤ ኣይንድም ፃምጥቍ።

21ኻፍለ ኣልቨይል ኣይር ምልግቨ ሚልግቨው ኣውማውም እጀው፤ እኒን ፃቭሽትሽ ግን ኣይር ምልግቨድ ኻፍለድየንት ቀድጡ፤ ቀዳድድም ወሰው ኣጡ። 22ቈሽም ኣይር ወይኒዙ ሚዘ ኣርጐው መርል እቝረው ኣውማውም እጀው፤ እኒን ፃቭሽትሽ ግን ወይኒዙ ሚዘድ መርድየንት ብጥቕ ሽጡ፤ ወይኒዙ ሚዘድም ቅብርጡ፤ መርድም ጨቅሽጡ፤ እንዝ ማጥን ኣይር ወይኒዙ ሚዘይዝ ኣይር መር በንዘኵ» ዩ።

ቅዳምሲንቭትት ማጥን ኣልተው ዋቕረ

(ማቲ. 12፡1-8፤ ሉቃ. 6፡1-5)

23ቅዳምሲንቭት ግርየዝ እየሱስ ቺዝጝ ማኽሊዝ ፃቭ ዲቋንድ፣ ጝክንደጥድ ፃጝጛ ሽውር ቅዝጥጘ ኪርምⶔ።#ዘዳ. 23፡25። 24ፈሪሳንድም፦ «ቓል! ክክንደጥድ ውርቃጥ የጝ ቅዳምሲንቭትት ኰር ፃቭጥነ ጥውሻው ዊገ ፃቭጘውድ?» ይጝ ዋቕርⶖ።

25እየሱስም፦ «ዳዊት ጝጅቅ ዊነቍ እቂጅቅ ጭቕጘ ግድርዳንድ ፃቨው ዊገድ ኣንቭቪርነቅመ?#1ሳሙ. 21፡1-6። 26ካኽነጣነ ኻልቀ ኣቭየተርት ዚምኒዝ እደረት ጝኒል ጥው፣ ካኽነጣንድ ጭቍ ዅጥጘ ጥውሸው ቀድሽተው ኽቭስትድየንት ኹ፤ ጝጅቅ ዊነቍዝም ይዉ» ዩ።#ዘሊ. 24፡9።

27ቈሽም፦ «ቅዳምሲንቭት እጅርዝ ማጥን ፋጥርሹጚ እጅርም ቅዳምሲንቭት ማጥን ፋጥርሺየው። 28እንዝ ማጥን እጅር ዅር ቅዳምሲንቭትስም እኳ ኣደረ የጝ» ዩ።

Currently Selected:

ማርቈስት ወንጌል 2: ኽምጣኣኪ

Highlight

Copy