ማርቈስት ወንጌል 16

ፈወነ 16

እየሱስ ክርጘይስ ጐጘ

(ማቲ. 28፡1-8፤ ሉቃ. 24፡1-12፤ ይዃ. 20፡1-10)

1ቅዳምሲንቭት ዲቈት ግረ መግደላዊት ማርያም፣ ያይቈቭ ትኘ ማርያም፣ ሰለውምየም ኣቕጝ እየሱስት እርሸድየንት ቓስጥጘ ሽቱ ጅቭⶖ። 2ሸወጪዙ በወትረ ግርየይዝም ግረቨዝ ኻር ጕጝ ገነ ኰረየን ፍረጘ መቃቭሪዝጐ ፊርጛⶖ ሲጝቀ፦ 3«ቕርጘድየንት መቃቭሪዙ ሚረይስ ኣው ጊልብርጡ ኣጢ?» ይጛⶖ ጛስ ጛይ ዊግትጛⶖ ዊንⶖ። 4እኒንትም ይጘውድ መቃቭርድ ዲቭሽተው ቕርጘድ ጭቕጘ ኽየው ዊናንስቅ የጝ፤ ጭቅ ይጝ ቓልጛንድ ግን፣ ቕርጘድ ጊልብርሽ ቓልⶖ። 5መቃቭሪዝጐ ጥውጘጘም ፃረው ኣልቨ ሲረው ውርጋጠ እጅር ጝታለወይዝጐቱ ጐይ ቓልጝ ዳጝግፅⶖ። 6ጘጝ ግን፦ «ኣይዝዀጥን ዳጝግፅትረነ፤ ክትን ደምዝርነውድ ሲቅልሸው ናዝሪትቱ እየሱስት ኣቐጘ ኣርቕኩን፤ ጘጝ ጕኩ፤ እንል እጀውም፤ ዲቭሽተው ስፍረድም ቓልጥን። 7ነን ግን ፊጥን፤ ጝክንደጢዝመ ቢጥሮስስ፦ ‹እንዝ ሚቅ እየሱስ ክታጭስ ድቈጘ ገሊለ ቃውስ ፊርጡ፤ ጝጊስም ቓልትርንቅ› ይርን ድቍጥን» ዩ።#ማቲ. 26፡32፤ ማር. 14፡28።

8እቍንድም ጐውትዝ ቈጥቈጥ ይጛⶖ መቃቭር ስፍረይስ ፍጝ ውጥይⶖ፤ ጭቕጘ ጐውትጝ ዊንጛንስቅም ኣውማውስቅ ውርቅ ዊግቲየቍም።

9[ሸወጪዙ በወትረ ግርየይዝ ግረቨዝ ክርጘይስ ጐት ግረ፣ እየሱስ ላጝጠ ጋኒናን ጝርጊስ ፊሰቍ ማርያም መግደላዊትስ በዊል እትሉ። 10-11ጚይም ፊትር ጝጅቅ ዊነቍድ ኻዝንጛ ሊዝጛⶖ ችጝር፦ «ጘጝ ርዅየዝ እኩ፤ ያንም ይልጣኒዝ ቓልኩን» ይር ድቍች፤ ጛይ ግን ጝርት እምኒየቍም።

12እንዝ ግረም ክንደጢስ ሊጘድ ገጠሪዝጐ ፊርጋⶖ ጛጭስ ላየ ሚልክዝ እትሉ። 13ጛይም ዋጥርጝ እኒንት ላጥ ጝክንደጢዝ ድቍⶖ፤ ኣነጚ ጛትም ኣምኒየቍም።

14ጝዝ ግረም ፅጭ ለውድ መድል ጐይጝ ፅብጛⶖ ጛጭስ ጋልፅሽቱ፤ ክርጘይስ ጐት ግረ ቓለቍ እቅድ ድቍጘውድየንት ኣምነቅ ይጛንስቅም ጝታእምንት በነይዝመ ጝታእዘኒዙ ጥጝክርነይዝቍዝ ኒቕፉ። 15እንትም ዩ፦ «ኣልሚልቅ ፊጥን፤ ወንጌልድየንትም ፍጥርቲዝቅ ሲቭክጥን።#ኻወ. 1፡8። 16ኣምነውድ፣ ጣምቅሸውድም ቓድጡ፤ ኣምናውድ ግን ፊርድሽጡ። 17ይት ኣምነቍዝቅ እንዛይ ምልክታንድ ቲክንጥቍ፦ ይሽⶔዝ ጋኒናን ፊስጥቍ፤ ኣይር ቋቈዝም ዊግትጥቍ። 18ሳብልድ ጝታናኒዝ ፃይጥቍ፤ ቍወው መርዝም ዝይጝሽ ጛት ጒድያውም፤ ጝታናንድም ፅውዝጅኒል እቝርጥቍ፤ ፅውዝጅንድም ቓድጥቍ።»

19ኣደረ እየሱስ እኒንት ዊግተት ግረ ሲመይ ኣርጉ፤ እደረት ለዊይልም ጐዩ።#ኻወ. 1፡9-11። 20ጝክንደጥድም ስፍረ ጨቨቅ ፊርጛⶖ ሲቭክⶖ፤ ኣደረም ጛጅቅ ኣቕ ሰራሻ ጝታክንድጚጅቅ ፃቭጘቍ ምልክታኒዝ ቃልድየንት ፀናዛ ዊኑ።]#16፡20 ላው ላው ኽፅምትቍ ብራንጥድ እግዘ 9-20 ኣሽ ፅበውድየንት ቈሻቍም።

Currently Selected:

ማርቈስት ወንጌል 16: ኽምጣኣኪ

Highlight

Copy