ማርቈስት ወንጌል 15

ፈወነ 15

እየሱስት ቢላጠውስትል ፊስጘጘ

(ማቲ. 27፡1-2፤11-14፤ ሉቃ. 23፡1-5፤ ይዃ. 18፡28-38)

1ቅሻንድም ካኽነጣነ ኻልቅጥድ ሽመቅሊጅቅ፣ ወሪትት ኽግ ክንሰጢጅቅ፣ ሸጐዊዝቍ ኣቫላኒጅቅ ማኽርሽጘት ግረ እየሱስት እፅቍጝ ፊስⶖ፤ ቢላጠውስስም ዲቍስጝ ይውⶖ። 2ቢላጠውስም፦ «ክት ኣይዅዳነ ንጕስመ?» የው ዋቕሩ፤ እየሱስም፦ «ክት ይረጘ የጝ» የው ዊሱ። 3ኻኽናጣነ ኻልቅጥድም ንቕፀቍ ዊቅዝ ኪስጛⶖ ዊን። 4ቢላጠውስም፦ «ዊሰ ይዋር ወረጘ የጝ? እንወ! ክት ንቕፀቍ ዊቅዝ ኪስጘኵ» የው እንደ ገነ ዋቕሩ። 5እየሱስ ግን ቢላጠውስ ጊርምሽጢስቅ ውረውረም ዊስየው።

6ቢላጠውስም ፈዝየ በሊዝ ኣምረ ኣምረዝ ኽዝቭድ ላው እፁሸው እጅር ጝት ዋቕርጘውድየንት እክሰነው ክንስ ዊኑ። 7ኣይንድ ኣመፅ ጕይስጝ ኒቭስ ቍወቍ ኣመፅኝጢጅቅ እፁውሸው በርቫን የነው ላው እጅር ዊኑ። 8ኽዝቭድም ቢላጠውስ ትጐ ኣልት ክንሸው ስቝርትድ ፃቫንስ ጨዉ። 9-10ጘጝም ካኽነጣነ ኻልቅጥድ እየሱስት ዲቍስጝ ይውጘውድ ቅንየዝ ኣቐጘ ኣርቕ ዊናንስቅ፦ «ኣይዅዳነ ንጕስድየንት እክስጨ በንርነኩመ?» የው ዋቕሩ።

11ካኽነጣነ ኻልቅጥድ ግን፦ «እየሱስት ቃጥ በርቫን እኪትነ» የው ዋቕራንስ ማጥን ክዝቭድየንት ኣቭልቭል። 12ቢላጠውስም እንደ ገነ፦ «እደስለ እኒን ኣይዅዳነ ንጕስ ይርነውድየንት ውር ፃቭጨ በንርነኵ?» ዩ። 13ጛይም እንደ ገነ፦ «ሲቅል!» ይጛⶖ ቓፅⶖ። 14ቢላጠውስም፦ «ውረ ሰራሸው በደልድ ወረጘ የጝ?» ዩ፤ ጛይ ግን፦ «ሲቅል» ይጛⶖ ወሰገቨ ቓፅⶖ። 15ቢላጠውስም ኽዝቭድ ዲስ ያንስ የው በርቫንት እክሱ፤ እየሱስት ግን ጊርፍስ በር ሲቅልጛንስ ጛጭስ ዲቍስ ይዉ።

ዊተድርድ እየሱስትል ኣሹፍጘጘ

(ማቲ. 27፡27-31፤ ይዃ. 19፡2-3)

16ዊተድርድም እየሱስት፦ «ብራይተውሪወን» ይሽተው ቅመተይዙ ኻፅሪል ፊስⶖ፤ ላጥ ዊተድርዛትም እጝቅትቅ ላው ፃቭጝ ኣኽቭⶖ። 17ሰረው ኣልቨም ሲስⶖ፤ ኣሚዙ ኣክሊልም ጒንጕን ጝኣውሪል ደፋቕⶖ። 18ጝዝለም፦ «ኣይዅዳነ ንጕስወ! ዲግተ ክጭስ ኣነ!» ይጛⶖ ሲለም ይ። 19ጝኣውርድየንትም ግብዝ ጣዝⶖ፤ ጝታብፅቕንድም ጝዲጊል ትፍ ይ፤ ኣሹፍጛም ጝበዊል ግርቨቭሽጝ ሲግድⶖ። 20ኣሹፍጘት ግረም ሰረው ኣልቨድየንት ጭውዝጝ፣ ጝቕምት ኣልቨድየንት ሲስⶖ፤ ሲቅልጥጘም ፃይጝ ፊርⶖ።

እየሱስ ሲቅልሸጘ

(ማቲ. 27፡32-44፤ ሉቃ. 23፡26-43፤ ይዃ. 19፡17-27)

21ኣለክሳንድረውስስመ ሩፈውስስታይር ስሙን ይሽተው ቀሪነቱ እጅር ገጠሪስ ኻትመይዝጐ ተራንድ ችጝጝ ሚስቅልድየንት መውራንስ ኣስግድድዝⶖ።#ረው. 16፡13። 22እንዝ ግረም እየሱስት ጝትርጉምድ፦ «ኣውር በወ ስፍረ» ይሽተው ጐልጐልተ ትጐ ፊስⶖ። 23ጝጊስም ከርቭየ ጅቅ ዲቭልቅሸው ወይንዙ ሚዝ ይውⶖ፤ ጘጝ ግን ዚዪየውም። 24እንዝ ግረም እየሱስት ጝግል ሲቅልⶖ፤ ጝኣልቨድየንትም እፀ ማልጝ ኣድልድልሽⶖ።#መዝ. 22፡18። 25ሲቅልጛንድም ግረቨዝ ሻቘ ሳ ዊኑ። 26ጝኪስሽተው ዊገድየንት ቓሊሳንስ ማጥን፦ «እኒን ኣይዅዳነ ንጕስ የጝ» የው ፅፈሽ ፃፍሽ ዊኑ። 27እየሱስ ጅቅም ሊጘ ወምበዲጥ ነስጝ ላውድየንት ጝፃግቪዝ ሊጘትረድየንት ቈሽ ጝለወይዝ ሲቅልⶖ። 28እንዝም መፃፍ፦ «ኣመፅኝጢጅቅ እጊቱ» የው ዊግተው ትንቪቲዙ ቃልድ ፋፅምሹ።#እሳ. 53፡12።

29ጒደነይዝ ዲቈቍድም ጝታውርድ ኒንቅጛⶖ፦ «ኣዪይ! መቅደስ ጝንድየንት ፋዝር ሻቘ ግርቅዝ ተስረርድ ክት ቃይረር?#መዝ. 22፡7፤ 109፡25፤ ማር. 14፡58፤ ይዃ. 2፡19። 30እስቲ ነን ሚስቅሊስ ጊምር ክቕምት ቓዝ» ይጛ ዛሽ። 31እኒዝጘም ካኽነጣነ ኻልቅጢዝመ ወሪትት ኽግ ክንሰጢዝ ጛስ ጛይ፦ «ላጥድዛት ቓዙ፤ ጝቕምት ግን ቓዝጠ ቸላውም። 32ጘጝ እማን እስራየላነ ንጕስ ክርስቶስ ኣቐውዝየ ይንም ቓልን ኣምንናንስ ማጥን እስቲ ነን ሚስቅሊስ ጊምነ!» ይጛ ኣሹፍጛⶖ ዊን፤ ጝጅቅ ሲቅልሸቍ ወምበዲጥድም ዛሽጛⶖ ዊን።

እየሱስ ክረጘ

(ማቲ. 27፡45-56፤ ሉቃ. 23፡44-49፤ ይዃ. 19፡28-30)

33ዋልጠ ሳይስ ኪርም ፃይጨ ሳይል ኣሽ ዝቨይልቅ ጥመ ኣቑ። 34እየሱስም ፃይጨ ሳይዝ፦ «የለዅየ የለዅየ ላማ ሰቨቅታኒ?» የው ኽየው ድመዝ ቓፁ፤ ጝትርጕምድም፦ «ይኣምላክወ! ይኣምላክወ! ውረ ይት በትሩ?» የነት የጝ።#መዝ. 22፡1። 35ጝግል ችብርጝ ዊነቍ እቂስ ላው ላውድ እኒንት ወሽጛንድ፦ «እንወ! ይልያስት ጭጘኵ» ይⶖ። 36ላው እጅርም ውጢ ፊር ምጥጠው ወይንዙ ሚዝ ሰፍነግዝ ናኽሩ፤ ዚግልም ፃቭ እየሱስ ዚያንስ ኣልሱ፤ ጝዝለም፦ «በጥን! እስቲ ይልያስ ተር ጊምዛንድ ቓልነር» ዩ።#መዝ. 69፡21።

37እየሱስም ኽየው ድመዝ ቓፁ፤ ኣይንድም ጝፈውጥድ ፍ።

38ኣይንድም መቅደስ ጝኒዙ ገርደነድ ንየ ጫፊስ ኪርም ሳ ጫፊል ኣሽ ሊጘትል ቀድሹ።#ዘፀ. 26፡31-33። 39እየሱስት በዊል ችብር ዊነው ላዝ ኻልቀድም እየሱስ ቓፅ ጝፈውጥድ ፍጘጘ ቓል፦ «እን እጅርድ እማንም እደረት ዅር ዊኑ» ዩ።

40ኣይንድም ላው ላው እቍን እክልድጝ ቓልጛⶖ ዊንⶖ፤ ጝታማኽሊስም መግደላዊት ማርያም፣ እጥን ያይቈቭስመ የውሳስታኘ ማርያም፣ ሰለውምየም ዊንⶖ። 41እንዛይ እቍንድ ገሊለስ ኪርምጝ ቲክንጝ ጝት ኣግልግልጛⶖ ዊነቍ ጛይ፤ ቈሽም ጝጅቅ ላብጠ እየሩሳልየም ተረቍ ላጥ ንቕፀቍ እቍንም ዊንⶖ።

እየሱስት ድቭሽተጘ#ሉቃ. 8፡2-3።

(ማቲ. 27፡57-61፤ ሉቃ. 23፡50-56፤ ይዃ. 19፡38-42)

42ጊርቅድም ኵናⶖ ፊሩ፤ ቅዳምሲንቭትት ዋዚመ ኣስልሸነ ሰትም ኣቑ። 43ኣይንድ ኣይዅዳኒዙ ሸጐዊዝ ኣቫል ዊነው ዮሴፍ የነው ኪብረው ኣርማትያስቱ እጅር ተሩ፤ ጘጝ እጅርድ እደረት ምጝግስትየንት ቲስፈዝ ኣርውደው ዊኑ፤ ጘጝም ድፍርትዝ ቢላጠውስትል ፊር እየሱስት እርሸድየንት ጨዉ። 44ቢላጠውስም በውዝ ክረጘ ወሻንድ ዲንቅሹ፤ ላዝ ኻልቀድየንትም ጭጝ፦ «ክረመ ክሩ?» የው ዋቕሩ። 45እየሱስት ክርጘድየንት ላዝ ኻልቀይስ ተረድሸተት ግረ እርሸድየንት ዮሴፍስ ይዉ። 46ዮሴፍም ፃረው ኻር ኣልቨ ጅቩ፤ እርሸድየንትም ጘጝ ኣልቨይዝ ጊንዙ፤ ጝዝ ግረም ፃፀይስ ፃርቭሽ ኣስልሸው መቃቭርል እቝሩ፤ መቃቭሪዝ ሚረድየንትም ኽየው ቕርጘ ትጕለልዝ ዲቩ። 47ማርያም መግደላዊትስመ የውሳትኘ ማርያምስም እየሱስት ኣውል ዲቭጘጘ ቓልጛ ዊንⶖ።

Currently Selected:

ማርቈስት ወንጌል 15: ኽምጣኣኪ

Highlight

Copy